د افغانستان او ازبیکستان د سوداګرو او پانګوالو ترمنځ د درملو سکتور د سوداګریزو اړیکو کنفرانس، د نظریاتو د تبادلې او ګډو پانګونو په موخه، د افغانستان د سوداګرۍ او پانګونې اتاق د مالي او اداري مرستیال سرپرست ښاغلي میرزمان پوپل، د ازبیکستان تجارتي اتشه ښاغلي جمشید بدلوف، د درملو خدمتونو اتحادیې مرستیال او د اتاق لوړپوړي سلاکار ښاغلي محمد محسن ساحل پرواني، او د دواړو هېوادونو د ګڼ شمېر درملو سوداګرو په ګډون، د کابل ښار په پروان هوټل کې جوړ شو.

ښاغلي میرزمان پوپل، د افغانستان د سوداګرۍ او پانګونې اتاق ۹۴ کلنو فعالیتونو او د هېواد په اقتصادي وده کې د دې اتاق پر رول خبرې وکړې. نوموړي، له د عامې روغتیا له سرپرست وزیر سره د وروستۍ ناستې جزییات او د درملو وارداتو ارقام هم ګډونوالو ته وړاندې کړل. هغه د افغانستان اوسنی وضعیت د پانګونې لپاره مناسب وباله او له ازبیک سوداګرو یې وغوښتل چې له افغان سوداګرو سره په ځانګړې توګه د درملو په سکتور کې ګډې پانګونې وکړي. نوموړي وویل، ګډې پانګونې به د دواړو هېوادونو ترمنځ اقتصادي وده او سوداګریزې اړیکې پراخې کړي.

ښاغلي جمشید بدلوف، دا ډول ناستې د دواړو هېوادونو ترمنځ د سوداګریزو او اقتصادي اړیکو د پیاوړتیا لپاره مهمې وبللې او له دواړو لوریو سوداګرو یې وغوښتل چې له ننني کنفرانس څخه ښه ګټه واخلي.

ښاغلي ساحل پرواني، د ازبیک مېلمنو او ګډونوالو هرکلی وکړ، ویې ویل چې د دواړو هېوادونو د سوداګرو او پانګوالو ترمنځ دا ناسته کولی شي په ځانګړې توګه د درملو او روغتیايي خدمتونو سکتور کې د سوداګرۍ پراختیا ته مهم رول ولوبوي. نوموړي د دې ناستې له پایلو څخه د ښې پایلې هیله وښوده.

 

 

 

 

د پانګونې جلب، د سوداګریزو اړیکو پراختیا، د لا زیاتو اسانتیاوو رامنځته کولو او د سوداګریزو نظریاتو تبادلې په موخه، د افغانستان د سوداګرۍ او پانګونې اتاق د ازبیکستان د سوداګرۍ او صنایعو اتاق له مشرتابه پلاوي سره سوداګریزه ناسته د کابل شهرنو کې د اتاق د مشرتابه پلاوي په مرکزي دفتر کې ترسره کړه.

په دې ناسته کې ښاغلي محمد یونس مهمند، د اتاق لومړی مرستیال؛ ښاغلی شیرین آغا سخی، د اتاق د مشرتابه پلاوي مالي رئیس؛ ښاغلی سید جاوید برهان، د مشرتابه پلاوي د بهرنیو اړیکو رئیس؛ ښاغلی خانجان الکوزی او ښاغلی سید پرویز سادات هوفیاني، د مشرتابه پلاوي غړي؛ ښاغلی احمد شاه حکیمي، د کابل د اتاق لومړی مرستیال؛ ښاغلی میرزمان پوپل، د عامل پلاوي مالي او اداري مرستیال سرپرست؛ ښاغلی محمد انور عارفي، د پالیسي او تخنیکي چارو مرستیال؛ ښاغلی جمشید بدلوف، د ازبیکستان سوداګریز اتشه؛ ښاغلی یخوبوف دوران، د ازبیکستان د سوداګرۍ او صنایعو اتاق رئیس او د هغه مل پلاوی؛ حاجي محمد محسن ساحل پرواني، د دوایي اتحادیې مرستیال او د اتاق ارشد مشاور، او یو شمېر د درملو سوداګر ګډون کړی و.

