د افغانستان د سوداګرۍ او پانګونې اتاق د پالیسۍ او تخنیکي چارو مرستیال ښاغلي محمد انور عارفي، له ښاغلي ظفر نورماتوف، چې د ازبیکستان د سوداګرۍ او صنایعو اتاق د افغانستان لپاره استازی دی، یوه ابتدایی آنلاین ناسته ترسره کړه. په دې ناسته کې د افغان او ازبیک سوداګرو ترمنځ د سوداګریزو اړیکو پراخولو او د ګډو نندارتونونو د تنظیمولو په اړه خبرې وشوې.

ښاغلي عارفي، ازبیکستان د افغانستان یو نېک دوست او د دیني، فرهنګي ارزښتونو شریک وبللو، او همداراز یې د ترانزیت وصل نقطه یاده کړه. هغه له ښاغلي ظفر سره د څو ورځې مخکې د هغه ناسته یادونه وکړه چې د دواړو هیوادونو د سوداګرو ترمنځ د سوداګریزو ناستو د تنظیمولو په موخه ترسره شوې وه، او له نوموړي یې وغوښتل چې د افغان سوداګرو لپاره د ازبکستان په نړیوالو نندارتونونو کې د ګډون زمینه برابره کړي.

ښاغلي عارفي، د افغانستان او ازبکستان ترمنځ د ګډ سوداګریز اتاق جوړېدل، د سوداګریزو تبادلو د زیاتوالي او د خصوصي سکتور ترمنځ د باور د فضا رامنځته کولو لپاره مهم وباله. نوموړي له د ازبکستان د سوداګرۍ او صنایعو اتاق له استازي وغوښتل چې دا تخنیکي موضوعات له خپلې مشرتابه سره شریک کړي.

ښاغلي ظفر، نننۍ ابتدایی آنلاین ناسته د دواړو هیوادونو د اتاقونو ترمنځ د اړیکو د ښه والي لپاره مهمه وبلله او ژمنه یې وکړه چې د افغانستان د اتاق ټول وړاندیزونه او ستونزې به له د ازبکستان د اتاق مشرتابه سره شریکوي، تر څو دواړه خواوې وکولای شي د ګډ اتاق جوړولو او نورو سوداګریزو موضوعاتو په اړه ګډ تصمیمونه ونیسي.

 

 

 

 

 

د افغانستان د سوداګرۍ او پانګونې اتاق عمومي رئیس ښاغلی توکل احمدیار، د ښاغلو: محمد یونس مهمند د اتاق لومړي مرستیال، خان جان الکوزي د مشرتابه پلاوي غړی او د افغان – پاکستان ګډ اتاق رئیس، احمد شکیب احمدیار د مشرتابه پلاوي غړی، میر زمان پوپل د عامل پلاوي مالي او اداري مرستیال سرپرست، او محمد انور عارفي د پالیسۍ او تخنیکي مرستیال؛ د حقوقي مشاور، مالي مفتش، د سوداګریزو شخړو د حل مرکز رئیس، د افغان – پاکستان ګډ اتاق اجرائیوي رئیس او د اتاق د ډیپارټمنټونو مسؤلینو په ګډون کې ناسته ترسره کړه او د کاري مسایلو، د خصوصي سکتور لپاره د خدماتو وړاندې کولو او شته ستونزو د حل په موخه بحث او نظرونه تبادله کړل.

ښاغلي احمدیار د سوداګرۍ او پانګونې اتاق د مشرتابه پلاوي او د عامل پلاوي د کارکوونکو د شپه او ورځو هڅو څخه مننه وکړه چې د هیواد د خصوصي سکتور غړو ته د غوره خدماتو وړاندې کولو او د سوداګرو د ستونزو ژر حل لپاره یې کوي.

نوموړي، د ګاونډیو، سیمې او نړۍ هیوادونو سره د سوداګرۍ پر پراختیا ټینګار وکړ. هغه د خصوصي سکتور او حکومت ترمنځ همغږي او همکاري د پانګونې جذب، سوداګرۍ، د صادراتو د زیاتوالي او د سوداګرو ستونزو د حل لپاره مهمه وبلله او د دغې همکارۍ دوام یې اړین وباله.

