د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند، د مدیره پلاوي سوداګریز مرستیال ښاغلي خیرالدین مایل احمدي، د مدیره پلاوي غړي ښاغلي خان جان الکوزي او د عامل پلاوي سرپرست رئیس ښاغلي میرویس هوتک د پاکستان سوداګریزې آتشې ښاغلي ډاکټر کوثر علي زیدي او د پاکستان هېواد یو شمیر سوداګرو سره لیدنه ترسره کړه.
 
ښاغلي مهمند د پاکستان سوداګریزې آتشې ته د ښه راغلاست په ترڅ کې د دواړو هېوادونو ترمنځ د سوداګرۍ او پانګونې مسایلو، د سوداګرۍ د فرصتونو او ننګونو او د افغانستان له لارې منځنۍ آسیا ته د پاکستان د ترانزیتي ستونزو په اړه خبرې وکړې او زیاته يې کړه "د کوکنارو د کښت مخنیوی، د اداري فساد د پام وړ کموالی او د ټولیز امنیت شتون په هېواد کې د سوداګرۍ او پانګونې بهیر د چټکتیا لپاره خورا اړین دي. هغه د پاکستان له سوداګرو وغوښتل چې په افغانستان کې په بېلابېلو برخو کې پانګونه وکړي. ښاغلي مهمند په کابل کې د پاکستان له خوا د ګډو روغتیايي او علمي مرکزونو پر جوړولو ټینګار وکړ.

ښاغلي مایل احمدي د امام ابوحنیفه رحمه الله په دویم ملي او نړیوال نندارتون کې د پاکستاني سوداګرو او پانګوالو پر ګډون ټینګار وکړ او له هغوی یې وغوښتل چې یاد نندارتون ته د خپلو توکو د لېږد په برخه کې عملي ګامونه پورته کړي او فعاله برخه واخلي.

ښاغلي خان جان الکوزي د ډبرو سکرو بیه ۳۰ ډالرو ته ټیټه اعلان کړه او د افغانستان له خاورې یې منځنۍ اسیا ته د پاکستان د ټرانزیټي سکټور په برخه کې د لازمو اسانتیاوو د رامنځته کولو په برخه کې د اتاق د هڅو ژمنه وکړه او له سوداګرو یې وغوښتل چې لا زیاتې هڅې وکړي او د دواړو هیوادونو ترمنځ د سوداګرۍ او پانګونې کچه لوړه کړي.

ډاکټر کوثر علي زيدي د ډبرو سکاره او د افغانستان ځينې طبيعي زېرمې د پاکستان اړتيا وګڼله او د ډبرو سکرو د بيو د راټيټېدو هرکلى يې وکړ او دا يې د دواړو هېوادونو د خلکو او حکومتونو په ګټه وګڼله.
نوموړي د دواړو هېوادونو ترمنځ د ګډ بازار د رامنځته کېدو او افغان سوداګرو ته د ویزې د لازمو اسانتیاوو د برابرولو اعلان وکړ او د امام ابو حنیفه (رح) په دویم ملي او نړیوال نندارتون کې يې د مناسبو غرفو غوښتنه وکړه او اتاق هم په دې برخه کې د همکارۍ ډاډ ورکړ.

یکشنبه، غبرګولي ۲۸مه، ۱۴۰۲

د افغانستان د سوداګرۍ او پانګونې اتاق عامل پلاوي سرپرست رئیس ښاغلي میرویس هوتک په داسی حال کې چې، د کار نړیوال سازمان (ILO) رئیس ښاغلي بهزاد، د مختلفو اتاقونو رئیسانو، د اتاق عامل پلاوي نړیوالو اړیکو ډیپارټمنټ مسؤل ښاغلي امید غفورزي، متشبثینو او د خصوصي سکتور غړو په ګډون، په کابل سټار هوټل کې د ماشومانو د کار ضد مبارزې نړیوالې ورځې په مناسبت په جوړ شوي کنفرانس کې ګډون وکړ او د ماشومانو د کار مخنیوي برخه کې يې د اتاق نظر څرګند کړ.
 
