ښاغلي محمد یونس مهمند، د افغانستان د سوداګرۍ او پانګونې اتاق لومړی مرستیال، د خپل کاري سفر په لړ کې د هېواد جنوبي ولایتونو ته، زابل ولایت ته سفر وکړ او د دغه ولایت د والي له مرستیال، د سوداګرۍ او پانګونې اتاق له رئیس او مشرتابه غړو او همداراز د یاد ولایت د مختلفو اتحادیو له رئیسانو سره وکتل.

په هغه غونډه کې چې د زابل ولایت د سوداګرۍ او پانګونې اتاق له مشرتابه پلاوي سره ترسره شوه، ښاغلیو: عبدالقادر خان، د یاد اتاق رئیس، حاجي همایون، لومړی مرستیال، حاجي امین الله، د زابل د سوداګرۍ او پانګونې اتاق د مشرتابه پلاوي غړی، او ډاکتر عصمت الله، د درملو د اتحادیې رئیس، حضور درلود.

عبدالقادر خان د افغانستان د سوداګرۍ او پانګونې اتاق لومړي مرستیال ته د ښه راغلاست ویلو تر څنګ، د زابل ولایت د مختلفو سکتورونو د سوداګرو ستونزې بیان کړې. هغه د معیاري درملتونونو، د اوړو، تازه مېوو او وچو مېوو لپاره د مناسب بازار نشتون، د زراعتي محصولاتو د ساتنې لپاره د معیاري سړو خونو نه شتون، او د مېوو د پروسس فابریکو نشتون ته اشاره وکړه. هغه له ښاغلي مهمند څخه وغوښتل چې د یادو ستونزو د حل، د ګمرکونو د فعالولو، او د زابل ولایت لپاره د صنعتي پارک د ځمکې د وېش په برخه کې د اړوندو حکومتي ادارو سره جدي همغږي وکړي.

ښاغلي حاجي غلام محمد، د زابل ولایت د وچو مېوو د اتحادیې رئیس، د شاه جوی ولسوالۍ د سوداګرو ستونزو ته اشاره وکړه او ویې ویل چې د دې ولسوالۍ سوداګر له ګڼو ستونزو سره مخ دي. نوموړي وویل چې د سوداګرو د پیسو نه رسېدل په ټاکلي وخت، د معیاري سړو خونو نشتون، د وچو مېوو د پروسس معیاري فابریکو نشتون، او د باکیفیته درملو نشتوالی، هغه ستونزې دي چې ځینې وخت تازه مېوې، په ځانګړي ډول انګور، زهرجن کوي.

ښاغلي مهمند، زابل ولایت یې د افغانستان له سرحدي ولایتونو، د طبیعي زېرمې او زراعتي محصولاتو لرونکی مهم ولایت وباله او له ټولو ګډونوالو سوداګرو څخه یې وغوښتل چې خپلې ستونزې سوداګرۍ او پانګونې اتاق ته په رسمي توګه وسپاري، څو اتاق د حکومتي ادارو سره په همغږۍ د دې ستونزو د حل لپاره عملي ګامونه پورته کړي. هغه، له ټولو سوداګرو وغوښتل چې د افغانیو د ارزښت د ثبات په برخه کې د دولت سره لا زیاته همکاري وکړي.

د سوداګرۍ او پانګونې اتاق لومړي مرستیال د خپل سفر په ترڅ کې د زابل ولایت د والي له مرستیال، ښاغلي محب الله حماس، نذیر احمد حمزه، د صنعت رئیس، د اقتصاد رئیس، او د شاه جوی ولسوالۍ له ولسوال سره هم جلا-جلا ملاقاتونه درلودل، او د سوداګرو ستونزې یې له دوی سره شریکې کړې. نوموړي له حکومتي مسئولینو وغوښتل چې د سوداګرو د ستونزو د حل، او د زابل د صنعتي پارک د ځمکې د وېش په برخه کې عملي ګامونه پورته کړي.

