ښاغلي محمد یونس مهمند، د افغانستان د سوداګرۍ او پانګونې اتاق لومړي مرستیال، فراه ولایت ته د خپل کاري سفر په ترڅ کې، چې ښاغلی میرزمان پوپل، د اتاق د مالي او اداري مرستیال سرپرست اوحاجی غلام دنمیروزولایت داتا مرستیال یې ملتیا کوله، له ښاغلو: دین محمد نعمتي، د فراه ولایت د اتاق رئیس، ذکریا طاهر، د یاد اتاق مرستیال، او یو شمېر سوداګرو سره یې ولیدل او د دوی ستونزې یې واورېدې.

ښاغلي دین محمد نعمتي، د ښاغلي مهمند او ورسره د مل پلاوي هرکلی وکړ او د فراه سوداګرو لویې ستونزې یې د برېښنا نشتون د تولیدي فابریکو لپاره، د فراه مرکز څخه تر ایران پولو پورې د سړک خرابوالی، د افغان وسایطو درنې جریمې د ایران په خاوره کې، او د سرحدي اسانتیاوو نشتون یاد کړل او له اتاق څخه یې د هراړخیزې همکارۍ غوښتنه وکړه.

سوداګرو وویل، فراه که څه هم زرګونه شنې خونې لري او کرنیز محصولات پکې تولیدېږي، خو د دغو محصولاتو د ساتنې لپاره هېڅ سړې خونې نشته. هغوی وغوښتل چې د اتاق مشرتابه دې دا ستونزه له اړوندو حکومتي چارواکو سره شریکه کړي.

ښاغلي مهمند، فراه یو له مهمو کرنیزو، فرهنګي او د ایران سره د ترانزیټي وصل ولایتونو څخه وباله او د دې ولایت رول یې د صادراتو او د هېواد د اقتصاد د پراختیا لپاره مهم وباله. نوموړي د مشرتابه د لارښوونو په اړه ګډونوالو ته معلومات ورکړل چې موخه یې د خصوصي سکتور غړو ته د اسانتیاوو برابرول دي، او د افغان او ایراني سوداګرو لوري د کرنې او صنعت په برخو کې په ګډو پانګونو ټینګار وکړ.

ښاغلي مهمند وړاندیز وکړ چې د دې ولایت سوداګر دې سره یو موټی شي او لویې سهمي کمپنۍ دې جوړې کړي، ترڅو د برېښنا تولید او نورو لويو پروژو کې ګډې پانګونې وکړي. نوموړي د حکومت له‌خوا د خصوصي سکتور لپاره د لا زیاتو اسانتیاوو رامنځته کول د خلکو لپاره د کار زمینه برابرولو برخه کې مهم وبلل، او د مسکو د نندارتون یادونه یې وکړه چې ژر به ترسره شي. نوموړي له سوداګرو وغوښتل چې په یاد نندارتون کې ګډون وکړي او د افغانستان ځانګړي، په تېره کرنیز، محصولات نندارې ته وړاندې کړي.

د اتاق لومړي مرستیال له ټولو خصوصي سکتور غړو د غوښتنه وکړه چې له ایران سره د سوداګریزو تبادلو په ځانګړي ډول بندري ستونزې دې د سوداګرۍ او پانګونې اتاق له مشرتابه سره شریکې کړي، څو دا ستونزې د ایران له محترم سفیر سره شریکې شي او د حل لپاره یې هڅې وشي.

ښاغلي میرزمان پوپل، د افغانستان د صادراتو، په ځانګړي ډول د فراه ولایت د صادراتي محصولاتو او پر خلکو د مستقیم اقتصادي اغېز په اړه خبرې وکړې. همداراز، د صادراتو تخنیکي پروسې موضوعات یې تشریح کړل او د فراه د اتاق له مسوولینو یې غوښتنه وکړه چې د دغه ولایت د سوداګرو ستونزې باید له مرکزي دفتر سره تل شریکې کړي ترڅو ژر تر ژره د حل لپاره اقدام وشي.

