د افغانستان د سوداګرۍ او پانګونې اتاق لمړي مرستیال ښاغلي حاجي محمد یونس مهمند او عامل رئیس ښاغلي سید زمان هاشمي د کاغذ واردوونکو اتحاديې له رئیس ښاغلي مسعود احدي او ددی اتحاديې له یو شمیر غړو سره د اتاق د غونډو په تالار کې ولیدل او ددوی د ستونزو په اړه يې خبرې وکړی.

د کاغذ واردوونکو اتحاديې رئیس او غړو يې خپلې ستونزې په دی ډول څرګندې کړی "د سیمې هیوادونه هم تر اوسه نشي کولای چې د A4  او A3 سایز کاغذ وارد کړي په داسې حال کې چې په هیواد کې دننه ځینې تولیدي شرکتونه د کاغذ غټې تختې واردوي او بیا يې د A4 او A3 په سایزونو قطعه کوي او دعوه کوي چې دوی کاغذ پخپله تولیدوي. ددوی دغه کاغذ د بازار او مستهلیکینو اړتیاوې نشي پوره کولی. بله دا چې که چیری حکومت د کاغذ په واردوونکو باندی ګمرکي تعرفه زیاته کړي، په بازار او مستهلیکینو باندی د ناوړه اغیزو لرلو برسیره، خلک د جدي ستونزو سره مخامخ کوي."

د اتحاديې رئیس او غړو يې د اتاق څخه وغوښتل چې ددوی ستونزې د اړونده حکومتي ادارو سره شریکې او د په واردیدونکي کاغذ باندی د ګمرکي تعرفې د زیاتوالي مخنیوې وکړي.

ښاغلي مهمند د اتحاديې رئیس او غړو د وړاندیزونو اوریدو وروسته وویل "د افغانستان د سوداګرۍ او پانګونې اتاق مشرتابه د کورنیو تولیداتو د ملاتړ تر څنګ تل هڅه کړی چې د کورنیو تولیداتو او وارداتو ترمنځ یوه متوازنه کړنلاره په کار واچوي تر څو د یوې خوا د کورنیو تولیداتو د زیاتوالي سبب وګرځي او له بلې خوا بازار او مستهلیکین د ستونزو سره مخامخ نشي."

ښاغلي هاشمي د اتحاديې له غړو څخه وغوښتل چې خپلې ستونزې د اتاق سره په لیکلې بڼه شریکې کړي تر څو اتاق يې د مالیې وزارت له مسؤلینو سره شریکې او د له منځه وړلو لارې چارې ورته ولټوي. نوموړي ډاډ ورکړ چې د مستهلیکینو د نه زیانمن کیدو لپاره به د یادو ستونزو په له منځه وړلو کې خپلې هیڅ ډول مرستې ونه سپموي.       

د افغانستان د سوداګرۍ او پانګونې اتاق د مدیره پلاوي لومړي مرستیال ښاغلي حاجي محمد یونس مهمند او د مدیره پلاوي د پانګه اچوونې مرستیال ښاغلي سلطان محمد صافي د هندوستان سفارت د سوداګریز پلاوي مشرتابه ښاغلي ویبو تریپاتي سره د مدیره پلاوي په کاري دفتر کې د لیدنې په ترڅ کې په هندوستان کې د افغان سوداګرو په شتو ستونزو او ننګونو خبرې وکړی.

ښاغلي مهمند وویل "افغان زراعتي تولیدات د هنګ تصدیق پاڼې نه لرلو له امله د هندوستان په ګمرک کې ځنډول شوي او هندوستان هیواد ته د ننوتلو اجازه نه ورکول کیږي او بله دا چې د هندوستان سفارت له خوا افغان سوداګرو ته بیړنۍ او اوږدمهاله ویزې نه ورکول یوه بله ستره ستونزه ده. موږ د هندوستان سفارت سوداګریز پلاوي څخه په خورا درنښت هیله کوو، چې د یادو ستونزو په له منځه وړلو کې کوټلي ګامونه پورته او لازمي آستانتیاوې رامنځته کړي."

ښاغلي صافي د سیمې هیوادونو سره په نیکو اړیکو لرلو ټینګار وکړ او زیاته يې کړه چې په هندوستان کې هیواد کې باید افغان سوداګرو او پانګه اچوونکو ته لازمې آسانتیاوې رامنځته کړی شي.

