د خصوصی سکټور اوچت غږ

05
پنج شنبه, نومبر
11 New Articles

د افغانستان د سوداګرۍ او پانګونې خونې عمومي رئیس د ترکمنستان د نفت او ګاز په نړیوال کنفرانس او نندارتون کې گډون وکړ.

جمعه، د لړم لومړۍ، ۱۴۰۵
 
د افغانستان د سوداګرۍ او پانګونې خونې عمومي رئیس ښاغلي الحاج سید کریم هاشمي د ترکمنستان پلازمېنې عشق‌اباد ښار ته د خپل رسمي سفر په ترڅ کې د ترکمنستان د نفت او ګاز په نړیوال کنفرانس او نندارتون (OGT 2026) کې، چې د اکټوبر په ۲۱ او ۲۲مه ترسره شو، ګډون وکړ.
همدارنګه د خونې عمومي ریاست د ولایتي چارو مرستیال ښاغلي الحاج فیض احمد خوافي، د عمومي ریاست د پالیسۍ او له دولت سره د اړیکو مرستیال ښاغلي الحاج میراجان سلیمان‌خېل او د هېواد له بېلابېلو ولایتونو یو شمېر افغان سوداګرو هم په دې کنفرانس او نندارتون کې ګډون درلود.
دغه نړیوال کنفرانس او نندارتون د ترکمنستان او د بېلابېلو هېوادونو لوړپوړو چارواکو، د اقتصادي بنسټونو مسئولینو، پانګوالو او د نفت او ګاز په صنعت کې د فعالو نړیوالو شرکتونو د استازو په حضور کې پرانېستل شو. د افغانستان د سوداګرۍ او پانګونې خونې عمومي رئیس ښاغلي الحاج سید کریم هاشمي هم د پرانېستې په مراسمو کې ګډون درلود.
د کنفرانس او نندارتون په څنډه کې ښاغلي الحاج سید کریم هاشمي د ترکمنستان د سوداګرۍ او صنایعو خونې له رئیس ښاغلي مرګن ګوردوف او د نفت او ګاز د سترو نړیوالو شرکتونو له مسئولینو سره لیدنې او خبرې وکړې. په دغو لیدنو کې د افغانستان او ترکمنستان او نورو هېوادونو ترمنځ د سوداګریزو او اقتصادي اړیکو پر پراختیا، په افغانستان کې د پانګونې د فرصتونو پر معرفي کولو، د بهرنیو پانګونو پر جلبولو او د دواړو هېوادونو د خصوصي سکټورونو ترمنځ د ګډو همکاریو پر پیاوړتیا خبرې وشوې.
د افغانستان د سوداګرۍ او پانګونې خونې عمومي رئیس د اقتصادي همکاریو او ګډو پانګونو د پراختیا پر ارزښت د ټینګار ترڅنګ د نړیوالو شرکتونو مسئولین او پانګوال افغانستان ته راوبلل، څو د هېواد شته اقتصادي ظرفیتونه او د پانګونې فرصتونه له نږدې وڅېړي او د افغانستان له خصوصي سکټور سره د همکاریو مناسبې زمینې وپېژني.