د خصوصی سکټور اوچت غږ

05
شنبه, سپتامبر
1 New Articles

زېرمتون

یکشنبه، د زمري ۱۸مه، ۱۴۰۵
 
د افغانستان د سوداګرۍ او پانګونې خونې مشرتابه پلاوي غړو د ترکمنستان د سوداګرۍ او صنایعو خونې په رسمي بلنه د سوداګریزو ـ اقتصادي اړیکو او سیمه‌ییزو همکاریو د پراختیا په موخه عشق‌اباد ته سفر کړی و.
د دغه پلاوي په ترکيب کې د افغانستان د خونې ولایتي چارو مرستیال ښاغلي الحاج فیض‌احمد خوافي، د پاليسۍ او له دولت سره د اړیکو مرستیال ښاغلي الحاج میراجان سلیمان‌خېل، د هرات د سوداګرۍ او پانګونې خونې رئیس ښاغلي الحاج یونس قاضي‌زاده، د هرات د نفت او ګازو اتحادیې رئیس ښاغلي ظاهرشاه توخي، د هرات د سوداګرۍ خونې د ځوانانو چارو مرستیال ښاغلي رحیمي، د هرات سوداګرۍ او پانګونې خونې د مدیره پلاوي یو شمېر غړي، د افغانستان یو شمېر سوداګر او په ترکمنستان کې مېشتو افغان سوداګر شامل دي.
عشق‌اباد ته د افغانستان د سوداګرۍ او پانګونې خونې د مشرتابه پلاوي غړو د سفر په ترڅ کې ښاغلي فیض‌احمد خوافي د ترکمنستان د سوداګرۍ او صنایعو خونې په رسمي غونډه کې د دغې خونې له مسؤلینو، ترکمن سوداګرو، صنعتکارانو او پانګوالو سره وکتل.
د ليدنې پرمهال ښاغلي خوافي د دواړو هېوادونو تاریخي، دوستانه او اقتصادي اړیکو ته په اشارې ټینګار وکړ، چې د افغانستان او ترکمنستان سوداګریزې اړیکې باید له عادي پېر او پلور څخه لوړې او د ګډو پانګونو، د ګډو شرکتونو جوړولو، اوږدمهالو تړونونو او عملي اقتصادي پروژو تر کچې پراخې شي.
نوموړي د نفت او ګاز، انرژۍ، صنعت، کانونو، کرنې، ټرانسپورټ، اوسپنې پټلۍ، ټرانزیټ، لوجسټیک او زېرمه‌کولو برخې د دواړو هېوادونو د خصوصي سکټورونو ترمنځ د همکاریو مهمې برخې وبللې.
ښاغلي خوافي په دې ليدنه کې په رسمي ډول د ترکمنستان ۱۰۰ سوداګرو، صنعتکارانو او پانګوالو ته بلنه ورکړه، څو د یوه سوداګريز پلاوي په توګه افغانستان ته سفر وکړي او د هېواد د پانګونې فرصتونه له نږدې وڅېړي.
نوموړي په پای کې د دواړو هېوادونو د شرکتونو ترمنځ د مستقیمو اړیکو پر پراختیا، د سوداګریزو پلاوو پر تګ راتګ او د ګډو پروژو د عملي تعقیب پر اړتیا ټینګار وکړ.

