د افغانستان د سوداګرۍ او پانګونې اتاق د عامل پلاوي د پالیسي او تخنیکي مرستیال ښاغلي محمد انور عارفي، د نړیوالو اړیکو مسؤل ښاغلي عبدالمتین غالب، او د صادراتو او پانګونې د پراختیایي اړیکو مسؤل ښاغلي ګل احمد حاجي زاده په شتون کې، د قزاقستان د سوداګرۍ او صنایعو د اتاق له عامل رئیس ښاغلي چنګیز خان ممانوف او د هغه له ملګري ټیم سره آنلاین لیدنه وکړه او د دواړو هېوادونو تر منځ د سوداګریزو اړیکو د پراختیا په اړه یې بحث او نظرونه تبادله کړل.

ښاغلي عارفي، قزاقستان د افغانستان یو ښه ملګری او د نیکو سوداګریزو اړیکو لرونکی هېواد یاد کړ او د دواړو هېوادونو د خصوصي سکتور ترمنځ د ګډو نندارتونونو او سوداګریزو ناستو د جوړولو پر اړتیا ټینګار وکړ. نوموړي، د افغان سوداګرو عمده ستونزې لکه د قزاقستان له لورې پر افغان صادراتي توکو، په ځانګړې توګه پر تازه مېوو، د لوړو ګمرکي تعرفو وضع کول، د معیاري سړې خونې نشتوالی د قزاقستان په ګمرکونو کې، او د بانکي اسانتیاوو نشتوالی یاد کړل او له ښاغلي چنګیز خان څخه یې وغوښتل چې د قزاقستان له حکومتي ادارو سره په همغږۍ د یادو ستونزو د حل لپاره ځانګړې پاملرنه وکړي.

ښاغلي عارفي، د افغان خصوصي سکتور له لورې له قزاق سوداګرو سره د ګډو پانګونو د لیوالتیا یادونه وکړه او د قزاقستان له اړوندو ادارو څخه د افغان سوداګرو لپاره د ویزې د اسانتیاوو نشتوالی یې د دواړو هېوادونو ترمنځ د سوداګرۍ او پانګونې د خنډونو په توګه یاد کړ. نوموړي له د قزاقستان د سوداګرۍ او صنایعو د اتاق له رئیس څخه وغوښتل چې د هغه هېواد سوداګر د امام ابوحنیفه (رح) په ملي او نړیوال نندارتون کې د ګډون لپاره وهڅوي.

ښاغلي چنګیز، د اتاق د عامل پلاوي د پالیسي او تخنیکي مرستیال وړاندیزونه واورېدل او د قزاق سوداګرو له خوا په افغانستان کې د مختلفو اقتصادي سکتورونو لپاره د پانګونې د علاقې یادونه وکړه. نوموړي ژمنه وکړه چې قزاق سوداګر به د امام ابوحنیفه (رح) په ملي او نړیوال نندارتون کې د ګډون لپاره تشویق کړي، د دواړو هېوادونو د اتاقونو د مشرانو ترمنځ به آنلاین ناسته ترسره شي، او د نږدې راتلونکي لپاره به د افغان ـ قزاق خصوصي سکتور ترمنځ د سوداګرۍ غونډه د قزاقستان په الماتا ښار کې جوړه کړي. نوموړي له ښاغلي عارفي څخه وغوښتل چې د هغو افغان سوداګرو نوملړ ورسره شریک کړي چې غواړي له قزاق سوداګرو سره په مختلفو اقتصادي برخو کې ګډې پانګونې وکړي.

 

 

 

 

 

 

د افغانستان د سوداګرۍ او پانګونې اتاق لومړي مرستیال، ښاغلي محمد یونس مهمند، د اتاق د عامل پلاوي د پالیسۍ او تخنیکي مرستیال ښاغلي محمد انور عارفي او د نړیوالو اړیکو د دیپارتمنت مسؤول ښاغلي عبدالمتین غالب په حضور کې، له ښاغلي ډاکټر نیکولای دی سازنوف، د روسیې د فدراسیون د سفارت سوداګریز او اقتصادي سلاکار سرخ، د اتاق په مرکزي دفتر کې لیدنه وکړه او د سوداګریزو اړیکو پراختیا او په ګډو پانګونو یې بحث او نظریات تبادله کړل.

