چهارشنبه، د وږي ۱۱مه، ۱۴۰۵

 

د افغانستان د سوداګرۍ او پانګونې خونې په نوښت د افغانستان او د روسیې د داغستان جمهوریت د خصوصي سکټورونو ترمنځ د سوداګریز تواصل (B2B) ناسته ترسره شوه، چې په ترڅ کې یې د دواړو لورو د سوداګرو او پانګوالو ترمنځ د سوداګریزو همکاریو په موخه د ۱۴.۵ میلیونه امریکايي ډالرو په ټوله‌يیز ارزښت څلور هوکړې لاسلیک شوې.

په دې ناسته کې د داغستان ۱۵ او د افغانستان ۴۵ شرکتونو، چې په بېلابېلو اقتصادي او سوداګریزو سکتورونو کې فعالیت کوي، د سوداګرو او د خصوصي سکټور د استازو ترڅنګ ګډون کړی و.

په مراسمو کې د افغانستان د سوداګرۍ او پانګونې خونې د ټولنیزو او فرهنګي چارو مرستیال الحاج حبیب‌الله عمر، د سټراټېژیکو اړیکو مرستیال مجیب الرحمن شېرزاد، خدماتي مرستیال الحاج عنایت‌الله صدیق‌زي، د مدیره پلاوي غړو الحاج یحیی پشتون او قاري صاحب شکرالله عالمي، د خونې د عامل پلاوي سرپرست رئیس ښاغلي زین‌الله حسني، او ګڼ شمېر افغان سوداګرو او پانګوالو ګډون کړی و.

د غونډې په پیل کې د افغانستان د سوداګرۍ او پانګونې خونې د ټولنیزو او فرهنګي چارو مرستیال الحاج حبیب‌الله عمر په خپله وینا کې وویل، چې د افغانستان او داغستان د خصوصي سکټورونو ترمنځ سوداګریزې اړیکې د پراختیا په حال کې دي او دا ډول ناستې د دواړو لورو ترمنځ د سوداګرۍ، پانګونې او اقتصادي همکاریو د پراختیا لپاره مهم فرصتونه برابروي.

نوموړي د افغانستان په بېلابېلو اقتصادي برخو، په ځانګړي ډول کرنې، کان‌کېندنې، تولید، د خوراکي توکو پروسس، انرجۍ، ټرانسپورټ، ساختماني چارو او خدماتو کې شته ظرفیتونو ته اشاره وکړه او څرګنده یې کړه، چې د داغستان له ورته اقتصادي ظرفیتونو سره د افغانستان د خصوصي سکټور د ظرفیتونو نښلول کولای شي د دوه‌اړخیزې سوداګرۍ د پراختیا، ګډو پانګونو او ګډو تولیدي پروژو د پلي کېدو لپاره زمینه برابره کړي.

الحاج عمر زیاته کړه، چې د افغانستان خصوصي سکټور لېوالتیا لري، څو له داغستان سره سوداګریزې اړیکې له محدودو توکو او انفرادي معاملاتو څخه د پراخو او دوامدارو اقتصادي همکاریو تر کچې ورسوي. نوموړي د سوداګریزو پلاوو د متقابل تګ راتګ، د ګډو نندارتونونو او اقتصادي ناستو د جوړولو، د بازارونو په اړه د معلوماتو د تبادلې، د ټرانزیټ او ټرانسپورټ اسانتیاوو د رامنځته کولو او د ګډو پانګونو د فرصتونو معرفي کولو په برخو کې د لا زیاتو همکاریو پر اړتیا ټینګار وکړ.

د افغانستان د سوداګرۍ او پانګونې خونې مرستیال د داغستان سوداګرو او پانګوالو ته بلنه ورکړه، چې په افغانستان کې د پانګونې شته فرصتونه له نږدې وڅېړي. نوموړي همداراز وویل، چې افغان سوداګر او پانګوال د داغستان په بازار کې شته د سوداګرۍ او پانګونې فرصتونو ته لېوالتیا لري.

نوموړي ډاډ ورکړ، چې د افغانستان د سوداګرۍ او پانګونې خونه د دواړو لورو د خصوصي سکټورونو ترمنځ د سوداګریزو اړیکو د لا پیاوړتیا، د متقابلو همکاریو د پراختیا او د ګډو اقتصادي او تولیدي پروژو د پلي کېدو په برخه کې هر ډول لازمې همکارۍ ته چمتوو ده.

په ورته وخت کې، د داغستان د سوداګرۍ خونې مرستیال ارسلان غمزه‌دوف د سوداګرو او پانګوالو لپاره د لازمو اسانتیاوو د برابرولو په برخه کې د افغانستان د سوداګرۍ او پانګونې خونې هڅې وستایلې. نوموړي وویل، چې د افغانستان او روسیې ترمنځ د اقتصادي تعاملاتو د زیاتېدو په پایله کې د دواړو هېوادونو د خصوصي سکټورونو لپاره د سوداګرۍ او پانګونې نوي فرصتونه رامنځته شوي دي.

غمزه‌دوف د افغانستان او د روسیې ترمنځ د سوداګرۍ په پراختیا کې لوجيسټیکي موضوعات مهم وبلل او د سوداګریزو اړیکو د لا پراختیا لپاره یې د موجودو لوجيسټیکي ستونزو د حل او د ټرانسپورټي او سوداګریزو اسانتیاوو د پیاوړتیا پر اړتیا ټینګار وکړ.

د ناستې په پای کې، د افغان او داغستاني سوداګرو او پانګوالو ترمنځ د ترسره شوو B2B بحثونو او مذاکراتو په پایله کې څلور سوداګریزې هوکړې لاسلیک شوې، چې ټوله‌يیز ارزښت یې ۱۴.۵ میلیونه امریکايي ډالرو ته رسېږي.

د افغانستان د سوداګرۍ او پانګونې خونه تمه لري، چې د دغو هوکړو عملي کېدل به د افغانستان او د روسیې داغستان ترمنځ د سوداګرۍ د حجم د زیاتوالي، د خصوصي سکټورونو ترمنځ د اړیکو د پراختیا او د ګډو پانګونو لپاره د نویو فرصتونو د رامنځته کېدو زمینه برابره کړي.