يک‌شنبه، د تلې ۱۹مه، ۱۴۰۵

د افغانستان د سوداګرۍ او پانګونې خونې په نوښت د امام ابوحنیفه (رح) پنځم ملي او نړیوال نندارتون په څنډه کې د جمعې ماښام په کابل کې د افغانستان او مېلمه هېوادونو د خصوصي سکټورونو ترمنځ د سوداګریزو اړیکو د پراختیا ناسته ترسره شوه، چې په پایله کې یې د کورنیو او بهرنیو شرکتونو د استازو ترمنځ د نږدې ۴۰۰ مېلیون امریکایي ډالرو په ارزښت د سوداګرۍ او پانګونې هوکړه‌لیکونه لاسلیک شول.

په دې ناسته کې د افغانستان د سوداګرۍ او پانګونې خونې عمومي رئیس ښاغلي الحاج سید کریم هاشمي، د عمومی ریاست د پانګونې مرستیال ښاغلي ارین زلګي عظیمي، د عمومي ریاست د پالیسۍ او دولت سره د اړیکیو مرستیال ښاغلي الحاج میراجان سلیمانخېل، د عمومی ریاست د ولایتي چارو مرستیال ښاغلي الحاج فیض‌احمد خوافي د عمومی ریاست نورو مرستيالانو، د مدیره پلاوي غړو، د عامل پلاوي سرپرست او مرستیالانو، په کابل کې د قرغېزستان سفیر ښاغلي تورادکُن سیدیکوف، د اوزبېکستان د سوداګرۍ او صنایعو خونې مرستیال او د هند، ترکمنستان، قزاقستان، قرغېزستان او نورو مېلمه هېوادونو ډیپلوماټیکو او سوداګریزو استازو ګډون درلود.

د اقتصادي همکاریو او پانګونې پر پراختیا ټینګار:

د افغانستان د سوداګرۍ او پانګونې خونې عمومی ریاست د پانګونې مرستیال ښاغلي ارین زلګي عظیمي د امام ابوحنیفه (رح) نندارتون او د سوداګریزو اړیکو د پراختیا مستقیمې ناستې د متقابل باور د پیاوړتیا، د اقتصادي همکاریو د پراختیا او د افغانستان او د سیمې او نړۍ د هېوادونو ترمنځ د سوداګریزو مشارکتونو د رامنځته کولو لپاره ارزښتناک فرصتونه وبلل.

نوموړي د افغانستان اقتصادي ظرفیتونو ته په اشارې، چې سټراټیژیک جغرافیایي موقعیت، طبیعي سرچینې، کرنیز او صنعتي ظرفیتونه او کورني تولیدات پکې شامل دي له بهرنیو سوداګرو او پانګوالو وغوښتل، چې له شته فرصتونو څخه په ګټې اخېستنې د هېواد په بېلابېلو اقتصادي برخو کې پانګونه وکړي.

د اوزبېکستان د سوداګرۍ او صنایعو خونې مرستیال ښاغلي شېرزاد ابراهیموف د دواړو هېوادونو ترمنځ د مخ پر ودې اقتصادي اړیکو په یادولو سره د پخوانیو هوکړه‌لیکونو پر عملي کېدو او د سوداګریزو همکاریو پراختیا پر وړاندې د تخنیکي او اداري خنډونو د لرې کولو پر اړتیا ټینګار وکړ.

په کابل کې د قرغېزستان سفیر هم د سوداګریزو نندارتونونو د ارزښت په اړه خبرې وکړې او ویې ویل، چې دغه ډول نندارتونونه د ګډونوالو هېوادونو د ظرفیتونو، محصولاتو او خدماتو په معرفي کولو او د افغانستان او د سیمې د هېوادونو ترمنځ د اقتصادي اړیکو په پراختیا کې مهم رول لري.

د دوه‌اړخیزو سوداګریزو ناستو ترسره کېدل او د هوکړه‌لیکونو لاسلیک:

د پروګرام په عملي برخه کې د افغانستان د سوداګرۍ او پانګونې خونې عمومي ریاست د پانګونې مرستیال ښاغلي ارین زلګي عظیمي تر سرپرستۍ لاندې د افغانستان او مېلمه هېوادونو د سوداګرو، پانګوالو او شرکتونو د استازو ترمنځ دوه‌اړخیزې سوداګریزې (B2B) ناستې ترسره شوې. په دغو ناستو کې دواړو لورو د سوداګرۍ فرصتونو، ګډو پانګونو او اقتصادي مشارکتونو د رامنځته کولو په اړه بحث او د نظرونو تبادله وکړه.

د دغو لیدنو په پایله کې د اړوندو لورو ترمنځ د نږدې ۴۰۰ میلیون امریکایي ډالرو په ارزښت د سوداګرۍ او پانگونې هوکړه‌لیکونه لاسلیک شول. تمه ده، چې دغه هوکړه‌لیکونه د اقتصادي همکاریو د پراختیا، د پانګونو د زیاتوالي او د کورنیو او بهرنیو شرکتونو لپاره د نویو سوداګریزو فرصتونو د رامنځته کېدو زمینه برابره کړي.

د پروګرام په پای کې د ګډونوالو هېوادونو د سوداګریزو پلاوو، ډیپلوماتیکو استازو او نورو مېلمنو په درناوي ماښامنۍ مېلمستیا جوړه شوه. دغه مېلمستیا په دوستانه فضا کې ترسره شوه او د افغان او بهرنیو اقتصادي فعالانو ترمنځ یې د اړیکو د پیاوړتیا او راتلونکو همکاریو د پراختیا لپاره زمینه برابره کړه.

د امام ابوحنیفه (رح) پنځم ملي او نړیوال نندارتون په څنډه کې د دې ناستې ترسره کېدل د اقتصادي فعالانو ترمنځ د مستقیمو اړیکو د پیاوړتیا او د افغانستان او د سیمې او نړۍ د هېوادونو ترمنځ د سوداګرۍ او پانګونې همکاریو د پراختیا په برخه کې یو مهم ګام دی.