د افغانستان د صادراتي توکو د هوايي او ځمکني کارګو له لارې د ټولو اروپایي هېوادونو او ځینو نورو هېوادونو ته د لېږد طرحه د ښاغلي میاخیل منګل، د منګل نړیوال بارچلاني او ترانسپورتي شرکت د مسؤول له خوا د اتاق د مشرتابه پلاوي سره شریکه شوه او د اتاق همکاري یې وغوښته.

ښاغلي محمد یونس مهمند، د سوداګرۍ او پانګونې اتاق لومړي مرستیال، ترې وغوښتل چې خپله طرحه په لیکلي ډول د غور او څېړنې لپاره اتاق ته وسپاري، څو اتاق له ارزونې وروسته د اړوندو حکومتي ادارو په همکارۍ د هغې د تطبیق لپاره عملي ګامونه پورته کړي.

 

 

 

ښاغلي سید کریم هاشمي، د افغانستان د سوداګرۍ او پانګونې اتاق عمومي رئیس، له یو شمېر د ډبرو سکرو له صادروونکو سره ولیدل او د دوی ستونزې یې واورېدې.

صادروونکو خپله اصلي ستونزه د افغانستان د ډبرو سکرو لپاره د نړیوالو بازارونو نشتون یاده کړه او له ښاغلي هاشمي یې وغوښتل چې په دې برخه کې جدي پاملرنه وکړي.

ښاغلي هاشمي د دوی ستونزې واورېدې او ډاډ یې ورکړ چې اتاق به د ډبرو سکرو د بدیلو بازارونو د موندلو په برخه کې هر اړخیزه همکاري کوي.

هغه، ژمنه وکړه چې د پاکستان له سفارت سره به خبرې وکړي څو د سرحد هاخوا د ترانزیټي اسانتیاوو د زیاتېدو لپاره اقدامات وشي.

 

 

 

 

ښاغلي محمد یونس مهمند، د افغانستان د سوداګرۍ او پانګونې اتاق لومړي مرستیال، پاکستان هېواد ته په سفر کې له ښاغلي سید جواد حسین کاظمي، د خیبر پښتونخوا د سوداګرۍ او صنایعو اتاق د مشرتابه پلاوي له رئیس او غړو سره وکتل.

په دې لیدنه کې د سوداګریزو معاملو د زیاتوالي، د ترانزیټي اسانتیاوو د رامنځته کولو، د تورخم، غلام خان او دندپټان د لارو په بندرونو کې د ستونزو د لرې کولو لپاره د مناسب حل لارو د مطرح کولو او د دواړو هېوادونو د تولیدي محصولاتو د معرفي کولو په موخه د ګډو نندارتونونو د جوړولو په اړه خبرې او نظرونه تبادله شول.

 

 

 

 

ښاغلي سید کریم هاشمي، د افغانستان د سوداګرۍ او پانګونې اتاق عمومي رئیس ، د ښاغلي ګازیز اکباسوف، په کابل کې د قزاقستان له سفیر سره د افغانستان د سوداګرۍ او پانګونې اتاق په مرکزي دفتر کې وکتل او دواړو لورو د سوداګریزو اړیکو د پراختیا، د ترانزیت د اسانتیا او د دواړو هېوادونو د خصوصي سکتور ترمنځ د ګډو پانګونو د فرصتونو د رامنځته کولو په اړه خبرې وکړې.

ښاغلي هاشمي خپل کاري لومړیتوب د خصوصي سکتور وده، د پانګونو جلب او د سیمې او نړۍ له هېوادونو سره د سوداګرۍ پراختیا وبلله او له ښاغلي سفیر څخه یې وغوښتل چې د دواړو هېوادونو ترمنځ د سوداګریزو اړیکو د پراختیا په برخه کې لا ډېرې هڅې وکړي.

ښاغلي اکباسوف د دواړو هېوادونو سوداګریزې اړیکې په ښه کېدو وبللې او ټینګار یې وکړ چې قزاقستان د افغانستان سره د سوداګریزو معاملو د ودې په موخه د هر ډول همکارۍ لپاره تیار دی. نوموړي ژمنه وکړه چې د افغان سوداګرو د مالونو د ترانزیت د اسانتیا په برخه کې به د خپل هېواد له لارې همکاري وکړي.

 

 

 

 

 

ښاغلي هارون الرشید قاضي د سوداګرو په استازیتوب خبرې وکړې او د قیمتي او نیمه قیمتي ډبرو د صادراتو په برخه کې خپلې ګمرکي ستونزې د اتاق له رئیس سره شریکې کړې او د هغه د همکارۍ غوښتنه یې وکړه.

ښاغلي سید کریم هاشمي، د اتاق عمومي رئیس، د کندز ولایت له سوداګرو سره د ستونزو د حل په اړه چې په ځینو عربي هېوادونو کې هم فعالیت لري، د هېواد د نافذه قوانینو سره سم او د حکومتي مسؤلینو په همغږۍ د همکارۍ ژمنه وکړه.