ښاغلي مهمند، د ازبیکستان د اتاق رئیس او د هغه د پلاوي هرکلی وکړ او ګډونوالو ته یې د حکومت د وروستۍ هدایت په اړه معلومات وړاندې کړل چې د ملي ګټو په ساتنه سره، د افغانستان او سیمې او نړۍ له هېوادونو سره د سوداګریزو اړیکو پراختیا باندې ټینګار کوي.

نوموړي، د افغانستان د خصوصي سکتور په استازیتوب، د ازبیکستان له جمهور رئیس او سفارت څخه د ترانزیټ پرانیستې له امله مننه وکړه او تېرو دریو کلونو کې د دواړو هېوادونو ترمنځ د ګډو ناستو او نندارتونونو ترسره کول یې د سوداګریزو اړیکو پیاوړتیا، د اسانتیاوو رامنځته کول او د کاري زمینې برابرولو په برخه کې مثبت ګام وباله. هغه د ازبیکستان د اتاق له رئیس څخه وغوښتل چې د افغان-ازبک سوداګرو ترمنځ د ګډو پانګونو د تشویق لپاره لا زیاتې هڅې وکړي.

ښاغلي مهمند، د ریاست الوزراء د اقتصادي مرستیال وروستي سفر ته چې ازبیکستان ته ترسره شوی و، اشاره وکړه او دا ډول سفرونه یې د دواړو هېوادونو د سوداګریزو اړیکو د پراخېدو لپاره مثبت وباله. نوموړي د حکومت له ټولو اقداماتو څخه ملاتړ څرګند کړ چې د افغانستان د خصوصي سکتور د ودې لپاره ترسره شوي.

هغه د افغانستان او ازبیکستان ترمنځ د صادراتو او وارداتو ارقامو ته په اشاره سره، د سوداګرۍ د لا زیاتوالي غوښتنه وکړه. نوموړي وویل چې اتاق د افغان-ترانس پروژه او د افغانستان، ازبیکستان او پاکستان ترمنځ د سترې ګډې پروژې ملاتړ کوي، او دغه ډول پروژې کولای شي د اقتصادي ودې، سوداګریزو فرصتونو پېژندنې او د سیمه ییزې سوداګرۍ زیاتوالي لپاره زمینه برابره کړي.

ښاغلي مهمند، وویل چې اتاق د بېلابېلو سکتورونو د ستونزو حل او فرصتونو پېژندلو لپاره تخصصي کمیټې جوړې کړې دي، او له ازبیکستاني سوداګرو سره د درملو تولید برخه کې د ګډو پانګونو غوښتنه وکړه. نوموړي، د افغانستان، ترکیې، آذربایجان، قزاقستان او ازبیکستان ترمنځ د ګډ اتاق جوړېدل د ترانزیټي اسانتیاوو او اروپایي بازارونو ته د صادراتو د لاسرسي لپاره مهم وبلل، او د ازبیکستان له تجارتي پلاوي یې وغوښتل چې په دې برخه کې له افغان اتاق سره لا زیاته همکاري وکړي.

د ازبیکستان د سوداګرۍ او صنایعو اتاق رئیس، د اتاق له مشرتابه څخه د ناستې د جوړېدو له امله مننه وکړه او د خپل سفر موخه یې د سوداګریزو نظریاتو تبادله، په بېلابېلو سکتورونو کې د ګډو پانګونو هڅونه وبلله. هغه، د افغانستان د درملو او چرګانو د روزنې سکتور کې د ازبک سوداګرو د پانګونې چمتووالي ته اشاره وکړه.