ښاغلی هوتک په افغانستان کې د ماشومانو د کار پای په مختلفو عواملو پورې تړلی ګڼي، چې په هغو کې د کورنیو ځواکمنتیا، د ماشومانو کورنیو ته د اوسیدو او سرپناه ځای برابرول، د مالي مرستو پروګرامونه، د روغتیا او درملنې خدمتونو وړاندې کول او خوراکي توکو ته لاسرسی شامل دي.
نوموړي د پوهاوي د زیاتولو او د ماشومانو د کار د منفي اغیزو په اړه کارګرانو او کارګمارونکو ته د پوهاوي ورکولو لپاره د تعلیمي پروګرامونو چمتو کول او جوړول اړین وبلل.

د اتاق سرپرست رئیس د ماشومانو د کار د قانون د پياوړتيا او د هغو کارګمارونکو په وړاندې د بنديزونو د زياتولو په باب چې له ماشومانو څخه کار اخلي خبرې وکړې او د دغو قوانينو د تطبيق لپاره يې د څارنې د پياوړي ميکانيزم په برابرولو باندې ټينګار وکړ.

ښاغلي هوتک په دې برخه کې نړیوالو همکاریو ته اشاره وکړه او زیاته یې کړه "د تجربو، مالي او تخنیکي منابعو د تبادلې په موخه د نړیوالو سازمانونو، حکومتونو، مدني بنسټونو او نورو نړیوالو ټولنو سره د همکاریو پیاوړتیا او د ماشومانو د کار د مخنیوي په برخه کې همکاري اړینه ده."

هغه د دوامداره اقتصادي ودې او د لویانو لپاره د مناسبو کاري فرصتونو رامینځته کول د ماشومانو د کار په کمولو کې اغیزمن وګڼل او د اعلاناتو، رسنیو او د ماشومانو د حقونو په اړه د عامه پوهاوي له لارې د ماشومانو د کار د زیانونو په اړه د ټولنې د پوهاوي په لوړولو يې ټینګار وکړ.

دوشنبه، غبرګولي ۲۲مه، ۱۴۰۲

د ښي لاس موټرونو واردوونکو او د لوړ تناژ موټر لرونکو د ټولګټو وزارت سرپرست ښاغلي محمد عیسی ثاني او د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند سره د دوه جلا ناستو په ترڅ کې، د ښي لاس موټرونو وارداتو ته عدم اجازې، د حکومت لخوا یادو موټرونو ته د سټیکر نه ویشلو، د ښي لاس موټرونو اړوند د طرزالعمل د بیا کتنې او د لوړ تناژ لیږدوونکو موټرونو برخه کې شته ستونزو په اړه يې خبرې اترې وکړې.

د ښي لاس موټرونو واردونکو په خپل وار سره خبرې وکړې او يادې ستونزې يې د اتاق مدیره  پلاوي له لومړي مرستيال سره مطرح کړې. دوی د افغانستان د سوداګرۍ او پانګونې اتاق له مشرتابه څخه وغوښتل چې د یوې معقولې حل لارې په موندلو کې له دوی سره بشپړه همکاري وکړي.

په ورته وخت کې د لوړ تناژ موټرونو خاوندانو د ټولګټو وزارت له خوا د لوړ تناژ موټرونو لپاره د ترتیب شوي طرزالعمل په اړه خبرې وکړې او ویې ویل " د ټولګټو وزارت د لوړ تناژ موټرونو لپاره معین وزن ټاکلې چې د هغه وزن څخه د ډیر وزن د لیږد اجازه نه لري. موږ د ټولګټو وزارت له سرپرست څخه غواړو چې د تعین شوي وزن سربیره موږ ته د ۱۰ ټنه ډیر وزن د انتقال اجازه راکړي."

ښاغلي مهمند وویل "د ترانسپورت سکتور د هېواد یو له مهمو او سترو سکتورونو څخه دی، چې په مستقیم او غیر مستقیم ډول يې لسګونه زره کسانو ته د کار زمینه برابره کړې ده."
نوموړي د يادو شويو ستونزو د تاييد په ترڅ کې د ټولګټو وزارت له سرپرست څخه وغوښتل، چې د لوړ تناژ وسايطو د طرزالعمل د بيا کتنې په برخه کې د يادو وسايطو د خاوندانو غوښتنو ته جدي پاملرنه وکړي.