ښاغلي محب الله حماس، ښاغلي مهمند ته ښه راغلاست ووایه، او ډاډ یې ورکړ چې د سوداګریزو اسانتیاوو د رامنځته کولو، د معیاري درملتونونو، د اوړو، وچو مېوو او تازه مېوو د مارکېټ د جوړولو، او د صنعتي پارک لپاره د ځمکې د وېش په برخه کې به هر اړخیزه همکاري وکړي.

د زابل د صنعت او اقتصاد رئیسانو د صنعتي پارک د ځمکې د وېش د طی مراحل پرمختګ ته اشاره وکړه او ډاډ یې ورکړ چې د یادې ځمکې د وېش چارې به ژر عملي شي.

همداراز، ښاغلي محمد یونس مهمند، د زابل ولایت د شاه جوی ولسوالۍ له ولسوال سره هم جلا لیدنه درلوده. د شاه جوی محترم ولسوال، د یادې ولسوالۍ د خصوصي سکتور ستونزې یې د اتاق له مرستیال سره شریکې کړې، او له هغه یې وغوښتل چې د سوداګرو د پانګونې د هڅونې او د خصوصي سکتور د ستونزو د حل لپاره جدي پاملرنه وکړي.

 

 

 

ښاغلي خیرالدین مایل احمدي، د افغانستان د سوداګرۍ او پانګونې اتاق د سوداګریزو چارو مرستیال، د سارک سوداګریزو مشرانو غړو هیوادونو په انلاین غونډه کې چې د "د سارک اووم کنفرانس " تر عنوان لاندې ترسره شوه، ګډون وکړ. په دې غونډه کې نوموړي د کنفرانس د پلان جوړونې او د غړو هیوادونو ترمنځ د ګډو همکاریو د پیاوړتیا په اړه د بنګله‌دېش، مالدیف، هند، نیپال، بوتان، او پاکستان له استازو سره بحث او نظرونه تبادله کړل.

ښاغلي مایل احمدي، د افغانستان د سوداګرۍ او پانګونې اتاق د فعالیتونو، هڅو او لاسته راوړنو په اړه معلومات وړاندې کړل او ټینګار یې وکړ چې یو داسې پروپوزل وړاندې شي چې د سارک د غړو هیوادونو د سوداګریزو غونډو ټولې لاسته راوړنې پکې شاملې وي. نوموړي، ګډونوالو ته د راتلونکې غونډې او د غړو هیوادونو د نندارتون، چې په داکه ښار کې به ترسره شي، په اړه معلومات ورکړل او وویل: زموږ کاري لومړیتوبونه باید د راتلونکې غونډې د وخت او ځای ټاکل، د بنګله‌دېش د سیاسي وضعیت ارزونه، د سارک غړو نظریات د کنفرانس د اجنډا په اړه، او د سوداګرو د ګډون لپاره د علاقې راټولول وي.

ښاغلي مایل د نندارتونونو رول د غړو هیوادونو ترمنځ د سوداګریزو اړیکو په پیاوړتیا او د محصولاتو په معرفۍ کې مهم وباله او ټینګار یې وکړ چې د سارک غړو هیوادونو له کونسلګریو سره سوداګرو ته د ویزې د صدور په برخه کې د لا زیاتو آسانتیاوو په شریکولو ټینګار وشي. نوموړي د دې ډول کنفرانسونو د اهمیت په اړه خبرې وکړې او د افغانستان د سوداګرۍ او پانګونې اتاق د چمتووالي ډاډ یې وړاندې کړ ترڅو د دې کنفرانس په غوره ډول ترسره کولو کې همکاري وکړي.

د غونډې په پای کې، د سارک غړو هیوادونو استازو د دې هیوادونو ترمنځ د سوداګریزو همکاریو په زیاتولو ټینګار وکړ او د دې ډول کنفرانسونو او نندارتونونو رول یې د اقتصادي او سوداګریزو اړیکو د پیاوړتیا لپاره خورا مهم وباله.