 

 

 

یاده غونډه د افغانستان د خصوصي سکتور د ملاتړ په موخه، د یوناما، نړیوال بانک، د اسیا پراختیایي بانک، د امریکا متحده ایالاتو او یو شمېر نورو هېوادونو د استازو په ګډون، د ترکېې په استانبول ښار کې ترسره شوه.

په دې غونډه کې د افغانستان د خصوصي سکتور استازیتوب ښاغلي توکل احمدیار، د افغانستان د سوداګرۍ او پانګونې اتاق عمومي رئیس، ښاغلي محمد یونس مهمند، د اتاق لومړی مرستیال، ښاغلي بهادر خیرخواه، د مشرتابه پلاوي غړی، او یو شمېر افغان سوداګرو او پانګوالو وکړ.

سربېره پر دې، ښاغلي زېشان شیخ، د افغانستان او پاکستان لپاره د نړیوال مالي بنسټ لوړپوړی مدیر، اندریکا رتوات، په افغانستان کې د یوناما د ځانګړي استازي مرستیال، او آغلې وژمه مهمند کروخېل، د نړیوال بانک استازې، هم برخه اخیستې وه.

ښاغلي توکل احمدیار د هېواد د اقتصادي وضعیت، د سوداګرۍ او پانګونې اتاق د فعالیتونو او د خصوصي سکتور د رول په اړه هر اړخیز معلومات ورکړل. نوموړي د خصوصي سکتور په ګډون د لویو اقتصادي پروژو پر ارزښت ټینګار وکړ.

د اتاق رئیس وویل، د اتاق مشرتابه تل هڅه کړې چې د ملي او سیمه‌ییزو اقتصادي پروژو د اهمیت په نظر کې نیولو سره، دا پروژې د نړیوالو بنسټونو په همکارۍ بریالۍ پلي شي، او خصوصي سکتور هم پکې فعاله ونډه واخلي.

ښاغلي احمدیار وویل، د خصوصي سکتور، په ځانګړي ډول د کوچنیو او متوسطو تشبثاتو رول د هېواد د اقتصاد، کرنې، باغدارۍ، مالدارۍ، او کورني اقتصاد د ودې لپاره ډېر مهم دی. نوموړي د نړیوالو بنسټونو مالي ملاتړ د دغو تشبثاتو لپاره ارزښتناک وباله او ټینګار یې وکړ چې که نړیوال بنسټونه د افغانستان خصوصي سکتور ته ملاتړ ورکړي، دوی کولای شي سترې او بنسټیزې پروژې پلي کړي. همدارنګه، د سوداګرۍ او پانګونې اتاق به د خصوصي سکتور د اصلي استازي په توګه، د دغو پروژو په پلي کولو کې خپله هر اړخیزه همکاري ترسره کړي.

ښاغلي محمد یونس مهمند د افغانستان پر شته فرصتونو خبرې وکړې او د ټول هېواد امنیت، د کوکنارو کښت بندیز، او په حکومتي ادارو کې د فساد له منځه وړل یې د اقتصادي او بنسټیزو پروژو د پلي کېدو لپاره ښه زمینه وبلله. نوموړي دا غونډه د خصوصي سکتور د ملاتړ لپاره اغېزمنه وبلله، او ټینګار یې وکړ چې دا ډول غونډې باید دوام ومومي. هغه زیاته کړه چې د افغانستان داخلي وضعیت هغه ډول نه دی لکه څنګه چې بهر ته انځورېږي، او دا ډول غونډو ته د هېواد دننه هم زمینه برابره ده.

آغلې وژمه مهمند کروخېل د نړیوال بانک په استازیتوب خبرې وکړې، او د خصوصي سکتور د ملاتړ او د دا ډول غونډو د دوام ژمنه یې وکړه.

