د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند د آغلې جاقوب ینګ او مل ټیم سره د اتاق په مرکزي دفتر کې لیدنه ترسره او په افغانستان کې يې د پانګونې په اړه خبرې اترې وکړې.

آغلې جاقوب ینګ په افغانستان کې د ودانیو او انرژۍ د تولید سکتورونو کې د چیني پانګوالو د پانګونې چمتووالي څخه خبر ورکړ او په یاده برخه کې يې د اتاق د هر اړخیزې همکارۍ غوښته او لازمو آسانتیاوو برابرولو غوښتنه وکړه.

ښاغلي مهمند آغلې ینګ او د هغې ټیم ته د ښه راغلاست پرمهال په افغانستان کې د پانګونې لپاره شته فرصتونه او د حکومت له خوا د کورنیو او بهرنیو سوداګرو او پانګوالو لپاره په هېواد کې د پانګونې په برخه کې رامنځته کړې شوې آسانتیاوې تشریح کړې.

ښاغلي مهمند چینايي سوداګر وهڅول چې د افغانستان د برېښنا تولید او کانونو په برخو کې پانګونه وکړي او په صنایع سبز ښارګوټي کې د ځمکې د وېش په برخه کې یې د افغانستان د سوداګرۍ او پانګونې اتاق د همکارۍ ژمنه وکړه.

شنبه، وري ۴مه، ۱۴۰۳

د افغانستان د سوداګرۍ او پانګونې اتاق عامل پلاوي سرپرست رئیس ښاغلي میرویس هوتک د UNDP لخوا په جوړه شوې آنلاین ناسته کې چې، د غضنفر بانک عامل پلاوي رئیس ښاغلي خسرو فضلي، د کوچنیو پورونو بانک رئیس ښاغلي سنزر کاکړ او یو شمیر بسپنه ورکونکو ادارو مسؤلینو پکې ګډون درلود، د خصوصي سکتور یو شمیر ستونزو په ځانګړې توګه بانکي ستونزو په اړه يې خبرې اترې وکړې.
 
ښاغلي هوتک د ټولیز امنیت تامین او د اداري فساد نه شتون په هېواد کې د سوداګرۍ او پانګونې لپاره یو ښه فرصت وباله او د خصوصي سکتور د ودې لپاره یې د معیاري سکینرونو د نصب په ګډون یو شمېر بنسټیزو کارونو ته اشاره وکړه.

ښاغلي هوتک د خصوصي سکتور یو شمېر ستونزې یادې کړې، چې په کې بانکي ستونزې او بېلابېلو هېوادونو ته د سوداګرو د پیسو لېږد، د ویزو د ورکړې د اسانتیاوو نشتوالی او د خصوصي سکتور د ټرانزیټ او ټرانسپورټي برخو کې ستونزې شاملې دي.

نوموړي د بسپنه ورکونکو په مرسته او د افغانستان د سوداګرۍ او پانګونې اتاق په همکارۍ د هوايي دهلیزونو د بیا فعالولو، د ښځو او ځوانانو د کاري ظرفیت لوړولو او همدارنګه د مختلفو پروژو تطبیق او عملي کولو برخه کې ځانګړي وړاندیزونه مطرح کړل.  

د UNDP مسؤلینو د افغانستان د سوداګرۍ او پانګونې اتاق عامل پلاوي رئیس د خبرو له اورېدو وروسته د یادو ستونزو د حل په برخه کې اتاق او افغان خصوصي سکتور ته د خپلو مرستو او همکاریو ډاډ ورکړ.

