د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند، د اتاق عامل پلاوي مالي او اداري مرستیال او د عامل پلاوي سرپرست رئیس ښاغلي میرویس هوتک، د اتاق د صادراتو پراختیا او دولت سره د اړیکو ډیپارټمنټونو مسؤلینو د افغانستان جلغوزو اتحاديې رئیس ښاغلي دلدار ځدراڼ او د پرزه جاتو او ټایرونو یو شمیر سره د جلا لیدنو په ترڅ کې، د دوی د ستونزو په تړاو خبرې اترې وکړې.

 

ښاغلي ځدراڼ او ورسره سوداګرو د جلغوزیو صادرولو او په تیرو وختونو کې د دوی ستونزو حل کولو په برخه کې د افغانستان د سوداګرۍ او پانګونې اتاق له دوامداره همکارۍ څخه د مننې څرګندولو ترڅنګ، دوی چین ته د جلغوزو په لیږد کې د هوایی شرکتونو لخوا وړاندیز شوي نرخونه لوړ وبلل او د اتاق له مشرتابه څخه یې وغوښتل چې له هوايې شرکتونو سره د تفاهم په پایله کې، چین ته د جلغوزو د لیږد نرخ کمولو کې لا زیاته همکاري وکړي.

 

د پرزه جاتو او ټایرونو سوداګرو او واردونکو د ګمرکي ستونزو لکه د ګمرکي تعرفو لوړوالي په اړه خپلې اندیښنې د اتاق له مشرتابه سره شریکې کړې، او د اتاق له مشرتابه څخه یې وغوښتل چې د دوی ستونزو حل په برخه کې کوټلي ګامونه پورته کړي.

 

ښاغلي مهمند سوداګرو ته د ښه راغلاست ویلو او د هېواد صادراتو ملاتړ کولو ترڅنګ، ژمنه وکړه چې د هوايې شرکتونو سره به چین ته د جلغوزو لیږد بیو راټیټولو په تړاو خبرې اترې وکړي.

ښاغلي مهمند زیاته کړه "اتاق د هوايې دهلیزونو بیا فعالیت لپاره ګړندۍ هڅې پیل کړي دي."

 

ښاغلي مهمند د پرزه جاتو او د موټر ټایرونو واردونکو د ستونزو حل په برخه کې، له هغوی څخه وغوښتل چې خپل وړاندیزونه اتاق ته وسپاري او ژمنه یې وکړه چې اتاق به د اسلامي امارت اړونده ادارو سره د یادو ستونزو په له منځه وړلو کې نه ستړی کیدونکې هلې ځلې وکړي.

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند او د مدیره پلاوي غړي ښاغلي خان جان الکوزي د خوراکي توکو واردوونکو اتحاديې له رئیس او مبایل واردوونکو سوداګرو سره د دوه جلا ناستو په ترڅ کې د دوی د شتو ستونزو او ننګونو په اړه خبرې اترې وکړې.

 

د خوراکي توکو واردوونکو سوداګرو په اوړ او وریجو د ګمرکي تعرفو زیاتوالي او د ټاکل شوي تناژ په اړه چې د بازار په نرخونو منفي اغیزې لري خبرې وکړې او د اتاق څخه وغوښتل چې د دوی ستونزې د اسلامي امارت اړوندو ادارو سره شریکې او د حل مناسبې لارې چارې ورته ولټوي.

 

د مبایل واردوونکو هم د لوړو ګمرکي تعرفو او ګمرکي ستونزو څخه سر وټکاوه او د اتاق څخه يې وغوښتل چې د دوی ستونزو ته د پای ټکي کیښودو په برخه کې لازمه همکاري وکړي.

 

ښاغلي مهمند او ښاغلي الکوزي د خوراکي توکو واردوونکو او د مبایل واردوونکو د ستونزو اوریدو وروسته، ژمنه وکړه چې اتاق به یادې ستونزې او وړاندیزونه د اسلامي امارت له اړونده ادارو سره شریکې او د له منځه وړلو په برخه کې به یې کوټلي ګامونه پورته کړي.