ښاغلي برهان، دا ډول ناستې د دواړو هېوادونو ترمنځ د سوداګریزو اړیکو د ټینګښت لپاره مهمې وبللې، ازبیکستان یې د افغانستان نږدې دوست او د دیني، فرهنګي ارزښتونو شریک یاد کړ. نوموړي، د ګډې کمېټې جوړول د صادراتو زیاتوالي لپاره اړین وبلل او د افغان سوداګرو لپاره د ویزو اسانتیا، او په افغانستان کې د ازبیک پانګوالو پانګونه د دواړو هېوادونو ترمنځ د سوداګریزو اړیکو پراخولو لپاره مثبت ګام وباله.

ښاغلي الکوزي وویل چې د نوي حکومت له راتګ سره د هېوادونو ترمنځ سوداګریزې اړیکې ښې شوي، چې اساسي لامل یې د دواړو هېوادونو د مشرانو او خصوصي سکتورونو ښه نیت دی. نوموړي د ازبکستان د اتاق له رئیس څخه وغوښتل چې د ترانزیټي ستونزو د حل او د منځنۍ آسیا د ترانزیټي لارې د نړیوالو سوداګریزو قوانینو سره سم، له افغانستان سره ګډه همکاري وکړي.

 

 

 

 

 

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند د ازبیکستان سفیر ښاغلي آیبیک عثمانوف، د افغان-پاک ګډ اتاق رئیس او د مشرتابه پلاوي غړي ښاغلي خانجان الکوزي، د ازبیکستان تجارتي اتشه ښاغلي جمشید بدلوف، د اتاق د مالي او اداري مرستیال سرپرست ښاغلي میرزمان پوپل، د ازبیکستان د صنعت او سوداګرۍ اتاق رئیس ښاغلي یخوبوف دوران او د دوی د مل پلاوي په حضور کې، له محترم مولوي نور جلال جلالي، د عامې روغتیا وزارت سرپرست سره، لیدنه وکړه او د افغانستان د پانګونې فرصتونو یې خبرې وکړې.

ښاغلي مهمند د مشرتابه د وروستي هدایت یادونه وکړه، چې له ګاونډیو هېوادونو سره د ښې اقتصادي اړیکو ټینګار کوي، او زیاته یې کړه: موږ هڅه کوو چې د خپلو ملي ګټو په ساتلو سره، له ګاونډیو، سیمې او نړۍ سره ښې سوداګریزې او اقتصادي اړیکې ولرو. نوموړي د حکومت له مشرتابه او ټولو ادارو مننه وکړه چې له هغو سوداګرو سره همکاري کوي، چې د افغانستان په بېلابېلو سکتورونو کې پانګونه کوي.

نوموړي د ټول هېواد امنیت، د کوکنارو کښت بندښت، او اداري فساد له منځه وړل، د پانګونې لپاره ښه فرصتونه وبلل او څرګنده یې کړه چې د ازبیکستان د سوداګریز پلاوي اساسي هدف په افغانستان کې د درملو تولیدي فابریکو کې پانګونه ده.

ښاغلي عثمانوف د دواړو هېوادونو تر منځ د اوسني فرصتونو په اړه خبرې وکړې او دغه ډول ناستې یې د دوستانه اړیکو په پیاوړتیا او د سوداګرۍ د حجم په زیاتوالي کې مهمې وبللې.

ښاغلي دوران وویل چې د دوی د سفر هدف له افغان سوداګرو سره د روغتیا سکتور کې د نظریاتو تبادله او د درملو تولیدي فابریکو کې ګډې پانګونې دي، او له محترم وزیر څخه یې د همکاریو غوښتنه وکړه.

ښاغلي الکوزي د یاد پلاوي فعالیتونه محترم وزیر ته تشریح کړل او ترې یې وغوښتل چې د روغتیا سکتور پانګوالو ته لا زیاتې آسانتیاوې برابرې کړي. نوموړي د دواړو هېوادونو د درملو پر وارداتي توکو د ترجیحې تعرفو په رامنځته کېدو هم ټینګار وکړ.

