د افغانستان د سوداګرۍ او پانګونې اتاق مدیره پلاوي غړي ښاغلي خان جان الکوزي، د اتاق عامل پلاوي سرپرست رئیس ښاغلي شفیق الله عطايي، د هرات ولایتي اتاق رئیس ښاغلي یونس قاضي زاده، د نیمروز ولایتي اتاق رئیس ښاغلي حاجي عبیدلله نورزي، د اتاق د عامل پلاوي د نړیوالو اړیکو او د صادراتو او پانګه اچونې پراختیا ډیپارټمنټونو مسؤلینو او د ایران – افغانستان ګډ سوداګریز اتاق مدیره پلاوي غړي ښاغلي محمد حنیف مسعودي په هېواد کې د افغانستان – ایران سوداګریز اتاق منځته راتګ، همغږۍ او دوه اړخیزه ناستو سرته رسولو په اړه خبرې وکړې.

 

د یو پخواني تفاهم پر بنسټ په ایران کې د افغانستان – ایران ګډ سوداګریز اتاق رامنځته شوی وو، لیکن له بده مرغه تر دی دمه په افغانستان کې ګډ د افغانستان – ایران ګډ اتاق نه دی تاسیس شوی.

 

ښاغلي الکوزي ښاغلي ښاغلي مسعودي ته د ښه راغلاست ویلو ترڅنګ، ایران د افغانستان د یو غښتلي سوداګریز شریک په توګه ونوماوه او زیاته يي کړه چې افغانستان د ایران سره ښې سوداګریزې اړیکي لري. سربیره پردی، ښاغلي الکوزي د افغانستان – ایران ګډ سوداګریزاتاق رامنځته کیدا د دواړو هېوادونو سوداګرو ستونزو حل برخه کې یو اړین ګام وباله.

 

ښاغلي مسعودي د افغانستان – ایران ترمنځ ګډه پوله کې د سوداګرو لخوا د انحصاري کولو سره د خپل مخالفت څرګندلو ترڅنګ، وړاندیز وکړ چې افغانستان او ایران خصوصي سکتورونو ترمنځ لازمه همغږي او همکاري باید رامنځته او د سوداګرو ستونزو ته د حل مناسبې لارې چارې ولټول شي.

 

ښاغلي عطايي په تشبثاتي برخه کې د شته ستونزو یادولو ترڅنګ، د ایران خصوصي سکتور سره د B2B پروګرامونو د په لاره اچولو، ګډو پانګه اچونو، نندارتونونو په لاره اچولو، دوه اړخیزو سوداګریزو پلاوو تبادلې او اقتصادي او سوداګریزو اړیکو پر غښتلتیا ټینګار وکړ. او د افغانستان – ایران ګډ سوداګریز اتاق تاسیس په اړه يي د خپل چمتووالي خبر ورکړ.

 

همدارنګه، د نمیروز او هرات ولایتي اتاقونو رئیسانو هم په خپل وار سره، د دواړو هېوادونو په ګډه پوله کې د شتو ستونزو یادونه وکړه او د سوداګرۍ رغښت برخه کې يي خپل رغوونکي وړاندیزونه مطرح کړل.

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند، د اتاق د عامل پلاوي مالي او اداري مرستیال ښاغلي میرویس هوتک او د دولت سره د اړیکو ډیپارټمنټ مسؤل ښاغلي علي مؤحدي د پکتیکا ولایت سوداګرو سره د لیدنې په ترڅ کې، په انګور هډه دروازه کې د دوی د شتو ستونزو په اړه خبرې اترې وکړې.

 

د پکتیکا ولایت سوداګرو د ښاغلي مهمند سره هغه ستونزې چې دوی يې په انګور هډې دروازه کې لري شریکې او د له منځه وړلو په برخه کې يې د اتاق د همکاریو غوښتنه وکړه.