د افغانستان د سوداګرۍ او پانګونې اتاق د مدیره پلاوي لومړي مرستیال ښاغلي حاجي محمد یونس مهمند، د مدیره پلاوي مالي رئیس ښاغلي شیرین آغا سخي، د نړیوالو اړیکو رئیس ښاغلي سید جاوید برهان، د مدیره پلاوي غړیو هر یو ښاغلي خان جان الکوزي، ذکریا بریالي، عصمت الله وردګ، محمد داود یوسفزي، ضیاءالدین اچکزي او سید پرویز سادات هوفیاني، د څارنې پلاوي منشي ښاغلي عبدالمتین قلندري او د صنایعو اتاق رئیس ښاغلي شیر باز کمین زاده او د هېواد یو شمیر سوداګرو د سه شنبه په ماښام د افغانستان اسلامي امارت بهرنیو چارو وزیر ښاغلي مولوي امیر خان متقي سره د لیدنې په ترڅ کې د سوداګرو شتو ستونزو په اړه خبرې اترې وکړې.

 

ښاغلي مهمند ښاغلي متقي ته د بهرنیو چارو سرپرست وزیر په توګه د ګمارنې په پار د مبارکۍ ویلو ترڅنګ، زیاته کړه چې ګاونډیو او سیمې هېوادونو سره نېکې اړیکې لرل د هېواد په اقتصادي پراختیا کې اړین رول لوبوي.

 

ښاغلي مهمند د سوداګرو ځینو ستونزو لکه: د سیمې هېوادونو ته د ویزو صدور نشتوالي، بانکي ستونزو، او د سوداګرو او پانګوالو امنیت او خوندیتوب په اړه خبرې وکړې او په دی برخه کې يې د بهرنیو چاور وزارت د همکارۍ غوښتنه يې وکړه.

 

ښاغلي الکوزي د اسلامي امارت په راتګ او واک ته رسیدو خوښي څرګنده او زیاته يې کړه چې په نوي حکومت کې د فساد نشتوالی او په لویو لارو کې د امنیت شتون د سوداګرو ستونزو د له منځه تلو سبب ګرځیدلي دي.

 

ښاغلي الکوزي د ګاونډیو او سیمې هیوادونو سره ښې اړیکې لرل یو مهم اصل وګڼه او غوښتنه یې وکړه چې د بهرنیو چارو وزارت دې له ټولو ګاونډیو هېوادونو سره د سوداګریزو-اقتصادي اړیکو نوي کولو فرصت له لاسه ورنکړي.

 

ښاغلي برهان او محمد داوود یوسفزي هم د سوداګرو ستونزو په اړه خبرې وکړې.

ښاغلي متقي د اتاق مشرتابه پلاوي او سوداګرو ته د ښه راغلاست ویلو ترڅنګ، زیاته کړه چې د افغانستان اسلامي امارت هڅه کوي چې د خلکو او سوداګرو ستونزو ته د پای ټکی کیږدي.

ښاغلي متقي د اتاق له مشرتابه څخه وغوښتل چې د سوداګرو ستونزې او وړاندیزونه په لیکلې او واضح ډول له وزارت سره شریک کړي، ترڅو وزارت يې په له منځه وړلو کې ګړندي ګامونه پورته کړي.

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند او د مدیره پلاوي غړي ښاغلي خان جان الکوزي د کورنیو او بهرنیو هوايې شرکتونو (کام ایر، آریانا، ترکش او پی آی ای) او د جلغوزو اتحاديې استازو سره د لیدنې په ترڅ کې د هوا له لارې د صادراتو بیا پیلولو په اړه خبرې اترې وکړې.

