د افغانستان د سوداګرۍ او پانګونې اتاق د واګې بندر د تړل کېدو له امله، چې د افغانستان صادرات د پاکستان له لارې هندوستان ته درولي، له صادرونکو او د کام ایر او آریانا د هوايي شرکتونو له مسوولینو سره ګډه ناسته ترسره کړه، تر څو د هوايي کارګو له لارې هندوستان ته د زراعتي محصولاتو د لېږد په موخه حل لارې ولټوي.

په دې ناسته کې ښاغلي خانجان الکوزی، د اتاق د مشرتابه پلاوي غړی او د افغان-پاک ګډ اتاق رئیس، میرزمان پوپل د اتاق د عامل پلاوي د مالي او اداري مرستیال سرپرست، عبدالسلام کوهی د اتاق حقوقي سلاکار، امید حیدري د اتاق لوړپوړی سلاکار، د کام ایر او آریانا شرکتونو مسوولین او یو شمېر صادرونکي ګډون درلود.

ښاغلي پوپل، د ناستې ګډونوالو ته د اتاق په استازیتوب هرکلی ووایه، اتاق یې د خصوصي سکتور ملاتړی او له حکومت سره د اړیکو پل وباله، او د ناستې اساسي هدف یې د افغانستان د صادراتي توکو لپاره بدیلې لارې موندل وبلل. نوموړي د هند بازارونه د افغان زراعتي محصولاتو لپاره حیاتي وبلل او له هوايي شرکتونو یې وغوښتل چې د صادراتي توکو د انتقال په نرخونو کې له سوداګرو سره نوره همکاري وکړي.

ښاغلي پوپل، همداراز د چابهار بندر له لارې د صادراتو یادونه وکړه او زیاته یې کړه چې د افغانستان د سوداګرۍ او پانګونې اتاق به ډېر ژر د چابهار بندر له مسوولینو سره آنلاین ناسته ترسره کړي، تر څو د صادراتي توکو لپاره لا زیاتې اسانتیاوې برابرې شي او صادرات خوندي او له نیمګړتیا پرته ترسره شي.

ښاغلي الکوزي د واګې بندر د بندېدو له امله د افغان سوداګرو د ستونزو یادونه وکړه او وچې مېوې یې د افغانستان له مهمو صادراتي توکو وبللې او د هېواد په اقتصاد کې یې ارزښتناک رول مهم وګاڼه. نوموړي له ټولو صادرونکو وغوښتل چې یوازې د هند په بازارونو تکیه ونه کړي، بلکې د نړۍ په نورو هېوادونو کې د خپلو توکو لپاره نوي بازارونه هم ولټوي.

ښاغلي الکوزي پر دې هم ټینګار وکړ چې د هند هېواد ته د هوايي الوتنو شمېر زیات شي او له هوايي شرکتونو او صادرونکو یې وغوښتل چې خپلې نظریې او وړاندیزونه د صادراتو د لا زیاتې اسانتیا لپاره لیکلي اتاق ته وسپاري، تر څو اتاق یې حکومت ته وړاندې کړي.

صادرونکو د اتاق د هڅو له امله د صادراتو د بدیلو لارو موندلو په برخه کې مننه وکړه او له حکومتي مسوولینو یې وغوښتل چې د هوايي کارګو له لارې د صادراتو لپاره د ګمرکي خدمتونو اسانتیاوې برابرې کړي.

د هوايي شرکتونو مسوولینو ژمنه وکړه چې د اتاق د رهبري پلاوي او سوداګرو ټول نظریات او وړاندیزونه به د خپلو شرکتونو رهبري ته ورسوي او په راتلونکې ناسته کې به د خپلو پروازونو د کرایو جزییات هم شریک کړي.

 

 

 

 

 

 

د افغانستان د سوداګرۍ او پانګونې اتاق لومړي مرستیال، ښاغلي محمد یونس مهمند، د اتاق د مالي او اداري مرستیال سرپرست ښاغلي میرزمان پوپل په حضور کې له ښاغلي سیناریل بکش او یو شمېر هندي سوداګرو سره په مرکزي دفتر کې وکتل او د دوی د سوداګریزو ستونزو په اړه خبرې او نظریات تبادله کړل.