ښاغلي مهمند سوداګرو ته د ښه راغلاست ویلو او د دوی د ستونزو له اوریدو وروسته، ژمنه وکړه چې د دوی ستونزې به د افغانستان اسلامي امارت اړوندو ادارو سره شریکې او د له منځه وړلو برخه کې به يې خپلې هیڅ ډول مرستې ونه سپموي.

د افغانستان د سوداګرۍ او پانګونې اتاق مدیره پلاوي دارلانشاء رئیس ښاغلي خان محمد سرفراز باز، د اتاق عامل پلاوي سرپرست رئیس ښاغلي شفیق الله عطايي، د اتاق عامل پلاوي د نړیوالو اړیکو، د پانګه اچونې او صادراتو پراختیا او د سوداګرۍ پراختیا ډیپارتمنټونو مسؤلینو د ملګرو ملتونو سازمان پراختیايي پروګرام د پالیسۍ او څارنې برخې متخصصینو سره د لیدنې په ترڅ کې، د هېواد په اقتصادي ودې او شتو ننګونو په اړه خبرې اترې وکړې.

 

ښاغلي باز د ملګرو ملتونو سازمان پراختیايي پروګرام مسؤلینو ته د ښه راغلاست ویلو ترڅنګ وویل، "د افغانستان د سوداګرۍ او پانګونې اتاق د ټولو سوداګرو او پانګوالو ګډ کور دی. اتاق د خصوصي سکتور په استازولۍ د سوداګرو او پانګوالو ستونزې د دولت اړوندو ادارو سره شریکوي او د حل مناسبې لارې چارې ورته ولټوي."

 

ښاغلي باز زیاته کړه "د نړیوالې ټولنې لخوا د افغانستان کنګل شوی پانګه، په افغان خصوصي سکتور، عامو وګړو او په ټوله کې په اقتصادي ودې باندې یو شمیر ناوړه اغیزو لرلو ترڅنګ، یو لړ ستونزې رامنځته کړي دي."

ښاغلي باز د خپلو خبرو په جریان کې وویل چې د افغانستان د سوداګرۍ او پانګونې اتاق د نړیوالې ټولنې لخوا د وضع شویو تعزیراتو د له منځه وړلو برخه کې بی ساری هلې ځلې ترسره کړي، مګر نړیوالې ټولنې تر دی دمه، د تعزیراتو په پورته کولو کې هیڅ ډول ګام نه دی پورته کړی چې یاده چاره، په هېواد د ګڼ شمیر اقتصادي او سوداګریزو ننګونو سبب ګرځیدلې ده.

 

د اتاق دارلانشاء رئیس ښاغلي باز دا هم وویل چې د هېواد څخه دباندی د پیسو لیږد یا (TT) او د خصوصي بانکونو د نغدینګۍ برخه کې شتو ستونزو ته د پای ټکي کیښودو په موخه، اتاق د پام وړ ګامونه پورته کړي او د اتاق لخوا په دی برخه کې د لازمو آسانتیاوو رامنځته کولو هڅې لا هم روانې دي.

 

د ملګرو ملتونو سازمان پراختیايي پروګرام د څارنې او پالیسۍ برخې متخصصینو په هېواد کې د سروې ګانو د ترسره کیدا، اقتصادي رغښت او صادراتو او وارداتو په اړه خبرې وکړې او د خپلو احتمالي سروې ګانو د ترسره ګیدا برخه کې يې د اتاق د همکارۍ غوښتنه وکړه.

 

ښاغلي عطايي وویل، "د پورته یادو ټولو ستونزو سربیره، او د اسلامي امارت واک ته رسیدو وروسته، افغان خصوصي سکتور توانیدلې چې د صادراتو برخه کې ۳۵ سلنه زیاتوالی رامنځته کړي."

ښاغلي عطايي زیاته کړه "د افغانستان د سوداګرۍ او پانګونې اتاق تل د ټولو بشردوستانه مؤسسو په ځانګړې توګه د ملګرو ملتونو سازمان پراختیايي پروګرام سره همکار پاتی شوی او ژمنه کوي چې د یاد سازمان د پروژ تطبیق برخه کې خپلې هیڅ ډول مرستې ونه سپموي."