یکشنبه، د زمري ۱۸مه، ۱۴۰۵
 
د افغانستان د سوداګرۍ او پانګونې خونې او د افغانستان د ملي او نړيوال نندارتون مرکز ترمنځ د امام ابوحنیفه (رح) پنځم ملي او نړیوال نندارتون د د داييرولو تړون د ګډو همکاریو د پیاوړتیا او د دغه ستر سوداګریز نندارتون د لا ښه ترسره کېدو لپاره د مناسبو زمینو برابرولو په موخه په کابل کې د یوې ناستې په ترڅ کې لاسلیک شو.
دغه تړون د خونې د عامل پلاوي د ریاست سرپرست ښاغلي زین‌الله حسني او د ملي او نړيوال نندارتون مرکز د اجرائیوي مسؤل ښاغلي مولا محمد پیمان له لوري د افغانستان د سوداګرۍ او پانګونې خونې د کنفرانسونو په تالار کې لاسلیک شو.
د خونې د عامل پلاوي د ریاست سرپرست ښاغلي زین‌الله حسني په دې مراسمو کې د نندارتون جوړولو لپاره د ګومارل شوو کمېټو د هڅو او د نندارتون له مرکز څخه د همکارۍ له امله مننه وکړه او د امام ابوحنیفه (رح) نندارتون یې د هېواد اقتصادي، سوداګریزو او تولیدي ظرفیتونو د معرفي کولو لپاره مهم وباله.
نوموړي زیاته کړه، چې خونه د سوداګریزو اړیکو د پراختیا، د کورنیو تولیداتو معرفي کولو او د اقتصادي فعالانو ترمنځ د اړیکو رامنځته کولو په برخه کې د دغه مهم نندارتون د اهمیت له مخې، په تړون کې به د شو ژمنو عملي کولو لپاره هر اړخیزه همکاري وکړي.
په همدې حال کې د نندارتون د مرکز رئیس ښاغلي محمد صابر لطیفي د دغه مرکز شته ظرفیتونو او امکاناتو ته په اشارې سره د امام ابوحنیفه (رح) ملي او نړیوال نندارتون پر ملي او نړیوال اهمیت ټینګار وکړ.
نوموړي وویل، چې د امام ابوحنیفه (رح) نندارتون په تېرو دورو کې توانېدلی، چې د هېواد د سوداګریزو نندارتونونو په منځ کې ځانګړی ځای خپل کړي او د افغانستان په کچه پر یوه پېژندل شوي نندارتوني برانډ بدل شي.
ښاغلي لطیفي همدارنګه وړاندیز وکړ، چې د ګډو همکاریو د دوام او بنسټیزولو لپاره دې د خونې او د نندارتون مرکز ترمنځ د دوامدارې همکارۍ یو چوکاټ رامنځته او د دواړو ادارو ترمنځ دې د دایمي همکاریو تړون هم لاسلیک شي.
د امام ابوحنیفه (رح) پنځم ملي او نړیوال نندارتون د جوړولو په تړون کې د نندارتون ترسره کولو، د کورنیو او بهرنیو شرکتونو، سوداګرو، تولیدوونکو او پانګوالو د جذب او ګډون، د هېواد د محصولاتو او اقتصادي ظرفیتونو د معرفي کولو او د سوداګرۍ او پانګونې د پراختیا لپاره د نویو فرصتونو رامنځته کولو په برخو کې د دواړو ادارو د همکارۍ او همغږۍ زمینې شاملې دي.
همدارنګه د خونې د سټراټيژیکو چارو مرستیال ښاغلي مجیب‌الرحمن شېرزاد د مراسمو په پای کې د امام ابوحنیفه (رح) پنځم نړيوال نندارتون د جوړولو لپاره پر دقیق او مسلکي پلان جوړونې ټینګار وکړ.
نوموړي وړاندیز وکړ، چې د دغه نندارتون لپاره دې د بازارموندنې او تبلیغاتو جامع پلان جوړ او د نندارتون د معرفي او بازارموندنې، د ګډونوالو د جذب او د کورنیو او بهرنیو لیدوونکو د جلب ټول فعالیتونه دې د یوه منظم او هدفمند پلان له مخې وشي.
د دواړو ادارو مسؤلینو په دې مراسمو کې تخصصي او سوداګریز نندارتونونه د کورنیو تولیداتو د ملاتړ، د بازارونو پراختیا، د سوداګریزو اړیکو اسانولو، د پانګونې جذب او د نویو اقتصادي فرصتونو رامنځته کولو لپاره اغېزناک وسایل وبلل او د اغېزناکو او معیاري سوداګریزو نندارتونونو د جوړولو لپاره یې د همکاریو پر دوام ټینګار وکړ.
په دې مراسمو کې د افغانستان د سوداګرۍ او پانګونې خونې د عامل پلاوي پالیسۍ او تخنیکي چارو مرستیال ښاغلي احمد شکیل حازم د دیپارټمنټونو امرینو او د نندارتون جوړولو په کمېټو کې ګومارل شوو کارکوونکو هم ګډون کړی و.

