د افغانستان د سوداګرۍ او پانګونې اتاق مشرتابه پلاوي، ښاغلی توکل احمدیار د اتاق عمومي رئیس، ښاغلی محمد یونس مهمند د اتاق لومړی مرستیال، ښاغلی خان جان الکوزی د افغان-پاک اتاق رئیس او د اتاق د مشرتابه پلاوي غړی، ښاغلی بهادر خیرخواه او ښاغلی داوود یوسفزی د اتاق د مشرتابه پلاوي غړي، د ښاغلیو: احمد شاه حکیمي د کابل د سوداګرۍ او پانګونې اتاق لومړی مرستیال، میرزمان پوپل د اتاق د عامل پلاوي د مالي او اداري مرستیال سرپرست، میراجان سلیمان خېل د افغانستان-ایران اتاق رئیس، سید کریم آغا د نفتو ټولنې رئیس او یو شمېر د نفتو واردونکو په شتون کې د مالیې وزارت د عوایدو او ګمرکونو له معین ښاغلي عبدالمتین سعید او د مالیې وزارت د نورم او ستندرد له رئیس ښاغلي قاري ابراهیم سره آنلاین ناسته ترسره کړه.

ښاغلي پوپل، د دې ناستې اساسي موخه د مالیې وزارت د ګمرکونو له لوري په بندرونو کې د درول شویو واګونونو لپاره د مناسب حل لارو موندل وبلل او له ټولو ګډونوالو یې وغوښتل چې نوبت سره سم خپلې ستونزې د مالیې وزارت د عوایدو او ګمرکونو له معین سره شریکې کړي.

ښاغلي احمدیار، د نفتو واردونکو له ستونزو یادونه وکړه او ټینګار یې وکړ چې د ورته ستونزو دایمي حل ته باید مناسبه لاره وموندل شي. نوموړي، د نورم او ستندرد ریاست له لوري د واګونونو بیا چک کول او د افغاني شرکتونو تړونونه له بهرنیو تولیدي شرکتونو سره بیا ارزونه د تیلو د شفافیت او د بې‌کیفیته تیلو د پېژندنې لپاره مهم وباله. هغه ډاډ ورکړ چې د سوداګرۍ او پانګونې اتاق به د بې‌کیفیته تیلو د وارداتو د مخنیوي په برخه کې هر اړخیزه همکاري وکړي.

ښاغلي مهمند، د نفتو واردونکو سوداګرو رول د هېواد د اقتصادي ثبات لپاره مهم وباله او ټینګار یې وکړ چې د بې‌کیفیته تیلو واردات د هوا د ککړتیا، د سون توکو د زیات مصرف، د کورنیو تولیداتو د کمښت او د ماشینونو د تخریب لامل کېږي. هغه ډاډ ورکړ چې د افغانستان د سوداګرۍ او پانګونې اتاق به د بې‌کیفیته تیلو د وارداتو د مخنیوي په برخه کې هر اړخیز ملاتړ وکړي او د مالیې وزارت د ګمرکونو معینیت څخه یې وغوښتل چې د وارداتي تیلو د ستندرد په برخه کې جدي پاملرنه وکړي.

ښاغلي سید کریم آغا د نفتو ټولنې رئیس او یو شمېر د نفتو واردونکو سوداګرو، د خپلو واګونونو د بندېدو ستونزې مطرح کړې او د مالیې وزارت د عوایدو او ګمرکونو له معین څخه یې وغوښتل چې د لابراتوارونو د معیاري کولو، د نورم او ستندرد ریاست له لوري د پالیسیو د بدلونونو په اړه سوداګرو ته د ژر خبر ورکولو او د نفتو د پانګوالو او کمیشنکارانو د مشخص کولو په برخه کې جدي توجه وکړي، ترڅو د قاچاق او د بې‌کیفیته تیلو د وارداتو مخه ونیول شي.

ښاغلي سعید، د نفتو واردونکو سوداګرو ستونزې واورېدلې او ټینګار یې وکړ چې د وارداتي تیلو د لابراتواري ازموینو پروسه به بیا ترسره کېږي. نوموړي له ټولو ګډونوالو وغوښتل چې خپل وړاندیزونه د دغو ستونزو دایمي حل لپاره د مالیې وزارت د عوایدو او ګمرکونو له معینیت سره شریک کړي.

ښاغلي سعید، په ګمرکونو کې د فساد د له‌ منځه وړلو لپاره د خپلې مبارزې یادونه وکړه او د مالیې وزارت د نورم او ستندرد ریاست رئیس ته یې لارښوونه وکړه چې په بندرونو کې د بندو واګونونو د خلاصون په برخه کې له سوداګرو سره همکاري وکړي. هغه، له ټولو نفتو واردونکو وغوښتل چې له دې وروسته خپل قراردادونه د افغانستان د نورم او ستندرد ریاست د پالیسۍ مطابق امضا کړي.

