د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د اتاق مالي رئیس ښاغلي شیرین آغا سخي، د اتاق مدیره پلاوي غړي ښاغلي خان جان الکوزي، د اتاق عامل پلاوي سرپرست رئیس ښاغلي میرویس هوتک، د کابل سوداګرۍ اتاق لومړي مرستیال ښاغلي احمد شاه حکیمي او د ننګرهار ولایتي اتاق رئیس ښاغلي ګل مراد عرب د ملګرو ملتونو سرمنشي د ځانګړي استازي له مرستیال ښاغلي مارکس پوتزل سره لیدنه ترسره او د پاکستان سره د افغان خصوصي سکتور سوداګریزو او ټرانزیټي ستونزو په اړه يې خبرې اترې وکړې.
 
په دغه کتنه کې چې د یوناما په مرکزي دفتر کې ترسره شوه، د اتاق مشرتابه پلاوي غړو له پاکستان سره د افغانستان د خصوصي سکتور د سوداګریزو او ترانزیتي ستونزو په اړه چې د کراچۍ په بندر کې د افغان سوداګرو د سوداګریزو توکو د کانټینرونو د بندیدو لامل شوې، خبرې وکړې.
دغه راز دوی زیاته کړه چې، د ډيورنډ کرښې هغې غاړې ته په سوداګريزو توکو بار وسایط بند پاتی دي چې له امله افغان سوداګرو ته ډېر مالي زيانونه اوښتي دي.

همدا راز د اتاق مشرتابه پلاوي د هېواد خصوصي سکتور د ټولنې په خدمت کې د یو بې پرې بنسټ په توګه یاد کړ چې تل یې هڅه کړې ده چې په ډېرو سختو شرایطو کې د هېواد د خلکو خوراکي او نورې اړتیاوې پوره کړي او له ګاونډیو هېوادونو سره د ښو سوداګریزو اړیکو په لرلو يې ټینګار وکړ. د دوی په وینا له بده مرغه د پاکستان حکومت په پرله پسې ډول د افغانستان د سوداګرۍ او ټرانزیټ په لاره کې د (اپټا) تړون او ښه ګاونډیتوب پر وړاندې ستونزې جوړې کړې دي. د اتاق د مشرتابه پلاوي غړو په افغانستان کې د ملګرو ملتونو د سرمنشي د ځانګړي استازي له مرستیال څخه وغوښتل چې په هېواد کې د خصوصي سکتور د ستونزو د هواري په برخه کې لازمه همکاري وکړي.

ښاغلي مارکس پوتزل د اتاق د مشرتابه پلاوي او د هېواد د سوداګرو د ستونزو له اورېدو وروسته ژمنه وکړه چې د افغانستان د خصوصي سکتور ستونزې يې نوټ کړې او خپلو اړوندو مشرانو ته به يې ورسوي څو د حل برخه کي يې کوټلي ګامونه پورته کړی شو.   
نوموړي د اتاق له مشرتابه سره په راتلونکو ناستو کې د هېواد له خصوصي سکتور څخه د ملاتړ او د هغوی د ستونزو د حل ډاډ ورکړ.

پنجشنبه، سلواغې ۵مه، ۱۴۰۲

د افغانستان د سوداګرۍ او پانګونې اتاق عمومي رئیس ښاغلي توکل احمدیار مکه مکرمه کې د حلال کنفرانس په څنډه کې، په داسی حال کې چې د اتاق مدیره پلاوي غړو هر یو جان آقا صادقي او ضیاءالدین اچکزي، د اتاق عامل پلاوي سوداګریزو شخړو حل مرکز رئیس ښاغلي توکل خرم او د نړیوالو اړیکو ډیپارټمنټ مسؤل ښاغلي امید غفورزي يې ملتیا کوله د مالیزیا پیراک ایالت رئیس الوزراء ښاغلي داتو سري شعراني بن محمد سره لیدنه ترسره او د سوداګرۍ پراختیا او ګډو پانګونو په اړه يې خبرې اترې وکړې.

ښاغلي احمدیار د افغانستان د سوداګرۍ او پانګونې اتاق د فعالیتونو او په هېواد کې د شته سوداګرۍ او پانګونې د فرصتونو په اړه معلومات ورکړل او زیاته یې کړه چې افغانستان له مالیزیا سره ښې سوداګریزې اړیکې لري او هر کال له دغه هېواد څخه په زیاته اندازه تېل او ټایرونه واردوي؛ مګر په افغانستان کې د مالیزیا سفارت د عملي فعالیتونو د نشتوالي له امله افغان سوداګر د ویزو په ترلاسه کولو کې له ګڼو ستونزو سره مخ دي او که چیرې دغه هیواد همکاري وکړي او د ویزو د ورکړې اسانتیاوې رامنځته کړي، د افغانستان او اندونیزیا ترمنځ د سوداګرۍ کچه به د پام وړ لوړه شي.