محترم مولوي نور جلال جلالي، د ناستې مېلمنو ته ښه راغلاست ووایه، ازبیکستان یې د افغانستان ښه دوست وباله چې دینی او فرهنګي ګډوالې لري، او د هېواد اوسني فرصتونه یې د پانګونې لپاره مناسبه زمینه وبلله. نوموړي له ټولو سوداګرو وغوښتل چې د روغتیا په برخه کې د شفاخانو، طبي سیاحت، او نورو برخو کې پانګونه وکړي، او له ازبیک سوداګرو سره یې په ځانګړې توګه د روغتیا سکتور کې د پانګونې ملاتړ څرګند کړ.

 

 

 

 

 

یادې غونډې ته چې د صنعت او سوداګرۍ وزارت، د افغانستان د سوداګرۍ او پانګونې اتاق، بېلابېلو ولایتي اتاقونو او اتحادیو استازو ګډون کړی و، د صنعت او سوداګرۍ وزارت سرپرست ښاغلي نورالدین عزیزی، د اتاق لومړي مرستیال ښاغلي محمد یونس مهمند، د اتاق تجارتي مرستیال ښاغلي خیرالدین مایل احمدي، د اتاق د مشرتابه پلاوي غړی او د افغان-پاک ګډ اتاق رئیس ښاغلي خانجان الکوزی، او د اتاق د عامل پلاوي د پالیسۍ او تخنیکي مرستیال ښاغلي محمد انور عارفي ګډون درلود.

ښاغلي نورالدین عزیزی د کازان او مسکو نندارتونونو د ارزښت په اړه خبرې وکړې او له افغان شرکتونو یې غوښتنه وکړه چې د معیاري بسته بندۍ سره خپل لوړ کیفیت تولیدات نندارې ته وړاندې کړي. نوموړي له سوداګرو وغوښتل چې د ګډون د لومړیتوبونو په اړه خپل نظر هم شریک کړي.

ښاغلي محمد یونس مهمند دا نندارتونونه د افغان محصولاتو لپاره مهم وبلل او د سوداګرو د پیسو انتقال په برخه کې یې د بانکي ستونزو یادونه وکړه، او وړاندیز یې وکړ چې د هیواد له بانکونو څخه، په ځانګړي ډول دولتي پشتنی بانک، یو استازی دې مسکو ته د استازولۍ د پرانیستلو لپاره واستول شي.

ښاغلي خیرالدین مایل احمدي د صنعت او سوداګرۍ وزارت له مشورتي دریځه مننه وکړه او څرګنده یې کړه که هر یو نندارتون د وزارت او سوداګرو له خوا تایید شي، اتاق هم د هغه ملاتړ کوي.

ښاغلي خانجان الکوزي د نندارتونونو د اهمیت په اړه خبرې وکړې او څرګنده یې کړه چې د افغان سوداګرو ګډون په مسکو کې به دوی ته ښه چمتووالی او زیات فرصتونه برابر کړي.

ښاغلي محمد انور عارفي دا ناسته د ښه همغږۍ او پراخ ګډون لپاره ګټوره وبلله او ډاډ یې ورکړ چې د اتاق له لوري به د تخنیکي همغږۍ په برخه کې د صنعت او سوداګرۍ وزارت او د افغان-روسیې سوداګریزې مجمعې سره هر اړخیزه همکاري وشي.

ټاکل شوې چې د افغان-روسیې سوداګریزه مجمع، چې سوداګریز فورم، دوه اړخیزې تجارتي ناستې، او د افغان تولیداتو نندارتون به پکې شامل وي، په روسیه کې ترسره شي.