د اتاق عمومي رئیس، د سوداګرۍ او پانګونې اتاق د مشرتابه پلاوي او د عامل پلاوي د مسؤلینو ګډون د هېوادونو ترمنځ د سوداګریزو اړیکو په کنفرانسونو، ناستو او نړیوالو نندارتونونو کې ارزښتناک وباله، او د «څلورم ملي او نړیوال نندارتون د امام ابو حنیفه(رح)» د لا ښایسته ترسره کېدو او د کورنیو او نړیوالو شرکتونو د پراخ ګډون غوښتنه وکړه.

ښاغلي مهمند تیر هجري کال د خصوصي سکتور لپاره د لاسته راوړنو کال وباله، که څه هم ځینې ګاونډیو هېوادونو سره په سوداګرۍ او ترانزیټ کې ننګونې هم وې، خو هیله یې وښوده چې خصوصي سکتور وکولی شي د روان هجري کال په اوږدو کې له ستونزو څخه ځان وباسي او د هېواد اقتصادي وده وکړي.

د اتاق د عامل پلاوي د دیپارتمنتونو مسؤلینو هم ډاډ ورکړ چې د کارونو د ښه والي او د خصوصي سکتور لپاره د غوره خدماتو وړاندې کولو په موخه به خپلې هڅې نه دریغوي.

 

 

 

 

 

 

 

 

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د اتاق د مالي او اداري مرستیال سرپرست ښاغلي میر زمان پوپل، د پالیسي او تخنیکي چارو مرستیال ښاغلي محمد انور عارفي، او ملي سوداګر حاجي کبیر په ملتیا د «بای دهقان» کمپنۍ له رئیس ښاغلي ایرلیس او د هغه له مل پلاوي سره د اتاق په مرکزي دفتر کې ولیدل او د دواړو هیوادونو ترمنځ د سوداګریزو اړیکو د پراختیا په اړه یې بحث وکړ.

ښاغلي ایرلیس وویل چې د افغانستان ته یې د سفر هدف دا دی چې د ازبیکستان او قرغیزستان له لارې چین ته د افغانستان د صادراتي مالونو د ترانزیت لپاره اسانتیاوې برابرې کړي. هغه د اتاق له مشرتابه وغوښتل چې افغان سوداګر وهڅوي څو د یادو لارو له لارې له چین سره تجارت وکړي. نوموړي زیاته کړه، د دوی کمپنۍ د قرغیزستان او چین پر پوله یو ترمینل جوړ کړی چې پکې یخچالونه، ګدامونه او د تولیداتو د بسته بندۍ اسانتیاوې شتون لري، او دا ترمینل د افغانستان د صادراتي مالونو لپاره هم پرانیستی دی.

ښاغلي ایرلیس، د اتاق له مشرتابه یې وغوښتل چې د بای دهقان ترمینل ته سفر وکړي او افغان سوداګر وهڅوي چې خپل صادراتي توکي په یاد ترمینل کې زېرمه کړي.

ښاغلي مهمند د ښاغلي ایرلیس او د هغه د پلاوي راتګ ته د ښه راغلاست ترڅنګ، قرغیزستان یې د افغانستان دوست او د دیني او فرهنګي ارزښتونو شریک یاد کړ. هغه وویل چې اتاق د ګاونډیو او سیمه‌ییزو هیوادونو سره د ملي ګټو پر بنسټ د سوداګریزو اړیکو د پراخولو هڅې کوي. نوموړي د افغانستان، قرغیزستان او ازبیکستان ترمنځ د ګډ اتاق جوړېدل د ترانزیتي اسانتیاوو د رامنځته کولو او د سوداګریزو توکو د چټک لیږد لپاره مهم وبلل.

ښاغلي مهمند، د افغانستان او قرغیزستان د سوداګرۍ اتاقونو ترمنځ د همکارۍ د تفاهمنامې لاسلیک یو اړین ګام وباله او له ښاغلي ایرلیس څخه یې وغوښتل چې د افغانستان په بندري سیمو کې له افغان سوداګرو سره په ګډه پانګونه وکړي. نوموړي د واخان له لارې چین ته د افغانستان د صادراتو د لومړۍ محمولې په اړه معلومات ورکړل او افغانستان یې د سویلي او مرکزي آسیا ترمنځ د ترانزیت لنډه لاره وبلله.