 

ښاغلي مهمند د چین، هند، عربي او اروپایی هیوادونو په ګډون بیلابیلو هیوادونو ته د هوایی کارګو له لارې د صادراتو پیل کولو اړتیا په اړه خبرې وکړې، او له هوایی شرکتونو یې وغوښتل چې د اوسني وضعیت سره سم په راتلونکو ۲۴ ساعتونو کې د کارګو لیږد نرخ اتاق ته وسپاري ترڅو پربنسټ يې د سوداګرو، هوایی شرکتونو او اتاق ترمینځ تړونونه تنظیم او لاسلیک کړي.

 

ښاغلي خان جان الکوزي په هوایي شرکتونو غږ وکړ چې د سبسایډي د نشتوالي په صورت کې خلکو او سوداګرۍ ته د دوی د سفر خدماتو وړاندې کولو پرمهال مناسب قیمتونه په پام کې ونیسي، ترڅو صادرونکي خلک او سوداګر وکولی شي د دې شرکتونو له خدماتو څخه حتی الامکان ګټه پورته کړي.

 

د هوایی شرکتونو استازو د دوی د یو شمیر ستونزو یادولو سربیره، ژمنه وکړه چې په راتلونکو ۲۴ ساعتونو کې به د نړۍ مختلفو هېوادونو او ښارونو ته د سوداګریزو توکو د لیږد لپاره قیمتونه چمتو کړي او وروسته به يې د افغانستان د سوداګرۍ او پانګونې اتاق ته وسپاري تر څو تړونونه يې د هوايې شرکتونو صلاحیت لرونکو استازو او د افغانستان د سوداګرۍ او پانګونې اتاق مشرتابه پلاوي په حضور کې لاسلیک شي.

د افغانستان د سوداګرۍ او پانګونې اتاق مدیره پلاوي درېمې دورې دیارلسمه ناسته د افغانستان د سوداګرۍ او پانګونې اتاق عمومي رئیس ښاغلي توکل احمدیار تر ریاست لاندی او د مدیره پلاوي لومړي مرستیال ښاغلي حاجي محمد یونس مهمند، د مدیره پلاوي سوداګریز مرستیال ښاغلي خیر الدین مایل احمدي، د مدیره پلاوي د پانګونې مرستیال ښاغلي سلطان محمد صافي، د مدیره پلاوي مالي رئیس ښاغلي شیرین آغا سخي، د نړیوالو اړیکو رئیس ښاغلي سید جاوید برهان، د اتاق عامل پلاوي سرپرست رئیس ښاغلي شفیق الله عطايې، د مدیره پلاوي غړیو هر یو ښاغلي خان جان الکوزي، ذکریا بریالي، عصمت الله وردګ، محمد داود یوسفزي، احمد ضیاء عظیمي شینوزاده، ضیاءالدین اچکزي او سید پرویز سادات هوفیاني، د څارنې پلاوي منشي ښاغلي عبدالمتین قلندري او د نوموړي پلاوي غړي ښاغلي ناصر صمیم، او د اتاق عامل پلاوي مالي او اداري مرستیال ښاغلي میرویس هوتک په ګډون په مرکزي دفتر کې ترسره شوه.

 

ښاغلي ذکریا بریالي ګډونوالو ته د ناستې اجنډا او ورپسې ښاغلي عطايي د عامل پلاوي کاري راپور د ناستې ګډونوالو ته وړاندی کړ.

 

پدې ناسته کې، د هرات سوداګرۍ او پانګونې اتاق نړیوال هوټل د کرایه نیوونکي تړون لغوه کول، د معاشونو ورکولو او اجرا کولو ستونزه او د خصوصي بانکونو د بندیدو او غیر فعالوالي له امله د ولایتي اتاقونو تخصیصونو لیږل، په حیرتان بندر کې ستونزې او په بندرونو کې نا قانونه پیسې اخیستنې، او همدارنګه د مدیره او عامل پلاوو درنو غړو په نورو وړاندیزونو هم خبرې وشوې، چې په اړه يې مدیره پلاوي خپل نظرونه څرګند او لازمې پریکړې وکړې.