يک‌شنبه، د زمري ۱۸مه، ۱۴۰۵
 
د افغانستان د سوداګرۍ او پانګونې خونې د اجرائیه کمېټې لسمه ناسته د کاري بوختیاوو د زیاتوالي له امله شنبه د شپې ۱۰:۰۰ بجې د افغانستان د سوداګرۍ او پانګونې خونې د عمومي رئیس ښاغلي الحاج سید کریم هاشمي په مشرۍ ترسره شوه.
په دې ناسته کې د ولایتي چارو مرستیال ښاغلي فیض‌احمد خوافي، د پالیسۍ او له حکومت سره د اړیکو مرستیال ښاغلي میراجان سلیمان‌خېل، د پانګونې مرستیال ښاغلي ارین زلګي عظیمي، د کورنیو تولیداتو د ملاتړ مرستیال ښاغلي عبدالنافع بارکزي، د خدماتو مرستیال ښاغلي عنایت‌الله صدیق‌زي، د سټراټیژیکو اړیکو مرستیال ښاغلي مجیب‌الرحمن شېرزاد او د دارالانشاء رئیس ښاغلي ذبیح‌الله عمرخېل ګډون درلود.
د ناستې په پیل کې د افغانستان د سوداګرۍ او پانګونې خونې عمومي رئیس ښاغلي الحاج سید کریم هاشمي د خونې د روانو چارو، مسؤلیتونو او هغو دندو په اړه، چې په اوسنیو شرایطو کې د دې ادارې پر غاړه دي هر اړخیز معلومات وړاندې کړل.
نوموړي د عامل پلاوي د ریاست، مرستیالانو، امرینو او مدیرانو له لوري د سپارل شویو دندو او مسؤلیتونو پر وخت ترسره کولو ټینګار وکړ او د خونې د بېلابېلو برخو ترمنځ یې د لا زیاتې همغږۍ، د مراجعینو چارو ته د اغېزناکې رسېدنې او سوداګرو، پانګوالو او د خصوصي سکټور غړو ته د چټک او مسؤلانه ځواب ویلو غوښتنه وکړه.
ښاغلي هاشمي زیاته کړه، چې د افغانستان د سوداګرۍ او پانګونې خونه د هېواد د خصوصي سکټور د استازولۍ یوې مهمې او ملي ادارې په توګه د سوداګرو، پانګوالو، متشبثینو او خپلو غړو پر وړاندې دروند مسؤلیت لري. د نوموړي په خبره، د دې مسؤلیت سم او اغېزناک ترسره کول، د خونې د مشرتابه ټولو غړو او مسؤلینو ترمنځ نږدې همکارۍ، دوامدارې همغږۍ، ګډ نظر، کاري ژمنتیا او ګډ مسؤلیت ته اړتیا لري.
نوموړي همدارنګه وویل، چې په اوسنیو شرایطو کې د خصوصي سکټور مشروع ستونزو او غوښتنو ته رسېدنه، د سوداګرو او پانګوالو د چارو اسانتیا او د اړوندو برخو ترمنځ د اغېزناکې همغږۍ رامنځته کول د خونې له مهمو لومړیتوبونو څخه دي او اړینه ده، چې ټول مسؤلین خپلې دندې په لا زیات جديت، دقت او مسؤلیت‌پالنې ترسره کړي.
د اجنډا په لومړۍ برخه کې پرېکړه وشوه، چې د عامل پلاوي رئیس، مرستیالان، امرین او د بېلابېلو برخو عمومي مدیران دې د شته اړیکو شمېرو ترڅنګ، یوه بېړنۍ د اړیکې شمېره هم د اړوند مرستیال یا مسؤل کارکوونکي په واک کې ورکړي، څو د اصلي مسؤل د نه شتون په صورت کې د مراجعینو، سوداګرو، پانګوالو او د خصوصي سکټور د غړو اړیکې بې‌ځوابه پاتې نه شي او ستونزې او غوښتنې یې په لنډ وخت کې تعقیب او حل شي.
