د افغانستان د سوداګرۍ او پانګونې اتاق، د ترانسپورتي شرکتونو د ستونزو د حل او د هغو موټر چلوونکو لپاره د موقتي اسنادو د ترلاسه کولو د مناسبو لارو موندلو په موخه، چې د افغان سوداګرو مالونه پاکستان ته انتقالوي، ناسته ترسره کړه.
 
یاده ناسته د اتاق د کنفرانسونو په تالار کې د ښاغلي محمد یونس مهمند، د سوداګرۍ او پانګونې اتاق د لومړي مرستیال، ښاغلي شیرین آغا سخي، د اتاق د مشرتابه پلاوي د مالي رئیس، ښاغلي میر زمان پوپل، د عامل پلاوي د مالي او اداري مرستیال، ښاغلي نقیب الله صافي، د افغان-پاک ګډ اتاق اجرائیوي رئیس، ښاغلي میر افغان صافي، د ترانسپورت د شورا رئیس، او ګڼ شمېر سوداګرو او پانګوالو په حضور کې ترسره شوه.
په پیل کې، ښاغلي پوپل د ترانسپورت سکتور غړو ته ښه راغلاست ووایه او د دې ناستې اساسي هدف یې د پاکستان د حکومت د وروستي تصمیم په اړه د ترانسپورتي شرکتونو نظریات او وړاندیزونه راټولول وبلل. نوموړي وویل چې د پاکستان حکومت له موټر چلوونکو او کلینرانو څخه د پاسپورت او ویزې غوښتنه کړې، چې دې مسئلې د افغان سوداګرو ترانسپورتي فعالیتونه له ستونزو سره مخ کړي. هغه له ټولو ګډونوالو وغوښتل چې خپلې طرحې د ستونزو د حل لپاره له اتاق سره شریکې کړي.
ښاغلي مهمند، د ترانسپورت رول یې د ترانزیټ په وده، د سوداګرۍ او اقتصاد پیاوړتیا، د تجارتي توکو تبادله، د لګښتونو کمښت، د کاري فرصتونو ایجاد، د امنیت او سیمه‌ییزو همکاریو پیاوړتیا، د سیاسي اړیکو پراختیا، د ترانسپورتي پالیسیو همغږي، د زیربناوو او ټکنالوژۍ وده، د دوامداره پرمختګ ملاتړ، او د پولو اقتصادي وده کې مهم وباله. نوموړي له سوداګرو وغوښتل چې د یادو ستونزو د حل لپاره خپل نظریات له اتاق سره شریک کړي.
ښاغلي مهمند ټینګار وکړ چې د خصوصي سکتور غړي او اړوند حکومتي ادارې باید پرله‌پسې ناستې ترسره کړي، څو د موټر چلوونکو او کلینرانو د پاکستان ته د داخلېدو مناسب حل لارې پیدا شي. هغه د اتاق عامل پلاوي ته لارښوونه وکړه چې د افغان سوداګرو ټولې ترانسپورتي ستونزې وڅېړي او د حل لپاره اقدام وکړي. نوموړي، ګډونوالو ته ډاډ ورکړ چې د سوداګرۍ او پانګونې اتاق به د پاکستان د حکومت د وروستي اقدام (د ویزې د لګولو پرېکړې) په اړه د سوداګرو او ترانسپورتي شرکتونو طرحې له اړوندو حکومتي چارواکو سره شریکې کړي.
په ناسته کې ګډونوالو سوداګرو او ترانسپورتي شرکتونو د پاکستان د حکومت د وروستي تصمیم په اړه خپل نظریات وړاندې کړل. هغوی د پاکستان او نورو ګاونډیو هیوادونو لخوا د ویزې د اسانتیاوو نه شتون د سوداګرۍ او ترانسپورتي فعالیتونو په وړاندې لوی خنډ وباله او له اتاق څخه یې وغوښتل چې د دې ستونزو د حل لپاره جدي اقدامات وکړي.
 
 
 
 
شنبه، د سلواغې ۲۰مه، ۱۴۰۳
 
 

د افغانستان د سوداګرۍ او پانګونې اتاق، د خصوصي سکتور د ستونزو د حل په موخه او د بېلابېلو سکتورونو لپاره د تخصصي کمیټو د جوړولو د لړۍ په دوام، د برښنايي وسایلو تخصصي کمیټه او د یادې کمیټې مشرتابه غړي د ښاغلي محمد یونس مهمند، د سوداګرۍ او پانګونې اتاق د لومړي مرستیال، ښاغلي میر زمان پوپل، د اتاق د عامل پلاوي د مالي او اداري مرستیال، ښاغلي عبدالسلام کوهي، د اتاق حقوقي سلاکار او د یادې کمیټې د ګڼو غړو په حضور کې وټاکل.
 
