د افغانستان د سوداګرۍ او پانګونې اتاق د مدیره پلاوي لمړي مرستیال ښاغلي حاجي محمد یونس مهمند د افغانستان لپاره د سعودي عربستان سرپرست سفیر بدر ابراهیم سره په کابل کې ولیدل او د دواړو هېوادونو ترمنځ د سوداګریزو اړیکو په اړه يې خبرې وکړی.

په دی ناسته کې ښاغلي مهمند سعودي عربستان ته د زعفرانو، جلغوزو، وچو او تازه میوو صادرولو او د نوموړي هېواد څخه د ځمکني او هوايې ټرانسپورټ په واسطه د خرما واردولو په اړه د بدر ابراهیم سره خپل نظریات شریک کړل او د سعودي عربستان له سفارت څخه يې په دی برخه د همکاریو غوښتنه وکړه.

د افغانستان د سوداګرۍ او پانګونې اتاق د عامل پلاوي سرپرست رئیس ښاغلي شفیق الله عطایی، د ایران د سوداګرۍ اوصنعت اتاق رئیس ښاغلي سلیم مهرامي، د ایران د سوداګرۍ رئیس ښاغلي مظفر خاني، او د هرات ولایتي اتاق سوداګریز مرستیال ښاغلي احمد سعید عظیمان په دې ناسته کې د ګډون تر څنګ د دواړو هیوادونو تر منځ د سوداګرۍ اړیکو پراختیا او شته فرصتونو او ننګونو په اړه خبرې وکړې.

په دې ناسته کې ښاغلي عطایي د پانګونې فرصتونو او د افغانستان او ایران تر منځ د سوداګرۍ د پراختیا یادونه وکړه او د دواړو هیوادونو تر منځ یې د یو لړ سوداګریزو اقداماتو یادونه هم وکړه. نوموړي د ایران د سوداګرۍ او صنایعو اتاق څخه وغوښتل چې حکومت ته وړاندیز وکړي چې د اروپايې اتحادیې، متحده ایالاتو او یو شمیر نورو هیوادونو په څیر د افغانستان صادراتو لپاره غوره تعرفې په نظر کې ولري.

د افغانستان د سوداګرۍ او پانګونې اتاق د عامل پلاوي سرپرست رئیس په افغانستان کې د پانګونې زمینه له بل هر وخته مناسب وګڼله او زیاته یې کړه: "رامینځته شوي فرصتونه باید په مناسب ډول وکارول شي او د دواړو هیوادونو سوداګرو ته ښې سوداګریزې اسانتیاوې برابرې کړی شي.

ښاغلي عطایي د ایران د سوداګرۍ او پانګونې اتاق له چارواکو هم وغوښتل چې د سوداګریزې تجربې تبادله او په ایران او افغانستان کې د پانګونې فرصتونه و ارزوي.

د هرات د سوداګرۍ او پانګونې اتاق د مدیر پلاوي سوداګریز مرستیال ښاغلي احمد سعید عظیمان هم په دغه انلاین کنفرانس کې د ایران او افغان سوداګرو ترمنځ د ګډې پانګونې غوښتنه وکړه. هغه زیاته کړه چې اوس مهال په صنعتي پارکونو ، د کرنې او بریښنا په برخو کې د پانګونې ښه فرصتونه شتون لري او دا چې ایراني سوداګر کولی شي له دې فرصتونو ګټه واخلي او پانګونه وکړي.

په دې ناسته کې ، د ایران - افغانستان د ګډ اتاق عمومي منشي، مظفر علي خاني وویل: "افغانستان د لاس نه خوړلو کانونو، ماهر کاريګر، حاصلخیزې ځمکې او ډیرې اوبه لري، چې د اقتصاد له پلوه د ایران لپاره ښه ملګری کیدی شي." هغه زیاته کړه چې د دواړو هیوادونو تر منځ د اړیکو د لا پراختیا لپاره د دواړو هیوادونو تر منځ په سرحدي نقطو کې ګډو بازارونو رامینځته کولو ته اړتیا ده.