 

 

 

 

 

ښاغلي محمد یونس مهمند د اتاق لومړی مرستیال پداسې حال کې چې د افغانستان د سوداګرۍ او پانګونې اتاق مشرتابه پلاوي، هر یو ښاغلیو: خان محمد سرفراز باز د مدیره پلاوي د دارالانشا رئیس، خان جان الکوزی د افغان-پاک ګډ اتاق رئیس او د اتاق د مدیره پلاوي غړی، سید پرویز سادات هوفیاني د مدیره پلاوي غړی، احمد شاه حکیمي د کابل د سوداګرۍ او پانګونې اتاق لومړی مرستیال، او میرزمان پوپل د اتاق عامل پلاوي مالي او اداري مرستیال شتون درلود، د بهرنیو چارو وزارت نوي ټاکل شوي معین ښاغلي محمد نعیم وردګ سره ولیدل او د افغانستان او د خلیج هېوادونو ترمنځ د سوداګرۍ اړیکو پر پراختیا یې خبرې اترې وکړې.

ښاغلي مهمند، د بهرنیو چارو وزارت د معین په توګه د ښاغلي وردګ ټاکنې ته مبارکي وویله او په ځانګړې توګه له قطر او بحرین سره د افغانستان د سوداګریزو اړیکو په پراختیا ټینګار وکړ. هغه له ښاغلي وردګ څخه وغوښتل چې د افغانستان د خصوصي سکتور د مشرتابه او یادو هېوادونو د چارواکو ترمنځ د کتنو زمینه برابره کړي، ترڅو د دواړو هېوادونو خصوصي سکتورونه په خوندي توګه د توکو تبادله او سوداګریز معاملات ترسره کړي. نوموړي، د افغانستان د سوداګرۍ او پانګونې اتاق کاري لومړیتوبونه د بدیلو سوداګریزو لارو لټون، د صادراتو زیاتوالی، او د بهرنیو هېوادونو د سوداګرو د تشویق لپاره د افغانستان په بېلابېلو اقتصادي سکتورونو کې پانګونې یادې کړې.

ښاغلي الکوزي، د افغانستان د ګاونډیو هېوادونو، په ځانګړي ډول د پاکستان سره د سوداګرۍ او ټرانزیټي اړیکو په اړه خبرې وکړې او له ښاغلي وردګ څخه یې وغوښتل چې د افغان سوداګرو د ستونزو د هوارۍ او له افغان-پاک ګډ اتاق سره د همکاریو په برخه کې هڅې وکړي.

ښاغلي سرفراز باز، د خصوصي سکتور د فعالیتونو په اړه، چې په بېلابېلو سوداګریزو او اقتصادي برخو کې ترسره کیږي، نوي ټاکل شوي معین ته معلومات ورکړل او له هغه یې وغوښتل چې د سیمې او نړۍ هېوادونو لپاره د سوداګرو د ویزو په برخه کې جدي پاملرنه وکړي.

ښاغلي حکیمي د کابل د سوداګرۍ او پانګونې اتاق د کاري پروګرامونو په اړه معلومات وړاندې کړل او د سوداګرو لپاره د سهولتونو برابرولو او له حکومت سره د کابل اتاق د همکارۍ څرنګوالی یې تشریح کړ.

ښاغلي وردګ، د افغانستان د سوداګرۍ او پانګونې اتاق مشرتابه پلاوي ته د ښه راغلاست ویلو ترڅنګ د اتاق له هغو هڅو ستاینه وکړه چې د سوداګرو او پانګوالو ستونزې یې له حکومت سره شريکې کړي دي. هغه ډاډ ورکړ چې د حکومت د قانون او پالیسۍ په چوکاټ کې به د سوداګرو لپاره د سهولتونو رامنځته کولو او د هغوی د ستونزو د هوارولو په برخه کې همکاري کوي.

 

 

 

 

د افغانستان د سوداګرۍ او پانګونې اتاق د ایران د اسلامي جمهوریت د بهرنیو چارو وزیر ښاغلي سید عباس عراقچي او ورسره د مل پلاوي د راتګ په ویاړ تعارفي مېلمستیا او د دواړو هېوادونو د خصوصي سکتور ناسته په کابل ستار هوټل کې جوړه کړه.