ښاغلي بن محمد له افغانستان سره د سوداګرۍ او پانګونې په برخه کې د مالیزیا لېوالتیا څرګنده کړه او ژمنه یې وکړه چې افغان سوداګرو ته د ویزو د ورکړې ستونزې به تعقیب او په دې برخه کې به هر ډول لازمه همکاري وکړي.

چهارشنبه، سلواغې ۴مه، ۱۴۰۲

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د اتاق سوداګریزو چارو مرستیال ښاغلي خیرالدین مایل احمدي، د اتاق مدیره پلاوي غړو هر یو ښاغلي خان جان الکوزي او احمد شکیب احمدیار، د اتاق عامل پلاوي سرپرست رئیس ښاغلي میرویس هوتک، د کابل سوداګرۍ اتاق لومړي مرستیال ښاغلي احمد شاه حکیمي، د عامل پلاوي پالیسۍ او تخنیکي مرستیال ښاغلي محمد انور عارفي او د قرغیزستان هېواد سوداګرو او پانګوالو د سوداګریزو اړیکو پراختیا او د پانګونې شته فرصتونو پیژندلو په موخه د سوداګریز پیوستون ناسته ترسره کړه.

ښاغلي مهمند د قرغیزستان سوداګریز پلاوي ته ښه راغلاست ووایه او دغه هېواد یې د یو دوست، ورور او ګډو دیني او کلتوري ارزښتونو درلودونکی یاد کړ.

ښاغلي مهمند د سوداګریزو اړیکو پر ښه والي، ټرانزیټ او د ګډو پانګونو پر رامنځته کولو ټینګار وکړ او له قرغزستاني سوداګرو یې وغوښتل چې د شته فرصتونو له مخې په افغانستان کې پانګونه وکړي.

ښاغلي مایل احمدي د دواړو هېوادونو ترمنځ د سوداګریزو اړیکو پراختیا ارزښتناکه وګڼله او د دغه هېواد د خصوصي سکتور له غړو یې وغوښتل، چې د دواړو هېوادونو ترمنځ د سوداګرۍ د توازن په زیاتولو کې لا زیاتې هڅې وکړي.

ښاغلي خان جان الکوزي د افغانستان د بېلابېلو سکتورونو د معرفي کولو په ترڅ کې له قرغیزستاني سوداګرو وغوښتل چې د پانګونې او سوداګرۍ د فرصتونو په پېژندلو کې له یو بل سره لا زیاتې ناستې ولري.

ښاغلي هوتک د اتاق د فعالیتونو په ځانګړي ډول د امام ابوحنیفه (رح) د ملي او نړیوالو نندارتونونو په ګډون د ملي او نړیوالو نندارتونونو د تنظیم په اړه معلومات ورکړل او د قرغیزستان سوداګر یې وهڅول چې په دریم نندارتون کې ګډون وکړي.
نوموړي د دواړو هېوادونو ترمنځ د ګډو نندارتونونو پر جوړېدو ټينګار وکړ او د توليداتو د معرفي کولو او د دواړو هېوادونو ترمنځ د سوداګريزو اړيکو د پراختيا لپاره يې مهم وبلل.

په دې لیدنه کې، د دواړو لورو سوداګرو او پانګوالو د دواړو لورو د علاقې وړ موضوعاتو په اړه متمرکزې او اړوندې خبرې وکړې او ژمنه یې وکړه، چې په راتلونکې کې به هم ګډې ناستې ترسره کړي.

پنجشنبه، سلواغې ۵مه، ۱۴۰۲

د افغانستان د سوداګرۍ او پانګونې اتاق عمومي رئیس ښاغلي توکل احمدیار مکې مکرمې ته د خپل کاري سفر په ترڅ کې په داسی حال کې چې د اتاق مدیره پلاوي غړو هر یو جان آقا صادقي او ضیاءالدین اچکزي، د اتاق عامل پلاوي سوداګریزو شخړو حل مرکز رئیس ښاغلي توکل خرم او د نړیوالو اړیکو ډیپارټمنټ مسؤل ښاغلي امید غفورزي يې ملتیا کوله د مکې ښار نړیوال نندارتون څخه لیدنه ترسره کړه.
ښاغلي احمدیار همدارنګه، د آذربایجان اتاق له رئیسې آغلې نتاو ممادو، د مالیزیا حلال ادارې عامل رئیس ښاغلي هیرول اریفین ساحري او دي جي بوتي اتاق رئیس ښاغلي یوسف موسی سره جلا لیدنو په ترڅ کې، د سوداګرۍ پراختیا، پانګونو جلب او سوداګریزو پلاوو تبادلې په اړه خبرې اترې وکړې.

ښاغلي احمدیار د آذربایجان د سوداګرۍ اتاق له رئیسې سره په کتنه کې د دواړو هېوادونو تر منځ د سوداګرۍ او پانګونې پر شته فرصتونو او د سوداګریزو پلاويو د تبادلې په اړه خبرې وکړې او اذربایجان یې د افغاني محصولاتو لکه قیمتي او نیمه قیمتي ډبرو او غالیو لپاره  د ښه بازار په توګه یاد کړ.

