د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند په داسی حال کې چې د مدیره پلاوي غړو هر یو ښاغلي خان جان الکوزي او ضیاءالدین اچکزي هم حضور درلود د افغانستان درملو اتحادیې له رئیس ښاغلي اسدالله کاکړ او د درملو یو شمیر واردوونکو سوداګرو سره لیدنه ترسره، او د درملو لپاره د عامې روغتیا کړنلارې په اړه يې خبرې اترې وکړې.

ښاغلي کاکړ د عامې روغتیا وزارت لخوا په جوړه شوې کړنلاره کې د لازمو آسانتیاوو رامنځته کولو په موخه، د درملو اتحادیې سوداګرو وړاندیزونه او طرحې د اتاق مشرتابه پلاوي ته قرائت او په دی برخه کې يې د هر اړخیزې همکارۍ غوښتنه وکړه.

ښاغلي مهمند د درملو اتحاديې مسؤلینو ته د ښه راغلاست او درملیزو خدماتو معیاري کولو برخه کې د دوی هڅو ستایلو ترڅنګ، ژمنه وکړه چې د دوی ستونزې او وړاندیزونه به د اړوندو حکومتي چارواکو سره شریکې او د حل په برخه کې به يې خپلې هیڅ ډول مرستې ونه سپموي.

سه شنبه، غبرګولي ۹مه، ۱۴۰۲

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند په داسی حال کې چې، د مدیره پلاوي غړي ښاغلي خان جان الکوزي يې ملتیا کوله د افغانستان د درملیزو خدمتونو اتحاديې رئیس ښاغلي اسدالله کاکړ سره لیدنه ترسره او د درملیزو خدمتونو قوانینو او کړنلارو کې د تعدیل او د روغتیا سکتور مالیاتو تاديې په اړه یې خبرې اترې وکړې.

د اتاق مدیره پلاوي لومړي مرستيال په خوست ولايت کې د سرطان د درملنې د روغتون د جوړولو د پيل يادونې په ترڅ کې، د افغانستان د روغتيايي سکتور له ټولو غړو او د هېواد له سوداګرو وغوښتل چې په دې برخه کې ونډه واخلي.

ښاغلي مهمند د هېواد د خصوصي سکټور د مالیې د سیستم او د مالیاتو د ورکړې په اړه خبرې وکړې او وې ویل "موږ هڅه کوو چې څنګه وکولای شو د مالیې په سیستم کې د یوې واحدې مالیې د ورکړې پر بنسټ لازمې اسانتیاوې رامنځته کړو."

ښاغلي مهمند د کابل – ارومچي د الوتنو د بیا پیل اعلان په هېواد کې د سوداګرۍ او پانګونې د بهیر د ښه والي لپاره یو مثبت ګام وباله.

نوموړي د درملیزو خدمتونو له اتحادیې څخه وغوښتل چې د درملو واردولو برخه کې د درملو کیفیت ته جدي پاملرنه وکړي او د هېواد د بې وزله خلکو سره د درملنې په برخه کې د مرستې کولو له لارې، خپل ایماني مسؤلیت ادا کړي.

سربیره پردی، ښاغلي مهمند په سیمه ایزه او نړیواله کچه د سوداګرۍ رامنځته کول او وده ورکول، د خلکو لخوا د ملاتړي صنعت لرل او د په خپلو پښو ولاړ حکومت لرل د خصوصي سکتور لیدلوری وباله او د افغانستان د سوداګرۍ او پانګونې اتاق يې د ستونزو حل برخه کې د دولتي ادارو او خصوصي سکتور ترمنځ د وصل نقطې په توګه یاد کړ.

چهارشنبه، غبرګولي ۴مه، ۱۴۰۲

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند د اتاق عامل پلاوي د نړیوالو اړیکو ډیپارټمنټ مسؤل ښاغلي امید غفورزي په ملتیا د نړیوالې سوداګرۍ پراختیا لپاره د چین قونسلګرۍ (CCPIT) رئیس ښاغلي ژو جیو سره آنلاین ناسته ترسره او په چین کې د راتلونکې سوداګریزې ناسته کې د ګډون څرنګوالي په اړه خبرې اترې وکړې.

