د افغانستان د سوداګرۍ او پانګونې اتاق د هڅو او د خصوصي سکتور استازو او د ماليې وزارت ترمنځ د مالیاتو د قوانینو تعدیل په اړه د جوړو شویو ناستو په پایله کې، د افغانستان اسلامي امارت مشرتابه لخوا یو فرمان توشیح شو چې، د خصوصي سکتور د مالیاتو د کمښت څرګندونه کوي.
له همدی امله، د افغانستان د سوداګرۍ او پانګونې اتاق مطبوعاتي کنفرانس د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند، د مدیره پلاوي غړي ښاغلي خان جان الکوزي، د اتاق عامل پلاوي سرپرست ښاغلي میرویس هوتک، یو شمیر سوداګرو او د مختلفو اتحادیو رئیسانو په حضور کې جوړ او په مالیاتو کې د کمښت په اړه يې د افغانستان اسلامي امارت محترم مشرتابه فرمان هرکلی وکړ.

ښاغلي مهمند د یاد فرمان او په مالیاتو کې د لازمو آسانتیاوو رامنځته کیدل وستایل او مالیاتي تاديې يې د حکومتدارۍ یو عمده شاخص وباله. نوموړي له ټولو سوداګرو او پانګوالو وغوښتل چې د ماليې په خپل وخت سره تادیه کړي او د هېواد په آبادۍ او اقتصادي وده کې فعاله ونډه واخلي.

ښاغلي مهمند د ماليې د څیړنې او ارزونې کمېټې په اړه چې د افغانستان د سوداګرۍ او پانګونې اتاق غړو او د حکومت سکتوري وزارتونو لوړ پوړو چارواکو څخه جوړه شوې ده خبر ورکړ او زیاته يې کړه "د مالیاتي تادیو برخه کې شته ستونزو په نظر کې نیولو سره، یاده کمېټه به هڅه وکړي چې د خصوصي سکتور سره په همکارۍ هر اړخیزې طرحې جوړې کړي څو د مالیې ورکړې پروسه کې آسانتیاوې لا پسې زیاتې کړي."
   
ښاغلي خان جان الکوزي د هېواد له صنعتکارانو او تولیدونکو وغوښتل چې د خپلو مالیاتو د پام وړ کموالي په پام کې نیولو سره د باکیفیته توکو تولید ته ډېره پاملرنه وکړي. نوموړي د مالیاتو او د هغې د ورکړې برخه کې د سوداګرو ستونزې او ننګونې د پوهاوي وړ وبللې او له حکومت څخه یې وغوښتل چې د وخت له ضایع کېدو او زیاتو ستونزو د مخنیوي په خاطر دې پر وارداتي توکو مالیه په یو وخت محاسبه کړي.

یکشنبه، غويي ۳۱مه، ۱۴۰۲

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند په داسی حال کې چې د مدیره پلاوي غړي ښاغلي عصمت الله وردګ، د غزني اتاق رئیس او د مرکزي اتاق د څارنې پلاوي منشي ښاغلي عبدالمتین قلندري او د بطریو تولیدوونکو او صادروونکو سوداګرو هم حضور درلود، د ماليې وزارت د ګمرکونو معینیت له مسؤلینو سره لیدنه ترسره او د صادراتي مستعملو بطریو تعرفې بیې ټاکلو په اړه يې خبرې اترې وکړې.   

ښاغلي مهمند د کورنیو تولیداتو په ځانګړي ډول د بطریو د تولید په برخه کې د خپل ملاتړ څرګندولو ترڅنګ، په هېواد کې یې د بطریو د تولید د کیفیت او ظرفیت په لوړولو ټینګار وکړ.
ښاغلي مهمند په بازار کې د دغه محصول د تقاضا په پوره کولو کې د بطریو سوداګرو رول مهم وباله او د ګمرکونو وزارت له مسوولینو یې وغوښتل چې د ګمرکي تعرفې د مناسبې کچې په ټاکلو کې توازن رامنځته کړي، څو له یوې خوا سوداګر په دی برخه کې پانګونې ته وهڅول شي او له بلې خوا د استهلاک شویو بطریو سوداګر وکولی شي د مناسبې تعرفې په پریکولو سره خپلو صادراتو ته دوام ورکړي.  

