ښاغلي سید کریم هاشمي، د افغانستان د سوداګرۍ او پانګونې اتاق عمومي رئیس، د محترم تور داقون سیدیکوف، په افغانستان کې د قرغیزستان له سفیر سره، د اتاق د مشرتابه پلاوي په مرکزي دفتر کې لیدنه وکړه او د دواړو هېوادونو ترمنځ د سوداګریزو اړیکو د پراخوالي په اړه یې بحث او نظریات تبادله کړل.

ښاغلي سیدیکوف، ښاغلي هاشمي ته د افغانستان د سوداګرۍ او پانګونې اتاق د رئیس په توګه د ټاکل کېدو مبارکي ورکړه او زیاته یې کړه: هیله لرم چې ستاسو په راتګ سره به د دواړو هېوادونو ترمنځ سوداګریزې اړیکې لا پراخې شي. نوموړي د افغانستان د سوداګرۍ او پانګونې اتاق او د قرغیزستان د سوداګرۍ اتاق ترمنځ د یوه سوداګریز میکانیزم د رامنځته کولو باندې ټینګار وکړ، تر څو د دواړو هېوادونو د خصوصي سکتور ستونزو ته رسېدنه وشي، او له عمومي رئیس سره یې د هر اړخیزې همکارۍ ژمنه وکړه.

ښاغلي هاشمي، د قرغیزستان د سفیر حضور ته په اتاق کې ښه راغلاست وویلو، او د نوموړي لیدنه یې د دواړو هېوادونو ترمنځ د اقتصادي او سوداګریز ژوند په نوې پاڼه کې یو نیک ګام وباله. نوموړي ډاډ ورکړ چې د افغانستان او قرغیزستان ترمنځ به د سوداګرۍ کچه نوره هم لوړه شي.

ښاغلي هاشمي، د ټول هېواد امنیت یې د پانګونې لپاره یو مناسب بستر وباله، او زیاته یې کړه: که چیرې د قرغیزستان سوداګر چمتو وي چې له افغان سوداګرو سره په بېلابېلو برخو، په ځانګړي ډول د کانونو استخراج، د کرنې میکانیزه کول، او د انرژۍ تولید برخو کې ګډې پانګونې وکړي، نو اتاق د هر ډول همکارۍ لپاره تیار دی.

ښاغلي عارفي، د اتاق د عامل پلاوي د پالیسي مرستیال، د خصوصي سکتورونو ترمنځ د ګډو سوداګریزو ناستو او نندارتونونو پر جوړولو ټینګار وکړ او له قرغیزستان سفیر څخه یې وغوښتل چې د دا ډول پروګرامونو په ترسره کولو کې له اتاق سره همکاري وکړي.

 

 

 

 

 

د افغانستان د سوداګرۍ او پانګونې اتاق عمومي رئیس، ښاغلي سید کریم هاشمي، د څار پلاوي د غړي ښاغلي خالد احمدي په شتون کې، د موبل فرنیچر د اتحادیې له رئیس ښاغلي محمد نعيم رحیمي او ورسره پلاوي سره، د اتاق د مشرتابه پلاوي په مرکزي دفترکې لیدنه وکړه.

ښاغلي رحیمي، ښاغلي هاشمي ته د افغانستان د سوداګرۍ او پانګونې د اتاق د رئیس په توګه د ټاکل کېدو مبارکي وویله او د دې سکتور مهمې ستونزې یې یاده کړې. هغه د اتاق له عمومي رئیس څخه وغوښتل، چې د فابریکو د جوړولو لپاره د ځمکو د وېش په برخه کې له اړوندو حکومتي ادارو سره همغږي وکړي. نوموړي، د اتحادیې له لوري له رئیس سره د هر اړخیزې همکارۍ ژمنه وکړه.

ښاغلي هاشمي، ښاغلي رحیمي او ورسره ټیم ته ښه راغلاست ووایه او د تولیدي فابریکو جوړول یې د صادراتو د زیاتوالي، د کار زمینو د برابرولو او د هېواد د اقتصادي پرمختګ لپاره مهم وبلل. هغه ګډون کوونکي تاجران تشویق کړل چې په هېواد کې د موبل فرنیچر د لویې سهامي تولیدي فابریکې بنسټ کښېږدي. نوموړي، د هېواد له سوداګرو سره د ستونزو د حل په برخه کې د اتاق د بشپړې همکارۍ ډاډ ورکړ.