ښاغلي سیناریل بکش، له افغان سوداګرو سره د تجارتي توکو د تبادلې په برخه کې د موجودو ستونزو یادونه وکړه او له لومړي مرستیال څخه یې د ستونزو په حل کې د همکارۍ غوښتنه وکړه.

ښاغلي مهمند، ښاغلي سیناریل بکش او د هغه د ملګرو راتګ ته هرکلی ووایه او هند یې د افغانستان یو ښه دوست او اقتصادي - تجارتي شریک وباله. هغه ډاډ ورکړ چې اتاق به د اساسنامې له مخې د خصوصي سکتور د تجارتي ستونزو په حل کې هر اړخیزه همکاري کوي.

 

 

 

 

 

 

ښاغلي محمد یونس مهمند، د افغانستان د سوداګرۍ او پانګونې اتاق لومړي مرستیال، له ښاغلي کورومیا تاکایوشي، د جاپان له سفیر سره د یاد هېواد په سفارت کې ولیدل او د دواړو هېوادونو ترمنځ د سوداګرۍ او پانګونې د پراختیا په اړه یې بحث وکړ. په دې لیدنه کې ښاغلي عبدالمتین غالب، د اتاق د نړیوالو اړیکو مسئول، او ښاغلي هیروتاکا کاواکامی، د جاپان سفارت لومړی سکرتر، هم حضور درلود.

د لیدنې په پیل کې، ښاغلي مهمند د جاپان له دوامداره او مؤثرو همکاریو څخه مننه وکړه، او د افغانستان د اقتصادي پرمختګ په برخه کې یې د جاپان مثبت رول وستایه. نوموړي جاپان د افغانانو پخوانی او باوري شریک وباله او د همکاریو د دوام هرکلی یې وکړ.

ښاغلي مهمند د افغانستان او جاپان ترمنځ د سوداګریزو اړیکو د پراختیا، په ځانګړې توګه د افغان انارو او انګورو د هوایي کارګو له لارې صادراتو په اړه معلومات ورکړل او له جاپان سفارته یې وغوښتل چې د یادو کرنیزو توکو د ګمرکي مراحلو په اسانولو کې مرسته وکړي. نوموړي همدارنګه د افغان سوداګرو او د جاپاني اړوندو مراجعو ترمنځ د یو آنلاین ناسته د جوړېدو وړاندیز وکړ.

ښاغلي مهمند زیاته کړه چې د جاپاني موټرو تقاضا په افغان بازارونو کې لوړه ده او یو شمېر ښي لوري موټرونه افغانستان ته وارده شوي دي. نوموړي وړاندیز وکړ چې هغه جاپاني شرکتونه یا فابریکې چې کولای شي د یادو موټرو د سټرینګ د اړولو تخنیکي خدمات په افغانستان کې وړاندې کړي، باید پانګونې ته وهڅول شي. هغه دا هم وویل چې د افغانستان خصوصي سکتور د سوزوکي شرکت د نمایندګۍ د پرانیستو لیوالتیا لري.

د اتاق مرستیال، د ټول هېواد امنیت، د کوکنارو کر د بندیدو، او د فساد له منځه تلو، د بهرنیو پانګوالو لپاره یوه ښه موقع وګڼله او له جاپان سفارته یې وغوښتل چې د افغانستان د سوداګرۍ اتاق او د جاپان د سوداګرۍ اتاق ترمنځ د یوې ناستې زمینه برابره کړي.

ښاغلي مهمند، د خبرو په یوه برخه کې، له سفارت څخه د یوې منطقوي اتاق په جوړېدو کې د ملاتړ غوښتنه وکړه چې د ازبیکستان، ترکمنستان، قزاقستان، آذربایجان او ترکیې ګډون پکې وي، او دا یې د افغانستان، سیمې او اروپا ترمنځ د سوداګرۍ د پراخېدو لپاره یو مهم ګام وباله.

په پای کې، د جاپان سفیر، ښاغلي کورومیا تاکایوشي، ښاغلي مهمند ته د ښه راغلاست ویلو ترڅنګ د وړاندې شویو وړاندیزونو هرکلی وکړ او د افغانستان د سوداګرۍ او پانګونې له اتاق سره یې د سفارت د هر اړخیزې همکارۍ ژمنه وکړه. نوموړي وویل چې سفارت چمتو دی څو له جیتو (د جاپان د بهرني تجارت سازمان) سره یو آنلاین کنفرانس جوړ کړي تر څو د دواړو هېوادونو د خصوصي سکتور اړیکې اسانه شي.