د اجرائیه کمېټې غړو ټینګار وکړ، چې مراجعینو او د خصوصي سکټور غړو ته باید په منظم، مسؤلانه او دوامدار ډول ځواب وویل شي او هېڅ مراجعه کوونکی باید د اړوند مسؤل د نه لاسرسي له امله خپلو چارو ته په رسېدنه کې له غیرضروري ځنډ سره مخ نه شي.
همدارنګه پرېکړه وشوه، چې د افغانستان د سوداګرۍ او پانګونې خونې د بهرنیو اړیکو امریت دې د موجودې اړیکې شمېرې ترڅنګ درې نورې د اړیکې شمېرې هم فعالې وساتي، څو په ټولیز ډول څلور د اړیکې شمېرې د سوداګرو، پانګوالو او نورو مراجعینو د اړیکو لپاره فعالې وي او هغوی ته د لا چټک او غوره ځواب ویلو زمینه برابره شي.
په دې برخه کې ټینګار وشو، چې یادې شمېرې باید په ټاکل شوو وختونو کې فعالې وي او اړوند مسؤلین مکلف دي، چې ترلاسه شوې اړیکې او غوښتنې ثبت او تعقیب کړي او د اړتیا په صورت کې یې اړوندو برخو ته راجع کړي، څو د مراجعینو ستونزو ته په رسېدنه کې د ځنډ مخنیوی وشي.
ورپسې پرېکړه وشوه، چې د مدیره پلاوي د سټراټیژیکو چارو محترم مرستیال ترڅنګ د مدیره پلاوي یو بل مرستیال هم په نوبتي ډول د لسو ورځو لپاره په خونه کې حضور ولري او د مدیره پلاوي اړوندو چارو سرپرستي دې وکړي.
د دې پرېکړې موخه د مشرتابه د حضور پیاوړتیا، د پرېکړو د بهیر چټکتیا، ورځنیو چارو ته رسېدنه او د مدیره پلاوي، عامل پلاوي او د خونې د بېلابېلو برخو ترمنځ د لا زیاتې همغږۍ رامنځته کول وبلل شول.
همدارنګه، د اجنډا له مخې د هغو ځینو فعالیتونو، څرګندونو او اقداماتو په اړه بحث او د نظرونو تبادله وشوه، چې د شخصي انګېزو یا په هدفي ډول د افغانستان د سوداګرۍ او پانګونې خونې د موقف، اعتبار او فعالیتونو د کمزوري کولو په موخه ترسره کېږي او کولای شي د هېواد د خصوصي سکټور پر ګټو منفي اغېز وکړي.
د اجرائیه کمېټې غړو د رایو په یووالي سره ټینګار وکړ، چې د افغانستان د سوداګرۍ او پانګونې خونه د هېواد د ټول خصوصي سکټور پورې اړه لري او د دې ادارې د باور، خپلواکۍ، مقام او مشروع ګټو ساتنه د ټولو غړو، سوداګرو، پانګوالو او د دې ادارې د چارواکو ګډ مسؤلیت دی.
په دې ناسته کې پرېکړه وشوه، چې د هر ډول غیرقانوني اقدام، د ناسمو معلوماتو خپرولو، د خونې د اعتبار او موقف د هدفمند تخریب او یا هغو فعالیتونو پر وړاندې چې د خونې، خصوصي سکټور او د هېواد اقتصادي مشروع ګټو ته زیان رسوي، موضوع دې د اسنادو، شواهدو او نافذه قوانینو پر بنسټ، له رسمي لارو او د مسؤلو ارګانونو له لارې په جدي او قانوني ډول تعقیب شي.