ښاغلي مهمند، د روسیې د فدراسیون د سفارت د سوداګریز او اقتصادي سلاکار تود هرکلی وکړ او له روسیې سفارت څخه د اتاق د رهبري پلاوي او افغان سوداګرو ته د ویزې په برخه کې د اسانتیاوو برابرولو له امله د کازان بزنس فورم کې د ګډون لپاره مننه وکړه، او هیله یې څرګنده کړه چې افغان سوداګر وکولی شي سږ کال هم د روسیې د سن پیټرزبورګ اقتصادي کنفرانس کې د تېر کال په څېر پراخ ګډون وکړي.

د اتاق لومړي مرستیال، ښاغلي نیکولای دی سازنوف ته د امام ابو حنیفه (رح) د څلورم ملي او نړیوال نندارتون په اړه معلومات ورکړل او له هغه یې غوښتنه وکړه چې د روسیې د سوداګرو او شرکتونو د ګډون زمینه برابره کړي. نوموړي ډاډ ورکړ چې اتاق به د اړوندو حکومتي ارګانونو سره په همغږۍ کې د بلنې لیکونو لېږلو او د ویزې د صادرولو برخه کې همکاري وکړي.

ښاغلي نیکولای دی سازنوف، له اتاق سره د روسیې سفارت د ښو همکاریو ستاینه وکړه او ژمنه یې وکړه چې د دواړو هېوادونو ترمنځ د سوداګرۍ او ګډو پانګونو د پراختیا، او همداراز د افغان سوداګرو ته د روسیې د ویزو د برابرولو او د سن پیټرزبورګ اقتصادي کنفرانس او نورو نندارتونونو او کنفرانسونو کې د ګډون لپاره، هر ډول همکاري کوي.

 

 

 

 

 

 

د افغانستان د سوداګرۍ او پانګونې اتاق مشرتابه پلاوی: ښاغلي خان محمد سرفراز باز د اتاق د مشرتابه پلاوي د دارالانشا رئیس، ښاغلی سید پرویز سادات هوفیانی د مشرتابه پلاوي غړی او ښاغلی میرزمان پوپل د عامل پلاوي د مالي او اداري مرستیال سرپرست، روسیې هېواد ته د خپل سفر په ترڅ کې، د مسکو ښار د افغان متشبثینو له سوداګریزو مارکیټونو لیدنه وکړه او د هغوی ستونزې یې واورېدې.

افغان متشبثینو د اتاق مشرتابه پلاوي ته ښه راغلاست وویلو او خپلې لویې سوداګریزې ستونزې یې ورسره شریکې کړې. دوی له مشرتابه پلاوي وغوښتل چې د دغو ستونزو د حل لپاره جدي پاملرنه وکړي.

ښاغلي سرفراز باز، د مسکو مېشتو افغان متشبثینو ستونزې په دقت واورېدې، د هېوادونو په اقتصادي ودې او بیا رغونه کې د سوداګرو رول مهم وباله، او ډاډ یې ورکړ چې د روسیې له حکومت سره د لاسلیک شوې همکارۍ تفاهمنامې پر بنسټ، به یادې ستونزې د اړوندو حکومتي مسوولینو سره شریکې کړي. نوموړي همداراز افغان سوداګر د افغانستان په بېلابېلو اقتصادي سکتورونو کې پانګونې ته وهڅول.

ښاغلي پوپل، له ټولو افغان متشبثینو نه چې په مسکو کې مېشت دي غوښتنه وکړه چې ټولې ستونزې او وړاندیزونه یې په لیکلي بڼه اتاق ته وسپاري. تر څو اتاق وکولای شي د یادو ستونزو په حل کې د هېواد اړوندو حکومتی ادارو سره په همغږي کې عملي ګامونه پورته کړي.

 

 

 

 

 

د افغانستان د سوداګرۍ او پانګونې اتاق د روسیې د خصوصي سکتور سره د ګډو پانګونو د جذب، د ترانزیټي اسانتیاوو رامنځته کولو، د دواړو هېوادونو د خصوصي سکتور ترمنځ د اقتصادي همکاریو پراختیا، د افغان صادراتي توکو لپاره د ترجیحي تعرفو د وړاندیز، ستونزو د پېژندنې او پر وخت د حل په موخه، له د روسیې د سوداګرۍ او صنایعو اتاق سره د همکاریو تفاهم‌لیک لاسلیک کړ.