سه شنبه، کب ۲۲مه، ۱۴۰۲

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند د سیمې او نړۍ هېوادونو په ځانګړې توګه ترکيې سره د سوداګریزو اړیکو غښتلتیا او پراختیا په موخه، د افطار یوه ناسته جوړه چې، د افغانستان د سوداګرۍ او پانګونې اتاق دارالإنشاء رئیس ښاغلي خان محمد سرفراز باز، د مدیره پلاوي غړو ښاغلي خان جان الکوزي او محمد داود یوسفزي، د صنعت او سوداګرۍ وزارت مرستیال، د افغانستان لپاره د ترکيې سفیر ښاغلي جنک اونال، د کابل ولایتي اتاق لومړي مرستیال ښاغلي احمد شاه حکیمي، د ولایتي اتاقونو رئیسانو، د 77 ترکي شرکت او MCC چینايي شرکت مسؤلینو، د افغان – ترک ښوونځیو رئیس، د صرافانو اتحاديې رئیس او د هېواد یو شمیر مطرح سوداګرو او پانګوالو پکې ګډون درلود.

ښاغلي مهمند ښاغلي جنک اونال او د ناستې ګډونوالو ته د ښه راغلاست ویلو ترڅنګ، ترکیه له افغانستان سره د مذهبي او فرهنګي مشترکاتو او ټرانزیټي، سوداګریزو، صنعتي او سیاسي اړیکو له پلوه یو پخوانی دوست هېواد وباله او د سوداګریزو او ټرانزیټي اړیکو په لا غښتلتیا يې ټینګار وکړ.

د اتاق لومړي مرستیال د افغان حکومت له لوري د کورنیو او بهرنیو پانګوالو لپاره شته فرصتونه او د لا زیاتو سوداګریزو اسانتیاوو رامنځته کول د پانګونې لپاره ښه وخت او چانس وباله او له ښاغلي اونال څخه یې وغوښتل چې ترکي سوداګر وهڅوي چې د افغانستان په بېلابېلو سکتورونو کې پانګونه وکړي.

د صنعت او سوداګرۍ وزارت معین ټولیز امنیت، د کوکنارو د کښت مخنیوی او د اداري فساد نه شتون په افغانستان کې د پانګونې لپاره ښه فرصت وباله او د کورنیو او بهرنیو سوداګرو لپاره د پانګونې د اسانتیاوو د رامنځته کولو په برخه کې د حکومت د چمتووالي ډاډ ورکړ.

ښاغلي خان جان الکوزي د دواړو هېوادونو ترمنځ د سوداګریزو او اقتصادي اړیکو پر اهمیت د خبرو کولو ترڅنګ، د افغانستان او ترکیې ترمنځ د سوداګریزو او اقتصادي اړیکو په برخه کې د لا زیاتو اسانتیاوو د رامنځته کولو، افغان سوداګرو ته د ویزو د ورکړې او د افغان سوداګرو پر سوداګریزو توکو د ترجیحي تعرفې په رامنځته کولو ټینګار وکړ.

ښاغلي جنک اونال د ترکیې او افغانستان ترمنځ د سوداګریزو او اقتصادي اړیکو پراختیا مهمه وبلله او د افغان سوداګرو لپاره یې د سوداګریزو اسانتیاوو په رامنځته کولو، د سوداګریزو او اقتصادي اړیکو د پراختیا او په افغانستان کې د ترکي سوداګرو پانګونې ته د هڅولو په برخه کې د همکارۍ ډاډ ورکړ.

پنجشنبه، وږي ۲مه، ۱۴۰۳

د افغانستان د سوداګرۍ او پانګونې اتاق د سیمې او نړۍ هېوادونو سره د سوداګریزو اړیکو پراختیا او اقتصادي ودې په موخه، دا ځل د افغان – ازبیک سوداګرو ګډه ناسته چې د افغانستان د سوداګرۍ او پانګونې اتاق سوداګریزو چارو مرستیال ښاغلي خیرالدین مایل احمدي، د افغانستان لپاره د ازبیکستان سفیر ښاغلي خواجه یادګار شادمانوف، د مدیره پلاوي غړو هر یو ښاغلي خان جان الکوزي، محمد داود یوسفزي او ذکریا بریالي، د اتاق د عامل پلاوي سرپرست ښاغلي میرویس هوتک، د کابل سوداګرۍ اتاق رئیس ښاغلي جمیل سادات، د مرکزي اتاق عامل پلاوي پالیسۍ او تخنیکي مرستیال ښاغلي محمد انور عارفي، او د درملو، خوراکي توکو او تیلو اتحادیو مسؤلینو پکې ګډون درلود جوړه کړه.