 

 

 

 

 

 

 

ښاغلی سید کریم هاشمي، د افغانستان د سوداګرۍ او پانګونې اتاق عمومي رئیس، له یو شمېر د کابل د تېلو ټانک لرونکو سوداګرو او له محترم جاوید واحدي، د AIB بانک د مشتریانو د برخې آمر، سره د اتاق د مشرتابه پلاوي په مرکزي دفتر کې لیدنه وکړه.

ټانک لرونکو او ښاغلي واحدي، ښاغلي هاشمي ته د اتاق د نوي رئیس په توګه د ټاکل کېدو مبارکي ورکړه او له هغه سره یې د پوره ملاتړ ژمنه وکړه.

ښاغلي هاشمي، د ټانکدارانو او ښاغلي واحدي ته ښه راغلاست وویلو، اتاق یې د ټولو سوداګرو ګډ کور او د خصوصي سکتور او حکومت ترمنځ د اړیکو پل وباله، او ډاډ یې ورکړ چې د سوداګرو د ستونزو د حل په برخه کې به د قانون په چوکاټ کې هر اړخیزه همکاري کوي.

 

 

 

 

 

 

د افغانستان د سوداګرۍ او پانګونې اتاق عمومي رئیس ښاغلي سید کریم هاشمي، د اتاق د مشرتابه پلاوي د غړي ښاغلي محمد گردېزي په شتون کې، د پکتيا د اتاق له رئیس، مشرتابه پلاوي او یو شمېر وتلو سوداګرو سره ولیدل.

د پکتيا د اتاق مشرتابه، ښاغلي هاشمي ته د افغانستان د سوداګرۍ او پانګونې اتاق د نوي رئیس په توګه د ټاکل کېدو مبارکي وویله او د پکتیا ولایت د خصوصي سکتور د فعالیتونو او جدي ستونزو په اړه خبرې وکړې. دوی ځانګړې یادونه وکړه چې د صنعتي پارک لپاره ځمکه نه‌ده وېشل شوې او د دند پټان بندر لپاره معیاري سړک نشته. دوی د اتاق له رئيس څخه وغوښتل چې د دغو ستونزو د حل لپاره له اړوندو حکومتي ادارو سره همغږي او جدي پاملرنه وکړي.

ښاغلي هاشمي د پکتيا د اتاق رئیس، مشرتابه پلاوي او د ولایت سوداګرو ته هرکلی وویلو، پکتيا یې د هېواد له مهمو اقتصادي او ترانزیتي ولایتونو څخه یاد کړ او د خصوصي سکتور اصلي ستونزې یې واورېدې. هغه د پکتيا د اتاق مشرتابه وغوښتل چې د خصوصي سکتور ټولې ستونزې راټولې کړي او د پکتيا اتاق له لارې یې په لیکلي ډول له مرکزي اتاق سره شريکې کړي، څو د حل لپاره یې هڅې وشي.

 

 

 

 

 

د افغانستان د سوداګرۍ او پانګونې اتاق لومړي مرستیال، ښاغلي محمد یونس مهمند او د یاد اتاق یو شمېر مشرتابه غړو له ښاغلي احمد نبي زاده، د صنایعو او کانونو د اتاق عمومي رئیس، سره وکتل او د متقابلو همکاریو په اړه یې بحث او نظرونه تبادله کړل.

ښاغلي مهمند، ښاغلي احمد نبي زاده ته د صنایعو او کانونو د اتاق د نوي رئیس په توګه د ټاکل کېدو مبارکي ورکړه او د دواړو اتاقونو تر منځ ګډ اتحاد او همکاري یې د صنعت ودې، د سوداګرۍ پراختیا، د صادراتو زیاتوالي او د کار زمینو برابرولو لپاره مهمه وبلله.

ښاغلي نبي زاده، د افغانستان د سوداګرۍ او پانګونې اتاق د مشرتابه پلاوي ته د صنایعو او کانونو په اتاق کې د ښه راغلاست وینا وکړه او له یاد اتاق سره یې د هېواد د خصوصي سکتور د ودې په برخه کې د دوامدارې همکارۍ ډاډ ورکړ.