د روژې مبارکې میاشتې په مناسبت او له بېوزلو کورنیو سره د مرستې په موخه د افغانستان د سوداګرۍ او پانګونې خونې د دې خونې د مشرتابه پلاوي د ښاغلو غړو لخوا د مرستو له راټولولو وروسته د دغو مرستو د وېش لړۍ پیل کړه.
د مرستو دا کڅوړې چې په کې اوړه، غوړي او لوبیا شامل دي، نن د کابل ښار د سرای شمالي په سیمه کې ۱۰۰۰ بېوزلو کورنیو ته یې وېش پيل شو او په دې بېوزلو کې د حکومتي ادارو کارکوونکي، د خونې کارکوونکي او نور هغه اړمن کسان شامل دي چې مخکې تر مخکې پېژندل شوي دي.
د مرستو د وېش بهیر د خونې د کورنیو تولیداتو او محصولاتو څخه د ملاتړ برخې مرستیال، ښاغلي الحاج عبدالنافع بارکزي، د خونې د عامل پلاوي رئیس، ښاغلي محمدولي امینی او د خونې د مدیره پلاوي ښاغلو غړو، الحاج حمیدالله حبیبي او الحاج سخي احمد نورزاد په حضور کې پیل شو.
سربېره پر دې، ۵۰۰ نورو بېوزلو کسانو ته نغدي مرستې هم وېشل کېږي چې د دغو نغدي او خوراکي مرستو ټولیز ارزښت شاوخوا ۷۰زره امریکايي ډالره دی.
همدارنګه د خونې د عامل پلاوي د ریاست مالي او اداري مرستیال، ښاغلي میرزمان پوپل، سلاکارانو او د بېلابېلو برخو یوشمېر آمرینو هم د مرستو د وېش له بهیر څخه څارنه کوله.
دوشنبه، کب ۱۸مه، ۱۴۰۴
