د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د اتاق عامل پلاوي پالیسۍ او تخنیکي مرستیال ښاغلي محمد انور عارفي په حضور کې، له محترم سبولیف اندری، د "LLC BTI" شرکت رئیس سره وکتل او د افغانستان په برخه کې د کیمیاوي سرو او پاکوونکو موادو په تولید کې د ګډو پانګوونو په اړه یې خبرې اترې وکړې.

ښاغلي اندری د یاد شرکت د فعالیتونو په اړه معلومات وړاندې کړل او زیاته یې کړه: "LLC BTI" شرکت د کیمیاوي سرو او پاکوونکو موادو په تولید کې فعالیت لري او تولیدات یې د نړیوالو معیارونو په نظر کې نیولو سره ترسره کیږي. هغه خپله علاقه د کیمیاوي سرو او پاکوونکو موادو په افغان بازارونو کې عرضه کولو او له افغان تولیدي شرکتونو سره په ګډو پانګوونو کې څرګنده کړه او له ښاغلي مهمند څخه یې وغوښتل چې د دواړو خواوو د سوداګرو ترمنځ د سوداګرۍ د بهیر د چټکتیا او اسانتیاوو د رامنځته کولو په موخه په افغانستان کې د روسیې د سوداګریز کور د جوړولو په برخه کې مرسته وکړي.

ښاغلي مهمند، ښاغلي اندری ته د ښه راغلاست ویلو ترڅنګ، له ګاونډیو هېوادونو په ځانګړي ډول له روسیې سره د ښو سوداګریزو اړیکو په ټینګار سره وویل چې د پانګوونې د جذب لپاره عمومي شرایط مناسب دي.
نوموړي له ښاغلي اندری څخه وغوښتل چې له موجوده فرصتونو څخه په استفادې سره په افغانستان کې د کیمیاوي سرو او نورو سکتورونو په تولید کې لا زیاتې پانګونې وکړي.

دوشنبه، چنګاښ ۲۵مه، ۱۴۰۳

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند محترم لیو بیگنان، د "Suzhou HLC Elevator" شرکت رئیس، او محترم امام الدین امانزاده، د "فضا لفت" تخنیکي او تولیدي خدماتو شرکت رئیس سره د اتاق په مرکزي دفتر کې لیدنه ترسره او د ګډو پانګوونو او ګمرکي ستونزو په اړه یې خبرې وکړې.

ښاغلي لیو، په افغانستان کې د "Suzhou HLC Elevator" شرکت فعالیتونه تشریح کړل او د ساختماني خامو موادو په وارداتو باندې لوړ ګمرکي محصول یې یوه اساسي ستونزه وبلله. هغه د اتاق له مشرتابه وغوښتل چې د ګمرکاتو له معینیت سره په همغږۍ کې د ګمرکي محصول په کمولو او په افغانستان کې د شرکت د پروژو په تطبیق کې ورسره مرسته وکړي.

ښاغلي مهمند، د ښاغلي لیو خبرې واورېدې او په هېواد کې یې د پانګونې لپاره عمومي شرایط مساعد وبلل.
نوموړي له ښاغلي لیو څخه وغوښتل چې په افغانستان کې د ساختماني موادو په تولید کې پانګونه وکړي او د ځمکې او ځینو اړوندو موضوعاتو په برابرولو کې یې د اړینو اسانتیاوو د برابرولو ژمنه یې وکړه.

د سوداګرۍ او پانګوونې اتاق لومړي مرستیال یادونه وکړه چې په نږدې راتلونکي کې به په کابل ښار کې د افغانستان د سوداګرۍ او پانګوونې اتاق لخوا یوه نندارتون جوړ شي او د یاد شرکت مسؤلین یې په دې نندارتون کې د ګډون او د خپلو محصولاتو د نندارې ته وړاندې کولو لپاره راوبلل.

دوشنبه، چنګاښ ۲۵مه، ۱۴۰۳

د افغانستان د سوداګرۍ او پانګونې اتاق عامل پلاوي مالي او اداري مرستیال ښاغلي میرزمان پوپل، د افغان مخابراتي شرکت نړیوالو اړیکو رئیس ښاغلي محمد امین امیري او د اتاق عامل پلاوي د نړیوالو اړیکو او غړو سره د اړیکو ډيپارټمنټ مسؤلینو په حضور کې د سا ایران شرکت له استازو سره آنلاین غونډه وکړه او د انټرنیټي خدماتو د کارونې او د هغوی د کیفیت او ظرفیت لوړولو په برخه کې د دوه اړخیزو همکاریو په اړه بحث او خبرې وکړې.

د سا ایران شرکت مسئولینو د دې شرکت د فعالیتونو په اړه معلومات وړاندې کړل او زیاته یې کړه چې سا ایران انټرنیټي خدماتو شرکت د انټرنیټي خدماتو په عرضه کولو کې فعالیت کوي چې د نړیوالو معیارونو په پام کې نیولو سره په ایران کې بازارونو ته خدمات وړاندې کوي. هغوی د افغان بازارونو ته د انټرنیټ عرضه کولو په برخه کې خپله لیوالتیا څرګنده کړه او له ښاغلي پوپل څخه یې وغوښتل چې افغان انټرنیټي خدماتو شبکې وهڅوي چې د سا ایران شرکت څخه انټرنیټ واخلي.

ښاغلي میر زمان پوپل، د ننني نړۍ پرمختګ د عصري تکنالوژۍ او د انټرنیټي خدماتو سرعت پورې تړلی وباله او د کیفیت لرونکو او مناسبو قیمت لرونکو انټرنیټي خدماتو په عرضه یې ټینګار وکړ.
نوموړي ژمنه وکړه چې د یاد شوي شرکت په بازار موندنه او په افغانستان کې د پلور مارکېټ په موندلو کې به له سا ایران شرکت سره همکاري وکړي.

یکشنبه، چنګاښ ۲۴مه، ۱۴۰۳