د افغانستان د سوداګرۍ او پانګونې خونې د مدیره پلاوي اجرائیه کمېټې اوولسمه ناسته د افغانستان د سوداګرۍ او پانګونې خونې عمومي رئیس ښاغلي الحاج سید کریم هاشمي په مشرۍ د عمومي ریاست په دفتر کې ترسره شوه.

د ناستې په پیل کې ښاغلي الحاج سید کریم هاشمي د اجرائیه کمېټې د غړو دوامدار حضور او فعالې ونډې د قدردانۍ ترڅنګ د افغانستان د سوداګرۍ او پانګونې خونې غړي د هېواد خدمتګاران او د ملي اقتصاد د ودې او پرمختګ په برخه کې مسؤولیت‌ منونکې شخصیتونه وبلل.

د خونې عمومي رئیس د لا زیاتې قانون‌مندۍ، د اداري او تشکیلاتي اصولو او مقرراتو د رعایت، د یووالي او همغږۍ روحیې د پیاوړتیا، مسؤولیت‌ منلو، حساب ورکولو او له مراجعینو سره د نېک چلند پر ارزښت د ټینګار ترڅنګ د مدیره پلاوي له غړو، مسؤولینو او د عامل ریاست له کارکوونکو وغوښتل، چې صداقت، ژمنتیا او د اداري اصولو رعایت ته د خپلو ورځنیو فعالیتونو په سر کې لا ډېر ځای کړي.

ښاغلي هاشمي سالم مدیریت، مسؤولانه رهبري او د کارکوونکو منظم فعالیتونه د هرې ادارې د بریا او پرمختګ له اساسي عواملو څخه وبلل او څرګنده یې کړه، چې مدیریتي کمزورتیا او اداري مسؤولیتونو ته نه پاملرنه، کولای شي د خدمتونو کیفیت او د سازماني موخو ترلاسه کولو بهیر وننګوي.

نوموړي همدارنګه په اداري چارو کې د شخصي سلیقو د پلي کېدو او د شخصي غوښتنو د تحمیل مخنیوي پر ارزښت له ټینګار سره څرګنده کړه، چې د اصولو او تشکیلاتي جوړښت درناوی د يو بل منلو، د همکارۍ فرهنګ پیاوړتیا، د ټیمي کار پر بنسټ د چارو پرمخ وړل، د اغېزناک مدیریت، د خدمتونو د کیفیت لوړولو او د افغانستان د سوداګرۍ او پانګونې خونې د موخو ترلاسه کېدو ته زمینه برابروي.

د ناستې په دوام کې د اجرائیه کمېټې غړو د ټاکل شوې اجنډا پر موضوعاتو، چې پکې د ولایتي خونو د خدمتونو د وړاندې کولو بهیر د ارزونې لپاره د کاري کمېټې ټاکل، په کابل کې د سرطان ناروغانو د درملنې لپاره د ځانګړي روغتون جوړولو د مقدماتي چارو پیل او د سهامي شرکت د جوړښت اړوند پړاوونو پیل شامل وو؛ بحث او د نظرونو تبادله وکړه. د موضوعاتو د بېلابېلو اړخونو له ارزونې وروسته د اړوندو کاري کمېټو مسؤولین او غړي وټاکل شول.

همدارنګه د خونې عامل رئیس ښاغلي محمد جبران مدثر له لوري د خونې د اداري او اجرائیه چارو په تړاو یو شمېر وړاندیزونه مطرح شول، چې د اجرائیوي کمېټې د غړو له خوا تر بحث او ارزونې لاندې ونیول شول.

د اجرائیه کمېټې غړو د ناستې په ترڅ کې د ټاکل شوې اجنډا لس موارد وڅېړل او د موضوعاتو بېلابېلو اړخونو تر ارزونې وروسته یې یو شمېر موارد د رایو په اکثریت تصویب کړل.

په دې ناسته کې د عمومي ریاست د کورنیو تولیداتو او محصولاتو د ملاتړ مرستیال ښاغلي الحاج عبدالنافع بارکزي، د عمومي ریاست د اقتصادي پراختیا مرستیال ښاغلي الحاج نوراحمد خان نورعالم، د عمومي ریاست د خدماتو مرستیال ښاغلي الحاج عنایت‌الله صدیق‌زي، د عمومي ریاست د ولایتي خونو مرستیال ښاغلي الحاج فیض احمد خوافي، د عمومي ریاست د پالیسۍ او له دولت سره د اړیکو مرستیال ښاغلي الحاج میراجان سلیمان‌خېل، د عمومي ریاست مالي رئیس ښاغلي الحاج خلیل‌الله خیرخواه، د عمومي ریاست د سټراټیژیکو اړیکو مرستیال ښاغلي مجیب‌الرحمن شېرزاد، د دارالانشاء رئیس ښاغلي الحاج ذبیح‌الله عمرخېل او د عامل پلاوي رئیس ښاغلي محمد جبران مدثر حضور درلود.