یاد غونډه د اتاق د کنفرانسونو په تالار کې ترسره شوه، چې په پیل کې ښاغلي پوپل د ګډون کوونکو سوداګرو حضور ته ښه راغلاست ووایه، د اتاق د تخصصي کمیټو د جوړولو په اړه یې معلومات ورکړل، او له هغوی یې وغوښتل چې وروسته له دې خپلې ستونزې د دې کمیټې له لارې له اتاق سره شریکې کړي. نوموړي د سوداګرۍ او پانګونې اتاق د خصوصي سکتور ملاتړی وباله او ویې ویل چې اتاق د حکومت، بهرنیو مرستندویانو، او د سیمې او نړۍ د خصوصي سکتور استازو ترمنځ د اړیکو پُل دی.
ورپسې، ښاغلي مهمند د هېواد د اوسني وضعیت په اړه خبرې وکړې او د اتاق د نړیوالو اړیکو یادونه یې وکړه. نوموړي د سوداګرو د پیسو د لېږد ستونزې او د خصوصي سکتور د پیسو کنګل کېدل له لویو خنډونو څخه وبلل، چې د خصوصي سکتور د ودې مخه نیسي. هغه د دې پیسو آزادېدل د اقتصاد د ودې، د هیواد د بیا رغونې، او د خلکو لپاره د کاري فرصتونو د ایجاد لپاره اړین وبلل.
همداراز، ښاغلي مهمند د ګاونډیو هیوادونو له لوري د ګمرکي ستونزو رامنځته کول د نړیوالو تجارتي قوانینو خلاف وبلل، خو د ایران، چین، او ترکیې له لوري د ویزو ورکولو اسانتیاوې یې د تجارتي اړیکو د ښه والي نښه وبلله. هغه د حکومت د مشرتابه له لارښوونو څخه ملاتړ څرګند کړ، چې په ګډه باید لوی سهامي شرکتونه جوړ شي، او له ټولو الکترونیکي شرکتونو یې وغوښتل چې په ګډه یو لوی برښنايي تولیدي شرکت په هېواد کې جوړ کړي.
د سوداګرۍ او پانګونې اتاق لومړي مرستیال د خصوصي سکتور د هڅو ستاینه وکړه، چې د خلکو لپاره د کار زمینه برابروي او د افغانستان بانک سره د افغانۍ د ارزښت په ساتلو کې مرسته کوي. نوموړي له سوداګرو وغوښتل چې په خپلو راکړو ورکړو کې له افغانۍ څخه استفاده وکړي، او ګډونوالو ته یې ډاډ ورکړ چې اتاق به د هغو سوداګرو لپاره د ځمکې د وېش په برخه کې هر اړخیزه همکاري وکړي، چې غواړي تولیدي فابریکې جوړې کړي.
ښاغلي مهمند، د برښنايي وسایلو رول د خلکو د ژوند د کیفیت په لوړولو، د انرژۍ د انتقال او ویش، او د نوې تکنالوژۍ په برخه کې مهم وباله، او له سوداګرو یې وغوښتل چې خپلې واردات د نړیوالو معیارونو مطابق برابر کړي.
په دې غونډه کې، ښاغلی محمد ابراهیم رسولی د برښنايي وسایلو د کمیټې د رئیس، او ښاغلي عبدالحمید حمیدي او مرتضی اسحاقزي د دې کمیټې د مرستیالانو په توګه وټاکل شول.
ښاغلي رسولی د دې غونډې د جوړولو په برخه کې د سوداګرۍ او پانګونې اتاق له همکاریو څخه مننه وکړه، د دې کمیټې له لارې د ستونزو د شریکولو او له اتاق سره د همغږۍ ژمنه یې وکړه، او له مشرتابه یې وغوښتل چې د برښنايي وسایلو د سکتور د غړو لپاره په ملي او نړیوالو نندارتونونو کې د ګډون اسانتیاوې برابرې کړي.
 
 
 
شنبه، د سلواغې ۲۰مه، ۱۴۰۳
 
 

ښاغلي محمد یونس مهمند، د افغانستان د سوداګرۍ او پانګونې اتاق لومړي مرستیال، د یوناما د اقتصادي چارو له استازي ښاغلي کارول پاول زینتک سره په کابل کې وکتل.
 
