د افغانستان د سوداګرۍ او پانګونې اتاق په یو خبرې ناسته کې چې د حرکت ادارې په همکارۍ د اتاق د محترم مشرتابه پلاوي غړو ښاغلو د مدیره پلاوي لومړي محمد یونس "مومند"، د پانګونې مرستیال سلطان محمد "صافي"، د دارالانشاء رییس خان محمد سرفراز باز، د مدیره پلاوي غړو خانجان "الکوزي"، آذرخش "حافظي"، احمد ضیاء عظیمي "شینوزاده" او جان آقا "صادقي"، د حرکت ادارې رییس نورعالم "حکیمیار" او د اتاق د عامل پلاوي رییس سید زمان "هاشمي"، د خصوصي سکتور لسګونو غړو او خبرېالانو په ګډون د اتاق د غونډو تالار کې ترسره شوه، افغانستان کې د کار وبار څلرویشتمه سروې او پر هغې د کوویډ 19 اغیزې اعلان کړې.

د افغانستان د سارک اتاق محترم مدیره پلاوي غړو خیرالدین "مایل احمدي"، محمد ‏یونس "مهمند"، غلام نبي "عیدي زاده"، جلال الدین "سعید"، عبدالجبار "ساپي"، نظام ‏الدین "تاجزاده"، امیرجان "حیدري"، ظریف "بهارت" او د افغانستان د ښځو د سوداګرۍ اتاق د عامل پلاوې مشرې مېرمن منیژه "وافق" د یکشنبې ورځ د روان کال د وږې مېاشت په دوېمه نېټه د افغانستان د اسلامي جمهوریت د بهرنیو چارو وزارت له اقتصادي مرستیال ښاغلي میروېس ناب او د دغه وزارت له یو شمېر رییسانو سره ولېدل او د سارک سازمان د ستونزو په تړاو یې بحث او خبرې وکړې.

دې ناسته کې،د افغانستان د سارک اتاق د مدیره پلاوي غړو د بهرنیو چارو وزارت له اقتصادي معین او د دې وزارت مسوولینو سره د سوېلي اسیا د سیمه یېزو اقتصادي همکاریو سازمان (سارک) د دایمي ناستې د نه ترسره کېدو له امله د دغه سازمان په رسمیت پېژندل شویو 24 بنسټونو د جواز نه تمدید، د افغانستان سوداګرو او پانګه والو ته د سارک د کثیرالمسافرت ویزې د سټیکر عدم صدور او همدا راز په افغانستان کې د سارک سازمان د صنعتي پارک جوړېدو وړاندیزونه شریک او د همکاریو غوښتنه وکړه.

ښاغلي "ناب" د افغانستان د سارک اتاق د مدیره پلاوي غړو له لوري د مطرح شویو ستونزو له اورېدو وروسته، ژمنه وکړه چې د افغانستان د سوداګرۍ او پانګونې اتاق سره په همکارۍ به موجوده ستونزې حل کړي.

د افغانستان د سوداګرۍ او پانګونې اتاق او د عامه ساتنې ملي تصدۍ، د هېواد خصوصي سکتور لپاره د امنیتي خدمتونو چمتو کولو په موخه د اتاق د مشرتابه پلاوي غړو، د کابل والي، د عامه محافظت ملي تصدۍ مشر، د کورنیو چارو وزارت مسوولینو او د هېواد د خصوصي سکتور غړو حضور کې د کابل انټر کانټیننټال هوټل کې ګډه ناسته ترسره کړه.

د افغانستان د سوداګرۍ او پانګونې اتاق د مدیره پلاوي د پانګونې مرستیال ښاغلي سلطان محمد صافي د غالیو د اتحادیې او ټولنې له مسوولینو او غړو سره د اتاق د غونډو په تالار کې کې ولېدل او د قالینو د سکتور په شته ستونزو یې بحث او خبرې وکړې.

‏دغه ناسته کې، د غالۍ سوداګرو او تولید کوونکو او د تار او وړۍ صادروونکو هندوستان ته د غالیو تار او وړۍ د صادراتو قسمت او همدا راز د غالیو صادراتو برخه کې خپلې شته ستونزې مطرح او د هغې د حل لپاره یې خپل مشخص وړاندیزونه او نظرونه هم وړاندې کړل.

‏ښاغلي صافي د غالۍ تار د صادروونکو، د غالیو تولید کوونکو او صادروونکو د ستونزو او وړاندیزونو له اورېدو وروسته خپل نظر څرګند کړ او ټینګار یې وکړ چې د ملي ګټو په پام کې نېولو سره او  د دواړو لورو د معقول غوښتنو او وړاندیزونو وروسته د مربوطه ارګانونو لخوا داسې تصمیم ونیول شي څو، له یوې خوا د قالینو د تار او وړۍ تولید کوونکو او صادروونکو ته زیان ونه رسیږي او له بل لوري د غالیو د تار او وړۍ صادرات د غالیو پر تولید کوونکو او صادروونکو منفي اغیز ونه کړي او په کور دننه د غالۍ تولید کوونکي د خامو موادو له کمښت سره مخ نه شي.

نوموړي زیاته کړه: په هغه صورت کې چې د غالیو تولید کوونکي حاضر وي،چې هېواد کې د غالۍ تولید شوي تار او وړۍ وپېري او خپل تولیداتو کې یې مصرف کړي او داخلي تار او وړۍ ته لومړیتوب ورکړل شي له دې سره به داخلي تار وکارول شي او هم به د کورنیو غالیو تولید او صادرات زیانمن نه شي.

د افغانستان د سوداګرۍ او پانګونې اتاق د پانګونې مرستيال ښاغلي سلطان محمد "صافي" دوشنبې ورځ د روان کال د وږې مېاشت په درېمه د موبل او فرنيچر د ټولنې له مشر  محمد نعيم "رحيمي" او د دې اتحاديې يو شمېر غړو سره د اتاق د غونډو په تالار کې د لېدنې په ترڅ کې د هغوى  د ستونزو او حل لارو په تړاو بحث او خبرې وکړې.‎

ښاغلي "رحيمي" د وارداتي توکو د ګمرکي پړاونو د طى کولو پر مهال  ستونزې او فساد، د دې اتحاديي پر توليدي شرکتونو د برښنا د لګښت لوړوالى د اندېښنې وړ وبلل او دغه برخه کې يې له اتاق د همکارۍ غوښتنه وکړه.‎

سوداګرو د کراچۍ بندر او پاکستان کې د خپلو وارداتي اموالو ځنډ، د پيسو د انتقال ستونزه او همدا راز د هېواد لويو لارو کې بېلابېلې اخاذې د سوداګرو لپاره له جدي ستونزو وبللې او د شته ننګونو حل کې يې د اتاق له همکاريو وغوښته.

د اتاق د پانګونې مرستيال محترم "صافي" د کورنيو توليداتو د ملاتړ ښودلو او د سوداګرو  د ستونزو تايېد ترڅنګ، د موبل او فرنيچر د اتحاديي له رييس او غړو وغوښتل چې خپلې ټولې ستونزې په کتبي بڼه د سوداګرۍ او پانګونې اتاق ته وسپاري او ژمنه يې وکړه چې اتاق به ډېر ژر د دوى ستونزې د حل لپاره مربوطه بنسټونو سره شريکې او د حل کولو لپاره  به يې هڅې وکړي.