په دې ناسته کې د ایراني ښاغلو مېلمنو تر څنګ د اتاق مشرتابه پلاوي غړو هر یو ښاغلو: محمد یونس مهمند، د اتاق لومړی مرستیال؛ خیرالدین مایل احمدي، د اتاق سوداګریز مرستیال؛ نصیر احمد عرب، د اتاق خدماتي مرستیال؛ محترم خان محمد سرفراز باز، د مدیره پلاوي د دارالانشاء رئیس؛ شیرین آغا سخي، د مدیره پلاوي مالي رئیس؛ خانجان الکوزی، د افغان-پاک ګډ اتاق رئیس او د اتاق مدیره پلاوي غړی؛ ذکریا بریالي او سید پرویز سادات هوفیانی، د مدیره پلاوي غړي؛ میرزمان پوپل او محمد انور عارفي، د عامل پلاوي مرستیالان؛ سید جمیل سادات، د کابل اتاق رئیس او احمد شاه حکیمي، د کابل د سوداګرۍ او پانګونې اتاق لومړی مرستیال؛ حاجي عبیدالله نورزی، د نیمروز اتاق رئیس؛ حاجي شرف الدین، د اتاق ارشد مشاور؛ د بېلابېلو اتحادیو او خونو مشران او استازو ګډون درلود.

ښاغلي محمد یونس مهمند، د ایران د اسلامي جمهوریت د بهرنیو چارو وزیر او ورسره مل پلاوي راتګ ته ښه راغلاست ووایه. هغه د دواړو هېوادونو دوستانه اړیکو، دیني او کلتوري مشترکاتو ته اشاره وکړه او د ایران سره د سوداګرۍ د زیاتوالي په ځانګړي ډول افغانستان ته د ایران د وارداتو په اړه خبرې وکړې او د افغانستان او ایران ترمنځ د وارداتو او صادراتو ترمنځ د سوداګرۍ بیلانس غوښتنه وکړه.

ښاغلي مهمند، د ټولیز امنیت ټینګښت، د اداري فساد له منځه وړل او د کوکنارو د کښت منع کېدل یې د بهرنیو پانګونو لپاره ښه فرصت وګاڼه او د ایراني سوداګرو او پانګوالو څخه یې وغوښتل چې د افغانستان په اقتصادي سکتورونو کې پانګونه وکړي. هغه په ځانګړي ډول د واخان دهلیز د تطبیق په برخه کې د ایرانیو شرکتونو همکاري اړینه وبلله.

د اتاق لومړي مرستیال، د افغان سوداګرو د توکو د ترانزیت د زیاتوالي یادونه وکړه چې د ایران له لارې ترسره کېږي او د دې برخې لپاره د ایران دولت څخه د لا زیاتو اسانتیاوو غوښتنه وکړه. هغه د افغان سوداګرو او شرکتونو د ځینو بانکي ستونزو په اړه هم خبرې وکړې، په ځانګړي ډول د ۸۶ افغان شرکتونو د فعالیتونو د بندیدو په اړه چې په کیش ټاپو کې رامنځته شوي، او له ایران حکومت څخه یې د دې ستونزو د حل غوښتنه یې وکړه.

د ایران د بهرنیو چارو وزیر، ښاغلي سید عباس عراقچي، د افغانستان د سوداګرۍ او پانګونې اتاق د بلنې او مېلمه پالنې څخه مننه وکړه. هغه د تېرو درې کلونو پرمختګونه، په ځانګړي ډول د ښه امنیت ټینګښت، د دواړو هېوادونو لپاره مهم وګڼل. نوموړي خپل دا سفر د ایران او افغانستان ترمنځ د سوداګریزو او اقتصادي اړیکو د پراختیا لپاره یوه نوې مرحله یاده کړه.

د ایران د بهرنیو چارو وزیر، د بهرنیو پانګوالو د جلب لپاره د لا زیاتو امتیازاتو ورکړه مهمه وبلله او د دویم میلک پله د جوړولو په اړه د ایران لېوالتیا څرګنده کړه. هغه د افغان شرکتونو د فعالیتونو د بندیدو په اړه وویل چې دا موضوع د ټولو بهرنیو شرکتونو لپاره یو شان ده او له یوې ارزونې وروسته به دا ستونزه حل شي.