 

 

 

 

 

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د ښاغلو: شیرین آغا سخي د اتاق د مشرتابه پلاوي د مالي رئیس، خانجان الکوزي د مشرتابه پلاوي غړی او د افغان-پاک ګډ اتاق رئیس، جمشید بدلوف په افغانستان کې د ازبیکستان تجارتي اتشه، یخوبوف دوران د ازبیکستان د صنعت او سوداګرۍ اتاق رئیس او ورسره مل پلاوی، احمد شاه حکمي د کابل د سوداګرۍ او پانګونې اتاق لومړی مرستیال، او محمد انور عارفي د اتاق د پالیسي او تخنیکي مرستیال په ګډون، د صنعت او سوداګرۍ وزارت له سرپرست وزیر محترم نورالدین عزیزی سره لیدنه وکړه او د ګډو پانګونو او تجارتي همکاریو په اړه یې خبرې اترې وکړې.

ښاغلي مهمند د منځنۍ اسیا هېوادونو ترمنځ له پاکستان سره د ترانزیټي ستونزو یادونه وکړه او د څو اړخیزو ګډو سوداګریزو اتاقونو جوړول یې د دې ستونزو د حل لپاره مهم وبلل. نوموړي د ازبیکستان د صنعت او سوداګرۍ اتاق رئیس او تجارتي اتشه څخه غوښتنه وکړه چې د خپل هېواد سفارت سره د منځنۍ اسیا له هېوادونو سره د پاکستان ترمنځ د ترانزیټي ستونزو د حل لپاره خبرې وکړي، څو سوداګر وکولای شي خپلې سوداګریزې تبادلې په چټک ډول ترسره کړي.

ښاغلي دوران د سفر موخه له افغان سوداګرو سره د نظریاتو تبادله او د درملو تولیدي فابریکو، ودانیزو چارو، مالدارۍ، چرګانو پالنې، او یخچالي ګودامونو په برخو کې د ګډو پانګونو پیل وښود. نوموړي له سرپرست وزیر څخه د همکارۍ غوښتنه وکړه او د هغه نندارتون په اړه یې معلومات ورکړل، چې په نږدې راتلونکي کې به د ازبیکستان په ترمز ښار کې جوړ شي. هغه ښاغلی عزیزی دغه نندارتون ته د ګډون لپاره هم راوباله.

ښاغلي دوران زیاته کړه: "موږ د تورخم د ترانزیټ ستونزې د ازبیکستان له سفارت سره شریکې کړي او له هغوی مو غوښتنه کړې چې له پاکستاني چارواکو سره د یادو ستونزو د حل لپاره خبرې وکړي."

ښاغلي الکوزي د افغانستان د ترانزیټي لارې پر ارزښت خبرې وکړې او ویې ویل: دا لاره د نورو ګاونډیو هېوادونو له لارې د مالونو د لېږد پر وړاندې لنډه، اقتصادي او مصؤنه ده، او ټول هېوادونه کولی شي له دې لارې خپل سوداګریز تبادلات له پاکستان او نورو اسیايي هېوادونو سره ترسره کړي.

محترم نورالدین عزیزی د افغانستان د سوداګرۍ او پانګونې اتاق د مشرتابه پلاوي او د ازبیکستان د سوداګریز پلاوي راتګ ته ښه راغلاست ووایه او د دواړو هېوادونو د اتاقونو له وړاندیزونو یې ملاتړ وکړ. هغه د دواړو هېوادونو ترمنځ د سوداګرۍ بیلانس ته د توازن راوستلو غوښتنه وکړه. نوموړي، د ازبیکستان او افغانستان ترمنځ پر پوله د سکینر نصبولو ته په صادراتو کې مهم رول ورکړ او له ازبیکستان څخه یې د اورګاډي کرښې تعرفو کمولو غوښتنه وکړه.

ښاغلي عزیزی، د ازبیکستان څخه تر سپین بولدک پورې د اورګاډي کرښې جوړول د منځنۍ آسیا هېوادونو له جنوبي آسیا سره د سوداګرۍ او ترانزیټ د پراختیا لپاره مهم وبلل او د یادې کرښې د تمدید په برخه کې یې د ازبیکستان د حکومت د همکارۍ غوښتنه وکړه.