یکشنبه، د زمري ۱۸، ۱۴۰۵
 
د افغانستان د سوداګرۍ او پانګونې خونې د عمومي رئیس ښاغلي الحاج سید کریم هاشمي، د ولایتي چارو مرستیال ښاغلي الحاج فیض احمد خوافي، د پالیسۍ او له دولت سره د اړیکو مرستیال ښاغلي الحاج میراجان سلیمانخېل او د سټراټیژیکو اړیکو د چارو مرستیال ښاغلي مجیب الرحمن شېرزاد په حضور کې د خونې بېلابېلو برخو له امرینو او عمومي مدیرانو سره په مرکزي دفتر کې ناسته وشوه.
په دې ناسته کې د خونې د عامل پلاوي سرپرست او مرستیالانو هم ګډون کړی و او د بېلابېلو برخو د کاري وضعیت، د چارو ترسره کېدو بهیر، شته ستونزو او ننګونو، وړاندیزونو او د فعالیتونو ښه‌والي پر لارو چارو بحث او د نظرونو تبادله وشوه.
د دې ناستې اساسي موخه د خونې د مشرتابه او اجرائیوي برخو ترمنځ د لا زیاتې همغږۍ رامنځته کول، په مستقيمه توګه د امرینو او عمومي مدیرانو د نظرونو او ستونزو اورېدل، د چارو د پرمختګ بهیر ارزول او د خونې فعالیتونو، مؤثریت، همغږۍ او د خدمتونو د کیفیت ښه‌والي لپاره د اړینو اقداماتو کول و.
د ناستې په جریان کې د بېلابېلو برخو امرینو او عمومي مدیرانو د خپلو فعالیتونو او اړوندو مسؤلیتونو په اړه لنډ راپورونه وړاندې کړل او هغه ستونزې او ننګونې یې د خونې له مشرتابه سره شریکې کړې، چې د خپلو ورځنیو دندو پر مهال ورسره مخ دي. همدارنګه يې د کاري بهیر ښه‌والي، د برخو ترمنځ د همغږۍ، د اجرااتو د چټکتیا او د خدمتونو د کیفیت لوړولو په برخه کې خپل وړاندیزونه او نظرونه هم وړاندې کړل.
د خونې مشرتابه په دقت سره د مطرح شويو نظرنو، ستونزو او وړاندیزونو د اورېدو ترڅنګ وړاندې شوي موضوعات وڅېړل او بحث یې پرې وکړ. په دې ناسته کې د کاري بهیر پر وړاندې د شته خنډونو د پېژندلو او له منځه وړلو، د بېلابېلو برخو ترمنځ د همغږۍ او همکارۍ پیاوړتیا، په دندو کې د تداخل مخنیوي او د داخلي چارو د بهیر ښه‌والي پر اړتیا ټینګار وشو.
د افغانستان د سوداګرۍ او پانګونې خونې عمومي رئیس ښاغلي الحاج سید کریم هاشمي د امرینو او عمومي مدیرانو د هڅو او فعالیتونو د ستاینې ترڅنګ پر مسؤلیت‌پذیرۍ، اداري نظم، د چارو په ترسره کولو کې پر چټکتيا او دقت او د اغېزناکو خدماتو پر وړاندې کولو ټینګار وکړ او د اړوندو برخو د فعالیتونو ښه‌والي په موخه یې لازمې لارښوونې وکړي.