د ایران او افغانستان د ګډ اتاق د نړیوالو اړیکو مسؤل ښاغلي مهندس مهراني وویل چې د ایراني سوداګرو اندیښنه په تیرو وختونو کې دا وه چې افغاني سیال ملګري به يې نشول پیداکولی خو په ایران کې د افغان سوداګرو شتون اوس د ایران لپاره یو ښه فرصت دی د پخوا په پرتله.

د غونډې په پای کې ، پریکړه وشوه چې د دواړو هیوادونو څخه یو به پلاوي د تجربو تبادلې او فرصتونو ارزولو لپاره سفر کوي.

د اتاق د نظارت پلاوي رئیس ښاغلي عبدالحامد حمیدي، د نظارت پلاوي منشي ښاغلي عبدالمتین قلندري، د نظارت پلاوي غړیو هر یو خالد احمدي او محمد ناصر صمیم د نظارت پلاوي په دفتر چې د کابل په شهرنو کې موقعت لري ناسته تر سره کړه.

په دی ناسته کې د افغانستان د سوداګرۍ او پانګونې اتاق د بنسټیزو موضوعګانو په اړه خبرې وشوې او په اړه يې لازمې پریکړې ونیول شوې.

د افغانستان د سوداګرۍ او پانګونې اتاق د مدیره پلاوي لمړي مرستیال ښاغلي محمد یونس مهمند، د مدیره پلاوي غړیو هر یو خان جان الکوزي او جان آقا صادقي، د عامل پلاوي سرپرست رئیس ښاغلي شفیق الله عطايې، د عامل پلاوي مالي او اداري مرستیال ښاغلي میرویس هوتک، د اتاق سلاکار ښاغلي نظام الدین تاج زاده، او د اتاق کارکوونکو د مارچ اتمه (د ښځو نړیواله ورځ) ولمانځله.

ښاغلي محمد یونس مهمند د هېواد ټولو ښځو او په ځانګړې توګه د اتاق ښځینه کارکوونکو ته د ښځو د نړیوالې ورځې په پار مبارکي وویله او په اقتصاد او کوچنیو تشبثاتو کې يې د ښځو رول اړین وباله.

ښاغلي خان جان الکوزي د مارچ اتمې، د سوداګرۍ پراختیا او د سولې راوستو په برخه کې د ښځو رول په اړه د خبرو کولو تر څنګ د هېواد ښځینه وو ته د لا ډیرو بریاوو دعا وکړه.
 
ښاغلي شفیق الله عطايې د مارچ د اتمې په پار ښځینه کارکوونکو ته د مبارکۍ ویلو تر څنګ، ډاډ ورکړ چې اتاق په خپلو ټولو ګمارنو کې د جنډر موضوع په جدي ډول په نظر کې نیسي.
 
ښاغلي جان آقا صادقي د اتاق ښځینه کارکوونکو ته د مارچ اتمې په پار د مبارکۍ ویلو تر څنګ زیاته کړه چې د سولې راتګ به ښځو ته د لا زیاتو کاري فرصتونو سبب وګرځي.

د اتاق دوه ښځینه کارکوونکو هرې یوې شکیلا شهاب عزیزیان او سیمین دانشور د مدیره پلاوي څخه د ښځینه کارکوونکو د ملاتړ او د ښځو د نړیوالې ورځې لمانځ غونډې ترتیبولو په تړاو مننه او ستاینه وکړه.

د پروګرام په پای کې د اتاق د سوداګریز مرستیال ښاغلي حاجي خیرالدین مایل احمدي او د بشیر نوید شرکت رئیس له خوا ترتیب شوې ډالۍ ګانې د اتاق ښځینه کارکوونکو ته ډالۍ کړی شوی.