د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د اتاق د مشرتابه پلاوي غړو ښاغلي آذرخش حافظي، اختر محمد پوپل، بلال احمد علیزي، زمري حاجي زاده، حاجي عبدالکریم او شعیب قناویزیان چې د جرمني مېشت پیژندل شوي سوداګر دي، له ښاغلي توکاس د جرمني د سوداګرۍ شورا د افغانستان د څانګې مسؤل سره وکتل او د اروپايي هېوادونو سره د سوداګرۍ پراختیا او په افغانستان کې د پانګونې د جلبولو په اړه خبرې وکړې.

ض

ښاغلي مهمند د پانګونې موجودو فرصتونو په اړه خبرې وکړې او ویې ویل: په هېواد کې سراسري امنیت، د کوکنارو کر د بندیدو او اداري فساد د له‌منځه تلو له امله، په افغانستان کې د پانګونې لیوالتیا ورځ تر بلې زیاتیږي.

د اتاق لومړي مرستیال د حکومت له خوا د پانګوالو او سوداګرو لپاره د رامنځته شویو آسانتیاوو په اړه تفصیلي معلومات وړاندې کړل او د جرمني د سوداګرۍ شورا د رهبري پلاوي څخه یې وغوښتل چې په اروپا کې پانګوال، په ځانګړې توګه د جرمني هېواد پانګوالو وهڅوي چې په افغانستان کې پانګونه وکړي.

په دې ناسته کې د افغانستان د سوداګرۍ او پانګونې اتاق او د جرمني د سوداګرۍ شورا ترمنځ د همکاریو یو تفاهم لیک هم لاسلیک شو. د دې تفاهملیک له مخې، یاده شورا به هڅه کوي چې اروپايي پانګوال او په اروپا، په تېره بیا جرمني کې مېشت افغان تاجران، په افغانستان کې ګډو پانګونو ته وهڅوي. دغه راز، په تفاهملیک کې ټینګار شوی چې د افغانستان سوداګري له اروپايي هېوادونو، په ځانګړي ډول له جرمني سره زیاته شي، او له اروپايي هېوادونو غوښتنه شوې چې د افغانستان د صادراتي توکو لپاره اسانتیاوې برابرې کړي او ترجیحي تعرفې په پام کې ونیسي.

ښاغلي توکاس د اتاق د رهبري پلاوي هرکلی وکړ، د لا ډېرو همکاریو لپاره یې چمتووالی اعلان کړ، او د ښاغلي مهمند له بلنې یې مننه وکړه چې هغه یې د امام ابو حنیفه (رح) څلورم ملي او نړیوال نندارتون ته دعوت کړی و، او ژمنه یې وکړه چې په دغه نندارتون کې به ګډون وکړي.

 

 

 

 

 

 

د افغانستان د سوداګرۍ او پانګونې اتاق د مشرتابه پلاوي د نړیوالو اړیکو رئیس ښاغلي سید جاوید برهان، د مشرتابه پلاوي د غړي ښاغلي ضیاءالدین اچکزي، یو شمېر افغان او د سیمې هېوادونو له سوداګرو سره یو ځای، د ایران د اووم صاداراتي نندارتون په څلورمه ورځ کې د افغانستان او د سیمې هېوادونو د خصوصي سکتور ترمنځ د سوداګریزو اړیکو په ناسته کې ګډون وکړ او سوداګر یې په افغانستان کې پانګونې ته وهڅول.

ایراني سوداګرو د افغانستان له سوداګرو سره په بېلابېلو اقتصادي برخو، په ځانګړي ډول د کانونو د استخراج په برخه کې، د ګډو پانګونو د چمتووالي څرګندونه وکړه او د اتاق له مشرتابه یې وغوښتل چې د اړوندو حکومتي چارواکو په همغږۍ د دوی لپاره د پانګونې اسانتیاوې برابرې کړي.

