د افغانستان د سوداګرۍ او پانګونې اتاق د پانګونې د جلب، د سوداګریزو نظریاتو د تبادلې، د سوداګرۍ د پراختیا او د صادراتو د ودې په موخه د افغانستان او تاتارستان د خصوصي سکتور تر منځ د B2B سوداګریزه ناسته د کابل ګرند هوټل کې ترسره کړه.

په دې ناسته کې د افغانستان او تاتارستان تر منځ د ساختماني، نفتو، برېښنا تولید، خوراکي توکو، جامو، درملو، ترانسپورت، پاکوونکو موادو، موبل فرنیچر، برقي وسایلو او کرنیزو ماشین آلاتو په برخو کې د ۱۸۵ میلیونه ډالرو څخه د زیات هوکړه‌لیک لاسلیک وشو.

د افغانستان د سوداګرۍ او پانګونې اتاق رئیس ښاغلي سید کریم هاشمي د تاتارستان درنو تجارتي مېلمنو او د ناستې ګډونوالو ته د ښه راغلاست ویلو ترڅنګ، یادې ناسته یې د دواړو هېوادونو تر منځ د ګډو پانګونو او سوداګریزو اړیکو د پراختیا په برخه کې مهمه وبلله او له دواړو هېوادونو تجارتي هیئتونو څخه د ګډون له امله مننه وکړه.

هغه د نننۍ ناستې اساسي هدف د خصوصي سکتور تر منځ د تجارتي توافقاتو ترلاسه کول وبلل او له ټولو ګډونوالو سوداګرو څخه یې وغوښتل چې له دې ناستې اعظمي استفاده وکړي او لا ډېر تجارتي تفاهمونه لاسلیک کړي.

ښاغلي هاشمي، په هېواد کې روانه سرتاسري امنیتي فضا د پانګونې لپاره ښه فرصت وباله او له هغو افغان سوداګرو څخه چې بهرنیو هېوادونو کې مېشت دي، غوښتنه وکړه چې د عزیزي ګروپ په څېر چې د لس میلیارده ډالرو پانګونه یې د انرژۍ د تولید په برخه کې کوي، وطن ته راستانه شي او د پانګونې له لارې د خپلو هېوادوالو لپاره د کار زمینې برابرې کړي.

نوموړي له هېوادونو سره د سوداګریزو اړیکو د ښه والي په برخه کې د اتاق له هر اړخیزې همکارۍ ډاډ ورکړ او د تاتارستان د صدراعظم مرستیال څخه یې وغوښتل چې د خپلو نفتو صادرات د افغانستان نورم او ستندرد ته برابر کړي.

ښاغلي کروک چینکو الویک ولادیمیرویچ، د تاتارستان د صدراعظم مرستیال او د صنعت او تجارت وزیر، د خپل هېواد د اقتصادي لاسته راوړنو او تولیداتو په اړه معلومات وړاندې کړل او د دواړو هېوادونو ترمنځ د سوداګرۍ او پانګونې پر پراختیا یې ټینګار وکړ. نوموړي هیله وښوده چې په دې ناسته کې به د دواړو هېوادونو خصوصي سکتورونو تر منځ ډېر تفاهمونه لاسلیک شي.

ښاغلي نورالدین عزیزی، د صنعت او تجارت وزارت سرپرست، یاده ناسته د پانګونې او سوداګرۍ د پراختیا لپاره ښه فرصت وباله او له تجارانو او پانګه‌والو یې وغوښتل چې له دې فرصته په ګټې اخیستنې سره ښې تجارتي تفاهمنامې لاسلیک کړي.

ښاغلي عزیزی، د افغانستان خصوصي سکتور د سیمې یو له فعالو سکتورونو څخه وباله او د هېواد اقتصاد په وده کې یې د هغه رول مهم وباله. نوموړي خبر ورکړ چې د افغان سوداګرو بانکي ستونزې به ډېر ژر په روسیې کې د تاتارستان له لوري حل شي.