همدارنګه ټینګار وشو، چې شته ستونزې او ننګونې باید په منظم ډول وپېژندل شي، وڅېړل شي او د حل لپاره یې عملي لارې چارې وړاندې شي او د برخو مسؤلین باید د خپلو وظیفوي صلاحیتونو په چوکاټ کې موضوعات په جدي توګه تعقیب کړي.
د ناستې په بله برخه کې د خونې د بېلابېلو برخو ترمنځ د همغږۍ پر اهمیت او د معلوماتو د لېږد، راپور ورکولو او د چارو تعقیب لپاره د منظم بهیر پر رامنځته کولو ټینګار وشو. د خونې مشرتابه غوښتنه وکړه،، چې د هرې برخې فعالیتونه دې د ځانګړو پروګرامونو، موخو او مسؤلیتونو پر بنسټ پر مخ یووړل شي او د کاري پایلو او لاسته راوړنو په اړه دې یې په منظم ډول له ارزولو وروسته راپور وړاندې شي.
همدارنګه د امرینو او عمومي مدیرانو له لوري د کاري چاپېریال ښه‌والي، د کارکوونکو د مسلکي ظرفیتونو لوړولو، د داخلي سیسټمونو ښه‌والي او د خدمتونو د اغېزمنتیا زیاتولو په برخه کې شوي وړاندیزونه د پام وړ وبلل شول او د مطرح شویو مواردو د ارزونې او تعقیب لپاره لازمې لارښوونې وشوې.
د خونې مشرتابه ټینګار وکړ، چې امرین او عمومي مدیران د بېلابېلو برخو د اجرائیوي مسؤلینو په توګه د خونې د موخو او پروګرامونو په پلي کولو کې مهم رول لري او اړینه ده، چې د همکارۍ، مسؤلیت‌پذیرۍ او همغږۍ په روحیه خپلې اړوندې چارې په اغېزناک او روڼ ډول پر مخ یووسي.
د ناستې په پای کې د خونې د مشرتابه او د بېلابېلو برخو د مسؤلینو ترمنځ د دا ډول ناستو او مستقیمو مشورو پر دوام ټینګار وشو، څو د ستونزو پر وخت پېژندلو ترڅنګ، د کارکوونکو وړاندیزونه او نوښتونه هم په پام کې ونیول شي او د خونې د فعالیتونو او خدمتونو د دوامدار ښه‌والي لپاره لازمه زمینه برابره شي.
دا ناسته په داسې حال کې ترسره شوه، چې د افغانستان د سوداګرۍ او پانګونې خونې مشرتابه د داخلي همغږۍ پر پیاوړتیا، د سازماني ظرفیتونو پر لوړولو، د خدمتونو د کیفیت پر لوړوالي او د یوې اغېزناکې، منظمې او ځواب‌ویونکې ادارې پر رامنځته کولو ځانګړی ټینګار لري.

