ښاغلي محمد انور عارفي، د سوداګرۍ او پانګونې اتاق د عامل پلاوي پالیسۍ او تخنیکي مرستیال، د قرغیزستان له سفیر محترم تورداکن صدیقوف او د هغه د مرستیال محترم دانیار ژولچیف سره د یاد هېواد په سفارت کې ولیدل او د افغانستان او قرغیزستان ترمنځ د سوداګریزو اړیکو د پراختیا په اړه یې خبرې وکړې.

ښاغلي عارفي د دواړو هېوادونو ترمنځ د سوداګریزو همکاریو پر پیاوړتیا ټینګار وکړ او د هغو سوداګریزو ناستو په اړه معلومات وړاندې کړل چې د څو مودې وړاندې د اتاق له لوري د افغانستان او قرغیزستان د خصوصي سکتور ترمنځ ترسره شوې وې.

نوموړي د اوسني وضعیت فرصتونه د پانګونې لپاره مناسب وبلل او له قرغیز سفیر څخه یې وغوښتل چې د ګډو نندارتونونو او سوداګریزو ناستو د ترسره کولو په برخه کې له اتاق سره همکاري وکړي.

د پالیسۍ مرستیال، اتاق د خصوصي سکتور، دولت او بهرنیو شریکانو ترمنځ د اړیکو پل وباله او د دواړو هېوادونو ترمنځ د سوداګرو ګډو پانګونو ته – په تېره بیا د نفتو او ګازو د وارداتو په برخه کې – د سوداګرۍ د پراختیا په برخه کې ډېر اهمیت ورکړ.

نوموړي ډاډ ورکړ چې اتاق به د دواړو هېوادونو د خصوصي سکتور د ټولو سوداګریزو ستونزو د حل لپاره هر اړخیز ملاتړ کوي.

ښاغلي صدیقوف د ښاغلي عارفي هرکلی وکړ او د افغانستان، ازبکستان، قرغیزستان او چین ترمنځ د څلور اړخیزې سوداګریزې همکارۍ د تفاهمنامې یادونه وکړه. نوموړي وویل چې هېواد یې د افغانستان له خصوصي سکتور سره د ګډو سوداګریزو همکاریو او پانګونو د پراختیا لپاره لیوالتیا لري. همدارنګه، نوموړي د خصوصي سکتور د ستونزو د هواري او د هغوی د هڅونې لپاره پر پرله‌پسې ناستو ټینګار وکړ او ډاډ یې ورکړ چې د افغان او قرغیز سوداګرو ترمنځ به د ګډو پانګونو لپاره له خپلې خوا هر اړخیز ملاتړ کوي.

 

 

 

 

 

یاده ناسته د ۱۴۰۴ کال د زمري په ۱ نېټه د ارګ په سلام‌خانې ماڼۍ کې د افغانستان د سوداګرۍ او پانګونې اتاق د مشرتابه پلاوي په ګډون جوړه شوې وه. په دې ناسته کې ښاغلي محمد یونس مهمند د اتاق لومړي مرستیال، ښاغلی خیرالدین مایل احمدي د سوداګریزو چارو مرستیال، ښاغلی خان محمد سرفراز باز د مدیره پلاوي د دارالانشاء رئیس، ښاغلی میرزمان پوپل د مالي او اداري چارو سرپرست، د ولایتي اتاقونو مشران او د هېواد له ۴۰۰ څخه زیاتو سوداګرو او صنعتکارانو ګډون کړی و.

په دې ناسته کې له ښاغلي مولوي عبدالله عزام، د ریاست‌الوزرا د اقتصادي مرستیال د دفتر رئیس، او د مالیې وزارت له استازو سره د وارداتي شرکتونو څخه د ثابتې مالیې د راټولولو په اړه بحث وشو.

سوداګرو او صنعتکارانو په ګډه دا غوښتنه وکړه، چې له وارداتي تجارتي شرکتونو او د صنعتکارانو د خامو موادو لپاره دې یو ځل او په ثابت ډول مالیه یوازې په ګمرکونو کې راټوله شي. دوی باور درلود، که دا وړاندیز عملي شي، د دوی سوداګریز فعالیتونه به څو چنده زیات شي او ټول شرکتونه به له اوږدو مالیاتي ارزونو او ستړیاوونکو پروسیجرونو خلاص شي.