په غونډه کې، د افغانستان د سوداګرۍ او پانګونې اتاق د کورنیو تولیداتو او صنایعو د ملاتړ پر ارزښت هم ټینګار وکړ.

سربېره پر دې، له خصوصي سکتور سره د همکاریو عمده برخې، لکه د مالي او بانکدارۍ زیربناوو پیاوړتیا، د کورنیو تولیداتو کارونه، له خصوصي سکتور سره شراکت، د کوچنیو او متوسطو صنعتونو پراختیا، کرنیزو تشبثاتو پراختیا، د مهارتونو وده، پور ته لاسرسی، او د سوداګریز چاپېریال اصلاحاتو ملاتړ هم وڅېړل شول.

 

 

 

 

 

 

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د هرات ولایت د سوداګرۍ او پانګونې اتاق د مشرتابه پلاوي سره، د ایران اسلامي جمهوریت د لوړپوړي اقتصادي پلاوي په فوق‌العاده سوداګریزه ناسته کې ګډون وکړ. دا ناسته د ایران لپاره د افغانستان د لوړپوړو دیپلوماتانو، د سکتوري ادارو رئیسانو، سوداګرو، پانګوالو او صنعتکارانو په حضور کې جوړه شوې وه.

ښاغلي مهمند د افغانستان پر اقتصادي وضعیت، د هرات ولایت پر سوداګریز او اقتصادي ارزښت، د افغانستان د سوداګرۍ او پانګونې اتاق د ۹۴ کلنو فعالیتونو، د پانګونې پر موجودو فرصتونو او له ایران سره د سوداګرۍ د زیاتوالي په ځانګړي ډول په وروستیو کلونو کې، خبرې وکړې. نوموړي د اقتصادي اړیکو پراخېدو او د ګډو پانګونو پر اړتیا ټینګار وکړ.

هغه سرتاسري امنیت، د کوکنارو کښت بندیز او د حکومتي ادارو له فساد سره مبارزه د ګډو پانګونو او اقتصادي-زیربنایي پروژو د پلي کولو لپاره مناسب فرصتونه وبلل.

د بهرنیو چارو وزارت د هرات استازي د افغانستان د لوړ اقتصادي ظرفیتونو یادونه وکړه او څرګنده یې کړه چې د دواړو هیوادونو تر منځ د سوداګریزو اړیکو پیاوړتیا د اقتصادي ودې سبب کیږي.

د هرات د سوداګرۍ او پانګونې اتاق رئیس ښاغلي محمد یونس قاضي‌زاده، د دواړو هیوادونو ترمنځ د سوداګرۍ او پانګونې د فرصتونو او ننګونو په اړه خبرې وکړې او څرګنده یې کړه چې د دواړو هیوادونو فعاله او معنا لرونکې ونډه اخیستنه به د خصوصي سکتور د لا ډېرې ودې لامل شي.

همداراز، په دې ناسته کې ښاغلو حمیدالله خادم، جان آقا صادقي، عبدالمتین قلندري، د غزني د اتاق رئیس، عبدالله دشتي، محمد ناصر امین، بشیر احمد بهادري، عبدالقدیر اکبري، غلام یحیی پښتون او د هرات د ترانسپورت ریاست استازي د دواړو هیوادونو د سوداګریزو اړیکو د پیاوړتیا په برخه کې خپل نظرونه شریک کړل.

په پای کې، د ایران د اسلامي جمهوریت د بهرنیو چارو وزارت د اقتصادي دیپلماسۍ مرستیال ښاغلي سید رسول مهاجر، د خراسان جنوبي والي ښاغلي سید محمد رضا هاشمي، د بهرنیو چارو وزارت د جنوبي آسیا مدیر ښاغلي بهرامي، او د افغانستان لپاره د ایران سفیر ښاغلي بیګدلي، د هرات د خصوصي سکتور له طرحو هرکلی وکړ او ټینګار یې وکړ چې د سوداګریزو اړیکو پراخوالی او د پانګونې د اسانتیاوو رامنځته کول به د دواړو هیوادونو د اقتصادي ودې لپاره مهم رول ولوبوي.

