د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند ایران ته د خپل رسمي سفر په ترڅ کې، په داسی حال کې چې، د اتاق مدیره پلاوي ښاغلي جان آقا صادقي، د ایران لپاره د افغانستان سوداګریز چاروال ښاغلي معین خوافي، ملي سوداګر ښاغلي سلیمان خیل، د هرات ولایتي اتاق نړیوالو اړیکو رئیس ښاغلي هاشمي، د مرکزي اتاق بشري سرچینو مسؤل ښاغلي نجیب الله فضلي، متشبثو ښځو او د دهېواد یو شمیر سوداګرو او پانګوالو يې ملتیا کوله، د ایران ایکسپو شپږمې ناستې په پرانیست غونډه کې ګډون وکړ او د نندارتون د مختلفو غرفو او محصولاتو څخه يې لیده کاته وکړل.

په یاد نندارتون کې، د ایران اسلامي جمهوریت ولسمشر، د بهرنیو هېوادونو لوړ پوړو چارواکو، د ایران صنعت او سوداګرۍ وزیر او د ایران سوداګرۍ اتاق رئیس هم ګډون درلود.

د ایران ولسمشر د اسیا د هېوادونو په تېره بیا د افغانستان ترمنځ د سوداګرۍ او پانګونې لپاره د ښه چاپېریال په رامنځته کولو ټینګار وکړ او د دواړو لورو د سوداګرۍ او پانګونې د سکتور له مسوولینو یې وغوښتل چې په دې برخه کې لا زیاتې هڅې وکړي.

ښاغلي مهمند د افغان سوداګرو او پانګوالو له یوې ډلې سره د دغه نندارتون له بېلابېلو برخو څخه د لیدنې پر مهال د خراسان رضوي ولایت له چارواکو سره وکتل او د دواړو لورو د سوداګرو ترمنځ یې د پانګونې په برخه کې، د لازیاتو اسانتیاو او د صادراتو او وارداتو بهیر برخه کې د چټکتیا رامنځته کولو په اړه د نظر تبادله او بحثونه ترسره کړل.

ښاغلي مهمند دغه راز، د ایران د سوداګرۍ اتاق له رئیس سره د یوې جلا کتنې په ترڅ کې، د سوداګریزو همکاریو د لا پراختیا، د دواړو هېوادونو د سوداګرو ترمنځ د ګډې پانګونې د رامنځته کولو، د اقتصادي، ټرانزیټي او سوداګریزو اړیکو پر پراختیا ټینګار وکړ.

یکشنبه، غويي ۹مه، ۱۴۰۳

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند په داسی حال کې چې، د اتاق مدیره پلاوي غړي ښاغلي خان جان الکوزي، د اتاق عامل پلاوي سرپرست ښاغلي مولوي محمد حلیم مستعین، د عامل پلاوي تخنیکي او پالیسۍ مرستیال ښاغلي محمد انور عارفي او د کابل سوداګرۍ اتاق لومړي مرستیال ښاغلي احمد شاه حکیمي هم حضور درلود، د افغان – قزاق ګډ سوداګریز کور له رئیس ښاغلي ارمان یاسین تایف سره لیدنه ترسره او د دواړو هېوادونو ترمنځ د سوداګریزو او اقتصادي اړیکو پر پراختیا او غښتلتیا يې خبرې اترې وکړې.

ښاغلي ارمان له افغانستان څخه قزاقستان ته د سوداګریزو توکو په ځانګړي ډول د وچې مېوې او نورو خامو موادو د وارداتو په برخه کې د قزاقستان د سوداګرو د چمتووالي او لیوالتیا خبر ورکړ او د ټرانزیټ، ګډون نندارتونونو او سوداګریزو کنفرانسونو جوړولو برخه کې يې د افغانستان، قزاقستان او ترکمنستان ترمنځ د درې اړخیزه هوکړه لیک لاسلیک اړین وباله.

ښاغلي مهمند ښاغلي ارمان او ورسره ملګري ټیم ته د ښه راغلاست په ترڅ کې قزاقستان یو له مهمو اقتصادي هیوادونو څخه وباله چې له افغانستان سره ګډ دیني او کلتوري ارزښتونه لري.
نوموړي د سیمې او نړۍ له هېوادونو په ځانګړې توګه له ګاونډیو هېوادونو سره د افغانستان د ملي ګټو د ساتنې او د متقابل درناوي پر بنسټ ښې اقتصادي، سوداګریزې او ترانزیتي اړیکې مهمې وبللې او په دې برخه کې یې د سوداګرۍ اتاق د هر اړخیزې همکارۍ ډاډ ورکړ.