ښاغلي برهان، د هېواد روان فرصتونه په تفصیل سره ګډون کوونکو سوداګرو ته تشریح کړل او هغوی یې افغانستان ته د سفر بلنه ورکړه ترڅو د خپلو پانګونو په اړه له حکومتي چارواکو او د سوداګرۍ او پانګونې له اتاق سره تفصیلي خبرې وکړي. هغه زیاته کړه: "موږ چمتو یو چې د ایران اسلامي جمهوریت سوداګر د افغانستان بازارونو سره وصل کړو، او غوره به دا وي چې د دواړو هېوادونو د سوداګرۍ اتاقونو ترمنځ یوه هوکړه‌لیک لاسلیک شي ترڅو چارې د یوه منظم کانال له لارې پر مخ یووړل شي."

ښاغلي اچکزي هم د افغانستان او ایران ترمنځ د سوداګرۍ په اړه نظر څرګند کړ او د سوداګرۍ د پراخوالي او اسانتیاوو پر رامنځته کولو یې ټینګار وکړ.

همداراز د همدې ورځې په پای کې، د اتاق مشرتابه د ایران د صنعت او سوداګرۍ له وزارت مسؤلینو سره هم وکتل، د نندارتون د تنظیم او د افغان سوداګرو د هرکلي په اړه یې خپل نظرونه وړاندې کړل، او د افغان سوداګرو وړاندیزونه او نیوکې یې هم له دوی سره شریکې کړې.

 

 

 

 

 

 

د افغانستان د سوداګرۍ او پانګونې اتاق مشرتابه پلاوي غړو، ښاغلي انجنیر سید جاوید برهان د مشرتابه پلاوي د نړیوالو اړیکو رئیس، او ښاغلي ضیاءالدین اچکزی د مشرتابه پلاوي غړی، د یو شمېر افغان او ایراني سوداګرو او پانګوالو په حضور کې، د ایران د کانونو او نفتو وزارت له مرستیال ښاغلي ډاکټر محمد بیات سره وکتل او د ګډو سوداګریزو او پانګوالو فرصتونو پر پراختیا بحث وشو.

دغه ناسته چې د ایران د اووم صادراتي نندارتون په څنډه کې، د ایران له وتلي پانګوال ډاکټر سید حسن موسوي په همغږۍ ترسره شوې وه، په کې د افغانستان، ایران او سیمې د هېوادونو تر منځ د سوداګریزو اړیکو د پراختیا او ګډو پانګونو پر اړتیا ټینګار وشو.

ښاغلي برهان، د افغانستان د عمومي امنیت د تامین او د پانګونې لپاره د مناسب چاپېریال د رامنځته کېدو په اړه ګډونوالو ته معلومات ورکړل، او له ایراني پانګوالو یې غوښتنه وکړه چې له شته فرصتونو ګټه پورته کړي او د زراعت، مالدارۍ او کانونو په برخو کې له افغان سوداګرو سره ګډې پانګونې ترسره کړي.

نوموړي د ایران او افغانستان تر منځ د سوداګریزو اړیکو، ترانزیټ او ګډو پانګونو د اسانتیاوو رامنځته کول ډېر مهم وبلل او پر لا زیاتو اسانتیاوو ټینګار وکړ.

د ایران د کانونو او نفتو وزارت مرستیال، د اتاق مشرتابه پلاوي او له دوی سره راغلو سوداګرو ته د ښه راغلاست ویلو ترڅنګ، دا ناسته یې د دواړو هېوادونو د پانګوالو د نظریاتو د تبادلې، د همکارۍ فضا د رامنځته کولو او د سوداګرۍ او پانګونې د ودې لپاره یوه ښه موقع وبلله او د خپلو همکاریو ډاډ یې ورکړ.

په دې ناسته کې د دواړو هېوادونو سوداګرو د نفت او ګاز، درملو، ساختماني موادو او پېتروکیمیاوي محصولاتو په برخو کې بحثونه وکړل او د درملو، ساختماني موادو او نورو برخو کې تفاهم لیکونه هم لاسلیک شول.

 

 

 

 

 

 

د افغانستان د سوداګرۍ او پانګونې اتاق مشرتابه پلاوي د دارالانشا رئیس خان محمد سرفراز باز، د ننګرهار د اتاق رئیس عتیق‌الله مومن‌زاده، د افغان-پاک ګډ اتاق اجرائیه رئیس نقیب‌الله صافي او یو شمېر سوداګرو، له ښاغلي نورالدین عزیزي، د صنعت او سوداګرۍ وزارت له سرپرست وزیر سره ولیدل او د افغان سوداګرو د ستونزو په اړه یې بحث او نظرونه تبادله کړل.

