د افغانستان د سوداګرۍ او پانګونې خونې او د استانبول د سوداګرۍ خونې مشرتابه پلاويو ترمنځ په ترکیې کې دوستانه او رغنده ناسته ترسره شوه، چې د افغانستان او ترکیې ترمنځ د سوداګریزو اړیکو پراختیا، د اقتصادي همکاریو پیاوړتیا او د پانګونې نویو فرصتونو رامنځته کول یې د بحث اساسي محورونه وو.

په دې ناسته کې د افغانستان د سوداګرۍ او پانګونې خونې عمومي رئیس ښاغلي سید کریم هاشمي د افغان پلاوي په مشرۍ ګډون کړی و او د افغانستان د سوداګرۍ او پانګونې خونې د ولایتي چارو مرستیال ښاغلی فیض احمد خوافي يې هم ملتيا کوله.

ښاغلي سید کریم هاشمي د دواړو هېوادونو پراخو اقتصادي او سوداګریزو ظرفیتونو ته په اشارې د عملي همکاریو پر پراختیا، د دواړو خونو ترمنځ د بنسټیزو اړیکو پر پیاوړتیا او د افغانستان او ترکیې د سوداګرو، پانګوالو او شرکتونو ترمنځ د مستقیمو او دوامدارو اړیکو پر رامنځته کولو ټینګار وکړ.

نوموړي څرګنده کړه، چې ترکیه د افغانستان له مهمو اقتصادي او سوداګریزو شریکانو ده او د دواړو هېوادونو ترمنځ د سوداګرۍ او پانګونې پراختیا لپاره شته ظرفیتونه د اوسنیو راکړو ورکړو له کچې ډېر لوړ دي. ښاغلي هاشمي همدارنګه د سوداګریزو پلاوو پر تګ راتګ، د ګډو پانګونو پر پراختیا او ترکي پانګوالو ته په افغانستان کې د شته اقتصادي فرصتونو پر معرفي کولو هم ټينګار وکړ.

د لیدنې په یوه بله برخه کې په نندارتونونو او اقتصادي پروګرامونو کې د دواړو هېوادونو د سوداګرو، شرکتونو او تولیدوونکو پر حضور هم بحث وشو. دواړو لورو ټینګار وکړ، چې د سوداګرو د تګ راتګ زیاتوالی او په نندارتونونو يې ګډون کولای شي د بازارونو د لا ښه پېژندنې او د سوداګریزو راکړو ورکړو پراختیا لپاره زمینه برابره کړي.

په همدې موخه د افغانستان د سوداګرۍ او پانګونې خونې مشرتابه پلاوي د استانبول د سوداګرۍ خونې مشرتابه پلاوي ته په افغانستان کې د امام ابوحنیفه (رح) په پنځم ملي او نړیوال نندارتون کې د ګډون بلنه ورکړه، چې دغه بلنه د استانبول د سوداګرۍ خونې مشرتابه له لوري ومنل شوه.

همدارنګه د بحث په نتيجه کې د استانبول د سوداګرۍ خونې مشرتابه د دواړو خونو ترمنځ د همکاریو هوکړه‌لیک د طرحې او لاسلیک وړاندیز هم وکړ. دواړو لورو د سوداګریزو او اقتصادي همکاریو د پراختیا لپاره د یوه منظم او دوامدار چوکاټ پر رامنځته کولو ټینګار وکړ.

د استانبول د سوداګرۍ خونې مشرتابه هم له افغانستان سره د اقتصادي او سوداګریزو همکاریو د پراختیا، د اقتصادي فعالانو ترمنځ د مستقیمو اړیکو پیاوړتیا او د دواړو هېوادونو د خصوصي سکټورونو ترمنځ د تعامل زیاتوالي لپاره خپل چمتووالی څرګند کړ.

د ناستې په وروستۍ برخه کې ښاغلي فیض احمد خوافي د افغانستان او ترکیې د سوداګرو او پانګوالو ترمنځ د مستقیمو اړیکو پر زیاتوالي او د دواړو هېوادونو د خصوصي سکټورونو ترمنځ د ګډو همکاریو او پانګونو لپاره د زمینه‌سازۍ پر اړتیا ټینګار وکړ. نوموړي د سوداګرو تګ راتګ زیاتوالی او د سوداګریزو پلاوو تبادله د اقتصادي اړیکو د پراختیا له اغېزناکو لاملونو وبلل.

دغه لیدنه په دوستانه فضا او د استانبول د سوداګرۍ خونې د مشرتابه پلاوي په تود هرکلي سره ترسره شوه. دواړو لورو د اړیکو پر دوام، د همکاریو د هوکړه‌لیک موضوع پر تعقیب، د سوداګرو د تګ راتګ پر زیاتوالي، په نندارتونونو کې پر ګډون او د افغانستان او ترکیې ترمنځ د اقتصادي او پانګونې همکاریو پر پراختیا ټینګار وکړ.