د کندهار د سمنټو تولیدي فابریکې د پرانېستې او د فعالیت پېل مراسم د افغانستان اسلامي امارت د ریاست‌الوزراء اقتصادي مرستیال ښاغلي ملا عبدالغني برادر اخند، د افغاني سرې میاشتې ټولنې رئیس ښاغلي شیخ شهاب‌الدین دلاور، د کندهار والي ښاغلي الحاج ملا شیرین اخند، د افغانستان اسلامي امارت ویاند ښاغلي ذبیح‌الله مجاهد، د اقتصاد وزارت مسلکي معين ښاغلي عبداللطیف نظري، د اسلامي امارت یو شمېر لوړپوړو چارواکو، د کندهار سیمه‌ییزو مسؤولینو، د خصوصي سکټور استازو، سوداګرو، پانګوالو، ديني علمانو، قومي مشرانو او نورو مېلمنو په ګډون ترسره شول.

په دغو مراسمو کې د افغانستان د سوداګرۍ او پانګونې خونې عمومي رئیس ښاغلي الحاج سید کریم هاشمي د دې فابریکې د فعالیت پېلېدو له امله د کندهار درنو خلکو او او ټولو افغانانو ته مبارکي وویله او د صنعت په برخه کې يې د پانګونې پر ارزښت او د اقتصادي ودې، کاري فرصتونو د رامنځته کولو او کورنیو تولیداتو د پیاوړتیا په برخه کې د خصوصي سکټور پر رول ټینګار وکړ.

ښاغلي هاشمي د دې پروژې له پانګوال ښاغلي الحاج احمد نبي‌زاده او ټولو هغو مسؤولینو او کارکوونکو مننه وکړه، چې د دې فابریکې د بشپړېدو او فعالېدو په برخه کې یې ونډه اخیستې. نوموړي همدارنګه د هېواد دننه او بهر افغان سوداګر او پانګوال وهڅول، چې په تولیدي او بېخبنایي برخو کې د پانګونې له لارې د افغانستان په ابادۍ او د ملي اقتصاد په پیاوړتیا کې فعاله ونډه واخلي.

هغه زیاته کړه، چې د کورنیو صنایعو پراختیا او د ملي تولیداتو زیاتوالی د کاري فرصتونو د رامنځته کېدو، پر وارداتو د اتکا کمېدو او د اقتصادي ځان‌بسیاینې پر لور د هېواد حرکت ته زمینه برابروي. نوموړي همدارنګه د خصوصي سکټور د ملاتړ او د پانګونې هڅونې په برخه کې د افغانستان د سوداګرۍ او پانګونې خونې پر ژمنتیا ټینګار وکړ.

په دې مراسمو کې د افغانستان د سوداګرۍ او پانګونې خونې عمومي ریاست د پالیسۍ او له دولت سره د اړیکو مرستیال ښاغلي الحاج میراجان سلیمان‌خېل، د عمومي ریاست د خدماتو مرستیال ښاغلي الحاج عنایت‌الله صدیق‌زي، د عمومي ریاست د کورنیو تولیداتو او محصولاتو د ملاتړ مرستیال ښاغلي الحاج عبدالنافع بارکزي، د عمومي ریاست فرهنګي او ټولنیزو چارو مرستیال ښاغلي الحاج حبیب‌الله عمر او د دې خونې د مدیره پلاوي غړي ښاغلي الحاج یحیی پښتون هم ګډون درلود.

د افغانستان د سوداګرۍ او پانګونې خونې د عامل پلاوي رئیس ښاغلي محمد جبران مدثر د خونې د صادراتو تخصصي کمېټې له غړو او یو شمېر افغان سوداګرو او صادرونکو سره یو ځای په کابل کې د قرغېزستان له مېشت سفیر ښاغلي توردیکان سیدیکوف سره ولیدل. په دې لیدنه کې د دواړو هېوادونو ترمنځ د پانګونې او سوداګریزو اړیکو پر پیاوړتیا، د خصوصي سکټور ترمنځ د اړیکو پر اسانولو او قرغېزستان ته د افغان سوداګرو د پلاوي سفر ته د زمینې پر برابرولو خبرې او نظرونه تبادله شول.