د افغانستان د سوداګرۍ او پانګونې خونې او د کابل ښاروالۍ ترمنځ ګډه ناسته، د خونې د زیربنا او ساختماني تخصصي کمېټې د مشرتابه او غړو په ګډون، د استوګنیزو کورونو د جوړولو په برخه کې د رامنځته شویو اسانتیاوو د تشریح او معلوماتو وړاندې کولو په موخه د خونې د کنفرانسونو په تالار کې جوړه شوه.
د افغانستان د سوداګرۍ او پانګونې خونې د عامل پلاوي رئیس، ښاغلي پوهندوی محمد ولي امیني، د کابل ښاروالۍ له لوري د خلکو او د هېواد خصوصي سکتور ته د ساختماني پروسو په برخه کې د اسانتیاوو د رامنځته کولو له امله مننه او ستاینه وکړه او د دې ناستې اساسي موخه یې سوداګرو ته د یادو اسانتیاوو په اړه د معلوماتو وړاندې کول وبلل. نوموړي همدارنګه د کابل ښاروالۍ د عامه ګټو او زیربنایي پروژو د ملاتړ په برخه کې د خونې د هر اړخیزې همکارۍ ډاډ څرګند کړ.
د کابل ښاروالۍ کلتوري سلاکار، ښاغلي نعمتالله بارکزي، د ۱۴۰۵ کال لپاره د ښاروالۍ د خدمتونو او د پروژو د پلي کیدلو په اړه تفصیلي معلومات وړاندې کړل او د خصوصي سکتور او کابل ښاروالۍ ترمنځ یې د همکاریو پر پیاوړتیا ټینګار وکړ.
د زیربنا او ساختماني تخصصي کمېټې رئیس او د خونې د مدیره پلاوي غړي، ښاغلي حمیدالله حبیبي، د ښار د ښه والي او د سړکونو د پراختیا په برخه کې د کابل ښاروالۍ وروستۍ کړنې وستایلې او د ښاري پراختیا، د کارموندنې رامنځته کولو او د ښاري خدمتونو د ښه والي په برخه کې یې د خصوصي سکتور او ښاروالۍ ترمنځ همکاري مهمه او اغېزمنه وبلله.
ورپسې، د کابل ښاروالۍ د تخنیکي ټیم مسوولینو د خپلو معلوماتي پریزنټېشنونو له لارې د نویو سیستمونو د رامنځته کولو، د مراجعینو د چارو د اسانتیا، د موبایل اپلیکیشن د پلي کېدو، ښاري پلان، زونینګ پلان، د ساختماني جوازونو د صادرولو او نورو اړوندو فعالیتونو په اړه تفصیلي معلومات وړاندې کړل.
د غونډې په پای کې، د خونې د زیربنا او ساختماني تخصصي کمېټې غړو هم د کابل ښاروالۍ له پروګرامونو سره د همکارۍ په برخه کې خپل نظرونه او وړاندیزونه په واضح ډول وړاندې کړل.
په دې ناسته کې د خونې سلاکاران، ښاغلي امان الله غالب او اسدالله فروغیار، د عامل پلاوي مالي او اداري مرستیال، میرزمان پوپل، د کابل ښاروالۍ د عوایدو مرستیال، حسیبالله مظهر، او د زیربنا او ساختماني تخصصي کمېټې یو شمېر غړو هم ګډون درلود.
سه شنبه، غويي اتمه، ۱۴۰۵
