د خصوصی سکټور اوچت غږ

05
پنج شنبه, نومبر
11 New Articles

د افغانستان د سوداګرۍ او پانګونې خونې عمومي رئیس او د مشرتابه پلاوي د کندهار په سپین بولدک ولسوالۍ کې د سوداګرۍ او پانګونې خونه پرانېسته.

د افغانستان د سوداګرۍ او پانګونې خونې عمومي رئیس ښاغلي الحاج سید کریم هاشمي د کندهار؛ سپین بولدک ولسوالۍ ته د خپل سفر په ترڅ کې د خونې د مشرتابه پلاوي د غړو په حضور کې د سپین بولدک د سوداګرۍ او پانګونې خونه پرانېسته. دغه اقدام د سیمه‌ییزو سوداګریزو جوړښتونو د پیاوړتیا، د سوداګرو او پانګوالو د ملاتړ او د هېواد د یوه مهم سوداګریز مسیر په اوږدو کې د اقتصادي فعالیتونو د پراختیا په موخه ترسره شو.
 
د دې خونې د پرانېستې په مراسمو کې د افغانستان د سوداګرۍ او پانګونې خونې د عمومي ریاست د پالیسۍ او له دولت سره د اړیکو مرستیال ښاغلي الحاج میراجان سلیمان‌خېل، د عمومي ریاست د خدماتو مرستیال ښاغلي الحاج عنایت‌الله صدیق‌زي، د عمومی ریاست د کورنیو تولیداتو او محصولاتو د ملاتړ مرستیال ښاغلي الحاج عبدالنافع بارکزي او د عمومي ریاست د فرهنګي او ټولنیزو چارو مرستیال ښاغلي الحاج حبیب‌الله عمر ترڅنګ د سپین بولدک د سوداګرۍ او پانګونې خونې رئیس ښاغلي محمد شفیق اڅکزي، د یادې خونې د مدیره پلاوي غړو، یو شمېر سیمه‌ییزو مسئولینو، قومي مشرانو، سوداګرو او پانګوالو ګډون درلود.
د افغانستان د سوداګرۍ او پانګونې خونې عمومي رئیس ښاغلي الحاج سید کریم هاشمي د دې خونې د پرانيستو په برخه کې د ښکېلو مسئولینو د هڅو ستاینې ترڅنګ دغه پرانيسته د سپین بولدک سوداګرو او د افغانستان د سوداګرۍ او پانګونې خونې ترمنځ د همغږۍ پیاوړتیا لپاره مهم ګام وباله. نوموړي هیله څرګنده کړه، چې دغه خونه به وکولای شي د سیمې سوداګرو د ستونزو انعکاس، د غوښتنو د تعقیب او د هغوی د سوداګریزو او پانګونې برخې فعالیتونو په ملاتړ کې اغېزناک رول ولوبوي.
ښاغلي هاشمي امنیت او ثبات د اقتصادي فعالیتونو د ودې او د پانګونې د جلب له اساسي عواملو څخه وبلل او د هېواد په کچه د امنیت ټینګښت په برخه کې یې د مسئولینو د هڅو مننه وکړه. نوموړي ټینګار وکړ، چې د اقتصادي فعالیتونو لپاره د مناسب چاپېریال برابرول د پانګوالو د باور زیاتوالي، د سوداګرۍ د پراختیا او د کاري فرصتونو د رامنځته کېدو زمینه برابروي.
د افغانستان د سوداګرۍ او پانګونې خونې عمومي رئیس د سپین بولدک مهم جغرافیوي موقعیت او اقتصادي ظرفیتونو ته په اشارې د سوداګرۍ، ټرانزیټ، د کرنیزو محصولاتو، تازه او وچو مېوو او نورو کورنیو تولیداتو د صادراتو په برخو کې له شته فرصتونو څخه د اغېزناکې ګټې اخېستنې پر اړتیا ټینګار وکړ. نوموړي څرګنده کړه، چې د کورنیو تولیدونکو ملاتړ، د سوداګرۍ بهیر اسانتیا او د خصوصي سکټور او اړوندو مسوولو بنسټونو ترمنځ د همکارۍ پیاوړتیا د صادراتو په زیاتوالي، د کاري فرصتونو په رامنځته کولو او د هېواد په اقتصادي وده کې ارزښتناک رول لري.
نوموړي زیاته کړه، چې سوداګر او پانګوال کولای شي د خپلو تولیدي او سوداګریزو فعالیتونو په پراختیا سره د کاري فرصتونو په رامنځته کولو، د بې‌وزلۍ په کمولو او د خلکو اقتصادي وضعیت په ښه‌والي کې اغېزناکه ونډه واخلي. د هغه په وینا د افغانستان د سوداګرۍ او پانګونې خونه ژمنه ده، چې د سوداګرۍ له سیمه‌ییزو خونو سره په همغږۍ د سوداګرو ستونزې تعقیب او د سوداګرۍ او پانګونې چاپېریال د ښه‌والي لپاره هڅې وکړي.
د مراسمو په دوام کې د سپین بولدک د سوداګرۍ او پانګونې خونې رئیس ښاغلي محمد شفیق اڅکزي، د مدیره پلاوي غړو او یو شمېر سوداګرو او پانګوالو د سوداګرۍ او پانګونې په بېلابېلو برخو کې خپلې ستونزې، لیدلوري او وړاندیزونه مطرح کړل. ګډونوالو د افغانستان د سوداګرۍ او پانګونې له خونې سره د همغږۍ پیاوړتیا او په سپین بولدک کې د اقتصادي فعالیتونو د ودې لپاره د غوره شرایطو پر برابرولو ټینګار وکړ.
د مراسمو په پای کې د خصوصي سکټور پر ملاتړ، د کورنیو تولیداتو پر پیاوړتیا، د صادراتو پر پراختیا، د سوداګریزو فعالیتونو پر اسانتیا او د اقتصادي ودې او د پانگونې فرصتونو د پراختیا په موخه د افغانستان د سوداګرۍ او پانګونې خونې او د سپین بولدک د سوداګرۍ او پانګونې خونې ترمنځ پر ګډو همکاریو ټینګار وشو.
د افغانستان د سوداګرۍ او پانګونې خونې مشرتابه د سپین بولدک ولسوالۍ د سیمه‌ییزو مسئولینو، د سپین بولدک د سوداګرۍ او پانګونې خونې د رئیس ښاغلي محمد شفیق اڅکزي او د مشرتابه پلاوي د غړو، قومي مشرانو، سوداګرو او پانګوالو له تود هرکلي، صمیمانه مېلمه‌پالنې او ارزښتناکو همکاریو څخه د زړه له کومې مننه وکړه. د خونې مشرتابه دغه همکاري او کوربه‌توب د اقتصادي ودې لپاره د سوداګرو او سیمه‌ییزو مسئولینو د ژمنتیا څرګندونه بولي او هیله لري، چې د ګډو همکاریو پر دوام سره به د سوداګرۍ د ودې، د پانګونې زیاتوالي او د سپین بولدک اقتصادي موقعیت د لا پیاوړتیا زمینه نوره هم برابره شي.