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند د فراه ولایتي اتاق لومړي مرستیال ښاغلي ذکریا طاهري، د ټوکر واردوونکو اتحاديې رئیس ښاغلي عبیدالله او د هېواد لویدیځ حوزې یو شمیر سوداګرو سره د لیدنې په ترڅ کې، د افغانستان او ایران تر منځ د سرحدي بازار او د ابو نصر فراهي بندر په برخه کې د افغان سوداګرو شتو ستونزو په اړه خبرې اترې وکړې.

 

ښاغلي طاهري، عبيدالله او د لوېديځې حوزې سوداګرو د ايران او افغانستان ترمنځ د سرحدي بازار او د ابو نصر فراهي بندر برخه کې شته تخنیکي ستونزې د افغانستان د سوداګرۍ او پانګونې اتاق له مشرتابه سره شریکې او د له منځه وړولو برخه کې يې د اتاق د همکارۍ غوښتنه وکړه.

 

ښاغلي مهمند یادو سوداګرو ته ښه راغلاست ووایه او د هغوی ستونزې یې واوریدې او له سوداګرو یې وغوښتل چې خپلې مشخصې ستونزې او وړاندیزونه په لیکلې بڼه اتاق ته وړاندې کړي تر څو د دوی ستونزې د اسلامي امارت له اړوندو مسوولینو سره شریکې او هڅه به وکړي چې د ایران او افغان دولتي چارواکو سره د تفاهم له لارې یادو ستونزو ته د پای ټکی کیږدي.

د أفغانستان د سوداګرۍ او پانګونې اتاق عامل پلاوي سرپرست رئیس ښاغلي شفیق الله عطايي د اتاق د عامل پلاوي مالي او اداري مرستیال ښاغلي میرویس هوتک او د صادراتو او پانګه اچونې پراختیا ډیپارټمنټ مسؤل ښاغلي میرزمان پوپل په ګډون د عینک معدني شرکت رئیس او ځانکړي استازي ښاغلي صفت الله رحیمي او د یاد شرکت مدیرې آغلې ژنګ قي سره د لیدنې په ترڅ کې، په هېواد کې د پانګه اچونې د شتو فرصتونو په اړه خبرې اترې وکړې.

 

ښاغلي عطايي ښاغلي رحیمي او آغلې ژنګ قي ته په تیرو ۹۰ کلونو کې د أفغانستان د سوداګرۍ او پانګونې اتاق د فعالیتونو په ځانګړې توګه د أفغانستان د سوداګرۍ پراختیا، اقتصادي ودې، سوداګرو او پانګوالو ته د لازمو آسانتیاوو رامنځته کولو او د سوداګرو او پانګوالو ستونزو ته د مناسبو حل لارو لټولو په اړه بشپړ مالوماتو ورکولو ترڅنګ، زیاته کړه چې اتاق تل د متشبثینو، سوداګرو او پانګوالو د مشروع فعالیتونو څخه ملاتړ کړی په هڅه کوي چې د خصوصي سکتور ملاتړ برخه کې خپلې هیڅ ډول مرستې او همکارۍ ونه سپموي.

 

آغلې ژنګ قي وویل "د سوداګرۍ پراختیا، اقتصادي ودې، سوداګرو او پانګوالو ته د لازمو آسانتیاوو برابرولو او د دوی ستونزو ته د حل لارو برابرولو برخه کې د اتاق فعالیتونو ته په کتو، موږ د خپلو پروژ د تطبیق او پانګه اچونو برخه کې د اتاق د همکارۍ غوښتونکي یو."

 

د ناستې په پای کې، ښاغلي عطايي آغلې ژنګ قي ته ډاډ ورکړ چې اتاق د دوی د پروژو د تطبیق او پانګه اچونو برخه کې هر ډول مشروع او قانوني ملاتړ او همکارۍ ته ژمن دی.