ښاغلي مایل احمدي د دې غونډې ګډونوالو ته د ښه راغلاست په ترڅ کې د ازبکستان هېواد له افغانستان سره د مذهبي او فرهنګي مشترکاتو او همدارنګه د ترانزیتي، سوداګریزو، صنعتي او سیاسي اړیکو په لرلو سره یو پخوانی دوست وباله او د دواړو هېوادونو ترمنځ یې د اړیکو پر لا پیاوړتیا ټینګار وکړ.

ښاغلي مایل په افغانستان کې اوسنی وضعیت د پانګونې لپاره مناسب وګاڼه او له ازبک سوداګرو یې وغوښتل چې له افغان سوداګرو سره په بېلابېلو برخو په ځانګړې توګه د کانونو د استخراج او د کرنې د میکانیزه کیدو برخه کې ګډې پانګونې وکړي.

ښاغلي مانوف د دغې غونډې د جوړیدو له امله د اتاق هڅې وستایلې او افغانستان یې له ازبکستان سره د سوداګرۍ او ترانزیت برخه کې ښه ملګری وباله او د دې ډول غونډو جوړول یې د سوداګریزو او اقتصادي اړیکو د پراختیا او همدارنګه د سیاسي اړیکو د پیاوړتیا بنسټونه وبلل.
نوموړي دغه راز د افغان سوداګرو لپاره د ویزو د ورکړې په برخه کې د لا زیاتو اسانتیاوو د رامنځته کولو خبر وکړ.

ښاغلي خان جان الکوزي، داوود یوسفزي او ذکریا بریالي ازبک سوداګرو ته په افغانستان کې د پانګونې د فرصتونو په اړه هر اړخیز معلومات ورکړل او د ویزو د ورکړې، سوداګرۍ او ترانزیت په برخه کې یې د لا زیاتو اسانتیاوو غوښتنه وکړه.
دوی د یو معیاري ځمکني دهلیز پر جوړولو ټینګار وکړ چې د دواړو هېوادونو ټول کورني تولیدات په چټکۍ سره صادر او وارد شي.

ښاغلي میرویس هوتک د دواړو هېوادونو ترمنځ د سوداګریزو او اقتصادي اړیکو پر اهمیت خبرې وکړې او د دواړو هېوادونو ترمنځ یې د سوداګریزو او اقتصادي اړیکو په برخه کې د لا زیاتو اسانتیاوو په رامنځته کولو ټینګار وکړ.
نوموړي د ګډو نندارتونونو جوړېدل، د دواړو هېوادونو د سوداګرو لپاره د ګډو پانګه ایزو فرصتونو برابرول او د افغانستان او ازبکستان د سوداګرۍ اتاقونو ترمنځ د همکاریو د هوکړه لیک لاسلیکول د سوداګرۍ د پراختیا او د اړیکو د پیاوړتیا په برخه کې مهم وبلل.

یکشنبه، کب ۲۰مه، ۱۴۰۲

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند د (MCC-JCL) کمپنۍ له رئیس ښاغلي سانګ وینبنګ سره د اتاق په مرکزي دفتر کې لیدنه ترسره او د دوی د شته ستونزو په اړه يې خبرې اترې وکړې.

ښاغلي سانګ وینبنګ د (MCC-JCL) کمپنۍ چې یو څه موده دمخه يې د افغانستان دولت سره د مس عینک کان د کیدنې تړون ترسره کړی وه، د کیندې برخه کې شته ستونزې د اتاق لومړي مرستیال سره شریکې او د ستونزو حل او د لازمو آسانتیاوو رامنځته کولو برخه کې يې د اتاق د همکارۍ غوښتنه وکړه.

ښاغلي مهمند ښاغلي سانګ وینبنګ او ورسره مل پلاوي ته د رغلاست ویلو وروسته ژمنه وکړه چې، د دوی د شته ستونزو حل برخه کې به خپلې هیڅ ډول مرستې ونه سپموي.

یکشنبه، کب ۲۷مه، ۱۴۰۲