د افغانستان د سوداګرۍ او پانګونې اتاق د عامل پلاوي د پاليسۍ او تخنيکي مرستيال، ښاغلي محمد انور عارفي، د آغا خان بنسټ له اجرايوي رئيس ښاغلي نجم الدين نجم سره وکتل او د دواړو ادارو ترمنځ د ګډو همکاریو په اړه بحث او نظریات تبادله کړل.

ښاغلي عارفي، ښاغلي نجم ته د اتاق د فعالیتونو، لاسته راوړنو او په ولایتونو کې د نمایندګیو په اړه معلومات ورکړل، او د آغا خان دفتر یې د کوچنيو او منځنیو متشبثینو، په ځانګړې توګه ښځو، د ظرفیت لوړونې او پراختیا په برخه کې مهم وباله. هغه د آغا خان بنسټ له اوږدمهالو خدمتونو څخه، چې په بیلابیلو اقتصادي برخو کې، په ځانګړي ډول لیرو پرتو ولایتونو کې ترسره شوي، مننه وکړه او ټینګار یې وکړ چې ښځو ته دې د اسلامي احکامو له مخې د کور دننه د حرفوي کارونو د رامنځته کولو زمینه نوره هم برابره شي.

نوموړي همداراز ډاډ ورکړ چې د بنسټ د پروژو تطبیق لپاره به اتاق هر اړخیزه همکاري کوي.

ښاغلي عارفي، ښاغلی نجم وهڅاوه چې د هغو پروژو په تطبیق کې، چې د هیواد د بیا رغونې او د خلکو لپاره د کار زمینې برابرولو په هدف د اتاق له خوا معرفي کیږي، لا زیاتې هڅې وکړي.

ښاغلي نجم د اتاق د پاليسۍ او تخنيکي مرستيال ته ښه راغلاست ووایه او څرګنده یې کړه چې د آغا خان دفتر د خصوصي سکتور، په ځانګړې توګه د کوچنيو متشبثینو د ودې او د بشري منابعو د ظرفیت لوړولو لپاره، د اتاق سره په همغږۍ کې د منځنۍ کچې پروژو په تطبیق کې لیوالتیا لري، او ټینګار یې وکړ چې د عملي کارونو لپاره دې د بنسټ او اتاق ترمنځ دوامدارې غونډې ترسره شي.

 

 

 

 

 

د افغانستان د سوداګرۍ او پانګونې اتاق د دریم پړاو د مدیره پلاوي ۳۱مه غونډه، د اتاق د عمومي رئیس الحاج ښاغلي توکل احمدیار په مشري، او د لاندې غړو په ګډون د مدیره پلاوي ښاغليو: محمد یونس مهمند، د مدیره پلاوي لومړی مرستیال؛

ښاغلی خیرالدین مایل احمدي، د مدیره پلاوي تجارتي مرستیال؛

ښاغلی نصیر احمد عرب، د مدیره پلاوي خدماتي مرستیال؛

ښاغلی خان محمد سرفراز باز، د مدیره پلاوي د دارالانشاء رئیس؛

ښاغلی شیرین آغا سخی، د مدیره پلاوي مالي رئیس؛

انجنیر سید جاوید برهان، د مدیره پلاوي د نړیوالو اړیکو رئیس؛

او نور غړي: سلطان محمد صافي، خانجان الکوزی، محمد داود یوسفزی، محمد گردیزی، ذکریا بریالی، سید پرویز سادات هوفیانی، ضیاءالدین اچکزی، بهادر خیرخواه، فواد دوست، جان آقا صادقی، احمد شکیب احمدیار، او احمد ضیاء عظیمی شینوزاده.

همدارنګه، ښاغلی عبدالحامد حمیدی، د اتاق د نظارت هیات رئیس؛

ښاغلی میر زمان پوپل، د عامل پلاوي د مالي او اداري مرستیال سرپرست؛

او ښاغلی محمد انور عارفي، د عامل پلاوي د پالیسۍ او تخنیکي چارو مرستیال هم په غونډه کې ګډون کړۍ وو.

د غونډې په پیل کې، د مدیره پلاوي د ۳۱مې ناستې اجندا موضوعات، د تېرې (۳۰مې) ناستې مصوبات او د هغې د صورت جلسې تلاوت او لاسلیک د محترم خان محمد سرفراز باز له‌خوا غونډې ته وړاندې شول.

ورپسې، د اتاق د عامل پلاوي راپورونه او وړاندیزونه، د ښاغلي میر زمان پوپل له‌خوا غونډې ته وړاندې شول.

وروسته له هر اړخیز بحثه، د افغانستان د سوداګرۍ او پانګونې اتاق اړوند موضوعاتو او د مدیره پلاوي او عامل پلاوي له‌خوا وړاندې شویو وړاندیزونو په اړه لازمې پریکړې وشوې.