جمعه، د زمري ۱۶مه، ۱۴۰۵
 
د افغانستان د سوداګرۍ او پانګونې خونې د «فکر خونې» دویمه ناسته د «پیاوړی اقتصاد، اباد افغانستان» تر شعار لاندې د یو د پوهنتونونو د استادانو، اقتصادپوهانو، علمي او مسلکي شخصیتونو، د خونې د سلاکارانو او د مشرتابه پلاوي د غړو په ګډون د خونې په عمومي دفتر کې ترسره شوه.
د دې ناستې موخه د هېواد اقتصادي ننګونو ارزونه، له علمي او تخصصي نظریاتو څخه ګټه اخیستل او د کورني تولید د ودې، د پانګونې پراختیا، د صادراتو زیاتوالي، د کارموندنې او د افغانستان اقتصادي ځان‌بساینې لپاره د عملي لارو چارو برابرول و.
د ناستې په پیل کې د افغانستان د سوداګرۍ او پانګونې خونې عمومي رئیس ښاغلي الحاج سید کریم هاشمي ګډونوالو ته د ښه راغلاست ویلو ترڅنگ د پوهنتونونو استادانو، اقتصادپوهانو او متخصصینو د مسؤلانه ګډون له امله مننه وکړه.
نوموړي ټینګار وکړ، چې افغانستان تر بل هر وخت زیات، علمي افکارو، عملي حل‌لارو او د حکومت، خصوصي سکټور او علمي ټولنې ترمنځ رښتینې همکارۍ ته اړتیا لري.
د خونې عمومي رئیس وویل، چې یوازې د طبیعي سرچینو لرل د اقتصادي ودې او هوساینې تضمین نشي کولای، بلکې سالم مدیریت، کره پلان جوړونه او له ملي ظرفیتونو اغېزناکه ګټه اخیستنه د هېواد د دوامدار پرمختګ اساسي عوامل دي.
ښاغلي هاشمي زیاته کړه، چې د فکر خونې د غونډو موخه یوازې د نظرونو تبادله نه ده، بلکې هڅه کېږي، چې د هېواد د علمي او فکري کادرونو د پوهې، تجربې او تخصص پر بنسټ یو هر اړخیز اقتصادي سټراټیژیک سند ترتیب او د اسلامي امارت مشرتابه ته د ملي وړاندیز په توګه وړاندې شي.
نوموړي ټینګار وکړ، چې وړاندې کېدونکې طرحې او وړاندیزونه باید عملي، د پلي کېدو وړ او د افغانستان له ریښتینې شرایطو سره سمون ولري، څو د بې‌وزلۍ په کمولو، د کارموندنې په رامنځته کولو، د پانګونې په پیاوړتیا، د کورنیو تولیداتو په زیاتوالي، د صادراتو په پراختیا او د اقتصادي تړلتیا په کمولو کې اغېزناک رول ولوبوي.
د خونې عمومي رئیس همدارنګه د افغانستان پراخو اقتصادي ظرفیتونو، لکه طبیعي سرچینو او کانونو، حاصل‌خېزو ځمکو، مناسب ټرانزیټي موقعیت، ځوان بشري ځواک او د پانګونې فرصتونو ته په اشارې وویل، چې د حکومت او خصوصي سکټور د ګډې همکارۍ او منظمې برنامې له لارې د دغو ظرفیتونو اغېزناکه ګټه اخېستنه کولای شي د «پیاوړی اقتصاد، اباد افغانستان» شعار عملي کړي.
هغه له استادانو، اقتصادپوهانو او متخصصینو وغوښتل، چې په ملي احساس او مسؤلیت‌پالنې سره خپلې عملي او علمي طرحې او نظریات وړاندې کړي او ډاډ یې ورکړ، چې ټول وړاندیزونه به په منظم ډول راټول، په یوه هر اړخیز تخصصي سند کې به تنظیم او د اسلامي امارت اړوندو مسؤلینو ته به وسپارل شي.
ورپسې د افغانستان د سوداګرۍ او پانګونې خونې سلاکار ښاغلي ډاکټر احمد خسرو ضیا د فکر خونې جوړښت او موخې تشریح کړې او د حکومت او خصوصي سکټور ترمنځ یې د لا زیاتې همغږۍ او د علمي او تخصصي فعالیتونو د بنسټیز کولو پر اړتیا ټینګار وکړ.
همدارنګه د خونې سلاکار ښاغلي اذرخش حافظي د حکومت او خصوصي سکټور ترمنځ د ګډو لومړیتوبونو او حل‌لارو د ټاکلو لپاره د همغږۍ پر رامنځته کولو ټینګار وکړ او له استادانو او متخصصینو یې وغوښتل، چې خپلې علمي او تخصصي طرحې په لیکلي ډول وړاندې کړي.
په ناسته کې ګډونوالو استادانو، اقتصادپوهانو او متخصصینو هم د هېواد د اقتصادي ننګونو په اړه خپل نظرونه او وړاندیزونه شریک کړل او د اقتصادي پروګرامونو په جوړولو کې یې د علمي او تخصصي همکارۍ لپاره خپل چمتووالی څرګند کړ.
ګډونوالو د پوهنتونونو او څېړنیزو مرکزونو له علمي ظرفیتونو څخه پر ګټنې او د علمي ټولنې، خصوصي سکټور او اړوندو ادارو ترمنځ د همکارۍ پر پیاوړتیا هم ټینګار وکړ.
د ناستې په پای کې د ګډونوالو له علمي ونډې څخه مننه وشوه او د فکر خونې د غونډو پر دوام، د تخصصي وړاندیزونو پر ترتیب او د هغو د پایلو پر تعقیب ټینګار وشو.
د دغې ناستې ترسره کېدل د علمي شخصیتونو، اقتصادي فعالانو او اړوندو ادارو ترمنځ د همکارۍ د پیاوړتیا او د «پیاوړي اقتصاد، اباد افغانستان» د هدف د ترسره کېدو لپاره د اغېزناکو اقتصادي حل‌لارو د تیارولو په لاره کې یو مهم ګام ګڼل کېږي.