ښاغلي محمد یونس مهمند، د اتاق لومړي مرستیال، د افغانستان او تاتارستان تر منځ د سوداګرۍ او پانګونې پر اهمیت خبرې وکړې او د دواړو هېوادونو تر منځ د تجارتي تبادلو د زیاتوالي لپاره یې د افغان بانک یوه څانګه د پرانیستلو وړاندیز وکړ.

نوموړي د هوايي کارګو په مرسته د افغانستان د صادراتو زیاتوالي ته اشاره وکړه، په ځانګړې توګه هندوستان ته، او د تاتارستان همکاري یې وغوښته.

ښاغلي مهمند، د تاتارستان د چرګانو فارمونو تجربو ته په اشارې سره، د افغان سوداګرو سره په دې برخه کې د ګډو پانګونو غوښتنه وکړه. نوموړي د افغان سوداګرو لپاره د ویزې ورکولو په برخه کې د لا زیاتو اسانتیاوو رامنځته کولو غوښتنه وکړه، په ځانګړې توګه د افغانستان د صنعت او تجارت وزارت سره په همغږۍ.

په دې ناسته کې، د یادو ویناوالو ترڅنګ، د اتاق د مشرتابه پلاوي غړو، د تاتارستان تجارتي هیئت غړو، او د دواړو هېوادونو د خصوصي سکتور ګڼ شمېر غړو ګډون کړی و.

 

 

 

 

 

 

 

ښاغلي سید کریم هاشمي، د افغانستان د سوداګرۍ او پانګونې اتاق عمومي رئیس، د هېواد د طبي درملو، ټرانزیټ او بارچلاني اتحادیو له مشرتابه سره د اتاق په مرکزي دفتر کې لیدنه وکړه.

د طبي درملو او بارچلاني اتحادیو مشرتابه، ښاغلي هاشمي ته د افغانستان د سوداګرۍ او پانګونې اتاق د عمومي رئیس په توګه د ټاکل کېدو مبارکي او نېکې هیلې وړاندې کړې، د خپلو کاري فعالیتونو او ستونزو په اړه یې معلومات شریک کړل او ډاډ یې ورکړ چې د موجوده قوانینو مطابق به په ټولو کاري چارو کې له عمومي رئیس سره هر اړخیزه همکاري کوي.

ښاغلي هاشمي، د طبي سکتور او بارچلاني اتحادیو رول د خلکو د خدمت رسونې او د هېواد د اقتصاد د ودې په برخه کې مهم وباله او خپل اساسي هدف یې د افغانستان د خصوصي سکتور او مصرفوونکو خدمت ګڼلی.

نوموړي ډاډ ورکړ چې اتاق به د خصوصي سکتور د ستونزو په حل او ملاتړ کې هر اړخیزه همکاري کوي.

 

 

 

 

 

 

ښاغلي محمد یونس مهمند، د افغانستان د سوداګرۍ او پانګونې اتاق لومړی مرستیال، له آغلې ورانیکا، چې په افغانستان کې د اروپايي اتحادیې شارژدافیر ده، لیدنه وکړه او د افغانستان او اروپايي هېوادونو ترمنځ د سوداګریزو اړیکو د پراخوالي په اړه یې خبرې وکړې.

ښاغلي مهمند، د افغانستان له خلکو، په ځانګړي ډول له خصوصي سکتور سره د اروپايي هېوادونو د همکاریو مننه وکړه او د افغانستان او اروپايي هېوادونو ترمنځ د سوداګرۍ د پراخېدو پر اړتیا یې ټینګار وکړ.

نوموړي د افغانستان د تولیداتو لکه وچه میوه، تازه میوه، او پروسس شوي معدني موادو صادرات اروپايي بازارونو ته، د سوداګریزو همکاریو له مهمو لومړیتوبونو څخه یاد کړل او د شته خنډونو د لرې کولو غوښتنه وکړه.

نوموړي، د ټول هېواد امنیت، د کوکنارو د کر پراختیا ته د پای ټکي اېښودل، او د اداري فساد کمښت یې د بهرنۍ پانګونې لپاره یوه ښه موقع وباله. ښاغلي مهمند له آغلې ورانیکا وغوښتل چې د افغانستان د سوداګرۍ او پانګونې اتاق او د اروپايي هېوادونو د سوداګرۍ اتاقونو ترمنځ د اړیکو د ټینګښت او یو ګډ ناستې د جوړېدو زمینه برابره کړي.