ښاغلي سفیر دا هم وویل چې راتلونکې میاشت به په دوبۍ کې د جاپان له منطقوي اتاق سره یوه ګډه ناسته ترسره شي او د افغانستان د سوداګرۍ او پانګونې اتاق تر مشرۍ لاندې د یوې منطقوي اتاق د جوړېدو ملاتړ یې اعلان کړ.

 

 

 

 

د افغانستان د سوداګرۍ او پانګونې اتاق مشرتابه پلاوی، ښاغلي محمد یونس مهمند د اتاق لومړی مرستیال، ښاغلي خیرالدین مایل احمدي د اتاق سوداګریز مرستیال، ښاغلي خانجان الکوزی د مشرتابه پلاوي غړی او د افغان-پاک ګډ اتاق رئیس، ښاغلي ضیاءالدین اچکزی، سلطان محمد صافي، محمد گردیزی او محمد داوود یوسفزی د مشرتابه پلاوي غړو، د قزاق-افغان سوداګریزې مجمعې کې چې د سوداګریزو نظریاتو د تبادلې او پانګونې د جلب لپاره په کابل ښار کې جوړه شوې وه، ګډون وکړ.

په دغه ناسته کې ښاغلي نورالدین عزیزی د صنعت او تجارت وزارت سرپرست، ژومان گارین سریک ماکاشویچ د قزاقستان صدراعظم مرستیال، میرمن روزا اوتنبایوا په افغانستان کې د یوناما مشرې، ښاغلی احمدشاه حکیمي د کابل د سوداګرۍ او پانګونې اتاق لومړی مرستیال، ښاغلی میر زمان پوپل د عامل پلاوي د مالي او اداري مرستیال سرپرست، ښاغلی محمد انور عارفي د پالیسۍ او تخنیکي مرستیال، ښاغلی احمدالله زاهد د صنعت او تجارت وزارت معین، د دواړو هیوادونو د خصوصي سکتور استازو او ګڼ شمېر رسنیز استازو ګډون درلود.

ښاغلي زاهد د ناستې ټولو ګډونوالو ته ښه راغلاست ووایه، د حکومت پالیسي یې اقتصاد محوره وبلله او د ګاونډیو او سیمې له ټولو هیوادونو سره یې د ښې سوداګرۍ غوښتنه وکړه. هغه د دې ډول ناستو ارزښت په پانګونې جلب او د خصوصي سکتور ترمنځ د نظریاتو تبادله کې ارزښتناک وباله.

ښاغلي عزیزی د قزاقستان له حکومت څخه د دریو کلونو د مرستو مننه وکړه او ویې ویل چې له نوي حکومت سره، د قزاقستان سره سوداګریزې اړیکې پراخې شوې دي. هغه د دواړو هیوادونو ترمنځ د ۳۲ سلنې د سوداګرۍ زیاتوالي یادونه وکړه او د وزارت د هڅو ډاډ یې ورکړ.

ښاغلي عزیزی، د قزاقستان سوداګریز کور جوړېدل مهم وګڼل او له قزاق لوري یې وغوښتل چې د کم‌کیفیته توکو د مخنیوي لپاره له افغان حکومت سره ګډ کار وکړي.

ښاغلي ماکاشویچ افغانستان او قزاقستان اقتصادي دوستان وبلل او د منځنۍ آسیا او سویلي آسیا ترمنځ د ترانزیت تړاو یې یاد کړ. هغه د مزار شریف – تورغندي او سپین بولدک د اورګاډي پټلۍ په جوړولو کې د تخنیکي مرستو ژمنه وکړه.

میرمن روزا اوتنبایوا د دې ناستې هرکلی وکړ او ویې ویل چې د ترانزیت له لارې له قزاقستان سره د نورو آسیایي هیوادونو نښلول ارزښت لري. هغې له قزاق خصوصي سکتور وغوښتل چې افغانستان ته سفر وکړي او په بیلابیلو برخو کې پانګونه وکړي.