ښاغلي الکوزي، د یوې تخنیکي ناستې د جوړېدو وړاندیز وکړ چې په هغې کې د نورم او ستندرد ریاست ټوله پالیسي او د نفتو واردونکو سوداګرو موجوده ستونزې وڅېړل شي.

 

 

 

 

 

د افغانستان او ازبیکستان د خصوصي سکتور ترمنځ د سوداګریز پيوستون ناسته د افغانستان د سوداګرۍ او پانګونې اتاق د مشرتابه پلاوي د غړو ښاغلیو: محمد یونس مهمند، د اتاق لومړی مرستيال؛ خیرالدین مایل احمدي، د اتاق سوداګریز مرستیال؛ شیرین آغا سخي، د مالي چارو رئیس؛ خان جان الکوزی، د افغان - پاک ګډ اتاق رئیس او د اتاق د مشرتابه پلاوي غړی؛ محمد داوود یوسفزی او ذکریا بریالي، د مشرتابه پلاوي غړي؛ د صنعت او سوداګرۍ وزارت معین ښاغلي احمدالله زاهد؛ په افغانستان کې د ازبیکستان سفیر محترم آی بیک عثمانوف؛ د ازبیکستان د سوداګریز پلاوي رئیس ښاغلي عزیزبیک؛ د زراعت، صنعت او کانونو د اتاقونو رئیسانو، د افغانستان د بېلابېلو اتحادیو رئیسانو، او د دواړو هېوادونو سوداګرو او پانګوالو په ګډون، په کابل ستار هوټل کې ترسره شوه.

ښاغلي محمد یونس مهمند، د ازبیکستان سوداګریز پلاوي او د ناستې ګډونوالو ته د ښه راغلاست ویلو ترڅنګ، د دواړو هېوادونو ترمنځ د ښو سوداګریزو - اقتصادي اړیکو یادونه وکړه او زیاته یې کړه: که د افغانستان او ازبیکستان ترمنځ د ترانزیټ او سوداګرۍ همکاري لا پراخه شي، نو افغانستان کولی شي د مرکزي آسیا او جنوبي آسیا د اتصال د پُل په توګه عمل وکړي او په سیمه‌ییزو سوداګریزو، ترانزیټي او تجارتي فعالیتونو کې مهم رول ولوبوي.

ښاغلي مهمند، په ټول هېواد کې د امنیت ټینګښت، د اداري فساد له منځه تلل، او د کوکنارو د کرلو درول، د بهرنیو پانګوالو لپاره ښه فرصت وباله. نوموړي، د افغانستان د اقتصاد‌ محور سیاست ته اشاره وکړه او په بېلابېلو برخو کې د ګډو پانګونو پر اهمیت یې ټینګار وکړ. هغه، ازبیکستان ته د افغانستان د ۶۰ میلیونه ډالرو صادراتو او له هغه هېواده د ۷۰۰ میلیونه ډالرو وارداتو ارقام ذکر کړل او د دواړو هېوادونو ترمنځ یې سوداګریز بیلانس نابرابر وباله. ښاغلي مهمند، هیله وښوده چې د افغانستان د صادراتي محصولاتو لپاره د ترجیحي تعرفو وضع او د افغانستان د ترانزیټ پیاوړتیا سره به د افغانستان په صادراتو کې ښه زیاتوالی راشي.

ښاغلي خیرالدین مایل احمدي، اوسنی سوداګریز وضعیت د قناعت وړ وباله او د ازبیکستان له سوداګرو او پانګوالو څخه یې وغوښتل چې په افغانستان کې په بېلابېلو اقتصادي سکتورونو کې ګډې پانګونې وکړي. نوموړي څرګنده کړه چې په افغانستان کې د اقتصادي همکاریو لپاره ډېر سوداګریز فرصتونه مساعد دي.

ښاغلي احمدالله زاهد، د شته سوداګریزو – اقتصادي فرصتونو او د افغانستان او ازبیکستان ترمنځ د ښو اړیکو په اړه خبرې وکړې او د ازبیکستان سوداګر او پانګوال یې وهڅول چې د افغانستان له شته فرصتونو څخه ګټه واخلي او هلته پانګونه وکړي.

ښاغلي عثمانوف، دغه ناسته د اقتصادي اړیکو د پراخولو لپاره غوره فرصت وباله او د افغانستان د صنعت او سوداګرۍ وزارت او د افغانستان د سوداګرۍ او پانګونې اتاق له هڅو څخه یې قدرداني وکړه. نوموړي د افغانستان او ازبیکستان خلک دوه وروڼه ملتونه یاد کړل چې ګډ میراث لري، او د اوږدمهاله سوداګریزو همکاریو پر اهمیت یې ټینګار وکړ.

په سوداګریزه ناسته کې، چې د افغانستان او ازبیکستان ترمنځ ترسره شوه، د دواړو هېوادونو د سوداګرو ترمنځ د ۴.۵ میلیونه امریکايي ډالرو په ارزښت هوکړه ‌لیکونه لاسلیک شول، چې له مخې به یې د افغانستان او ازبیکستان ترمنځ سوداګریزې اړیکې پراخې شي او د پانګونې او سوداګریزو تبادلو لپاره به نوي فرصتونه برابر شي.

