د خصوصی سکټور اوچت غږ

05
پنج شنبه, نومبر
11 New Articles

زېرمتون

پنج‌شنبه، د تلې ۲مه، ۱۴۰۵
 
د افغانستان د سوداګرۍ او پانګونې خونې اجرائیه کمېټې (مشرتابه پلاوي) څوارلسمه ناسته د خونې عمومي رئیس ښاغلي الحاج سید کریم هاشمي په مشرۍ د مرستیالانو، د مشرتابه پلاوي د غړو او اړوندو مسؤلینو په حضور کې ترسره شوه.
د ناستې د اجنډا لومړنۍ او تر ټولو مهمه موضوع د افغانستان د سوداګرۍ او پانګونې خونې په چوکاټ کې د «سرطان د تشخیص او درملنې خیریه تخصصي روغتون» د جوړېدو وړاندیز و، چې ټاکل شوې په لومړي پړاو کې د ۱۰۰ بسترو په ظرفیت جوړ شي او د سرطان ناروغانو په ځانګړي ډول بې‌وزلو او اړمنو ناروغانو ته د تشخیص او درملنې خدمات وړاندې کړي.
د افغانستان د سوداګرۍ او پانګونې خونې عمومي رئیس الحاج سید کریم هاشمي د دې نوښت پر انساني، اسلامي او ملي اهمیت ټینګار وکړ او ویې ویل، چې د سرطان د تشخیص او درملنې لوړ لګښتونه د افغانانو ډېرې کورنۍ له جدي ستونزو سره مخ کړې دي.
نوموړي وویل:
«افغانستان زموږ ګډ کور دی؛ د یو افغان درد زموږ د ټولو درد دی او د یو افغان د ژوند ژغورل زموږ د ټولو ویاړ دی.»
د خونې عمومي رئیس د هېواد سوداګرو، پانګوالو او خیر ښېګڼې کوونکو د ټولنیز مسئولیت په اړه وویل:
«پانګه یوازې د سوداګرۍ وسیله نه ده؛ پانګه د خدمت، هیله او ان د یو انسان د ژوند ژغورلو وسیله هم کېدای شي.»
نوموړي زیاته کړه، چې دغه روغتون د یو شخص یا یوې ادارې پروژه نه ده، بلکې یوه انساني او ملي پروژه ده، چې د افغانستان د خلکو اړوند ده او د سوداګرو، پانګوالو، خیر ښېګڼې کوونکو او عامو خلکو په ګډه ونډه او د اړوندو دولتي ادارو په همکارۍ به جوړ شي.
د خونې عمومي رئیس د دې نوښت پر اساسي موخې په ټینګار وویل:
«موږ یوازې یوه ودانۍ نه جوړوو؛ موږ هیله جوړوو. موږ غواړو یو ورځ هېڅ بې‌وزله افغان ناروغ یوازې د پیسو نشتوالي له امله د سرطان له درملنې څخه بې‌برخې پاتې نه شي.»
نوموړي وویل، چې د ۱۰۰ بسترو ظرفیت د دې حرکت پیل دی نه پای او هیله یې څرګنده کړه، چې په راتلونکي کې به د دې مرکز ظرفیت او خدمات پراخ او دغه روغتون به په افغانستان کې د سرطان د تشخیص او درملنې پر یوه مجهز او معیاري مرکز بدل شي.
د خونې عمومي رئیس له سوداګرو، پانګوالو، خیر ښېګڼې کوونکو او عامو خلکو څخه هم وغوښتل، چې کولی شي د خپلې وړتیا او امکاناتو له مخې په دې انساني حرکت کې ونډه واخلي. نوموړي ټینګار وکړ:
«مهمه نه ده چې زموږ ونډه څومره لویه یا کوچنۍ وي؛ مهمه دا ده چې په دې خیر کې شریک واوسو. هره ونډه که هر څومره کوچنۍ هم وي د یوه ناروغ او یوې کورنۍ لپاره د هیلې سبب کېدای شي.»
د اجرائیه کمېټې غړو له هر اړخیز بحث او ارزونې وروسته د «سرطان ناروغۍ د تشخیص او درملنې خیریه تخصصي روغتون» د جوړېدو څخه خپل قاطع او هر اړخیز ملاتړ اعلان کړ او دغه طرحه یې د رايو په اکثریت سره په رسمي توګه تصویب کړه.
همدارنګه پرېکړه وشوه، چې د ځمکې، نقشې او ډیزاین، طبي وسایلو، د سرطان تخصصي څانګو، لګښتونو او مالي سرچینو، د خصوصي سکټور د مشارکت، د اړوندو دولتي ادارو د همکاریو او د روغتون د روڼ او دوامدار مدیریت د څرنګوالي د ارزونې لپاره یوه مسلکي او باصلاحیته کمېټه جوړه شي او د پروژې د پلي کېدو جامع طرحه چمتو کړي.
د خونې عمومي رئیس د ناستې په پای کې د دې نوښت پیغام په لاندې ډول لنډ کړ:
«راځئ له سوداګرۍ څخه هیله جوړه کړو؛ له پانګې څخه ژوند جوړ کړو؛ او د نن ورځې له پرېکړې څخه د انسانانو د ژوند ژغورلو لپاره سبا جوړ کړو.»
د ناستې په دوام کې د اجنډا نور اقتصادي، اداري او اجرائیوي موضوعات هم د اجرائیه کمېټې د غړو له لوري وڅېړل شول او په اړه یې لازمې پرېکړې وشوې.