دا وړاندیز به لومړی اقتصادي کمیسیون ته او د هغوۍ له لارې به د مشرتابه دفتر درانه مقام ته د وروستۍ پرېکړې لپاره وړاندې شي.

 

 

 

 

 

د افغانستان د سوداګرۍ او پانګونې اتاق د نفتو ټانکدارانو تخصصي کمیټې، د اتاق د مشرتابه پلاوي؛ ښاغلي محمد یونس مهمند د اتاق لومړی مرستیال، ښاغلي خان جان الکوزي د مدیره پلاوي غړی او د افغان-پاک ګډ اتاق رئیس، ښاغلي میرزمان پوپل د عامل پلاوي د مالي او اداري مرستیال سرپرست، او د یادې کمیټې د ګڼ شمېر غړو په شتون کې، د اتاق د کنفرانسونو په تالار کې غونډه وکړه او ښاغلی مسعود راحت یې د یادې کمیټې د نوي رئیس په توګه معرفي کړ.

ښاغلي مهمند، د هېواد د نفتو ټانکدارانو له لوري د ستونزمنو شرایطو سره سره د خدماتو له وړاندې کولو مننه وکړه، په ځانګړي ډول یې د پخواني رئیس ښاغلي ذبیح الله مهمند د خدمتونو قدرداني وکړه. نوموړي د باکیفیته تيلو د وارداتو لپاره د اړوندو حکومتي ادارو له خوا ټاکل شوي معیارونو په تعقیب ټینګار وکړ.

د اتاق لومړي مرستیال، د ټول هېواد امنیت، د کوکنارو د کرنې مخنیوی، او د ادارو د فساد پر ضد مبارزه، د باکیفیته نفتو د ترانسپورت، وارداتو او توزیع لپاره مهم عوامل وبلل، او د حکومتي مشرتابه له خوا د ټیټ کیفیت لرونکو موادو د وارداتو د مخنیوي پر حکم یې یادونه وکړه. نوموړي له ټولو ټانکدارانو، په ځانګړي ډول هغو چې د لویو لارو پر سر موقعیت لري، وغوښتل چې د معیاري ترڅنګ ، د موټر چلوونکو او مسافرو لپاره لازمې اسانتیاوې هم برابرې کړي.

ښاغلي مهمند، د سیمې او نړۍ له هېوادونو سره د تجارت پر زیاتوالي خبرې وکړې، او ژمنه یې وکړه چې د لمریزې برېښنا پروژو پلي کېدو او د قوش تپې لوی کانال څخه د استفادې له لارې، به ډېر ژر افغانستان د برېښنا تولید او کرنیزو محصولاتو برخه کې ځان‌بسیا شي.

ښاغلي الکوزي، د اتاق د تخصصي کمیټو د مسؤلیتونو او د خصوصي سکتور د ستونزو د حل په برخه کې د هغوی د رول په اړه خبرې وکړې، او له نفتو ټانکدارانو او واردوونکو څخه یې وغوښتل چې د ټاکل شوو معیارونو سره سم، خلکو او مصرفوونکو ته خپل خدمات وړاندې کړي.

ښاغلي پوپل، د تخصصي کمیټو د ټاکنې پروسې تشریح کړه، او د پخواني رئیس له خدمتونو مننه وکړه. نوموړي د کمیټو په مشرتابه کې بدلونونه یو عادي او اصولي کار وباله، او هیله‌مندي یې وښوده، چې له نوي رئیس سره به خدمات لا ښه او معیاري شي.

همدارنګه، د نفتو د ټانکدارانو یو شمېر سوداګرو او استازو هم د اړوندو موضوعاتو په اړه خبرې وکړې او ژمنه یې وکړه، چې باکیفیته نفتې مواد به عرضه کړي او مصرفوونکو ته به غوره خدمات وړاندې کړي.

 

 

 

 

 

ښاغلي محمد انور عارفي، د افغانستان د سوداګرۍ او پانګونې اتاق د پالیسۍ او تخنیکي مرستیال، له ښاغلي اندري روی مویچ، چې د افغانستان ـ روسیې د ګډ سوداګریز کمیټې رئیس دی، سره آنلاین لیدنه وکړه او د دواړو هېوادونو ترمنځ د سوداګریزو اړیکو د پیاوړتیا په اړه یې بحث او نظرونه تبادله کړل.