 

 

 

 

د افغانستان د سوداګرۍ او پانګونې اتاق عمومي رئیس، ښاغلی سید کریم هاشمي، د ښاغلو: محمد یونس مهمند د اتاق لومړی مرستیال، نصیر احمد عرب د خدماتي چارو مرستیال، خان محمد سرفراز باز د مدیره پلاوي د دارالانشاء رئیس، شیرین آغا سخي د مالی چارو رئیس، سید جاوید برهان د نړیوالو اړیکو رئیس، خان جان الکوزی د افغان – پاک ګډ اتاق رئیس او د مدیره پلاوي غړی، ضیاءالدین اچکزی، احمد شکیب احمدیار د مدیره پلاوي غړي، او میرزمان پوپل د عامل ریاست سرپرست په حضور کې، د اتاق له کارکوونکو او د بېلابېلو دیپارتمنتونو له مسؤلینو سره تعارفي ناسته ترسره کړه.

ښاغلي پوپل د اتاق کارکوونکي د عمومي رئیس سره معرفي کړل، او د هغوی له کلونو بې‌دریغه خدمتونو څخه چې د نندارتونونو، سوداګریزو ناستو د تنظیم، او د خصوصي سکتور غړو ته د خدماتو په برخه کې یې کړي دي، یادونه وکړه.

همداراز، د امام ابو حنیفه (رح) په نوم د ملي او نړیوال نندارتون د څلورم پړاو د نږدې جوړېدو په اړه یې ښاغلي هاشمي ته معلومات وړاندې کړل.

ښاغلي هاشمي عامل پلاوي د کارکوونکو له لاسته راوړنو او کړنو خوښي وښوده، او یادونه وکړه چې د اتاق اساسي موخه د خصوصي سکتور غړو ته غوره خدمات وړاندې کول دي.

نوموړي مسؤلینو او کارکوونکو ته اړینې لارښوونې هم وکړې، څو پانګه‌والو او سوداګرو ته لا مؤثر او باکیفیته خدمات ورسوي.

 

 

 

 

 

ښاغلي توکل احمدیار، د افغانستان د سوداګرۍ او پانګونې اتاق عمومي رئیس، د مدیره پلاوي د دارالانشاء رئیس ښاغلی خان محمد سرفراز باز، د افغان – پاک ګډ اتاق رئیس او د مدیره پلاوي غړی ښاغلی خانجان الکوزی، د مدیره پلاوي غړي ښاغلي ضیاءالدین اچکزي، سید پرویز سادات هوفیاني، ښاغلی احمد شکیب احمدیار، او د عامل پلاوي د مالي او اداري مرستیال سرپرست ښاغلی میرزمان پوپل په حضور کې، د اتاق له یو شمېر مسؤلینو او د مرکزي دفتر د بېلابېلو څانګو له کارکوونکو سره ولیدل.

ښاغلي احمدیار، د سوداګرۍ او پانګونې اتاق د عامل پلاوي د کارکوونکو د شپه‌ او ورځ کار او هڅو څخه د ستاینې ترڅنګ، له هغوی وغوښتل چې د صادراتو د زیاتوالي، په ملي او نړیواله کچه د نندارتونونو د جوړولو، د غړو د جلب او جذب، او د سوداګرو او پانګوالو لپاره د لا غوره خدمتونو د برابرولو په برخه کې لا ډېرې هڅې وکړي او خپلو دندو ته په لا زیاته انرژۍ دوام ورکړي.

 

 

 

 

 

 

د افغانستان د سوداګرۍ او پانګونې اتاق نوی رئیس ښاغلی سید کریم هاشمي، د يو شانداره مراسمو په ترڅ کې د لاندې ښاغلیو: د صنعت او تجارت وزارت سرپرست محترم نورالدین عزیزی، د کانونو او پټرولیم وزارت سرپرست مولوي هدایت الله بدري، د ملي المپیک ادارې عمومي رئیس مولوي احمدالله وثیق، د اتاق پخوانی عمومي رئیس ښاغلی توکل احمدیار، د اتاق لومړی مرستیال ښاغلی محمد یونس مهمند، د سوداګرۍ مرستیال ښاغلی خیرالدین مایل احمدي، د خدماتي چارو مرستیال ښاغلی نصیر احمد عرب، د هیات مدیره د دارالانشاء رئیس ښاغلی خان محمد سرفراز باز، د مالي چارو رئیس ښاغلی شیرین آغا سخي، د نړیوالو اړیکو رئیس ښاغلی سید جاوید برهان، د هیات مدیره غړی او د افغان-پاک ګډ اتاق رئیس ښاغلی خانجان الکوزی، ښاغلي ذکریا بریالی، محمد داود یوسفزی، سید پرویز سادات هوفیاني، ضیاالدین اچکزی، جان آقا صادقي، احمد فواد دوست، او احمد شکیب احمدیار، د هیات مدیره غړي، د عامل پلاوي د مالي او اداري چارو سرپرست ښاغلی میرزمان پوپل، د پالیسۍ او تخنیکي چارو مرستیال محمد انور عارفي، د کابل، بلخ، ننګرهار، هرات او هلمند ولایتي اتاقونو هیاتونه، د بېلابېلو اتحادیو مشران او د هېواد مخکښ سوداګر په حضور کې وپیژندل شو.