شنبه، د تلې ۴مه، ۱۴۰۵
 
د افغانستان د سوداګرۍ او پانګونې خونې عمومي رئیس ښاغلي الحاج سید کریم هاشمي د خونې د مشرتابه پلاوي له یو شمېر غړو سره یو ځای د افغانستان د اتلانو لیګ (ACL) د سیالیو په لړ کې د «سرخ‌پوشان خوافي» او «استقلال کابل» فوټبال لوبډلو ترمنځ سیالۍ له نږدې ننداره کړه.
په دې سیالۍ کې د خوافي هولډینګ رئیس او د افغانستان د سوداګرۍ او پانګونې خونې د ولایتي چارو مرستیال ښاغلي الحاج فیض احمد خوافي، د پانګونې مرستیال ښاغلي الحاج ارین زلګي عظیمي، د خدماتو مرستیال ښاغلي الحاج عنایت‌الله صدیق‌زي او د سټراټېژیکو اړیکو مرستیال ښاغلي مجیب‌الرحمن شېرزاد هم ګډون درلود.
د «سرخ‌پوشان خوافي» فوټبال لوبډلې په یوه پیاوړې او ځلانده لوبه کې «استقلال کابل» لوبډلې ته په غوڅ ډول د ۶-۰ په مقابل ماتې ورکړه او ارزښتمنه بریا یې خپله کړه.
د افغانستان د سوداګرۍ او پانګونې خونې عمومي رئیس ښاغلي الحاج سید کریم هاشمي د ورزش ملاتړ، د ځوانانو هڅونې او د هېواد ورزشکارانو د هڅو درناوي په موخه له خپلې شخصي شتمنۍ څخه د دواړو لوبډلو هر لوبغاړي ته ۱۰۰ امریکايي ډالر د هڅونې په موخه ډالۍ کړل.
دغه اقدام د هېواد ورزشکارانو د ملاتړ او سالمې سیالۍ د روحیې هڅولو او د افغان ځوانانو د استعدادونو په وده او غوړېدو کې د ورزش مهم رول پر ارزښت د باور څرګندونه کوي.
د افغانستان د سوداګرۍ او پانګونې خونې عمومي رئیس او مشرتابه پلاوی دغه ارزښتمنه بریا د خوافي هولډینګ رئیس او د خونې ولایتي چارو مرستیال ښاغلي الحاج فیض احمد خوافي، د «سرخ‌پوشان خوافي» لوبډلې مسؤلینو، روزونکو، هڅاندو لوبغاړو او مینه‌والو او همدارنګه د هېواد ورزشکارانو او ټولو افغانانو ته په صمیمانه توګه مبارکي او نیکې هیلې وړاندې کوي.
د «سرخ‌پوشان خوافي» شپږ پر صفر بریا د لوبغاړو د هڅو، همغږۍ، انضباط او لوړې ټیمي روحیې پایله ده او کولای شي په هېواد کې د فوټبال ځوانانو او مینه‌والو ته د لا ډېرو هڅو او بریاوو انګېزه ورکړي.
د افغانستان د سوداګرۍ او پانګونې خونې عمومي رئیس او مشرتابه پلاوی د هېواد له ورزش او ځوانو استعدادونو څخه د خپل ملاتړ څرګندولو ترڅنګ د افغانستان د اتلانو لیګ په راتلونکو سیالیو کې د «سرخ‌پوشان خوافي» لوبډلې لپاره د لا ډېرو بریاوو هیله کوي او تمه لري، چې دغه لوبډله به د خپلو پرله‌پسې هڅو او ځلېدو له لارې د بریا او اتلولۍ پر لور لا پیاوړي ګامونه پورته کړي.