ښاغلي عارفي د دواړو هېوادونو سوداګریزې او اقتصادي اړیکې په ښه کېدو وبللې او لاندې موضوعات یې د سوداګرۍ پراختیا لپاره مهم وګڼل: افغان سوداګرو ته د ویزې د صدور آسانتیا، د بانکي ستونزو حل، د افغان صادراتي توکو لپاره د ترجیحی تعرفو تطبیق، د ګډو نندارتونونو او سوداګریزو غونډو جوړول، د خصوصي سکتور ترمنځ د تجارتي تفاهم‌لیکونو لاسلیک، د روسیې د صادراتو د بسته بندۍ معیارونو افغان سوداګرو ته معرفي کول، او د دواړو هېوادونو د سوداګرۍ اتاقونو ترمنځ آنلاین ناستې.

هغه وویل افغانستان د سرو زرو، سپینو زرو، نفرایت، مسو، لاجورد، کرومایټ او ډبرو سکرو غني کانونه لري، او له ښاغلي اندري څخه یې وغوښتل چې روسي سوداګر دې د افغانستان د کانونو او انرژۍ د تولید په سکتورونو کې پانګونې ته وهڅوي.

ښاغلي اندري د روسي سوداګرو د علاقې یادونه وکړه چې غواړي د سرو زرو، زمردو، نفتو کانونه واکاږي او په افغانستان کې د شیشې د تولید فابریکه جوړه کړي.

نوموړي ډاډ ورکړ چې د سوداګریزو ناستو، د دواړو هېوادونو د سوداګرۍ اتاقونو ترمنځ د آنلاین ناستې او د روسي پانګوالو د هڅونې په برخه کې به همکاري وکړي.

 

 

 

 

 

 

د افغانستان د سوداګرۍ او پانګونې اتاق مشرتابه پلاوي، ښاغليو: محمد یونس مهمند د اتاق لومړی مرستیال، ښاغلي خان محمد سرفراز باز د مدیره پلاوي د دارالانشاء رئیس، ښاغلي خان جان الکوزی د مدیره پلاوي غړی او د افغان-پاک ګډ اتاق رئیس،ښاغلي جان آقا صادقی داتاق دنفتی توکو دکميتی رئیس، ښاغلي میرزمان پوپل د عامل پلاوي د مالي او اداري مرستیال سرپرست، د یو شمېر ولایتي اتاقونو او سکتوري اتحادیو له رئیسانو او غړو سره یو ځای، د ریاست‌الوزرا د اقتصادي معاونیت په مرمرین ماڼۍ کې، له ښاغلي مولوي عبدالله عزام، د ریاست‌الوزرا اقتصادی مرستیال د دفتر له رئیس، ښاغلي حاجي ابراهیم د اقتصادي معاونیت له مشاور، او ښاغلي مولوي عبدالمتین سعید د مالیې وزارت د عوایدو او ګمرکاتو له مرستیال سره ولیدل او د خصوصي سکتور روانې ستونزې یې له دوی سره شریکې کړې.

سوداګرو او صنعتکارانو، خپلې ستونزې د تولیدي فابریکو لپاره د برېښنا سخت کمښت، د صنعتي پارکونو کې د ځمکو نه‌شتوالی، د ترانسپورتي کرایو لوړوالی، د بارولو پېچلې پروسه، د ګمرک او فومیګیشن وخت نیونکې کړنلارې، د کورنیو تولیداتو لپاره د بهرنیو بازارونو نه‌شتوالی، د جوازونو د تمدید او سوداګریزو ویزو د اخیستو ځنډ، د معیاري سړکونو کمښت، او د محصولاتو د کیفیت د ساتنې لپاره د سړو خونو او صنعتي زیربناوو نشتون یاد کړل، او د ریاست‌الوزرا د مرستیال د دفتر رئیس او د مالیې وزارت د عوایدو او ګمرکاتو له مرستیال څخه یې وغوښتل، چې دا ستونزې د حکومت له مشرانو سره شریکې کړي.

ښاغلیو عزام او سعید، د خصوصي سکتور ستونزې واورېدلې او ژمنه یې وکړه، چې یادې ستونزې به د اړوندو حکومتي ادارو سره شریکې کړي. دوی له ټولو ګډون‌والو سوداګرو څخه وغوښتل، چې خپلې ستونزې، وړاندیزونه او حل لارې په لیکلي ډول د ریاست‌الوزرا د اقتصادي معاونیت دفتر او د مالیې وزارت د عوایدو او ګمرکاتو معینیت ته وسپاري.