په دې ناسته کې، ښاغلي میرزمان پوپل، د اتاق د عامل پلاوي د مالي او اداري معاونیت سرپرست، عبدالمتین غالب، د اتاق د نړیوالو اړیکو د دیپارتمنت مسوول او مجیب الرحمن عثماني د یوناما د دفتر همکار، هم حضور درلود.
ښاغلي مهمند، ښاغلي کارول ته د ښه راغلاست ویلو ترڅنګ، د افغانستان د سوداګرۍ او پانګونې اتاق د فعالیتونو او لاسته راوړنو، او د هېواد د سوداګریزو حالاتو په اړه معلومات وړاندې کړل. هغه، زیاته کړه چې اتاق د هېواد په بېلابېلو ولایتونو کې اقتصادي کنفرانسونه د سوداګریزو ننګونو او فرصتونو د پیژندلو لپاره جوړ کړي، او دا بهیر به دوام ولري.
د اتاق لومړي مرستیال، په ټول هېواد کې د امنیت ټینګښت، د اداري فساد له منځه تلل، د کوکنارو د کرکیلې بندیدل، او د افغانیو د ارزښت ثبات د بهرنیو پانګونو لپاره ښه فرصتونه وبلل او د پانګوالو لپاره یې د لا زیاتو سوداګریزو اسانتیاوو د برابرولو یادونه وکړه. هغه، د افغانستان د خصوصي سکتور د استازو په نړیوالو پروګرامونو کې د حضور پر اهمیت ټینګار وکړ او غوښتنه یې وکړه چې د اتاق مشرتابه دې نړیوالو پروګرامونو ته وبلل شي.
ښاغلي مهمند، د خصوصي سکتور لویې ستونزې، په ځانګړي ډول د بانکدارۍ مشکلات، په بهرنیو بانکونو کې د سوداګرو د شتمنیو کنګل کېدل، د معیاري سړو خونو نشتوالی او د افغان سوداګرو لپاره د اروپایي هېوادونو د ویزو د ترلاسه کولو د اسانتیاوو نشتون یادونه وکړه او له یوناما څخه یې د سوداګرو د ستونزو په حل او د قطر هېواد کې د افغانستان د خصوصي سکتور د کاري ډلې د ناستې لپاره د اتاق د مشرتابه د ګډون په برخه کې د همکارۍ غوښتنه وکړه.
ښاغلي کارول پاول زینتک، د افغانستان د سوداګرۍ او پانګونې اتاق له مشرتابه څخه د یوناما له دفتر سره د همکارۍ له امله مننه وکړه او اتاق یې د یوناما کاري شریک وباله. هغه د اتاق د لومړي مرستیال لخوا د مطرح شوو موضوعاتو په اړه د هر اړخیزې همکارۍ ژمنه وکړه.
 
 
 
 
چهارشنبه، د سلواغې ۱۷مه، ۱۴۰۳
 
 

ښاغلي محمد یونس مهمند، د افغانستان د سوداګرۍ او پانګونې اتاق لومړي مرستیال، د ښاغلي میرزمان پوپل، د عامل پلاوي د مالي او اداري مرستیال په حضور کې، له ښاغلي جَنگ اونال، په افغانستان کې د ترکیې له سفیر سره وکتل او د دواړو هېوادونو ترمنځ د سوداګریزو اړیکو د پراخوالي په اړه یې بحث او نظرونه تبادله کړل.
 
ښاغلي مهمند، د افغانستان له خصوصي سکتور سره د ترکیې د دولت او سفارت له تلپاتې ملاتړ څخه د مننې ترڅنګ، ترکیه یې یو نېک دوست او له افغانستان سره دیني او کلتوري مشترکات لرونکی هېواد وباله. هغه، د سوداګریزو تبادلو زیاتوالی د دواړو هېوادونو د اقتصاد د ودې لپاره مهم وباله.
د اتاق لومړي مرستیال، د افغان سوداګرو لویې ستونزې یادې کړې او ویې ویل چې د افغانستان د صادراتي مالونو لپاره د ترانزیتي اسانتیاوو نشتون یو جدي خنډ دی. هغه د صادراتي توکو د لېږد، د افغان سوداګرو لپاره د ویزې د ورکړې، د سوداګریزو – اقتصادي اړیکو د پیاوړتیا، د کاري فرصتونو د رامنځته کولو، د لېږد او ترانسپورت د لګښتونو او وخت د کمولو او د دواړو هېوادونو د بنسټیزې پراختیا لپاره د اسانتیاوو برابرول مهم وبلل. هغه د ترکیې له سفیر څخه وغوښتل چې د یادو ستونزو د حل لپاره جدي پاملرنه وکړي.
ښاغلي جَنگ اونال، د اتاق لومړي مرستیال هرکلی یې وکړ او ډاډ یې ورکړ چې د دواړو هېوادونو ترمنځ د سوداګریزو اړیکو د ښه والي او افغان سوداګرو ته د ویزې د ورکړې په برخه کې به همکاري وکړي.
 