ښاغلي مهمند چین د افغانستان د سوداګرۍ عمده شریک وباله او د ښاغلي ژوجیو څخه یې وغوښتل چې، د چین هېواد پانګوال په افغانستان کې د پانګونې لپاره وهڅوي.
سربیره پردی، د افغانستان اوسنی وضعیت يې د پانګونې لپاره مساعد وګڼه او د کرنې میکانیزه کیدو، صنعت، ټرانزیټ او کانونو استخراج برخه کې يې د داوړ هېوادونو پانګوالو د ګډې پانګونې غوښتنه وکړه.

ښاغلي مهمند د افغانستان د سوداګرۍ او پانګونې اتاق او (CCPIT) ترمنځ د هوکړه لیک پر لاسلیک د ټینګار کولو ترڅنګ، او په چین کې جوړیدونکې ناستې کې د افغان سوداګریز پلاوي چې د افغانستان د سوداګرۍ او پانګونې اتاق به يې مشري کوي د ګډون ډاډ ورکړ.

د (CCPIT) رئیس په چین کې د جوړیدونکې سوداګریزې ناستې په اړه مفصل معلومات وړاندی او په یاده ناسته کې يې د افغان پلاوي د ګډون غوښتنه وکړه.
نوموړي ژمنه وکړه چې افغان سوداګر د سوداګریز پیوستون کنفرانسونو له لارې د چینايي سیالانو سره وصل او د سوداګرۍ او پانګونې بهیر ګړندی کړي.

پنجشنبه، غبرګولي ۴مه، ۱۴۰۲

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند په هغه خبري کنفرانس او مراسمو کې چې، د کابل – ارومچي الوتنو بیا پیل په پار جوړ شوی وه د ګډون کولو ترڅنګ، د ټرانسپورټ او هوايي چلند مشرتابه او د آریان افغان هوايي شرکت بی سارې هلې ځلې وستایلې او د خصوصي سکتور صادراتي توکو انتقال برخه کې يې د هوايي ډګر مسؤلینو هر اړخیزو خدماتو او ښه مدیریت مننه وکړه.

ښاغلي مهمند د آریانا افغان هوايي شرکت د ملي شرکت په توګه یاد کړ او په تېرو دوو کلونو کې یې د بېلابېلو محدودیتونو سره سره د دغه شرکت د ۲۴ ساعته خدمتونو د وړاندې کولو له امله مننه او قدرداني وکړه او ټینګار يې وکړ چې د هېواد صادراتي توکو انتقال لپاره له یاد شرکت څخه ګټه پورته کړی شي.

د اتاق مدیره پلاوي لومړي مرستيال د چين د سفارت له خوا افغان سوداګرو ته د ويزې د ورکړې په برخه کې د اسانتياوو د رامنځته کولو او د مثبتو بدلونونو د هرکلي په ترڅ کې د دواړو هېوادونو ترمنځ د صادراتو او وارداتو د بهير د چټکتيا په اړه خبرې وکړې او د چین له سفارت يې وغوښتل چې د افغان سوداګرو ته د ویزو صدور پروسه چټکه کړي څو چین ته د نورو صادراتي توکو ترڅنګ د شکرپارې، ریحان او تخم آب ګردان صادرات هم زیات هم شي.

ښاغلي مهمند د چین سفارت له مسؤلینو وغوښتل چې د افغانستان د سوداګرۍ او پانګونې اتاق او د چین د سوداګرۍ او پانګونې اتاق ترمنځ هوکړه لیک لاسلیک شي تر څو د سوداګریزو اړیکو د ښه والي لپاره زمینه برابره شي.
نوموړي د هېواد سوداګرو ته د اړوندو خدمتونو د وړاندې کولو په برخه کې د بهرنیو چارو وزارت د مشرتابه او نورو اړوندو بنسټونو د هڅو ستاینه کوله او د نړیوالې ټولنې له خوا د افغانانو د کنګل شویو پیسو د خلاصون غوښتنه يې وکړه او د لویو پروژو په تطبیق کې یې د هیوادوالو په ګډو هڅو ټینګار وکړ.

د چین سوداګریزې آتشې افغان سوداګرو ته د ویزو ورکولو په برخه کې د لا زیاتو اسانتیاوو د رامنځته کولو په برخه کې د همکارۍ ډاډ ورکړ او د دواړو هېوادونو ترمنځ یې د سوداګریزو اړیکو په غښتلتیا او پراختیا ټینګار وکړ.