ښاغلي احمدیار د غونډې ګډونوالو ته د ښه راغلاست ترڅنګ، ښاغلي سید کریم هاشمي ته د نوي رئیس په توګه د ټاکل کېدو مبارکي وویله او یادونه یې وکړه چې ادارو کې بدلون یو اصل دی. نوموړي ډاډ ورکړ چې له نوي رهبري سره به د خصوصي سکتور د اسانتیاوو او ستونزو د حل په برخه کې پوره همکاري وکړي. هغه د خپلو هغو هڅو او لاسته راوړنو یادونه وکړه چې په تېرو شپږو کلونو کې یې د خصوصي سکتور او بې‌وزله خلکو لپاره ترسره کړي، او ټینګار یې وکړ چې له خصوصي سکتور سره به همکاري روانه ساتي.

ښاغلي هاشمي د خپلو راتلونکو پلانونو یادونه وکړه، ویې ویل چې هڅه کوي د اتاق سوداګریزې اړیکې له ټولو حکومتي ادارو، نړیوالو بنسټونو او د سیمې او نړۍ له خونو سره پراخې کړي. نوموړي ژمنه وکړه چې د خصوصي سکتور ستونزې به ژر حل کړي، د افغانستان تولیدات به نړۍ ته معرفي کړي، او افغان او بهرني پانګه‌وال به د هېواد بېلابېلو سکتورونو پانګونې ته وهڅوي.

ښاغلي مهمند د حکومت له رهبري نه د خصوصي سکتور د ملاتړ له امله مننه وکړه او د ښاغلي احمدیار له هڅو قدرداني وکړه. نوموړي د اتاق د تېرو کلونو لاسته راوړنې بیان کړې او ویې ویل چې رهبري تل هڅه کړې تر څو د خصوصي سکتور لپاره غوره خدمات برابر کړي، له همدې امله یې د افغان او د سیمې هېوادونو د متشبثینو ترمنځ ګډ نندارتونونه او سوداګریزې ناستې ترسره کړې دي.

ښاغلي الکوزي د سوداګرۍ او پانګونې اتاق د تاریخ په اړه معلومات وړاندې کړل او زیاته یې کړه چې د اتاق اساسي هدف د هېواد د اقتصاد وده، د خلکو لپاره د کار زمینه برابرول، د سیمې او نړۍ سوداګرو ته د پانګونې فرصتونه معرفي کول، او د هېواد په لویو بنسټیزو پروژو کې د پانګونې راجلبول دي. نوموړي یادونه وکړه چې دغه اتاق تل د حکومت، خصوصي سکتور او بهرنیو مرسته‌کوونکو ترمنځ د اړیکو پل پاتې شوی دی. همدارنګه، هغه د خصوصي سکتور ستونزو د حل لپاره د اتاق رول په ګاونډیو هېوادونو کې مهم وباله او ډاډ یې ورکړ چې د اتاق له پالیسۍ سره سم، هر ډول همکاري له حکومتي ادارو سره ترسره کېږي.

ښاغلي مایل د سوداګرو رول د اقتصاد په وده او د بې‌وزله خلکو په ملاتړ کې مهم وباله. نوموړي وویل چې خصوصي سکتور تل هڅه کړې چې د هېواد په بازارونو کې د خامو موادو بیې متوازنې وساتي. همداراز، نوموړي ډاډ ورکړ چې له نوي رئیس سره به بشپړه همکاري کوي.

ښاغلي بدري د هغه کمیسیون معلومات وړاندې کړل چې د سوداګرۍ اتاق او نورو سکتوري اتاق د مشرتابه د ټاکلو لپاره جوړ شوی.

نوموړي له ټولو سوداګرو وغوښتل چې د کورني صنعت پراختیا ته ځانګړې پاملرنه وکړي.

ښاغلي عزیزی، د غونډې د جوړونکو قدرداني وکړه او ادارو کې بدلون او تبدیل یو اصل وباله. نوموړي د حکومت پالیسي اقتصادمحوره وبلله. هغه د ښاغلي توکل احمدیار له تېرو شپږو کلونو خدمتونو مننه وکړه او سوداګر یې وهڅول چې د صنعت د ودې په هدف له کورنیو تولیداتو ملاتړ وکړي.