د خصوصی سکټور اوچت غږ

05
پنج شنبه, نومبر
11 New Articles

د افغانستان د سوداګرۍ او پانګونې خونې عمومي رئیس او مشرتابه پلاوي د هلمند د سوداګرۍ او پانګونې خونې لیدنه وکړه.

 
 
د افغانستان د سوداګرۍ او پانګونې خونې عمومي رئیس ښاغلي الحاج سید کریم هاشمي د خونې د مشرتابه پلاوي په مشرۍ هلمند ولایت ته سفر وکړ او د هلمند د سوداګرۍ او پانګونې خونې په نوښت جوړ شوي اقتصادي پروګرام کې یې ګډون او وینا وکړه. نوموړي په دغه پروګرام کې د کورنیو تولیداتو پر ملاتړ، د صادراتو پر پراختیا، د پانګونې پر پیاوړتیا او د هلمند له اقتصادي ظرفیتونو څخه پر اغېزناکې ګټې اخېستنې ټینګار وکړ.
 
په دغه سفر کې د افغانستان د سوداګرۍ او پانګونې خونې عمومي ریاست د خدماتو مرستیال ښاغلي الحاج عنایت‌الله صدیق‌زی، د عمومي ریاست د کورنیو تولیداتو او محصولاتو د ملاتړ مرستیال ښاغلي الحاج عبدالنافع بارکزی، د عمومي ریاست د پالیسۍ او له دولت سره د اړیکو مرستیال ښاغلي الحاج میراجان سلیمان‌خېل، د عمومي ریاست د فرهنګي او ټولنیزو چارو مرستیال ښاغلي الحاج حبیب‌الله عمر او د دې خونې د مدیره پلاوي غړو ښاغلي الحاج یحیی پښتون، د کندهار د سوداګرۍ خونې د مدیره پلاوي رئیس ښاغلي الحاج عبدالاحد خان، ښاغلي الحاج احمد مسعود راحت او ښاغلي الحاج بهاوالدین خان د عمومي رئیس ملتیا کوله.
 
په دغه پروګرام کې د برېښنا شرکت رئیس، د صنعت او سوداګرۍ وزارت استازي، د هلمند والي، دولتي او سیمه‌ییزو مسؤولینو، د هلمند او کندهار د سوداګرۍ او پانګونې خونو رئیسانو او غړو، دیني علماوو، قومي مشرانو، سوداګرو او پانګوالو ګډون کړی و.
 
ښاغلي الحاج سید کریم هاشمي په خپله وینا کې هلمند د هېواد له مهمو ولایتونو وباله، چې پراخ اقتصادي او کرنیز ظرفیتونه لري. نوموړي د دغو ظرفیتونو، په ځانګړي ډول د پنبې، تازه مېوو او نورو کرنیزو محصولاتو په برخه کې پر اغېزناکې ګټې اخېستنې ټینګار وکړ. هغه څرګنده کړه، چې د دغو برخو پراختیا کولای شي د کورنیو تولیداتو زیاتوالي، د صادراتو پراختیا، د کاري فرصتونو رامنځته کېدو او د خلکو اقتصادي وضعیت ښه کېدو ته زمینه برابره کړي.
 
د افغانستان د سوداګرۍ او پانګونې خونې عمومي رئیس د کرنیزو محصولاتو د ارزښت‌ ځنځیر د پراختیا ارزښت ته په اشارې سره وویل، چې د دوامدارې اقتصادي ودې لپاره اړینه ده د محصولاتو پروسس، معیاري بسته‌بندۍ، ساتنې، لېږد او بازارموندنې په برخو کې ډېره پانګونه وشي او د دولتي ادارو او خصوصي سکټور ترمنځ همغږي او همکاري پیاوړې شي. د نوموړي په وینا، کورنیو او بهرنیو بازارونو ته د تولیدوونکو او صادرونکو د لاسرسي لپاره د مناسبو شرایطو برابرول د سوداګرۍ د ودې او د افغانستان د محصولاتو د ارزښت زیاتوالي په برخه کې مهم ګامونه دي.
 