 

 

 

 

د زراعتي او صنعتي ماشین آلاتو کمیټې، د هېواد د زراعت ودې او د دې سکتور د ستونزو د حل په موخه، غونډه جوړه کړه چې پکې ښاغلیو: محمد یونس مهمند، د افغانستان د سوداګرۍ او پانګونې اتاق لومړی مرستیال، خان جان الکوزی، د افغان-پاک ګډ اتاق رئیس او د اتاق د مشرتابه پلاوي غړی، محمد داوود یوسفزی، د اتاق مشرتابه پلاوي غړی، میرزمان پوپل، د اتاق عامل پلاوي د مالي او اداري مرستیال سرپرست، سردار ولي پښتون، د اتاق ارشد سلاکار، عبدالسلام کوهی، د اتاق حقوقي سلاکار او د یادی کمیټې ګڼ شمېر غړو ګډون درلود چې د یادې غونډې په پایله کې، د کمیټې نوی رئیس او مرستیالان وټاکل شول.

ښاغلي پوپل، د زراعتي او صنعتي ماشین آلاتو کمیټې د مشرتابه غړو ته د ښه راغلاست ویلو ترڅنګ، د اتاق سره د بېلابېلو کمیټو د غړیتوب په اړه معلومات ورکړل. هغه له دوی وغوښتل چې له دې وروسته د ماشین آلاتو سکتور ټولې ستونزې د دې کمټې له لارې له اتاق سره شریکې کړي.

ښاغلي مهمند، د افغانستان د سوداګرۍ او پانګونې اتاق د خصوصي سکتور د ګټو مدافع او له حکومت سره یې د اړیکو پل وباله او له یادې کمیتې یې وغوښتل چې خپل ټول فعالیتونه د اتاق د اساسنامې له مخې ترسره کړي.

ښاغلي الکوزي، د کمیټو د دندو په اړه خبرې وکړې او له ګډونوالو یې وغوښتل چې د بې‌کیفیته توکو له وارداتو څخه مخنیوی وکړي. هغه ډاډ ورکړ چې اتاق به د یاد سکتور د ستونزو د حل لپاره هر اړخیزه همکاري وکړي.

د یادونې وړ ده چې په دې غونډه کې، ښاغلی حاجي عبدالله د زراعتي او صنعتي ماشین آلاتو کمیتې د رئیس، او ښاغلي هر یو: عبدالغفار قاسمي، قاري محمد حسن سلامزی، توریالي رحماني او حاجي داوود نیکبین د مرستیالانو په توګه وټاکل شول.

 

 

 

ښاغلي محمد یونس مهمند، د افغانستان د سوداګرۍ او پانګونې اتاق لومړي مرستیال، د ښاغلي حاجي عبدالاحد اکا، حاجي ظاهر، یوسف یوسفي او د سویلي حوزې د یو شمېر نورو سوداګرو په شتون کې، له ښاغلي عبدالمتین سعید، د مالیې وزارت د عوایدو او ګمرکاتو له معین سره لیدنه وکړه او د یادو ولایتونو د سوداګرو د ستونزو په اړه یې بحث او نظرونه تبادله کړل.

ښاغلي مهمند، د سویلي حوزې د سوداګرو اساسي ستونزې یادې کړې، چې پکې د مالیې لوړوالی، د هند هېواد د ویزې د صادرولو اسانتیاوو نشتون، د بانکي تضمینونو ترلاسه کولو محدودیت، سیمې او نړۍ ته د پیسو لېږدولو اسانتیاوو نشتون، او د مالیاتو د ارزونې په بهیر کې د اسانتیاوو نه شتون شامل دي. هغه له ښاغلي معین څخه غوښتنه وکړه چې د پورته ستونزو، په ځانګړي ډول د مالیاتو د ارزونې د اسانتیاوو د رامنځته کولو په برخه کې ځانګړې پاملرنه وکړي. نوموړي مالیه د هېواد د اقتصاد د خوځښت اصل وباله او په ګمرکاتو کې د واحد مالیاتي سیستم پر تطبیق یې ټینګار وکړ.

د سویلي حوزې سوداګرو د اتاق د لومړي مرستیال خبرې تایید کړې، خپلې ستونزې یې یادې کړې او له ښاغلي معین څخه یې د دې ستونزو د حل لپاره د ځانګړې پاملرنې غوښتنه وکړه.

ښاغلي سعید، د اتاق د لومړي مرستیال او ورسره پلاوي ته د ښه راغلاست ویلو ترڅنګ، ژمنه وکړه چې د صادرونکو سوداګرو لپاره به د قسط‌وار مالیاتو د تادیې اسانتیاوې رامنځته کړي. همداراز، نوموړي له ټولو ګډونوالو وغوښتل چې خپلې ستونزې په لیکلي بڼه معینیت ته وسپاري، ترڅو معینیت یې له حکومت سره شریکې کړي او د مناسب حل لپاره لازم اقدامات وشي.