سه شنبه، غويي ۴، ۱۴۰۳

د ازبکستان هېواد د رسمي بلنې په ترڅ کې، د افغانستان د سوداګرۍ او پانګونې اتاق مدیره پلاوي غړي ښاغلي ضیاءالدین اچکزي، د اتاق د صادراتو او پانګونې پراختیا ډیپارټمنټ مسؤل ښاغلي میرزمان پوپل، د کابل سوداګرۍ او پانګونې اتاق مرستیال ښاغلي انجنیر جلیل حریف، د لوګر ولایتي اتاق رئیس ښاغلي مولوي یعقوب شرافت او د هېواد له یو شمیر سوداګرو څخه جوړ سوداګریز پلاوي چې مشري يې د افغانستان د سوداګرۍ او پانګونې اتاق سوداګریزو چارو مرستیال ښاغلي خیرالدین مایل احمدي کوله، د ازبکستان تولیداتو نندارتون او د یاد هېواد له یو شمیر تولیدي فابریکو څخه لیدنه ترسره کړه.

ښاغلي مایل احمدي او ورسره ملګري ټیم یې ازبکستان ته د رسیدو سره سم د ترمز بندري ښار د سنتر کارګو او تاسیساتو څخه لیدنه وکړه او وروسته د تاشکند نندارتون د لیدو لپاره هغه ښار ته ولاړ.

د اتاق مشرتابه پلاوي او سوداګرو او پانګوالو د چهارشنبې په ورځ د غويي د میاشتې په ۵مه، د ياد شوي نندارتون د پرانېستې په مراسمو کې د ګډون کولو ترڅنګ، د یاد نندارتون له یو شمیر تولیدي غرفو څخه لیدنه ترسره کړه.

دغه راز د اتاق مشرتابه، افغان سوداګرو او پانګوالو د دغه نندارتون په څنډه کې د پنجشنبې په ورځ په تاشکند ښار کې د دواړو هېوادونو د سوداګرو او پانګوالو ترمنځ په جوړه شوې ناسته کې ګډون وکړ. په پیل کې، د ازبکستان د سوداګرۍ او پانګونې اتاق رئیس د افغانستان د سوداګرۍ او پانګونې اتاق مشرتابه پلاوي، سوداګرو او پانګوالو ته ښه راغلاست ووایه او د سوداګرۍ د پراختیا او د سوداګرۍ او ټرانزیټ په برخه کې د لا زیاتو اسانتیاوو د رامنځته کولو په اړه خبرې وکړې او د دواړو هېوادونو ترمنځ یې د اړیکو پر پیاوړتیا ټینګار وکړ.

ښاغلي مایل احمدي د دواړو هېوادونو د سوداګرو او پانګوالو ترمنځ د سوداګرۍ او ګډې پانګونې د پراختیا په اړه خبرې وکړې او په دې برخه کې یې د لا زیاتو اسانتیاوو غوښتنه وکړه.

همدارنګه ښاغلي جلیل حریف او محمد نبي افغان د سوداګرو او ټرانسپورټي شرکتونو په استازیتوب د سوداګرۍ او ټرانزیټ په برخه کې د شته ستونزو په اړه خبرې وکړې او خپل نظریات او وړاندیزونه یې د ازبکستان د حکومت له مسؤلینو سره شریک کړل.
د سوداګریز پیوستون (B2B) کنفرانس په پای کې، د خوراکي توکو او روغتیا برخه کې د دواړو لورو ترمنځ هوکړه لیکونه لاسلیک شول.
د دغه سفر په ترڅ کې، د هېواد د سوداګرۍ اتاق مشرتابه، سوداګرو او پانګوالو د تاشکند ښار له یو شمېر تولیدي فابریکو او صنعتي تاسیساتو څخه لیدنه وکړه.

پنجشنبه، غويي ۶مه، ۱۴۰۳

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند بلخ ولایت ته د خپل کاري سفر په ترڅ کې، د بلخ ولایتي اتاق مدیره پلاوي رئیس ښاغلي اسدالله اسدي، د بلخ اتاق سلاکار ښاغلي حاجي اجمل قادري، د بلخ اتاق اجرائیه آمر ښاغلي احمد شکیب اکبري، د غله جاتو اتحاديې رئیس ښاغلي محمد یاسین او د یاد ولایت سوداګرو او پانګوالو سره لیده کاته وکړل.