آغلې نتاو ممادو د افغانستان او آذربایجان ترمنځ د ښو سوداګریزو فرصتونو په ځانګړې توګه د صادراتو او وارداتو په اړه خبرې وکړې او د دغه هېواد بازارونه یې د حلالو محصولاتو د واردولو لپاره مناسب وګڼل. نوموړې د دواړو هېوادونو ترمنځ د سوداګریزو پلاويو د تبادلې هرکلی وکړ او په دې برخه کې یې د همکارۍ ژمنه وکړه.

سربیره پردی، ښاغلي احمدیار د حلال ادارې له عامل رئیس سره د کتنې په ترڅ کې، په هېواد کې د افغاني محصولاتو لپاره د حلال سرټیفیکیټ عدم صدور په اړه خبرې وکړې او له ښاغلي ساحري څخه وغوښتل چې په هېواد کې د محصولاتو لپاره د حلال سرټیفیکیټ صادرولو، د ظرفیت لوړونې او په معیار برابرولو برخه کې یې ورسره همکاري وکړي.

ښاغلي ساحري د نړۍ په بېلابېلو بازارونو کې د حلال محصولاتو د زیاتېدونکي لېوالتیا په اړه د معلوماتو ورکولو پر مهال په افغانستان کې د حلال محصولاتو د تولید لپاره د ظرفیت لوړونې په برخه کې د همکارۍ ژمنه وکړه او په دې برخه کې یې د افغانستان سوداګریز پلاوي ته بلنه ورکړه چې اندونیزیا ته سفر وکړي څو د همکارۍ په جزیاتو سره د نظر تبادله وکړي.

همدا راز، ښاغلي احمدیار له ښاغلي یوسف موسی سره په کتنه کې د افغانستان د سوداګرۍ او پانګونې اتاق د فعالیتونو او په هېواد کې د شته سوداګرۍ او پانګونې د فرصتونو په اړه معلومات وړاندې کړل او دواړو لورو د سوداګریزو اړیکو پر پراختیا او ګډو همکاریو زیاتوالي په زیاتوالي ټینګار وکړ.

چهارشنبه، سلواغې ۴مه، ۱۴۰۲

د افغانستان د سوداګرۍ او پانګونې اتاق سوداګریزو چارو مرستیال ښاغلي خیرالدین مایل احمدي، د مدیره پلاوي مالي رئیس ښاغلي شیرین آغا سخي، د مدیره پلاوي غړي ښاغلي خان جان الکوزي، د عامل پلاوي سرپرست رئیس ښاغلي میرویس هوتک، د عامل پلاوي پالیسۍ او تخنیکي مرستیال ښاغلي محمد انور عارفي، د افغانستان اسلامي امارت سوداګرۍ او صنعت وزارت سرپرست، سوداګرو او پانګوالو په کابل سرینا هوټل کې د قرغیزستان سوداګرۍ او اقتصاد وزیر ښاغلي امان ګلدیف دانیار سره لیدنه او د دواړو هېوادنو ترمنځ د سوداګریزو او اقتصادي اړیکو په اړه يې خبرې اترې وکړې.

د سوداګرۍ او صنعت وزارت سرپرست قرغزستان د ګډو ارزښتونو له پلوه د دوست هېواد په توګه یاد کړ او د دواړو هېوادونو ترمنځ یې د سوداګرۍ د توازن پر زیاتوالي او د ټرانزیټ پر پیاوړتیا ټینګار وکړ. هغه د قرغیزستان د سوداګرو او پانګوالو له پلاوي وغوښتل چې د دواړو هېوادونو ترمنځ د سوداګرۍ د وضعیت د ښه والي په موخه په راتلونکو نندارتونونو کې چې په افغانستان کې جوړیږي، فعاله ونډه واخلي.

ښاغلي مایل احمدي د قرغیزستان هېواد د سوداګرۍ او اقتصاد وزیر او ورسره پلاوي ته ښه راغلاست ووایه او د سوداګریزو اړیکو د ښه والي او د ګډې پانګونې د رامنځته کولو په برخه کې یې د افغانستان د خصوصي سکتور د چمتووالي ډاډ ورکولو ترڅنګ، د سوداګریز پیوستون ناستو په ترسره کولو يې ټینګار وکړ.

ښاغلي خان جان الکوزي په بېلابېلو برخو کې د سوداګرۍ د فرصتونو د بیانولو په ترڅ کې د افغانستان او قرغیزستان د سوداګرۍ او پانګونې اتاقونو ترمنځ د اړیکو پر ټینګښت او دغه راز د دوه اړخیزو همکاریو د تفاهم لیک پر لاسلیکولو ټینګار وکړ.

پنجشنبه، سلواغې ۴مه، ۱۴۰۲