یاد تفاهم‌لیک د افغانستان د سوداګرۍ او پانګونې اتاق د لومړي مرستیال ښاغلي محمد یونس مهمند او د روسیې د سوداګرۍ او صنایعو اتاق د مرستیال لخوا، د لاندې ښاغلیو: د افغانستان د ریاست‌الوزرا اقتصادي مرستیال ملا عبدالغني برادر، د روسیې د صدراعظم مرستیال الکسي اورچوک، د صنعت او تجارت وزارت سرپرست نورالدین عزیزی، د ترانسپورت او هوایي چلند وزارت سرپرست، د اتاق د تجارتي مرستیال ښاغلي خیرالدین مایل احمدي، د مشرتابه پلاوي د دارالانشأ رئیس ښاغلي خان محمد سرفراز باز، د مشرتابه پلاوي غړي سلطان محمد صافي، سید پرویز سادات هوفیاني، او داود یوسفزي، د عامل پلاوي د مالي او اداري مرستیال سرپرست میرزمان پوپل، د ننګرهار د اتاق غړی ښاغلي گل مراد عرب، د نیمروز د خونې رئیس حاجي عبیدالله نورزی او د دواړو هېوادونو یو شمېر سوداګرو او پانګه‌والو په حضور کې د افغانستان ـ روسیې د سوداګریز فورم د اختتامیې مراسمو په ترڅ کې، د تاتارستان جمهوریت په کازان ښار کې لاسلیک شو.

 

 

 

 

 

د افغانستان د سوداګرۍ او پانګونې اتاق لومړي مرستیال، محترم محمد یونس مهمند، د پالیسۍ او تخنیکي مرستیال ښاغلي محمد انور عارفي، د دولت سره د اړیکو د دیپارتمنت مسؤول ښاغلي صمیم هاشمي، او د بریښنایي وسایلو د تخصصي کمېټې رئیس ښاغلي محمد ابراهیم رسولی په حضور کې، له یو شمېر هغو دوکاندارانو سره لیدنه وکړه چې د ۱۳۹۷ هـ.ش کال د اورلګیدنې له امله یې په خیرخواه مارکېټ کې زیان لیدلی و، او د دوی ستونزې یې واورېدې.

ښاغلي رسولی، د ۱۳۹۷ هـ.ش کال د کابل د نادر پشتون سړک د اورلګیدنې په اړه معلومات ورکړل، چې په ځانګړې توګه خیرخواه مارکېټ کې ۸۳۸ دوکانونه سوځیدلي وو او شاوخوا ۱۱۴ میلیونه ډالر زیان یې دوکاندارانو ته اړولی و. هغه زیاته کړه، چې د هغه وخت د قرارداد او طرزالعمل پر بنسټ باید دوکانونه له بیارغونې او د نرخونو له ټاکلو وروسته، اصلي متضررینو ته وسپارل شي، خو اوس داسې ښکاري چې ډېری متضررین خپلو حقونو ته نه دي رسېدلي. نوموړي له اتاق وغوښتل چې د دوی ستونزې اړوندو حکومتي ادارو ته ورسوي او د عادلانه توزیع په برخه کې ورسره همکاري وکړي.

د خیرخواه مارکېټ دوکاندارانو هم د خپلو موجوده ستونزو په اړه خبرې وکړې، په ځانګړې توګه د دوکانونو ناعادلانه ویش، چې د پخوا ټاکل شویو نرخونو خلاف تر سره شوی دی. هغوی غوښتنه وکړه چې مخکې تصویب شوی قرارداد او طرزالعمل دې تطبیق شي، او ادعا یې وکړه چې د ویش په بهیر کې عدالت نه دی مراعات شوی، او اصلي متضررین د عادلانه ویش غوښتونکي دي.

ښاغلي مهمند، له خیرخواه مارکېټ دوکاندارانو څخه د دوی د ستونزو تر اورېدو وروسته وویل، چې د افغانستان د سوداګرۍ او پانګونې اتاق تل د خصوصي سکتور د زیانمنو شویو غړو، په ځانګړې توګه د هغو سوداګرو او دوکاندارانو ستونزو ته چې په پیښو او اورلګیدنو کې زیانمن شوي، جدي پاملرنه کړې ده. نوموړي زیاته کړه، چې د نادر پشتون د سړک اورلګیدنه، په ځانګړې توګه د خیرخواه مارکېټ پېښه، د کابل په زړه کې یوه ستره ضایعه وه چې ډېر زیانونه یې واړول، او اتاق هڅه وکړه چې بیارغول شوي دوکانونه اصلي متضررینو ته وسپارل شي.

ښاغلي مهمند ټینګار وکړ، چې د اتاق مشرتابه د دوکانونو د عادلانه ویش ملاتړ کوي، او له معترضو دوکاندارانو یې وغوښتل، چې له منځه دې پنځه تنه د استازو په توګه وټاکي، څو اتاق وکولای شي له هر اړخیزې ارزونې او له اړوندو خواوو سره تر خبرو وروسته، له حکومتي ادارو سره په همغږۍ، عملي ګامونه واخلي.