ښاغلي نورالدین عزیزي، د ایران سره د سوداګریزو راکړو ورکړو په زیاتوالي خوښي څرګنده کړه او د ایران لخوا د سوداګریزو خنډونو د لرې کولو او د دواړو هېوادونو د خصوصي سکتور ترمنځ د چابهار بندر څخه د ګټې اخیستنې په برخه کې د همکارۍ غوښتنه وکړه. هغه د افغانستان د صنعت، زراعت او کانونو د استخراج په برخو کې د پانګونې ښه فرصتونو ته اشاره وکړه او د بهرنیو پانګوالو لپاره د اسانتیاوو په برخه کې د افغان حکومت د همکارۍ ډاډ ورکړ.

د دې پروګرام په یوه بله برخه کې چې د دواړو هېوادونو خصوصي سکتور پورې اړه لرله، ویناوالو د اړیکو پراختیا، ګډې پانګونې او د سوداګرۍ، ترانزیت او پانګونې لپاره د اسانتیاوو په برابرولو ټینګار وکړ.

ښاغلي خیرالدین مایل د سوداګریزو او اقتصادي اړیکو د لا زیاتې پراختیا او د دواړو هېوادونو ترمنځ د نندارتونونو او سوداګریزو ناستو د جوړولو غوښتنه وکړه. هغه د افغانستان اوسنی وضعیت د پانګونې لپاره یو ښه فرصت وباله او له ښاغلي عراقچي څخه یې وغوښتل چې د دواړو هېوادونو د سوداګرو ترمنځ د ګډو پانګونو او سوداګریزو اړیکو د پراختیا په برخه کې، په ځانګړي ډول د افغان سوداګرو لپاره د وېزې په ورکولو کې لا زیاتې اسانتیاوې برابرې کړي.

ډاکتر محمد سعید اربابي، د چابهار د آزادې سیمې د ادارې عمومي مدیر، د افغانستان د حکومت او خصوصي سکتور له مېلمه پالنې مننه وکړه. هغه د چابهار بندر د اهمیت، موقعیت او شته فرصتونو په اړه خبرې وکړې او د یاد بندر په برخه کې د لا زیاتو اسانتیاوو او د سوداګرو د ستونزو د حل ډاډ ورکړ. هغه افغان سوداګر وهڅول چې د چابهار بندر له لارې خپلې سوداګرۍ لا زیاتې کړي.

ښاغلي خان محمد فروتن، د زراعت اتاق رئیس، د سرتاسري امنیت ټینګښت او د اداري فساد له منځه وړل د پانګونې لپاره یو ښه فرصت وباله او د دواړو هېوادونو د سوداګرو ترمنځ په زراعت سکتور کې د ګډو پانګونو پر اړتیا ټینګار وکړ.

ښاغلي محمود سیادت، د ایران-افغانستان د ګډ اتاق رئیس، د امام ابو حنیفه (رح) د درېیم نندارتون په اړه خبرې وکړې چې د افغانستان د سوداګرۍ او پانګونې اتاق له خوا د اړوندو حکومتي ادارو په همکارۍ ترسره شوی و. هغه د ایراني سوداګرو په ګډون خوښي څرګنده کړه او ډاډ یې ورکړ چې د راتلونکي کال لپاره به نور ایراني سوداګر په دې نندارتون کې د ګډون لپاره وهڅوي. نوموړي د دواړو هېوادونو د ملي ګټو په پام کې نیولو سره د لویو صنعتي سهامي شرکتونو د ګډو پانګونو پر اړتیا ټینګار وکړ.

ښاغلي الکوزي، د دواړو هېوادونو د سوداګرۍ، ترانزیت او ګډو پانګونو پر اهمیت خبرې وکړې او له ایراني لوړپوړو حکومتي چارواکو څخه یې وغوښتل چې د کانونو په استخراج، د افغانستان د زراعت په میکانیزه کولو او همدارنګه د هغه کمیسیون د چارو په چټکتیا کې مرسته وکړي چې څو ورځې وړاندې د سوداګرو د ستونزو د حل لپاره جوړ شوی و.