یکشنبه، د زمري ۱۸مه، ۱۴۰۵
 
د افغانستان د سوداګرۍ او پانګونې خونې د مشرتابه پلاوي غړو او د کابل نړیوال هوايي ډګر عمومي رئیس ترمنځ د تازه او وچو مېوو د صادرونکو د ستونزو او ننګونو د شریکولو او ورته د حل‌لارو موندلو په موخه ناسته وشوه.
په دې ناسته کې د افغانستان د سوداګرۍ او پانګونې خونې له لوري د مدیره پلاوي محترمو مرستیالانو او غړو، د تازه او وچو مېوو د صادرونکو شرکتونو استازو او د حکومت له لوري اړوندو مسؤلینو ګډون کړی و.
د ناستې په پیل کې د افغانستان د سوداګرۍ او پانګونې خونې د مدیره پلاوي د پالیسۍ او له دولت سره د اړیکو مرستیال ښاغلي الحاج میراجان سلیمان‌خېل د تازه او وچو مېوو د صادرونکو پر وړاندې د شته ستونزو او ننګونو په اړه خبرې وکړې او عمده ستونزې یې په مشخص ډول مطرح کړې.
نوموړي وویل، له دې وړاندې هند ته د کام ایر، اریانا افغان او ترکش ایرلاین هوايي شرکتونو له لارې د صادراتي محصولاتو د انتقال لګښت پريو کیلو ګرام د امريکايي ډالر شاوخوا ۸۰ سېنټه و، خو اوس مهال د هوايي انتقالاتو کرایه لوړه شوې، چې له امله یې د صادراتو لګښتونه د پام وړ زیات شوي.
د سکينرونو کمښت، د هنګرونو ستونزې، د صادراتي توکو د ساتنې او انتقال لپاره د معیاري ذخیره ‌ځایونو نشتوالی، د هوايي بارونو اړوند ستونزې، د چيک کولو او د نمونو اخېستلو بهیر هغه مهم موارد وو، چې په دې ناسته کې پرې بحث وشو.
د خونې د مدیره پلاوي د پالیسۍ او له حکومت سره د اړیکو مرستیال د کابل هوايي ډګر له عمومي رئیس څخه وغوښتل، چې د یادو ستونزو د حل په برخه کې لازمه پاملرنه او همکاري وکړي او د صادراتو بهیر د اسانولو لپاره دې عملي اقدامات ترسره شي.
وروسته د کابل نړیوال هوايي ډګر عمومي رئیس ښاغلي مولوي عبدالهادي محمد د صادراتو پر اهمیت او د هېواد د اقتصادي ودې او پرمختګ په برخه کې د سوداګرو او صادرونکو پر رول ټینګار وکړ. نوموړي د مطرح شویو ستونزو او ننګونو په اړه خبرې وکړې او ډاډ یې ورکړ، چې د شته ننګونو د حل په برخه کې به لازمه همکاري کوي.
نوموړي زیاته کړه، چې د کابل هوايي ډګر او اړوندو ادارو له لوري په هوايي ډګر کې د وړاندې کېدونکو فیسونو او نورو خدماتو په برخه کې ځانګړي تخفیفونه په پام کې نیول شوي او په نږدې راتلونکي کې به د خدمتونو د انتقالاتو په لګښتونو کې د پام وړ کموالی راشي.
نوموړي همدارنګه وویل، چې په افغانستان کې د فعالیت او د بهرنیو هوايي کارګو شرکتونو لپاره به درېیمو هېوادونو ته د صادراتي جوپو د انتقال حق هم په پام کې ونیول شي؛ په دې معنا چې دغه شرکتونه به وکولای شي د خپلو اصلي هېوادونو ترڅنګ د افغانستان صادراتي جوپې هم نورو هېوادونو ته انتقال کړي.
د کابل هوايي ډګر عمومي رئیس همدارنګه وویل، چې په نږدې راتلونکي کې به یو نوی کارګو شرکت خپل فعالیت پیل کړي، چې د دغه شرکت له فعالیت سره به د انتقالاتو او صادراتو په برخه کې د شته ستونزو یوه برخه حل شي.
ښاغلي مولوي عبدالهادي محمد د تازه او وچو مېوو صادراتو ته د لومړیتوب ورکولو او له صادرونکو سره د لازمو همکاریو په اړه ډاډ ورکړ او ژمنه یې وکړه، چې د ګمرکي بهیر د چټکتیا په برخه کې به لازمې همکارۍ وشي.
په پای کې دواړو لورو د افغانستان د سوداګرۍ او پانګونې خونې، د کابل هوايي ډګر د مسؤلینو او اړوندو ادارو ترمنځ د لا زیاتو همکاریو او همغږۍ پر دوام ټینګار وکړ او د صادرونکو د ستونزو حل او د تازه او وچو مېوو د صادراتو بهیر اسانولو لپاره یې پر ګډو هڅو هوکړه وکړه.

مقالات دیگر...

  1. د فاریاب له والي سره د افغانستان د سوداګرۍ او پانګونې خونې عمومي رئیس لیدنه
  2. د افغانستان او اوزبېکستان د ټوکر او نساجۍ سکټور سوداګرو او پانګوالو انلاین ناسته وکړه.
  3. د افغانستان د سوداګرۍ او پانګونې خونې عمومي رئیس ښاغلي الحاج سید کریم هاشمي د ریاست الوزراء د اقتصادي مرستیال ښاغلي الحاج ملا عبدالغني برادر په مشرۍ د اسلامي امارت د لوړپوړي پلاوي په ترکیب کې نورستان ته سفر وکړ.
صفحه5 از280