ښاغلي محمد عیسی ثاني د لوړ تناژ موټرونو د خاوندانو د خبرو له اورېدو وروسته د یوې معقولې حل لارې د موندلو په موخه د یوې ګډې کمېټې د جوړولو اعلان وکړ او په دې برخه کې یې د ټولګټو وزارت د همکارۍ ډاډ ورکړ.

چهارشنبه، غبرګولي ۲۴مه، ۱۴۰۲

د افغانستان د سوداګرۍ او پانګونې اتاق عامل پلاوي سرپرست رئیس ښاغلي میرویس هوتک او د اتاق عامل پلاوي نړیوالو اړیکو ډيپارټمنټ مسؤل ښاغلي امید غفورزي د بهرینو چارو وزارت مقام دفتر رئیس او د یاد وزارت اقتصادي مرستیال او قونسلګرۍ څانګې رئیس سره لیدنه ترسره، او موټر چلوونکو او سوداګرو ته د ویزو صدور برخه کې ستونزو او د مرکزي آسیا هېوادونو ترمنځ د ټرانسپورټ او ټرانزیټ برخه کې د هوکړه لیک پر څرنګوالي خبرې اترې وکړې.

ښاغلي هوتک د امام ابو حنیفه (رح) دویم ملي او نړیوال نندارتون په اړه بشپړ معلومات وړاندی کړل او د بهرنیو چارو وزارت له مشرتابه يې وغوښتل چې هغو بهرنیو سوداګرو ته چې په یاد نندارتون کې د ګډون لیوالتیا لري، د ویزې صدور لازمې آسانتیاوې رامنځته کړي څو هغوی هم وکولی شي په یاد نندارتون کې ګډون وکړي.

د بهرنیو چارو وزارت مسؤلینو د امام ابو حنیفه (رح) دویم ملي او نړیوال نندارتون جوړولو او د هېواد خصوصي سکتور ملاتړ برخه کې د افغانستان د سوداګرۍ او پانګونې اتاق هڅې وستایلې او بهرنیو سوداګرو ته يې د ویزو صدور برخه کې د یاد وزارت د بشپړې همکارۍ ډاډ ورکړ.

دوشنبه، غبرګولي ۲۲مه، ۱۴۰۲

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند د هېواد سویل او لویدیځې حوزې ځمکني مسافربري ټرانسپورټ شرکتونو او اتحادیو مسؤلینو سره لیدنه ترسره او د دوی د ستونزو په اړه يې خبرې اترې وکړې.

د ځمکني مسافربري ټرانسپورټ شرکتونو او اتحادیو مسؤلینو وویل چې د کابل ښار کمپنۍ سیمې څخه د تم ځای انتقال د ښار یوې لرې پرتې سیمې ته چې شخصي ملکیت دی، هغو مسافرو ته چې د هېواد سویلي او لویدځو ولایتونو ته د ځمکې له لارې د سفر اراده لري، ډیر شمیر ستونزې را ولاړوي.
دوی د اتاق له مشرتابه پلاوي څخه وغوښتل چې د دوی ستونزه د اړوندو دولتي ادارو سره شریکه او د حل مناسبې لارې چارې ورته ولټوي.

ښاغلي مهمند د ځمکني مسافربري ټرانسپورټ شرکتونو او اتحادیو مسؤلینو ته د ښه راغلاست ویلو او د دوی د ستونزو اوریدو وروسته وویل چې اتاق تل هڅه کوي چې د خصوصي شرکتونو ستونزو ته د حل لارې پیداکړي.
نوموړي ژمنه وکړه چې، پورته یاده ستونزه به د دولت له اړوندو ادارو سره شریکه او له منځه وړلو برخه کې به يې خپلې هیڅ ډول مرستې ونه سپموي.

چهارشنبه، غبرګولي ۲۴مه، ۱۴۰۲