ښاغلي مهمند، د ټول هېواد امنیت او د کوکنارو کښت بندول د حکومت لویې لاسته راوړنې وبللې. هغه دا د سوداګرۍ د پراختیا او پانګونې لپاره فرصت وباله. نوموړي د افغانستان د سیمه ییزې سوداګرۍ ارقام شریک کړل او د سوداګرۍ د بیلانس متوازن کولو باندې یې ټینګار وکړ.

نوموړي، د افغان سوداګرو لپاره د ویزو په بهیر کې اسانتیاوې د جنوبي او مرکزي آسیا ترمنځ د ترانزیت او سوداګرۍ پراخېدو لپاره مهم وبللې او له ټولو هیوادونو سره یې د ملي ګټو پر بنسټ د ښو سوداګریزو اړیکو غوښتنه وکړه. هغه ل د صنعت او سوداګرۍ وزیر او د قزاق صدراعظم مرستیال څخه غوښتنه وکړه چې د دواړو هیوادونو ترمنځ د سوداګرۍ د پیاوړتیا لپاره هڅې وکړي.

ښاغلي مهمند، د افغانستان د سوداګرۍ او پانګونې اتاق او د قزاقستان د سوداګرۍ او صنایع اتاق ترمنځ د همکارۍ د تفاهمنامې پر لاسلیک ټینګار وکړ او دا یې د پانګوالو فرصتونو د پیژندلو او د خصوصي سکتور د ستونزو د حل لپاره ارزښتناک وباله. نوموړي د افغانستان د خصوصي سکتور ملاتړ د حکومت د ټولو هغو فرامینو او لارښوونو څخه اعلان کړ، چې د خصوصي سکتور د ثبات او پیاوړتیا لپاره صادرېږي.

 

 

 

 

 

 

 

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د اتاق د مالي او اداري مرستیال سرپرست ښاغلي میرزمان پوپل او د نړیوالو اړیکو د دیپارتمنت مسوول ښاغلي عبدالمتین غالب په حضور کې، له ښاغلي نیکولای، چې د روسیې د سفارت سوداګریز اتشه دی، سره وکتل او د دواړو هېوادونو ترمنځ د سوداګریزو اړیکو د پراخوالي په اړه بحثونه وکړل.

ښاغلي نیکولای د کازان نندارتون، د اسلامي همکاریو د سازمان د غړو اتاقونو د رئیسانو کنفرانس، د افغان سوداګرو او د مختلفو هېوادونو د سوداګرو ترمنځ د سوداګریزې ناستې، او د افغانستان – روسیې د سوداګریز فورم کنفرانس په اړه معلومات وړاندې کړل چې ټاکل شوې نږدې راتلونکي کې په کازان ښار کې جوړ شي. نوموړي د افغانستان د خصوصي سکتور د استازیتوب په توګه د اتاق له رهبري څخه غوښتنه وکړه چې په یاده نندارتون او غونډو کې ګډون وکړي. هغه همداراز وویل چې د یادو برنامو په څنډه کې به د افغانستان د سوداګرۍ او پانګونې اتاق او د روسیې د سوداګرۍ او صنایعو فدراسیون ترمنځ د همکاریو یو تفاهم‌لیک هم لاسلیک شي.

ښاغلي مهمند، ښاغلي نیکولای ته د تود هرکلي ترڅنګ، د روسیې له سفارت او خلکو څخه د افغانستان له خصوصي سکتور او ولس سره د همکارۍ له امله مننه وکړه او یادې ناستې یې د سوداګرۍ د پراختیا، ګډو پانګونو، د تولیدي توکو د معرفي، او د مختلفو سکتورونو د سوداګرو ترمنځ د نظریاتو د تبادلې لپاره مهمې وبللې. نوموړي له ښاغلي نیکولای څخه وغوښتل چې د یادو کنفرانسونو په څنډه کې د اتاق د مشرتابه پلاوي او د روسیې د حکومتي چارواکو ترمنځ غونډې تنظیم کړي څو هغوی د افغان صادراتو پر توکو د ترجیحي تعرفو د وضعې او نورو سوداګریزو اسانتیاوو په برخه کې وهڅول شي