د اتاق د مدیره پلاوي لومړي مرستیال د اتاق هغه میکانیزم په اړه چې د بطریو سرب صادروونکو لپاره په کې لازمې آسانتیاوې ځای پر ځای شوي دي، معلوماتو وړاندی کولو ترڅنګ، زیاته کړه "د افغانستان د سوداګرۍ او پانګونې اتاق د بطریو تولیدوونکو او صادروونکو سره په جلا جلا ناستو کې د استهلاک شویو بطریو سرب باندی په لوړې تعرفې ټنیګار وکړ.

د مالیې وزارت د ګمرکونو معینیت مسوولینو د اتاق د مشرتابه پلاوي، صادروونکو او په کور دننه بطریو تولیدونکو د خبرو له اورېدو وروسته د کورنیو تولیدونکو او سوداګرو د ګډې کمېټې لخوا ټاکل شویو نرخونو سره موافقه څرګنده کړه.

چهارشنبه، غويي ۲۷مه، ۱۴۰۲

د افغانستان د سوداګرۍ او پانګونې اتاق عامل پلاوي سرپرست ښاغلي میرویس هوتک په داسی حال کې چې د عامه اړیکو، نړیوالو اړیکو او سوداګرۍ پراختیا ډیپارټمنټونو مسؤلینو هم حضور درلود د Roots of Peace ادارې د پروژو له مسؤل ښاغلي اندریو فلیپ سره لیدنه ترسره، او د سوداګرۍ برخه کې ستونزو او سوداګرۍ اړوند نورو مسایلو په اړه يې خبرې اترې وکړې.

ښاغلي هوتک د اتاق د فعالیتونو، لاسته راوړنو، غړیتوب او په ولایتونو کې د استازولیو په اړه د بشپړو معلوماتو ورکولو ترڅنګ زیاته کړه "د افغانستان د سوداګرۍ او پانګونې اتاق تل هڅه کړې چې سوداګرو او پانګوالو ته لازمې آسانتیاوې رامنځته کړي."

ښاغلي هوتک د کرنې په برخه کې د ماشینرۍ نه شتون، د سړو خونو نه شتون، د محصولاتو انتقال برخه کې ستونزې او اړوند نور مسایل د عمده ستونزو په توګه یاد کړل او په دی برخه کې يې د اندریو فلیپ د هر اړخیزې همکارۍ غوښتنه وکړه.

ښاغلي اندریو فلیپ د ښاغلي هوتک لخوا د ستونزو او وړاندیزونو اوریدو وروسته، د کوچنیو او منځنیو پروژو پیل برخه کې د هر اړخیزې همکارۍ ژمنه وکړه.

چهارشنبه، غويي ۲۷مه، ۱۴۰۲

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند په داسی حال کې چې د عامل پلاوي سرپرست ښاغلي میرویس هوتک او د اتاق عامل پلاوي ځینو ډیپارټمنټونو مسؤلینو هم حضور درلود، د آبادي پروژو له مسؤل ښاغلي فیروز سید جواجه یوف سره لیدنه ترسره او د هېواد د خصوصي سکتور ننګونو او ګډو همکاریو په اړه يې خبرې اترې وکړې.

ښاغلي مهمند ښاغلي خواجه یوف او ورسره ملګري ټیم ته د ښه راغلاست ویلو او د هیواد د خصوصي سکتور د فعالیتونو پر وړاندې یو لړ ننګونو ته د اشارې کولو ترڅنګ، د هېواد د خصوصي سکتور په ځانګړي ډول د ودانیو سکتور، د تولیداتو سکتور، د ښځینه متشبثینو د فعالیتونو او د زیربنایي پروژو د تطبیق په برخه کې چې هېوادوالو ته د کار زمینه برابروي، د آبادي پروژو د مسوولینو ملاتړ مهم وباله او د خصوصي سکتور رغښت او سوداګرۍ ودې برخه کې يې د ګډې همکارۍ غوښتنه وکړه.  

ښاغلي میرویس هوتک د افغانستان د سوداګرۍ او پانګونې اتاق مخینې او فعالیتونو په اړه د معلوماتو وړاندی کولو ترڅنګ، او د پروګرامونو تطبیق او په لاره اچولو برخه کې يې د آبادي پروژو مسؤلینو همکاري ګټوره وبلله.
ښاغلي هوتک هغو کوچنیو او منځنیو تشبثاتو ته چې مالي ملاتړ ته اړتیا لري په ځانګړې توګه ښځینه متشبثینو ته د یادې ادارې د مالي ملاتړ غوښتنه وکړه.

