د افغانستان د سوداګرۍ او پانګونې خونې رئیس ښاغلي الحاج سید کریم هاشمي، د ولایتي چارو مرستیال ښاغلي الحاج فیض احمد خوافي او د پاليسۍ او له دولت سره د اړیکو مرستیال ښاغلي الحاج میراجان سلیمان‌خېل په ملتیا د ترکمنستان د سوداګرۍ او صنایعو خونې له رئیس سره لیدلي او د دواړو هېوادونو ترمنځ د سوداګریزو او اقتصادي همکاریو پراختیا په اړه یې ورسره خبرې کړې.

د افغانستان د سوداګرۍ او پانګونې خونې د ولایتي چارو مرستیال ښاغلي فیض احمد خوافي د افغانستان د سوداګرۍ او ټرانزېټ لپاره د ترکمنستان سټراټېژیک موقعیت ته په اشارې د دواړو هېوادونو ترمنځ د شته ظرفیتونو د لا پراخې استفادې پر اړتیا ټینګار وکړ. نوموړي څرګنده کړه، چې د ځینو سوداګریزو لارو د محدودیتونو او لنډمهاله تړل کېدو له امله د ترکمنستان له لارې د ټرانزېټي مسیرونو پراختیا او د متنوع، دوامدارو او باوري ټرانزېټي لارو رامنځته کول کولای شي د افغانستان د سوداګرۍ په اسانولو او سیمه‌ییزو او نړیوالو بازارونو ته د افغان سوداګرو په لاسرسي کې مهم رول ولوبوي.

په دې لیدنه کې دواړو لورو د سوداګریزو راکړو ورکړو د زیاتوالي، د ټرانزېټ د اسانتیا، د سوداګریزو پلاوو د تبادلې، د سوداګرو او پانګوالو ترمنځ د مستقیمو اړیکو د رامنځته کولو او د ګډو پانګونې فرصتونو د پېژندلو پر اهمیت ټینګار وکړ.

په همدې موخه د افغانستان د سوداګرۍ او پانګونې خونې عمومی رئیس ښاغلي الحاج سید کریم هاشمي د ترکمنستان د سوداګرۍ او صنایعو خونې له رئیس څخه په رسمي توګه وغوښتل، چې د یوه سوداګریز او اقتصادي پلاوي په مشرۍ افغانستان ته سفر وکړي. دغه بلنه د ترکمنستان د سوداګرۍ او صنایعو خونې رئیس له لوري ومنل شوه او هوکړه وشوه، چې نوموړی به د ۲۰۲۶ کال په نومبر میاشت کې له یوه کاري پلاوي او سوداګرو سره افغانستان ته سفر وکړي.

دغه سفر به د دواړو هېوادونو د خصوصي سکتورونو ترمنځ د ګډو سوداګریزو ناستو، د عملي همکاریو رامنځته کېدو او د افغانستان او ترکمنستان ترمنځ د اقتصادي اړیکو د لا پراختیا لپاره زمینه برابره کړي.