پنجشنبه، د تلې ۲مه، ۱۴۰۵
 
د افغانستان د وچې مېوې د صادروونکو اتحادیې رئیس ښاغلی محمد قاسم امرخېل، چې د ځینو ملاحظاتو له امله یې د افغانستان د سوداګرۍ او پانګونې خونې په مدیره پلاوي کې غړیتوب ځنډول شوی و، د نوموړي د غړیتوب بیا پيلېدو موضوع د افغانستان د وچې مېوې د صادروونکو اتحادیې د غوښتنو او اړینو ارزونو وروسته د ۱۴۰۵ کال د تلې په لومړۍ نېټه د خونې مديره پلاوي د اجرائیه کمیټې په ناسته کې مطرح شوه.
د خونې مشرتابه د موضوع په اړه له هر اړخیز غور، ارزونې او له نوموړي څخه د لیکلي تعهد له ترلاسه کولو وروسته، د رايو په اکثریت سره د ښاغلي محمد قاسم امرخېل د غړیتوب بیا پيلېدل تأیید کړ.
د افغانستان د سوداګرۍ او پانګونې خونه د نوموړي د غړیتوب بیا پيلېدو هرکلی کوي او ښاغلي امرخېل ته د سوداګرو د خدمت، د صادراتو د پیاوړتیا او د هېواد اقتصادي فعالیتونو د پراختیا په برخه کې د لا زیاتو بریاوو هیله کوي.
په درنښت
د افغانستان د سوداګرۍ او پانګونې خونه

پنج‌شنبه، د تلې ۲مه، ۱۴۰۵
 
د لومړنيو توکو شاوخوا ۱۰۰ تنه سوداګرو، د اړوندو اتحادیو استازو، د کابل منډوي او د کابل ښار د نورو منډویو مسؤلینو په یوه ناسته کې د افغانستان د سوداګرۍ او پانګونې خونې له مرستیالانو سره کابل ښار ته دننه د لومړنیو توکو لېږد او تخلیې په برخه کې خپلې ستونزې او اندېښنې مطرح کړې.
سوداګرو د ښار د ورودي دروازو په ساحو کې د لویو باروړونکو موټرو د بارونو د تخلیې له امله رامنځته کېدونکو ستونزو په ځانګړي ډول د توکو زیرمه کولو د ظرفیت کمښت، د تو د زیانمنېدو احتمال او د تخلیې او بارولو د لګښتونو زیاتوالي په اړه خبرې وکړې او د خپلو ستونزو د جدي حل او ښار ته يې د لومړنیو توکو د لېږد بهیر اسانولو غوښتنه وکړه.
د سوداګرو او اړوندو اتحادیو استازو د غوښتنې پر بنسټ د خونې او سوداګرو له استازو څخه یوه ګډه کمېټه وټاکل شوه، څو د سوداګرو مشخصې ستونزې او وړاندیزونه د کابل ښاروالۍ له مسؤلینو سره شریک کړي او د یادو ستونزو د حل لپاره عملي لارې چارې وړاندې کړي.
په دې ناسته کې د افغانستان د سوداګرۍ او پانګونې خونې د خدمتونو مرستیال ښاغلي الحاج عنایت‌الله صدیق‌زي، د اقتصادي پراختیا مرستیال ښاغلي الحاج نوراحمد نورعلم، د سټراټېژیکو اړیکو مرستیال ښاغلي مجیب‌الرحمن شېرزاد او د خونې عامل پلاوي سرپرست رئیس ښاغلي زین‌الله حسني ګډون کړی و.