ښاغلي سرفراز باز، د هغو وارداتي توکو د بندېدو ستونزه یاده کړه چې د هند څخه اخیستل شوي او د واګه او کراچۍ بندرونو کې بند پاتې دي، او له ښاغلي وزیر نه یې وغوښتل چې د پاکستان له اړوندو ادارو سره په همغږۍ د یادو توکو د خوشې کولو په برخه کې همکاري وکړي.

ښاغلي عزیزی د خان محمد سرفراز باز او نورو سوداګرو تود هرکلی وکړ، د دوی خبرې یې واورېدې او ډاډ یې ورکړ چې د بند پاتې مالونو د خوشې کولو په برخه کې به هر اړخیزه همکاري کوي.

د یادونې وړ ده چې د افغانستان د سوداګرۍ او پانګونې اتاق او د حکومت اړوندو ادارو د هڅو په پایله کې، پرون د پاکستان حکومت ژمنه وکړه چې د واګه بندر به د افغانستان د ټولو صادراتي توکو لپاره پرانیزي.

 

 

 

 

 

د افغانستان د سوداګرۍ او پانګونې اتاق مشرتابه پلاوي د پاکستان له لوري د افغان سوداګرو د ترانزیټي ستونزو د حل په موخه له ښاغلي مولوي امیرخان متقي، د بهرنیو چارو وزارت له سرپرست سره وکتل او د شته ستونزو او د هغو د حل لارو چارو په اړه یې بحث او نظرونه تبادله کړل.

په دې لیدنه کې، د اتاق له خوا ښاغلي خان‌محمد سرفراز باز، د مشرتابه پلاوي د دارالانشاء رئیس، ښاغلی خان‌جان الکوزی، د مشرتابه پلاوي غړی او د افغان-پاک ګډ اتاق رئیس، ښاغلی سید پرویز سادات هوفیاني، د مشرتابه پلاوي غړی، ښاغلی عتیق‌الله مومن‌زاده، د ننګرهار د اتاق رئیس، ښاغلی همایون خواجه‌زاده، د کابل د اتاق تجارتي مرستیال، ښاغلی میرویس کتوازی، د ګډ اتاق د مشرتابه پلاوي غړی، ښاغلی نقیب‌الله صافي، د ګډ اتاق اجرائیه رئیس او د هېواد یو شمېر نور سوداګر ګډون درلود.

د افغانستان د سوداګرۍ او پانګونې اتاق مشرتابه، د کابل او ننګرهار د ولایتي اتاقونو له مشرتابه سره یو ځای، خپلې ټولې ستونزې، په ځانګړي ډول له پاکستان سره شته لنډمهاله او اوږدمهاله تجارتي ستونزې د بهرنیو چارو وزارت له مشرتابه سره شریکې کړې او ټینګار یې وکړ چې باید ژر تر ژره د حل لپاره اقدام وشي.

افغان سوداګرو، د هند او پاکستان ترمنځ د سیاسي اختلافاتو له امله د رامنځته شویو ترانزیټي ستونزو ته په اشارې، له ښاغلي وزیر څخه وغوښتل چې له پاکستاني او هندي لوریو سره خبرې اترې وکړي، تر څو د افغان سوداګرو مالونو ته د ترانزیټ آسانتیا برابره شي. دوی زیاته کړه چې دا مهال د افغان سوداګرو ډېر توکي د پاکستان په کراچۍ او واګه بندرونو کې بند پاتې دي چې باید ژر تر ژره د عبور اجازه ورکړل شي.

د بهرنیو چارو وزارت سرپرست، افغان سوداګرو ته د هر ډول همکارۍ ډاډ ورکړ او زیاته یې کړه چې د افغان سوداګرو له ټولو ستونزو خبر دی او د بهرنیو چارو وزارت تخنیکي همکاران د حل لپاره کار پیل کړی، چې ډېر ژر به له ډیپلوماټیکو لارو حل لارې وموندل شي. نوموړي همداراز د سیمې د سوداګرۍ او د ترانزیټ د بهیر اهمیت په اړه له مشرتابه پلاوي او سوداګرو سره مفصل معلومات شریک کړل.