د افغانستان د سوداګرۍ او پانګونې اتاق د اجرائیه کمیټې لومړۍ غونډه د اتاق د عمومي رئیس، الحاج سید کریم هاشمي، په مشرۍ او د ښاغلیو: آرین زلگی عظیمي، د پانګونې مرستیال، عنایت الله صدیق زی، د خدماتو مرستیال،میراجان سلیمان خیل، د پالیسي او د حکومت سره د اړیکو مرستیال،

حاجي خلیل الله خیرخواه مالی رئیس، ذبیح الله عمرخیل، د مدیره پلاوي د دارالانشا رئیس او محمد ولي امیني د اتاق د عامل پلاوي رئیس په ګډون ترسره شوه.

غونډه د دارالانشأ رئیس ښاغلي ذبیح الله عمرخیل لخوا د اجنډا د موضوعاتو په وړاندې کولو سره پیل شوه.

وروسته د اتاق د عامل پلاوي راپور د محمد ولي امیني لخوا وړاندې شو او د بحثونو وروسته د اجرائیه کمیټې او عامل پلاوي له خوا اړینې پریکړې وشوې.

 

 

ښاغلي عبدالقاسم امرخېل، د افغانستان د سوداګرۍ او پانګونې اتاق د مشرتابه غړی، د ختیځو ولایتونو د سفر پر مهال، د هېواد د وچو مېوو د صادرونکو د اتحادیې له یو شمېر غړو سره یوځای، خپلې مالي مرستې د وروستۍ زلزله ځپلو سره، په ځانګړې توګه د کونړ ولایت اغېزمنو ته ووېشلې.

یادې مرستې چې نغدي پیسې (۱.۴ میلیونه افغانۍ او ۶۰۰۰ امریکایي ډالر) او خوراکي توکي پکې شامل وو، د زاهد ولید مارکېټ او د سرای چهار مغز د سوداګرو لخوا راټولې شوې وې. دغه توکي د اتاق د مشرتابه لخوا د بسته بندۍ وروسته، د کونړ ولایت د نورګل ولسوالۍ د ودیر، غازي‌اباد، ښارک قُبا، ګربز کلي، مزار دره، او همدارنګه د ننګرهار ولایت مرکزي روغتون اړمنو کورنیو ته ووېشل شول.

 

 

 

ښاغلي الحاج سید کریم هاشمي، د افغانستان د سوداګرۍ او پانګونې اتاق عمومي رئیس، د آذربایجان د جمهوریت له سفیر ښاغلي الهام محمدوف سره د اتاق په عمومي ریاست کې وکتل او خبرې یې وکړې.

په دې ناسته کې دواړو لورو د افغانستان او آذربایجان ترمنځ د اقتصادي او سوداګریزو همکاریو د پراختیا په اړه بحث او نظرونه شریک کړل.

ښاغلي هاشمي د اتاق د فعالیتونو په اړه معلومات وړاندې کړل، آذربایجان یې د افغانستان ښه دوست او اقتصادي شریک وباله او ټینګار یې وکړ چې د افغان او آذربایجاني سوداګرو ترمنځ د ګډو ونډه لرونکو شرکتونو په جوړولو سره د نفتو د تصفیې فابریکې جوړې شي. نوموړي څرګنده کړه، دا کار کولای شي د کورنیو تولیداتو په پیاوړتیا، د صادراتو په زیاتوالي او د دواړو هېوادونو د وګړو لپاره د کار زمینه برابره کړي.

د آذربایجان سفیر، د اتاق د عمومي رئیس له تود هرکلي څخه په مننې سره، د آذربایجان د سوداګرو د تیارۍ یادونه وکړه چې غواړي په افغانستان کې د نفتو د استخراج او نورو اقتصادي سکتورونو کې پانګونه وکړي. نوموړي افغانستان د آذربایجان مهم سیمه ییز اقتصادي شریک وباله او پر ګډو پروژو یې ټینګار وکړ.

 

 

 

په پایله کې اړونده مسؤلینو د سوداګرۍ او پانګونې خونې مرستیال ته په تورخم دروازه کې د خالي موټرو د ستونزې د حل جدي وعده ورکړه.

 

 

 

ښاغلي آرین زلگی عظیمي، د افغانستان د سوداګرۍ او پانګونې اتاق د پانګونې مرستیال، د افغانستان د برېښنا د انرژۍ د سکتور د پانګونې د جلب او ملاتړ په کنفرانس کې چې د برښنا شرکت له لوري په انټرکانټیننټال هوټل کې ترسره شوی و، ګډون وکړ.

ښاغلي عظیمي د حکومت له همکارۍ څخه د خصوصي سکتور لپاره د پانګونې د اسانتیاوو په برخه کې مننه وکړه او ملي امنیت یې د پانګونو په جلب او د هېواد په اقتصادي وده کې مهم وباله. نوموړي انرژي د اقتصاد ملا تیر، د صنعت، سوداګرۍ او کرنې د ودې ستنې وبللې او د هېواد له ټولو سترو اقتصادي پروژو څخه یې د اتاق هر اړخیز ملاتړ اعلان کړ.

د اتاق د پانګونې مرستیال د کارموندنې په رامنځته کولو کې د انرژۍ رول خورا مهم وباله او افغانستان یې د اقلیمي موقعیت، د اوبو او باد د طبیعي منابعو او همدارنګه د روزل شوې کاري ځواک له پلوه د انرژۍ د تولید او پانګونې لپاره ښه فرصت وباله او ټول سوداګر یې د افغانستان د انرژۍ په سکتور کې پانګونې ته راوبلل.