ښاغلي هاشمي د کورنیو تولیداتو ملاتړ، د سوداګریزو فعالیتونو اسانول، د پانګونې پر وړاندې د خنډونو لرې کول او د صادراتو پراختیا د افغانستان د سوداګرۍ او پانګونې خونې له لومړیتوبونو څخه وبلل. نوموړي څرګنده کړه، چې د خصوصي سکټور وده او د سوداګرو، پانګه‌والو او تولیدوونکو ملاتړ کولای شي د بې‌کارۍ او بې‌وزلۍ په کمولو، د کاري فرصتونو په رامنځته کولو او د ملي اقتصاد په پیاوړتیا کې اغېزناک رول ولوبوي.
 
هغه همدارنګه د دغه سفر او د هلمند له سوداګرو سره د ناستې موخه د سوداګرو او پانګوالو د ستونزو، وړاندیزونو او نظرونو مستقیم اورېدل او د سوداګرۍ او پانګونې چاپېریال د ښه‌والي لپاره د عملي لارو چارو څېړل وبلل. نوموړي ټینګار وکړ، چې د افغانستان د سوداګرۍ او پانګونې خونه به د خپلو مسؤولیتونو په چوکاټ کې د خصوصي سکټور د ستونزو انعکاس، د سوداګریزو مشروع غوښتنو د تعقیب او له اړوندو ادارو سره د همغږۍ پیاوړتیا لپاره هڅې وکړي.
 
د خونې عمومي رئیس هیله څرګنده کړه، چې د هلمند د والي، سیمه‌ییزو مسؤولینو، د هلمند او کندهار د سوداګرۍ او پانګونې خونو او نورو اړوندو ادارو په همکارۍ به د کورنیو تولیداتو د ملاتړ، د پنبې، تازه مېوو او د هېواد د نورو محصولاتو د صادراتو پراختیا او د پانګونې او سوداګریزو فعالیتونو پراخېدو لپاره لا مناسب فرصتونه برابر شي.
 
د پروګرام پر دوام د بېلابېلو ادارو یو شمېر مسؤولینو او استازو هم په هلمند کې د سوداګرۍ، تولید، پانګونې او اقتصادي فعالیتونو په برخو کې خپل نظرونه، وړاندیزونه او شته ستونزې له ګډونوالو سره شریکې کړې. د نظرونو دغه تبادله د دولتي مسؤولینو او سوداګرو ترمنځ د همغږۍ پیاوړتیا او د دې ولایت اقتصادي پراختیا لپاره د عملي لارو چارو د څېړلو یو فرصت برابر کړ.
 
په پای کې د افغانستان د سوداګرۍ او پانګونې خونې د خونې د مديره پلاوي له غړي او د هلمند د سوداګرۍ او پانګونې خونې د مدیره پلاوي له رئیس ښاغلي الحاج یحیی پښتون، د هلمند ولایت له مقام، محترم ښاروال، ولایتي مسؤولینو، د دغه ولایت له سوداګرو او پانګوالو او د هلمند د سوداګرۍ او پانګونې خونې د مدیره او عامل پلاوي د تود هرکلي، صمیمانه مېلمه‌پالنې او ارزښتناکې همکارۍ له امله د زړه له کومې مننه او قدرداني وکړه.
 
د افغانستان د سوداګرۍ او پانګونې خونې مشرتابه دغه هرکلی او همکاري د خصوصي سکټور د پیاوړتیا، د کورنیو تولیداتو د ملاتړ او د سوداګرۍ او پانګونې د پراختیا لپاره د ګډې ژمنتیا نښه وبلله او هیله یې څرګنده کړه، چې د دا ډول همکاریو پر دوام سره به د اقتصادي ودې، د صادراتو زیاتوالي او د هېواد د خلکو او سوداګرو لپاره د لا ډېرو فرصتونو د رامنځته کېدو زمینه برابره شي.