ښاغلي اسدالله اسدي بلخ ولایت ته د افغانستان د سوداګرۍ او پانګونې اتاق د لومړي مرستیال د راتګ هرکلي کولو ترڅنګ، نوموړي ته د بلخ ولایت د خصوصي سکتور غړو ته د سوداګریزو خدمتونو د وړاندې کولو او د صادراتي توکو اسنادو طی مراحل پروسه کې د لازمو اسانتیاوو د رامنځته کولو په برخه کې د بلخ اتاق هڅو او فعالیتونو په اړه مفصل معلومات وړاندی کړل او د اورګاډي درولو او له امله يې د جرمانو د رامنځته کیدو ستونزې ورسره شریکې کړي.

ښاغلي مهمند د غوره خدمتونو د وړاندې کولو او د دغه ولایت د خصوصي سکتور د غړو د ستونزو د حل په برخه کې د بلخ اتاق د مشرتابه هڅې وستایلې او د بلخ ولایت سوداګرو او پانګوالو ته د سوداګریزو خدمتونو د عرضې د ښه والي او د لازمو آسانتیاوو د رامنځته کولو په برخه کې یې لازمې لارښوونې وکړې.

ښاغلي مهمند ژمنه وکړه، چې د بلخ ولایت د خصوصي سکتور د شته ستونزو د حل په موخه به د دغه ولایت له اړوندو سیمه ییزو ادارو سره په همغږۍ د حل لارې چارې ولټوي.

سه شنبه، غويي ۴مه، ۱۴۰۳

د افغانستان د سوداګر ۍ او پانګونې اتاق د سیمې او نړۍ هېوادونو سره د سوداګرۍ پراختیا په موخه، د افغان – قزاق سوداګرو ګډه ناسته جوړه، چې د افغانستان د سوداګرۍ او پانګونې اتاق مدیره پلاوي غړي ښاغلي خان جان الکوزي، د مدیره پلاوي غړي ښاغلي محمد داود یوسفزي، د عامل پلاوي پالیسۍ او تخنیکي مرستیال ښاغلي محمد انور عارفي، د اتاق د حقوقي او نړیوالو چارو ستر سلاکار ښاغلي قلندر رحیمي او د دواړو هېوادونو د خوراکي توکو او پټرولیم سکتورونو مسؤلینو په کې ګډون درلود.

ښاغلي خان جان الکوزي د دې غونډې ګډونوالو ته د ښه راغلاست په ترڅ کې د قزاقستان هېواد له افغانستان سره د مذهبي او فرهنګي مشترکاتو او همدارنګه ټرانزیټي، سوداګریزو، صنعتي او سیاسي اړیکو له پلوه پخوانی دوست وباله او د دواړو هېوادونو تر منځ يې د سوداګریزو او ټرانزیټي اړیکو پر لا پیاوړتیا یې ټینګار وکړ.

ښاغلي الکوزي د افغانستان اوسنی وضعیت له منځنۍ اسیا سره د سویلي اسیا د نښلولو لپاره یو ښه فرصت وباله او د دواړو هېوادونو د خصوصي سکتور له مسؤلینو یې وغوښتل چې د ټرانزیټ، کانونو او نورو بېلابېلو برخو کې همکاري او ګډه پانګونه وکړي.

ښاغلي داوود یوسفزي او محمد انورعارفي په افغانستان کې د پانګونې د فرصتونو په اړه د قزاقستان سوداګرو ته هراړخیز معلومات ورکړل او افغان سوداګرو ته یې د قزاقستان له خوا د ویزې د ورکړې، سوداګرۍ او ټرانزیټ په برخه کې د لا زیاتو اسانتیاوو رامنځته کولو غوښتنه وکړه.
دوی د یو معیاري ځمکني دهلیز پر جوړولو ټینګار وکړ چې د دواړو هېوادونو ټول کورني تولیدات په چټکۍ سره صادر او وارد شي.

د قزاقستان سوداګرو په قزاقستان کې د افغان سوداګرو د سوداګریزو ستونزو د حل او د ګډې پانګونې په برخه کې د خپل چمتووالي ډاډ ورکړ.

چهارشنبه، غويي ۵مه، ۱۴۰۳