په کابل کې د هندوستان سفارت سوداګریز پلاوي د افغانستان خصوصي سکتور په ځانګړې توګه د افغانستان د سوداګرۍ او پانګونې اتاق سره د خپلو همیشنیو همکاریو یادونه وکړه او زیاته يې کړه چې د اتاق مشرتابه پلاوي له خوا مطرح شوې ستونزې به د خپل حکومت اړوندو ادارو سره شریکې او د له منځه وړلو په برخه کې به يې خپلې هیڅ ډول مرستې ونه سپموي.

د افغانستان د سوداګرۍ او پانګونې اتاق د مدیره پلاوي لومړي مرستیال ښاغلي حاجي محمد یونس مهمند، د مدیره پلاوي مالي رئیس ښاغلي شیرین آغا سخي، د مدیره پلاوي غړي ښاغلي احمد ضیاء عظیمي شینوزاده او د اتاق عامل رئیس ښاغلي سید زمان هاشمي او یو شمیر سوداګرو او پانګه اچوونکو د ایران بهرني کښت انجمن مدیره پلاوي رئیس ښاغلي علي رضواني زاده سره په اتاق کې د لیدنې په ترڅ کې د پانګه اچوونې فرصتونو، سوداګرۍ پراختیا، مالدارۍ او زراعت په اړه خبرې اترې وکړی.

ښاغلي مهمند ایراني پلاوي ته د ښه راغلاست ویلو تر څنګ وویل "د افغانستان اقلیم د کښت او مالدارۍ لپاره ډیر مناسب دی. او یو ګډ تفاهملیک به په دواړو هیوادونو کې د سوداګرۍ او پانګه اچوونې لپاره لیار هواره کړي."

ښاغلي هاشمي د دواړو هیوادونو په خصوصي سکتورونو کې د شتو سوداګریزو او پانګه ایزو فرصتونو په اړه خبرې وکړی او د هیواد په اقتصادي لوړتیا کې يې د زراعت او مالدارۍ رول اړین وباله.

ښاغلي هاشمي زیاته کړه "د افغانستان د سوداګرۍ او پانګونې اتاق د هغو پانګه اچوونو چې په هیواد کې د زراعت او مالدارۍ لوړتیا، ځان بساینې او کاري فرصتونو سبب ګرځي ملاتړ کوي."

نوموړي د ایراني سوداګرو او پانګه اچوونکو څخه وغوښتل چې د مالدارۍ د لا ښه والي، کښت او د تولیداتو پروسس په برخه کې خپلې ځانګړې طرحې د اتاق سره شریکې کړي تر څو اتاق د هیواد سوداګرو او پانګه اچوونکو سره یوځای د ګډې پانګه اچوونې په موخه ورته طرحې جوړې کړي.

ښاغلي علي رضواني زاده د افغانستان د زراعت، اوبو ورکونې او مالدارۍ وزارت وزیر سره د لیدنې، د ایران بهرني کښت انجمن فعالیتونو او د کښت په اړه د ګډو همکاریو په اړه مالومات وړاندی کړل او د وریو د اصلاح شوي نسل، د وښو تولید او د کښت تولیداتو د بسته بندۍ په برخه کې د ګډو پانګه اچوونو په اړه خپله لیوالتیا څرګنده کړه.

په دی غونډه کې افغان سوداګرو او پانګه اچوونکو هم د زراعت، باغدارۍ او مالدارۍ په اړه خبرې وکړی او په دی برخه کې يې د ګډې پانګه اچوونې په اړه خپله لیوالتیا څرګنده کړه.  

د ترکیې هیواد سوداګرۍ اتاق او د آسیايې همکاریو مکالمې سازمان (ACD) رئیس ښاغلي رفعت هسارکچي اوګلو، د ترکيې د سوداګرۍ وزیرې آغلې رخسار پیکان او د آسیايې هیوادونو د سوداګریزو اتاقونو رئیسانو او مرستیالانو په ګډون د چهارشنبه په ورځ د سلواغې د میاشتې په ۱ نیټه په جوړه شوې آنلاین غونډه کې د افغانستان د سوداګرۍ او پانګونې اتاق عامل پلاوي د ګډون تر څنګ؛ په آسیا کې د اقتصادي همکاریو په ارزښت باندی خبرې وکړی.