 

 

 

 

 

 

ښاغلي میرزمان پوپل، د افغانستان د سوداګرۍ او پانګونې اتاق د عامل پلاوي د مالي او اداري مرستیال، له ښاغلي چنګ، چې د چین د شانګهای ښار د پانګوالو استازی دی، او ورسره مل ټیم سره په خپل کاري دفتر کې وکتل او د افغانستان د ګډو پانګونو په اړه یې بحث او نظرونه تبادله کړل.

ښاغلي چنګ له افغان سوداګرو سره په ځانګړي ډول د ډبرو سکرو او د سرو زرو د معیاري پروسس په برخه کې د ګډو پانګونو یادونه وکړه او دا ډول پانګونې یې د اقتصادي ودې او د کار فرصتونو د ایجاد لپاره مهمې وبللې. نوموړي له ښاغلي پوپل څخه وغوښتل چې د ګډو پانګونو په برخه کې ورسره هر اړخیزه همکاري وکړي.

ښاغلي پوپل، ښاغلي چنګ او د هغه ملګرو ته د افغانستان د سوداګرۍ او پانګونې اتاق ته د راتګ هرکلی ووایه، د افغانستان د اوسنیو پانګوالو فرصتونو مفصل معلومات ورکړل او د اتاق له لوري یې د ټولو هغو پانګوالو لپاره د بشپړې همکارۍ ژمنه وکړه چې غواړي په مختلفو سکتورونو کې پانګونه وکړي.

ښاغلي پوپل وویل: د قیمتي او نیمه قیمتي ډبرو د معاینه‌ لپاره د لابراتوار نشتون افغان سوداګر اړ کوي چې ټولې دا ډول ډبرې د معاینې لپاره له هېواده بهر واستوي، او له افغان سوداګرو سره په دې برخه کې ګډه پانګونه یوه اساسي اړتیا ده. نوموړي د شانګهای د پانګوالو له استازي وغوښتل چې خپل پانګیز پروپوزل له اتاق سره شریک کړي، تر څو اتاق وکولای شي د اړوندو دولتي ادارو په همکارۍ د ځمکې برابرولو او نورو سوداګریزو موضوعاتو په برخه کې ورسره همکاري وکړي.

 

 

 

 

د افغانستان د سوداګرۍ او پانګونې اتاق لومړي مرستیال، ښاغلي محمد یونس مهمند، د افغانستان د نفتو او ګازو د سراسري اتحادیې د مرستیال، ښاغلي فیض احمد خافي په شتون کې، د خصوصي سکتور د ملاتړ ناستې په ترڅ کې د ترکیې له استازي ښاغلي حسین بوتسالي، په قطر کې د جرمني له سفیر ښاغلي رول او د انګلستان له استازي ښاغلي جاني سره وکتل.

په دې لیدنه کې د افغان سوداګرو لپاره د ویزو د ستونزو او له یادو هېوادونو سره د سوداګرۍ د پراختیا په اړه مفصل بحث او نظریات تبادله شول.

ښاغلي مهمند له ترکیې، انګلستان او جرمني سره د افغانستان د سوداګرۍ په پراختیا ټینګار وکړ او د یادو هېوادونو د سوداګرۍ اتاقونو ترمنځ یې همکاري مهمه وبلله. نوموړي څرګنده کړه چې افغان سوداګر د جرمني جوړو چپ لاسو موټرو ته لیوالتیا لري، خو د جرمني ویزې نه شتون د دوی لپاره ستونزې جوړې کړي دي.

همدارنګه، نوموړي د صادراتي مالونو د ترانزیت په برخه کې د ترکیې رول مهم وباله او د لا زیاتو سوداګریزو او ترانزیتي اسانتیاوو غوښتنه یې وکړه.