ښاغلي مهمند، د ترانزیټي لارو پر پراخوالي او د متنوعو تجارتي مسیرونو پر ایجاد ټینګار وکړ او له هغې یې د پراخو همکاریو غوښتنه وکړه. نوموړي د هند او پاکستان ترمنځ د اختلافاتو له امله د افغان سوداګرۍ پر وړاندې د رامنځته شویو ستونزو یادونه وکړه، په ځانګړي ډول د مالونو د لېږد ځنډ، د ترانسپورت لوړې بیې، او د قېمتونو لوړوالي ته اشاره وکړه او د دې ستونزو په حل کې یې د اروپايي اتحادیې همکاری حیاتي وبلله.

ښاغلي مهمند، په کابل ولایت استالف کې د خصوصي سکتور له خوا د لوی کشمشو د پروسس د فابریکې د فعالیت یادونه وکړه او آغلې ورانیکا ته یې بلنه ورکړه چې له دې فابریکې لیدنه وکړي.

آغلې ورانیکا، له افغانستان سره د اروپايي هېوادونو د سوداګریزو اړیکو د پراختیا ملاتړ اعلان کړ او د افغان تولیداتو او توکو وارداتو ته د همکارۍ ډاډ یې ورکړ. نوموړې، د اروپايي ادارو چمتووالی څرګند کړ چې له افغانستان د صادراتو د معیارونو او رهنمودونو په اړه د ACCI سره په راتلونکو اونیو کې آنلاین ناسته وکړي او ټینګار یې وکړ چې د ترانزیټ ستونزې باید حل شي.

آغلې ورانیکا، د کشمش د پروسس فابریکې پرانیسته د افغانستان د اقتصاد د ودې په برخه کې یو لوی ګام وباله او ژمنه یې وکړه چې په نږدې راتلونکي کې به له دغې فابریکې لیدنه وکړي.

 

 

 

 

 

د افغانستان د سوداګرۍ او پانګونې اتاق عمومي رئیس ښاغلي سید کریم هاشمي، د نړیوال بانک له رئیس ښاغلي فریس حداد – زرؤس او د هغه له مل پلاوي سره، د اتاق په مرکزي دفتر – کابل کې تعارفي ناسته وکړه.

ښاغلي زرؤس، ښاغلي هاشمي ته د اتاق د عمومي رئیس په توګه د ټاکل کېدو مبارکي وویله او د نړیوال بانک د فعالیتونو په اړه یې معلومات ورکړل، چې پکې د خصوصي سکتور پیاوړتیا، سلا مشورې، لنډمهاله او اوږدمهاله پورونه، او د بې وزلو خلکو لپاره د کار زمینې برابرول شامل دي.

نوموړي د نړیوال بانک او اتاق ترمنځ د اړیکو پر لا ټینګښت ټینګار وکړ.

ښاغلي هاشمي، ښاغلي زرؤس او د هغه د ټیم راتګ ته ښه راغلاست ووایه او څرګنده یې کړه چې د سوداګرۍ او پانګونې اتاق له نړیوال بانک سره له څو کلونو راهیسې ښې اړیکې لري.

نوموړي له نړیوال بانک څخه غوښتنه وکړه چې د خصوصي سکتور غړو، په ځانګړي ډول کوچنيو او منځنیو متشبثینو ته، که په مرکز کې وي او که په ولایتونو کې، لا ډېر ملاتړ وکړي.

ښاغلي هاشمي د صنعت پراختیا د هېواد د ځان بسیا، او د کارموندنې لپاره مهمه وبلله، او له ښاغلي زرؤس څخه یې غوښتنه وکړه چې هغه سوداګر چې غواړي خپلې فابریکې له بهره هېواد ته راولي، او هغه مېرمنې چې غواړي د کور دننه د غالیو اوبدلو کوچنۍ تولیدي فابریکې جوړې کړي، مالي ملاتړ ورسره وشي.

ښاغلي هاشمي، له نړیوال بانک سره د هر اړخیزې همکارۍ ډاډ ورکړ.