ښاغلي هاشمي د ترکیې هیواد څخه ددی غونډې د کوربه توب په تړاو مننه وکړه او د آسیايې همکاریو مکالمې سازمان ((ACD غړیو هیوادونو څخه يې وغوښتل چې د سوداګریزو اړیکو په پراختیا کې د خپلو همکاریو کچه زیاته کړي. تر څو هر غړی هیواد وکولی شي په ایکو سیمه کې د توکو په آزاد جریان او پانګه اچوونه کې خپل اړین رول ولوبوي.

په دی غونډه کې غړیو هیوادونو د پانګه اچوونې کچې په لوړیدا، سوداګریزو اړیکو په پراختیا او په خپلو هیوادونو کې د پانګه اچوونې فرصتونو په اړه خبرې او ټینګار وکړ.

د غونډې په پای کې په دی پریکړه وشوه چې غړي هیوادونه باید د سیمه ایزو زیربناو د جوړولو او د سوداګرۍ د پراختیا په برخه کې د خپلو همکاریو کچه لوړه کړي.

د افغانستان جمهور رئیس محمد اشرف غني هرات ولایت ته د یوه سفر په ترڅ کې د هرات ولایت د سوداګرۍ او پانګونې اتاق مشرتابه، د معدن او صنایعو اتاق مسؤلینو، کسبګرو، د ښځو سوداګرۍ اتاق او یو شمیر سوداګرو او پانګه اچوونکو سره لیدل او په سوداګریزو او پانګه ایزو موضوعاتو باندی يې خبرې وکړی.

د هرات ولایت د سوداګرۍ او پانګونې اتاق مشرتابه ښاغلي یونس قاضي زاده جلالتمآب جمهور رئیس او لومړي مرستیال امرالله صالح ته د ښه راغلاست ویلو تر څنګ د خصوصي سکتور په ستونزو او ننګونو خبرې وکړی.

ښاغلي قاضي زاده وویل "ّپه اسلام قلعه او تورغندۍ بندرونو کې د امنیت او زیربناوو نه شتون او د غربي ولایتونو په ګمرکونو کې د قانون په یوشان نه تطبیقیدل د خصوصي سکتور لپاره بنسټیزې ننګونې دي."

ښاغلي قاضي زاده زیاته کړه چې د اوبو ورکونې او زراعت وزارت له خوا د ځینو صادراتي توکو اضافي ټکس اخیستلو جدي ستونزې رامنځته کړي او د نورم او سټنډرډ اداره هم توکي په سیمه ایز معیار نه ارزوي.

ښاغلي قاضي زاده د خپلو خبرو په جریان کې وویل "د نفتي موادو اداره بی له دی چې کوم خدمت وړاندی کړي پیسې اخلي او د TCRC کمپنۍ هم د خصوصي سکتور ستونزې زیاتې کړي دي."

نوموړي وویل چې د ایران چابهار سیمه د اقتصادي تعزیراتو څخه معاف ده او سوداګر کولی شي چې خپل سوداګریز توکي د همدې لارې څخه وارد او پیسې ولیږي لیکن افغان سوداګر تر دی دمه ددی سهولت څخه برخمن شوي نه دي.

د جمهوري ریاست لومړي مرستیال ښاغلي امرالله صالح په خپلو خبرو کې وویل چې د اداري فساد سره به جدي مبارزه وکړي او تردی مهاله ټول مستند موارد څیړل شوي او سرغړونکو سره يې قانوني چلند شوی دی.

د هیواد جمهور رئیس جلالتمآب محمد اشرف غني وویل "د هیواد اقتصادي لوړتیا په برخه کې د هرډول ښې طرحې ملاتړ کوو. د هیواد په ۸ ګمرکونو کې چې دوه يې په هرات ولایت پوری اړوند دي، د زیربناوو جوړولو په بنسټیزې نقشې کار جریان لري او حکومت ژمن دی چې په دغو زیربناوو باندی تر دوه سوه میلیونه امریکايې ډالرو پانګونه وکړي.

جلالتمآب جمهور رئیس زیاته کړه "د صادراتي توکو په سر فیصدي اخیستل موږ ته د منلو وړ نه ده او موږ به دا موضوع  وپلټو او بله دا چې هر چارواکې چې په اداري فساد ککړ ثابت شو، د دندې څخه به ګوښه کړی شي."