د اتاق لومړي مرستیال، د ترکیې په وروستۍ نړیوالې غونډه کې چې د افغانستان د خصوصي سکتور د ملاتړ لپاره جوړه شوې وه، معلومات وړاندې کړل او د نړیوالو هیوادونو سره د افغانستان د اړیکو د پراختیا په برخه کې د خصوصي سکتور د همکارۍ ژمنه وکړه. هغه له ټولو ګاونډیو هیوادونو وغوښتل چې سیاست له سوداګرۍ څخه جلا کړي، تر څو خصوصي سکتور وکولای شي په امن ډول سوداګریز فعالیتونه ترسره کړي.

ښاغلي پوپل، له سیمې او نړۍ سره د افغانستان د سوداګرۍ د ستونزو په اړه خبرې وکړې او له ښاغلي ایرلیس څخه یې وغوښتل چې د قرغیزستان د ترانزیت ټولې ستونزې او ګټې له اتاق سره شریکې کړي.

ښاغلي عارفي، د افغانستان، قرغیزستان او ازبیکستان ترمنځ د ګډ اتاق رول د سوداګریزو اړیکو د پیاوړتیا لپاره مهم وباله او د داسې اتاق پر جوړېدو یې ټینګار وکړ.

 

 

 

 

 

د افغانستان د سوداګرۍ او پانګونې اتاق لومړي مرستیال ښاغلي محمد یونس مهمند، د عامل پلاوي د مالي او اداري مرستیال سرپرست ښاغلي میرزمان پوپل په شتون کې، له ملي سوداګر ښاغلي میرویس کټوازي او د پکتیکا ولایت له یو شمېر نورو سوداګرو سره د اتاق په مرکزي دفتر کې لیدنه وکړه او د «انګور اډې» د لاري ستونزو په اړه یې بحث او خبرې وکړې.

ښاغلي کټوازي، د پکتیکا ولایت د خصوصي سکتور عمده ستونزې د انګور اډې د لاري د بندېدو او د یاد ولایت له مستوفیت لخوا د ناعادلانه مالیاتي ارزونو په برخه کې یادې کړې، او له د سوداګرۍ او پانګونې اتاق له مشرتابه یې وغوښتل، چې د یادو ستونزو د حل په موخه له اړوندو حکومتي ادارو سره د همغږۍ له لارې ورسره همکاري وکړي.

ښاغلي مهمند، د دې ناستې ګډونوالو ته د ښه راغلاست ویلو ترڅنګ، پکتیکا یې له مهمو اقتصادي ولایتونو څخه یاد کړ چې له پاکستان سره ګډ ترانزیتي موقعیت لري. نوموړي د یاد ولایت د خصوصي سکتور رول د هیواد د پولي ثبات په ټینګښت کې ارزښتناک وباله. هغه د انګور اډې، غلام خان، او دند پتان د لارو له لارې د دواړو هیوادونو د سوداګرۍ پر وړاندې د خنډونو پېژندنه د ستونزو د حل او د تجارتي تبادلو د دوام لپاره مهمه وبلله او ډاډ یې ورکړ چې د انګور اډې د بندر د پرانیستو په برخه کې به د سوداګرۍ او پانګونې خونه هر اړخیزه همکاري کوي.

ښاغلي پوپل، د سوداګرۍ او پانګونې اتاق د هیواد د خصوصي سکتور مهم ملاتړی وباله او د پکتیکا له سوداګرو یې وغوښتل، چې هغه ستونزې چې د انګور اډې د لارې له امله د افغانستان او پاکستان ترمنځ د سوداګرۍ د کمښت لامل کېږي، په لیکلي ډول له اتاق سره شریکې کړي، ترڅو اتاق وکولای شي ژر تر ژره او په همغږۍ کې له اړوندو حکومتي ادارو سره د حل لپاره هڅې وکړي.