کابل ښاروالۍ د کابل ښار ضد عفوني کولو کې د افغانستان د سوداګرۍ او پانګونې اتاق د همکارۍ غوښتنه وکړه

د افغانستان د سوداګرۍ او پانګونې اتاق عمومي رئيس ښاغلي توکل احمدیار او د مشرتابه پلاوي یو شمېر غړو د روان کال د وري میاشت پر 11مه نېټه د کابل له ښاروال او د هغه مل ټیم سره د سوداګرۍ او پانګونې اتاق کې ولیدل او له کابل ښاروالۍ سره یې د خصوصي سکتور د همکاریو په تړاو بحث وکړ.

دغه لیدنه کې چې د اتاق د مدیره پلاوي د د دارالانشا رئيس محترم خان محمد سرفراز باز، د مدیره پلاوي محترموغړو سید جاوید برهان او خانجان الکوزي او د عامل پلاوي مشر ښاغلي سید زمان هاشمي هم حضور درلود، د کابل ښاروال د سوداګرۍ او پانګونې اتاق له لوري له ښاروالۍ سره د ښو همکاریو د یادونې ترڅنګ، د نوروهمکاریو په ځانګړي ډول د کابل ښار بېلابېلو ناحېو د هغو نقاطو ضد عفوني کولو کې د همکارۍ غوښتنه وکړه چې زیان لیدونکې او له ګواښ سره مخ دي.

ښاغلي احمدیار، له کابل ښاروالۍ سره د افغانستان د سوداګرۍ او پانګونې اتاق هر ډول چمتوالی او همکاري وښوده او مشخصآ یې د کابل ښار ضد عفوني کیدو په موخه کابل ښاروالۍ ته په خدمتي ډول د احمدیار ګروپ د درې عراده اطفائیې ( اور وژنې وسایطو) اختیار کې ورکولو ژمنه وکړه.