ښاغلي خواجه یوف د سوداګریزو فعالیتونو ملاتړ، په شته ننګونو د برلاسي حاصلولو او پانګونو جلب برخه کې د افغانستان د سوداګرۍ او پانګونې اتاق مدیره پلاوي لومړي مرستیال د وړاندیزونو او نظرونو اوریدو وروسته، ژمنه وکړه چې ورته ناستو ته به دوام ورکوي او اتاق سره د ګډ کار کولو په ترڅ کې به شته ستونزو ته د مناسبو حل لارو پیداکولو، سوداګرۍ ودې او د خصوصي سکتور ملاتړ برخه کې همکاري وکړي.

سه شنبه، غويي ۲۶مه، ۱۴۰۲

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند په داسی حال کې چې د مدیره پلاوي غړو هر یو ښاغلي خان جان الکوزي، ضیاءالدین اچکزي، عصمت الله وردګ او احمد ضیاء عظیمي شینوزاده، د غزني اتاق رئیس او مرکزي اتاق څارنې پلاوي منشي، د کابل سوداګرۍ او پانګونې اتاق سرپرست ښاغلي احمد شاه حکیمي، د کابل اتاق مرستیال ښاغلي همایون خواجه زاده او د جوزجان اتاق رئیس ښاغلي یولبرس عطايي هم حضور درلود، د افغانستان مشرتابه دفتر څارنې او تعقیب له عمومي رئیس ښاغلي احمد بلال آخندزاده سره لیدنه ترسره، د سوداګرو او پانګوالو ستونزو، زیربنايي پروژو تطبیق او په دی برخه کې په ننګونو برلاسي حاصولو په موخه خبرې اترې وکړې.

د مدیره پلاوي لومړي مرستیال د افغانستان د سوداګرۍ او پانګونې اتاق ته د ښاغلي احمد بلال آخندزاده راتګ نیک وباله او د حکومت مشرتابه ته د خصوصي سکتور ستونزو لیږد برخه کې يې د دوی بی سارې هڅې وستایلې.

ښاغلي مهمند د هېواد په اقتصادي وده او پرمختګ کې د بانکونو رول مهم وباله او د حکومت له مشرتابه څخه یې وغوښتل چې د هېواد د خصوصي سکتور له غړو سره د بانکي خدمتونو په برخه کې د لازمو اسانتیاوو په رامنځته کولو او د بانکي زیرمو په وړاندې کولو کې همکاري وکړي. هغه د هېواد د روغتيايي سکټور د ماليې د ستونزو د هواري لپاره د يوه پلان د جوړولو يادونه وکړه او د هېواد د خصوصي روغتونونو د ماليې په برخه کې يې د تعديل غوښتنه وکړه.

د اتاق مشرتابه پلاوي خپلې ستونزې لکه: په جوزجان کې د کلفت بندر د احیا، په جوزجان ولایت کې د صنعتي پارک جوړول، د دغه ولایت د نفتي توکو په واردولو کې ستونزې، د زیربنایي پروژو د تطبیق، د کانونو استخراج او په دې برخه کې د یوه واضح میکانیزم رامنځته کول، په کابل کې د سوداګرۍ اتاق د ۱۸ پوړیزې پروژې بیا پیل، د اوسپنې ویلو کولو اتحادیې ستونزې او د هېواد څخه دباندی د سوداګرو او پانګوالو پیسو انتقال او یو شمیر نور مسایل له ښاغلي احمد بلال اخندزاده سره شریک کړل او د هغه د جدي پاملرنې او د حکومت مشرتابه ته یې د سپارلو غوښتنه وکړه.

ښاغلي احمد بلال اخندزاده د اتاق مشرتابه پلاوي د خبرو له اورېدو وروسته د هېواد له خصوصي سکتور څخه د ملاتړ په برخه کې د دوی پرله پسې هڅې وستایلې او حکومت يې د سوداګرو او پانګوالو خدمت ته ژمن وباله او ډاډ يې ورکړ چې پورته یادې ستونزې به د حکومت له مشرتابه سره شریکې کړي.

چهارشنبه، غويي ۲۷مه، ۱۴۰۲