چهارشنبه، غبرګولي ۳مه، ۱۴۰۲

د افغانستان د سوداګرۍ او پانګونې اتاق مدیره پلاوي لومړي مرستیال ښاغلي محمد یونس مهمند په داسی حال کې چې، د اتاق مدیره پلاوي د دارلانشاء رئیس ښاغلي خان محمد سرفراز باز، د اتاق مدیره پلاوي نړیوالو اړیکو رئیس ښاغلي انجنیر سید جاوید برهان، د مدیره پلاوي غړو هر یو ښاغلي خان جان الکوزي، احمد فواد دوست، احمد ضیاء عظیمي شینوزاده او ضیاءالدین اچکزي، د اتاق عامل پلاوي سرپرست رئیس ښاغلي میرویس هوتک هم حضور درلود، د افغانستان لپاره د اندونیزیا بشردوستانه مرستو ماموریت مسؤل او سلاکار وزیر ښاغلي بودي رحمت سوریا سپوترا سره لیدنه ترسره او د دواړو هېوادونو ترمنځ د سوداګرۍ پراختیا په اړه يې خبرې اترې وکړې.
 
دغه غونډه چې د کابل په شهرنو کې د مدیره پلاوي په دفتر کې جوړه شوې وه، ښاغلي مهمند ښاغلي سوریا او د هغه ټیم ته د ښه راغلاست په ترڅ کې د هېواد امنیت، د اداري فساد نه شتون او د کوکنارو د کښت نه شتون په افغانستان کې د پانګونې لپاره ښه فرصت وباله او له ښاغلي سوریا څخه یې وغوښتل چې د اندونیزیا لوی سوداګر وهڅوي چې په افغانستان کې د کرنې میکانیزه کیدو، کانونو استخراج، صنعتي ودې او په لویو زیربنایي پروژو کې پانګونه وکړي.

د مدیره پلاوي لومړي مرستيال د ويزو د ورکړې د اسانتياوو رامنځته کول، په هېواد کې د معياري پوهنتونونو جوړول، اندونيزيا ته د افغاني سوداګریزو توکو د صادراتو لپاره د اسانتياوو رامنځته کول، د افغانستان او اندونيزيا ترمنځ د هوايي کارګو رامنځته کول د سوداګرو د پيسو لېږد او يو شمیر نور اړوند مسایل يې بسټیزې اړتیاوې وبللې او په دی برخه کې یې د افغانستان لپاره د اندونیزیا بشردوستانه مرستو ماموریت مسؤل د هر اړخیزې همکارۍ غوښتنه وکړه.  

ښاغلي مهمند د امام ابوحنيفه (رح) د لومړي نندارتون په اړه چې د اتاق لخوا جوړ شوى و، معلوماتو ورکولو ترڅنګ، زیاته کړه "د افغانستان د سوداګرۍ او پانګونې اتاق په پلان کې لري چې د روان لمریز کال د چنګاښ د میاشتې په ۱۵ نېټه د امام ابوحنیفه (رح) دویم نړیوال نندارتون د ۷ ورځو لپاره جوړ کړي او په خورا درناوي په دغه ستر نندارتون کې د ګډون لپاره د اندونيزيا د سوداګرو او پانګوالو د هڅولو په برخه کې د ښاغلي سيپوترا د همکارۍ غوښتنه وکړه."


په دې کتنه کې د اتاق د مشرتابه پلاوي نورو غړو هم د افغانستان او اندونیزیا ترمنځ د اوږدمهاله اړیکو او سوداګرۍ په اړه خبرې وکړې او له اندونیزیا او نورو هېوادونو سره یې د دوه اړخیزو او څو اړخیزو نندارتونونو او کنفرانسونو په څېر د ګډو سوداګریزو پروګرامونو د پیلولو غوښتنه وکړه.

ښاغلي سپوترا د اتاق د مشرتابه پلاوي څخه ددې غونډې د جوړولو په پار مننه وکړه او د سوداګریزو او اقتصادي اړیکو پراختیا برخه کې يې د خپل هېواد لیوالتیا څرکندولو ترڅنګ، په افغانستان کې د پانګونې، نندارتونونو کې د ګډون او د سوداګرو لپاره د ویزو صدور برخه کې يې د اندونیزیايې شرکتونو د هڅونې ډاډ ورکړ.  

په دې لیدنه کې دواړو لورو د دواړو هېوادونو ترمنځ د سوداګرۍ پر پراختيا، د دوامدارو اړيکو پر ټينګښت او د ګډو اقتصادي پروګرامونو پر پيلولو ټينګار وکړ.

پنجشنبه، غبرګولي ۴مه، ۱۴۰۲