چهارشنبه، د تلې لومړی، ۱۴۰۵
 
د افغانستان د سوداګرۍ او پانګونې خونې او د افغان-امریکا د سوداګرۍ ګډې خونې (AACC) ترمنځ د همکاریو هوکړه‌لیک د انلاین ناستې له لارې د افغانستان د سوداګرۍ او پانګونې خونې عمومي رئیس ښاغلي الحاج سید کریم هاشمي او د افغان-امریکا د سوداګرۍ ګډې خونې رئیس ښاغلي جیفري ګرېکو په حضور کې لاسلیک شو.
دغه هوکړه‌لیک د سوداګرۍ، پانګونې، د خصوصي سکټور پراختیا او د دواړو خونو ترمنځ د سوداګریزو اړیکو او همکاریو پیاوړتیا په موخه لاسلیک شو.
ښاغلي جیفري د خونې له عمومي رئیس سره خپلې لومړنۍ لیدنې ته په اشارې د نوموړي نوښت، جدیت او هڅو یادونه وکړه او د افغانستان سوداګرۍ او پانګونې له خونې سره یې د همکاریو پراختیا په برخه کې خپله لېوالتیا څرګنده کړه.
د ناستې پر دوام د افغانستان د سوداګرۍ او پانګونې خونې عمومي رئیس ښاغلي الحاج سید کریم هاشمي؛ ښاغلي جیفري ته د امام ابوحنیفه (رح) په پنځم ملي او نړیوال نندارتون کې د ګډون بلنه ورکړه. ښاغلي جیفري هم څرګنده کړه، چې له متحده ایالاتو څخه به د یو شمېر سوداګرو په ملتیا په دغه نندارتون کې ګډون وکړي.
په دې ناسته کې د خونې مرستیالانو ښاغلي مجیب‌الرحمن شېرزاد او ښاغلي عبدالنافع بارکزي او د مدیره پلاوي یو شمېر غړو هم ګډون کړی و.
دغه هوکړه‌لیک د افغانستان او متحده ایالاتو د خصوصي سکټورونو ترمنځ د سوداګریزو او اقتصادي اړیکو د پیاوړتیا په برخه کې یو مهم ګام دی.

پنجشنبه، د تلې ۲مه، ۱۴۰۵
 
د افغانستان د سوداګرۍ او پانګونې خونې عمومي رئیس ښاغلي الحاج سید کریم هاشمي په کابل کې د ایران اسلامي جمهوریت له سفیر ښاغلي علیرضا بیګدلي او مل پلاوي سره د افغانستان د سوداګرۍ او پانګونې خونې په مرکزي دفتر کې وکتل.
په دې لیدنه کې دواړو لورو د افغانستان او ایران ترمنځ د بېلابېلو سوداګریزو او اقتصادي موضوعاتو په اړه بحث او د نظرونو تبادله وکړه. همدارنګه د امام ابوحنیفه (رح) د پنځم ملي او نړیوال نندارتون په اړه هم خبرې وشوې.
د افغانستان د سوداګرۍ او پانګونې خونې عمومي رئیس د سوداګریزو اړیکو پر پراختیا، د سوداګریزو راکړو ورکړو پر زیاتوالي او سوداګرو او پانګوالو ته د اړینو اسانتیاوو پر برابرولو ټینګار وکړ.
په ورته مهال په کابل کې د ایران اسلامي جمهوریت سفیر ښاغلي علیرضا بیګدلي د امام ابوحنیفه (رح) په پنځم ملي او نړیوال نندارتون کې د ایراني سوداګرو او پانګوالو د ګډون ډاډ ورکړ.
د ناستې په پای کې دواړو لورو د وارداتو او صادراتو د پراختیا، د ځمکنیو ټرانسپورټي لارو او رېل پټلۍ د پراخولو، په بندرونو د اسانتیاوو ښه‌والي او د سوداګرۍ او پانګونې نویو فرصتونو د رامنځته کولو په اړه هم خبرې وشي.

مقالات دیگر...

  1. ښاغلی عبدالشکور عظیمي د افغانستان د سوداګرۍ او پانګونې خونې د مدیره پلاوي د نوي غړي په توګه معرفي شو.
  2. د پانګونې او سوداګريزو اړيکو پر پراختیا د افغانستان او قرغېزستان ټينګار.
  3. د افغانستان د سوداگرۍ او پانگونې خونې د اقتصادي چارو د پراختیا مرستیال معرفي شو.
صفحه9 از293