محترم الکوزي د افغان سوداګرو لپاره په ایران کې د لا زیاتو تجارتي اسانتیاوو برابرول مهم وبلل، څو هغوی خپلې صادراتي او وارداتي چارې د ایران له بندرونو په ځانګړي ډول د بندر عباس او چابهار له لارې ترسره کړي. نوموړي د افغانستان د خصوصي سکتور ستونزې په دې برخو کې یادې کړې: د افغان سوداګرو د ستونزو د حل لپاره د میکانیزم نشتون، د ویزې لوړه بیه، او په بانکي سکتور کې د اسانتیاوو نشتوالی. هغه د ایران د بهرنیو چارو له وزیر څخه وغوښتل چې پورته ذکر شوې ستونزې د خپلو کاري لومړیتوبونو په سر کې شاملې کړي.

ښاغلي عبدالطیف نظري، د اقتصاد وزارت معین، د ایران د لوړپوړي پلاوي سفر د سیاسي اړیکو د پیاوړتیا، سوداګرۍ او ترانزیت د پراختیا لپاره نوې مرحله یاده کړه او ډاډ یې ورکړ چې د افغان او ایراني سوداګرو ترمنځ د ګډو پانګونو لپاره به لا زیات تجارتي فرصتونه رامنځته شي.

 

 

 

 

د افغانستان د سوداګرۍ او پانګونې اتاق د دریمې دورې د مشرتابه پلاوي نهه ويشتمه غونډه د اتاق د عمومي رئیس ښاغلي توکل احمدیار په مشري او د ښاغلیو ګډونوالو: د مشرتابه پلاوي لومړي مرستیال ښاغلي محمد یونس مهمند، د سوداګریزو چارو مرستیال ښاغلي خیرالدین مایل احمدي، خدماتي چارو مرستیال ښاغلي نصیر احمد عرب، د مشرتابه پلاوي د دارالانشاء رئیس ښاغلي خان محمد سرفراز باز، د مالي چارو رئیس ښاغلي شیرین آغا سخي، د نړیوالو اړیکو رئیس انجنیر سید جاوید برهان، او د نورو غړو په ګډون چې ښاغلي سلطان محمد صافي د اتاق مشرتابه پلاوي غړي، ښاغلي خان جان الکوزی داتاق مشرتابه پلاوي غړي او دافغان پاک ګده خوني رئیس، محمد داوود یوسفزی، محمد گردیزی، ذکریا بریالی، سید پرویز سادات هوفیانی، جان آقا صادقی، ضیاءالدین اچکزی، بهادر خیرخواه او احمد ضیاء عظیمی شینوزاده د اتاق د مشرتابه پلاوي غړي پکې شامل وو، او همدارنګه د اتاق د څارنې پلاوي رئیس ښاغلي عبدالحامد حمیدی او د مالي او اداري مرستیالۍ سرپرست ښاغلي میر زمان پوپل په ګډون، د اتاق د مشرتابه پلاوي په دفتر کې چې په شهرنو کابل کې موقعیت لري، ترسره شوه.

د غونډې په پیل کې، د نهه ويشتمې غونډې د اجنډا موضوعات، د تېرو غونډو پرېکړې، او د مشرتابه پلاوي د دریمې دورې د اته ويشتمې غونډې صورت د ښاغلي خان محمد سرفراز باز د دارالانشاء د رئیس له لوري غونډې ته وړاندې شول.

وروسته، د اتاق د اجرائیوي پلاوي راپورونه او وړاندیزونه د ښاغلي میر زمان پوپل د مالي او اداري مرستیالۍ سرپرست له خوا غونډې ته وړاندې شول.

په پای کې، د افغانستان د سوداګرۍ او پانګونې اتاق اړوند موضوعاتو او نورو وړاندیزونو په اړه د مشرتابه پلاوي او اجرائیوي پلاوي د رئیس ترمنځ بحث وشو، او اړین تصمیمونه ونیول شول.