 
 
 
پنجشنبه، د ۱۴۰۳ د سلواغې ۱۸مه
 
 

ښاغلي محمد یونس مهمند، د افغانستان د سوداګرۍ او پانګونې اتاق لومړی مرستیال، د ښاغلي میرزمان پوپل، د اتاق د عامل پلاوي د مالي او اداري مرستیال سرپرست، او ښاغلي صمیم هاشمي، د حکومت سره د اړیکو د دیپارتمنت مسوول، په حضور کې له ښاغلي عزیزالله گردیزی، د پکتیا د سوداګرۍ او پانګونې اتاق له رئیس، او د یاد ولایت له سوداګرو سره د اتاق په مرکزي دفتر کې وکتل او د دوی ستونزې یې واورېدلې.
 
ښاغلي گردیزي د پکتیا مستوفیت له لوري د مالیاتو تخمینې ارزونه د یاد ولایت د سوداګرو اساسي ستونزه وبلله او د اتاق له لومړي مرستیال څخه یې وغوښتل چې د مالیې وزارت د عوایدو او ګمرکاتو له معینیت سره د همغږۍ له لارې د دوی ستونزو ته ځانګړې پاملرنه وکړي.
ښاغلي مهمند، ښاغلي عزیزالله گردیزي او ورسره مل ټیم راتګ ته ښه راغلاست ووايه، د هېواد د اقتصاد په وده او بیا رغونه کې یې د سوداګرو رول مهم وباله، او د پکتیا د سوداګرۍ او پانګونې اتاق له رئیس څخه یې وغوښتل چې د سوداګرو ټولې ستونزې په رسمي توګه اتاق ته وسپاري، ترڅو د اتاق مشرتابه یې له اړوندو دولتي ادارو سره شریکې کړي. نوموړي مالیه د اقتصاد د دوران یو اصل وباله او په ګمرکونو کې د مالیاتو د واحد اخېستنې سیستم یې د سوداګرو د سوداګریزو اسانتیاوو د رامنځته کولو لپاره مهم وباله.
 
 
 
 
چهارشنبه، د سلواغې ۱۷مه، ۱۴۰۳
 
 

ښاغلي محمد یونس مهمند، د افغانستان د سوداګرۍ او پانګونې اتاق لومړي مرستیال، د ښاغلي عزیزالله گردیزي، د پکتیا د سوداګرۍ او پانګونې اتاق رئیس، او د یاد ولایت د یو شمېر سوداګرو په حضور کې، د مالیې وزارت د عوایدو او ګمرکاتو له معین، ښاغلي عبدالمتین سعید، سره وکتل.
 
ښاغلي مهمند، د مالیې وزارت د عوایدو او ګمرکاتو معینیت د خصوصي سکتور سره د تلپاتې همکارۍ له امله مننه وکړه او د پکتیا د سوداګرو مالي ستونزې یې له ښاغلي معین صاحب سره شریکې کړې، او له هغه څخه یې وغوښتل چې د یادو ستونزو په حل کې جدي پاملرنه وکړي.
د پکتیا د سوداګرۍ او پانګونې اتاق رئیس او د دغه ولایت سوداګرو، د مستوفیت له لوري د مالیاتو د اټکلې ارزونې ستونزو ته اشاره وکړه او د عوایدو او ګمرکاتو له معین څخه یې د ځانګړې پاملرنې غوښتنه وکړه.
ښاغلي عبدالمتین سعید، د افغانستان د سوداګرۍ او پانګونې اتاق د لومړي مرستیال او د پکتیا ولایت د سوداګرو تود هرکلی وکړ، د هغوی ستونزې یې واورېدې، او ژمنه یې وکړه چې د هغوی د ستونزو د حل لپاره به لازمې همکارۍ وکړي.
 
 
 
 
چهارشنبه، د سلواغې ١٧مه، ١٤٠٣
 
 

مقالات دیگر...